ຫວຽດນາມ ແລະ ຍີ່ປຸ່ນ ຍູ້ແຮງການຮ່ວມມືດ້ານຮູບເງົາ | |
ນັກຮຽນຮູ້ຈີນ ຢືນຢັນຄວາມເຊື່ອໝັ້ນຂອງປະຊາຄົມສາກົນທີ່ມີຕໍ່ຫວຽດນາມໃນໜ້າທີ່ຮັບປະກັນສິດທິມະນຸດ |
ປີ 2011 ຂ້າພະເຈົ້າແມ່ນໜຶ່ງໃນບັນດາພະນັກງານໜຸ່ມທີ່ກໍາລັງດຳລົງຊີວິດ ແລະ ເຮັດວຽກຢູ່ສູນກາງແນວລາວສ້າງຊາດ ແຂວງຫຼວງພະບາງ ຖືກຄະນະຈັດຕັ້ງສູນກາງສົ່ງໄປຮຽນຢູ່ ສສ ຫວຽດນາມ (2011-2012). ຂ້າພະເຈົ້າໄດ້ເຂົ້າຮຽນກຽມພາສາຫວຽດນາມ ຢູ່ໂຮງຮຽນມິດຕະພາບ 80, ໂຮງຮຽນແຫ່ງຄວາມສາມັກຄີ, ການຮ່ວມມື, ມິດຕະພາບທີ່ເປັນມູນເຊື້ອຂອງສາມປະເທດອ້າຍນ້ອງຢູ່ແຫຼມອິນດູຈີນ. ໃນປີ 2012-2016, ຂ້າພະເຈົ້າໄດ້ສຶກສາຮໍ່າຮຽນຢູ່ສະຖາບັນໂຄສະນາ ແລະ ຂ່າວສານ (ຫວຽດນາມ) ສາຍການເມືອງວິທະຍາ. ພາຍຫຼັງນັ້ນໄລຍະໜຶ່ງ, ປີ 2018-2020 ຂ້າພະເຈົ້າສືບຕໍ່ໄດ້ໄປຮຽນຕໍ່ລະດັບປະລິນຍາໂທ ສາຍການເມືອງວິທະຍາ ຢູ່ສະຖາບັນການເມືອງແຫ່ງຊາດ (ຫວຽດນາມ) ທີ່ມີຊື່ເອີ້ນຂອງທ່ານປະທານ ໂຮ່ຈີມິນ.
ຮູບລຸງໂຮ່ |
ປີ 2022 ເປັນປີທີ່ໜ້າຈື່ຈຳ ເມື່ອຂ້າພະເຈົ້າໄດ້ຖືກສົ່ງໄປເປັນນັກຄົ້ນຄວ້າສາຍການເມືອງວິທະຍາ ຢູ່ສະຖາບັນການເມືອງແຫ່ງຊາດໂຮ່ຈິມິນ. ໃນໄລຍະເວລາດຳລົງຊີວິດ ແລະ ສຶກສາຮ່ຳຮຽນຢູ່ ຫວຽດນາມ, ຂ້າພະເຈົ້າໄດ້ຮັບການແບ່ງປັນ ແລະ ລະດົມກຳລັງໃຈຈາກບັນດານັກສຶກສາລາວ ແລະ ນັກສຶກສາຫວຽດນາມ… ໂດຍສະເພາະແມ່ນໃນພິທີຕ້ອນຮັບສົກຮຽນໃໝ່ 2015-2016 ທີ່ທຳນຽບປະທານປະເທດ ໂດຍສະຖານທູດລາວ ປະຈຳ ຫວຽດນາມ ຈັດຕັ້ງ, ຂ້າພະເຈົ້າແມ່ນໜຶ່ງໃນບັນດານັກສຶກສາລາວ ທີ່ຕາງໜ້າໃຫ້ນັກສຶກສາຕ່າງປະເທດ 100 ກວ່າຄົນຂອງສະຖາບັນໂຄສະນາ ແລະ ຂ່າວສານ ເຂົ້າຮ່ວມທີ່ພິທີນີ້.
