| ລາວ ປັບເພີ່ມອັດຕາພາສີ VAT 10% ຄືນ | |
| ເທື່ອທຽນເຫວ້ - ສາລະວັນ ເພີ່ມທະວີການປະສານງານໃນວຽກງານຍຸຕິທຳ