ຢູ່ທີ່ນີ້ ພວກຂ້າພະເຈົ້າໄດ້ພົບປະກັບທ່ານນາງ ຫງວຽນທິຢວານ, ອະດີດຮອງປະທານປະເທດ ຫວຽດນາມ. ໄດ້ໂອ້ລົມສົນທະນາ ແລະ ແບ່ງປັນກ່ຽວກັບຊີວິດການເປັນຢູ່ຂອງຕົນໃນໄລຍະເວລາມາຮຽນຢູ່ຫວຽດນາມກັບ ທ່ານນາງ ຫງວຽນທິຢວານ, ທ່ານນາງໄດ້ລະດົມກຳລັງໃຈໃຫ້ນັກສຶກສາລາວພວກຂ້າພະເຈົ້າ ເມື່ອໃດກໍຕ້ອງມານະພະຍາຍາມຮ່ຳຮຽນ, ນຳຄວາມຮູ້ທີ່ໄດ້ຮ່ຳຮຽນກັບເມືອສ້າງສາປະເທດລາວໃຫ້ນັບມື້ນັບພັດທະນາ, ພວກຂ້າພະເຈົ້າຍາມໃດກໍຮູ້ສຶກດີໃຈຫຼາຍ. ໃນການໂອ້ລົມສົນທະນາ, ທ່ານນາງໄດ້ມອບຮູບພາບເຄິ່ງຄີງລຸງໂຮ່ໃຫ້ຂ້າພະເຈົ້າ ແລະ ແບ່ງປັນກັບຂ້າພະເຈົ້າ ກໍຄືນັກສຶກສາລາວ ກ່ຽວກັບຊີວິດ, ພາລະກິດ ແລະ ການອຸທິດສ່ວນຂອງປະທານ ໂຮ່ຈີມິນ ຕໍ່ປະເທດ ຫວຽດນາມ. ຂ້າພະເຈົ້າຮູ້ສຶກນັບຖື ແລະ ຮູ້ບຸນຄຸນຕໍ່ການນຳທ່ານນີ້, ເພາະວ່າເພິ່ນໄດ້ນຳຄວາມຜາສຸກມາໃຫ້ປະເທດຫວຽດນາມ ແລະ ໄດ້ເຊື່ອມຕໍ່ນ້ຳໃຈສາມັກຄີລະຫວ່າງສອງປະເທດ ຫວຽດນາມ - ລາວ ເປັນປະຊາຄົມມິດຕະພາບ ແລະ ໝັ້ນຄົງເຂັ້ມແຂງ. ຂ້າພະເຈົ້າຮູ້ສຶກດີໃຈທີ່ໄດ້ດຳລົງຊີວິດ ແລະ ສຶກສາຮ່ຳຮຽນຢູ່ຫວຽດນາມ ເຊິ່ງເປັນປະເທດທີ່ເຕັມໄປດ້ວຍຄວາມຮັກແພງແຂກຄົນນີ້.
ເມື່ອທ່ານນາງ ຫງວຽນທິຢວານ, ອະດີດຮອງປະທານປະເທດ ຫວຽດນາມ ໄດ້ມອບຂອງຂ ວັນ ເຊິ່ງແມ່ນຮູບປະທານ ໂຮ່ຈີມິນ, ຂ້າພະເຈົ້າຍາມໃດກໍຖະນຸຖະໜອມ ແລະ ວາງໄວ້ຢູ່ເທິງໂຕະເຮັດວຽກ ເພື່ອເປັນກຳລັງໃຈໃຫ້ຂ້າພະເຈົ້າມານະພະຍາຍາມຮ່ຳຮຽນ ເພື່ອບັນລຸໄດ້ບັນດາຜົນການຮຽນທີ່ດີ, ນຳຄວາມຮູ້ຂອງຕົນກັບເມືອເພື່ອນຳໃຊ້ເຂົ້າໃນວຽກງານ, ສ້າງສາແຂວງຫຼວງພະບາງ ເວົ້າສະເພາະ ແລະ ປະເທດລາວ ເວົ້າລວມ ໃຫ້ນັບມື້ນັບສວຍງາມ ແລະ ພັດທະນາ... ພາຍຫຼັງກັບເມືອປະເທດ, ຂ້າພະເຈົ້າໄດ້ເອົາຮູບດັ່ງກ່າວ ແລະ ຮູບຂອງປະທານປະເທດລາວ - ທ່ານ ໄກສອນ ພົມວິຫານ ຕັ້ງໄວ້ຢູ່ບ່ອນສູງສຸດ, ເພື່ອເຫັນແລ້ວ ຂ້າພະເຈົ້າກໍມີກໍາລັງໃຈມານະພະຍາຍາມສູ້ຊົນໃນວຽກງານ ແລະ ຊີວິດຕື່ມອີກ. ສໍາລັບຂ້າພະເຈົ້າແລ້ວ, ຮູບຖ່າຍປະທານ ໂຮ່ຈິມິນ ແມ່ນຂອງທີ່ລະນຶກອັນລ້ຳຄ່າທີ່ສຸດ, ຂອງຂວັນທີ່ຮັກແພງທີ່ສຸດໃນເວລາທີ່ຂ້າພະເຈົ້າຮໍ່າຮຽນຢູ່ຫວຽດນາມ ແລະ ກັບເມືອປະເທດ. ໃນສະພາບການໃດກໍຕາມ, ເວລາຮູ້ສຶກໂສກເສົ້າ ຫຼື ມີຄວາມສຸກ, ຂ້າພະເຈົ້າຍາມໃດກໍຖືວ່າມັນເປັນກໍາລັງໃຈຂອງຕົນເພື່ອຈະພະຍາຍາມສູ້ຊົນໃນຊີວິດ. ຍ້ອນແນວນັ້ນ ນີ້ກໍເປັນການຕັກເຕືອນໃຫ້ລູກຫລານຕ້ອງຈື່ຈຳບັນດາສິ່ງທີ່ປະຊາຊົນຫວຽດນາມ ມອບໃຫ້ປະຊາຊົນປະເທດລາວ. ແລະນັ້ນກໍແມ່ນນໍ້າໃຈອັນພິເສດຂ້າພະເຈົ້າ ແລະ ປະຊາຊົນ ຫວຽດນາມ ທີ່ມີຕໍ່ຜູ້ເປັນພໍ່ຂອງຊາດ, ປະທານ ໂຮ່ຈີມິນ.
ທ່ານນາງ ຫງວຽນທິຢວານ ມອບຂອງຂວັນໃຫ້ແກ່ນັກສຶກສາລາວ |
ຖ້າຫາກຂ້າພະເຈົ້າສາມາດຫວນຄືນໄປເວລາທີ່ທ່ານນາງ ຫງວຽນທິຢວານ ມອບຮູບຖ່າຍປະທານ ໂຮ່ຈີມິນ, ຂ້າພະເຈົ້າ ອາດຈະແບ່ງປັນກ່ຽວກັບຄວາມຮູ້ສຶກຂອງຕົນເມື່ອໄດ້ມາຫວຽດນາມດຳລົງຊີວິດ ແລະ ຮ່ຳຮຽນຫຼາຍກວ່ານີ້ອີກ. ຂ້າພະເຈົ້າຮູ້ສຶກດີໃຈທີ່ໄດ້ຕາງໜ້າໃຫ້ບັນດານັກສຶກສາລາວ ມາສະແດງຄວາມຮູ້ສຶກ ແລະ ຄວາມຄິດເຫັນຂອງຕົນທີ່ມີຕໍ່ປະເທດຫວຽດນາມທີ່ສວຍງາມ, ຊາວຫວຽດນາມທີ່ມີນ້ຳໃຈມິດຕະພາບ…. ພິເສດແມ່ນຄວາມເຄົາລົບຮັກຕໍ່ປະທານ ໂຮ່ຈີມິນ ທີ່ເຄົາລົບນັບຖື ແລະ ຮັກແພງ… ນັ້ນແມ່ນຫຼັກຖານແຫ່ງຄວາມຮັກແພງອັນພິເສດຂອງບັນດານັກສຶກສາລາວຄືຂ້າພະເຈົ້າ ມີຕໍ່ປະທານ ໂຮ່ຈີມິນ, ຜູ້ເປັນພໍ່ທີ່ຮັກແພງ ແລະ ປະເທດຫວຽດນາມທີ່ເປັນມິດ, ຮັກຫອມສັນຕິພາບ. ຂ້າພະເຈົ້າຈະມອບຂອງຂວັນອັນພິເສດໃຫ້ທ່ານນາງ ຫງວຽນທິຢວານ, ນັ້ນແມ່ນຮູບຂອງທ່ານ ໄກສອນ ພົມວິຫານ - ປະທານປະເທດ ສປປລາວ. ນັ້ນກໍແມ່ນເພື່ອສະແດງຄວາມຮັກແພງແຂກຄົນ, ຄວາມປິຕິຍິນດີທີ່ໄດ້ພົບປະທ່ານນາງອີກເທື່ອໜຶ່ງ ແລະ ຫວັງວ່າທ່ານນາງຈະມີຄວາມຮູ້ສຶກທີ່ພິເສດຕໍ່ປະເທດລາວທີ່ສວຍງາມ ຄືດັ່ງບັນດາບົດກະວີຂອງການນຳສອງປະເທດທີ່ສະແດງໃຫ້ເຫັນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມ “ຮັກຫອມກັນໝາຍໝັ້ນ ຫລາຍສັນພູກໍ່ປີນໄຕ່, ຫລາຍນໍ້າໃຫຍ່ ແລະ ໂຄກຄ້ອຍ ຂວາງຂັ້ນກໍ່ດຸ່ງໄປ. ສອງຊາດ ລາວ - ຫວຽດ ໄດ້ຝັງຄວາມຮັກຢູ່ໃນໃຈ, ຮົ່ງຮ່າທັງແມ່ຂອງ ບໍ່ເລິກປຸນປານໄດ້”... “ແມ່ນໍ້າອາດຈະບົກແຫ້ງ, ພູເຂົາອາດຈະເຈື່ອນ... ແຕ່ການພົວພັນມິດຕະພາບລະຫວ່າງ ລາວ-ຫວຽດນາມ ຈະຍືນຍົງຕະຫຼອດໄປ...”
ສະເດັດເຈົ້າ ສຸພານຸວົງ ເຄີຍກ່າວໄວ້ວ່າ: “ສາຍພົວພັນມິດຕະພາບລະຫວ່າງປະຊາຊົນ ລາວ-ຫວຽດນາມ ຍິ່ງໃຫຍ່ທີ່ສຸດ,ເຊິ່ງບໍ່ມີບົດເພງ, ບົດກະວີໃດສາມາດຍ້ອງຍໍສັນລະເສີນໝົດໄດ້. ນ້ຳໃຈສາມັກຄີ ລາວ-ຫວຽດນາມ ສູງກວ່າພູຜາໃດໆ, ຍາວກວ່າແມ່ນໍ້າທຸກສາຍ, ກວ້າງໃຫຍ່ກວ່າມະຫາສະໝຸດ, ສວຍງາມກວ່າດວງເດືອນໃນວັນເພັງ, ຫອມກວ່າດອກໄມ້ທີ່ຫອມທີ່ສຸດ. ນໍ້າໃຈມິດຕະພາບອັນດີງາມນັ້ນ, ໄດ້ຮັບການເພີ່ມພູນຄູນສ້າງດ້ວຍຈິດໃຈອັນບໍລິສຸດ, ບໍ່ມີສັດຕູໂຕໃດໆສາມາດທຳລາຍໄດ້…”
ເຊິ່ງເປັນຜູ້ທີ່ເຄີຍໄດ້ດຳລົງຊີວິດ ແລະ ສຶກສາຮ່ຳຮຽນຢູ່ປະເທດຫວຽດນາມ ເປັນເວລາຍາວນານສົມຄວນ, ສະນັ້ນ ຂ້າພະເຈົ້າສາມາດເວົ້າ ແລະ ຮ້ອງເປັນເພງຫວຽດນາມ ໄດ້ຢ່າງຊໍານິຊໍານານ. ພິເສດ, ໃນການພົບປະແລກປ່ຽນຢູ່ໂຮງຮຽນ ແລະ ເມື່ອມີຄະນະຫວຽດນາມ ມາຢ້ຽມຢາມຢູ່ ລາວ, ຂ້າພະເຈົ້າກໍສາມາດຕາງໜ້າພະນັກງານຢູ່ຫ້ອງການ ໄປແລກປ່ຽນກັບຄະນະເປັນພາສາຫວຽດນາມ. ສິ່ງທີ່ໜ້າຈັບໃຈນັ້ນແມ່ນຄືຂ້າພະເຈົ້າສາມາດຈື່ຈຳ ແລະ ຮ້ອງເພງ “ຮ່າໂນ້ຍ-ວຽງຈັນ”, ແຕ່ງໂດຍ ບຸນປະສົງ ສາຍເຊກະໝານ, ເນື້ອເພງເປັນພາສາຫວຽດ ບຸນປະສົງ ສາຍເຊກະໝານ, ມິງ ກວາງ. ບົດເພງມ່ວນ ແລະ ມີຄວາມໝາຍຫຼາຍ.
ຖ້າໄດ້ກັບມາປະເທດ ຫວຽດນາມ ອີກເທື່ອຫນຶ່ງ, ຂ້າພະເຈົ້າຫວັງວ່າຈະໄດ້ພົບກັບໝູ່ເພື່ອນຄົນ ຫວຽດນາມ ຂອງຕົນອີກ ເພື່ອສາມາດໄປຍັງບັນດາສະຖານທີ່ທີ່ຍັງບໍ່ທັນເຄີຍໄປກັບເຂົາເຈົ້າ ເພື່ອໄປທ່ຽວຊົມ ແລະ ຊອກຮູ້ກ່ຽວກັບວັດທະນະທຳ ແລະ ປະຊາຊົນ ຫວຽດນາມ ໃຫ້ຫຼາຍກວ່າອີກ. ໃນຖານະເປັນພະນັກງານຂອງສູນກາງແນວລາວສ້າງຊາດ, ຂ້າພະເຈົ້າປາດຖະໜາວ່າ ສອງພັກ, ສອງປະເທດ ຈະສືບຕໍ່ເສີມຂະຫຍາຍການພົວພັນມິດຕະພາບຫວຽດນາມ - ລາວ, ເພື່ອໃຫ້ປະຊາຊົນລາວຄືພວກຂ້າພະເຈົ້າ ແລະ ເພື່ອນຫວຽດນາມ ມີໂອກາດໄດ້ແລກປ່ຽນ ແລະ ຮຽນຮູ້ເຊິ່ງກັນ ແລະ ກັນ ໃນໜ້າທີ່ການງານ ແລະ ຊີວິດໃຫ້ຫຼາຍກວ່າອີກ.
ຫອມມາລາ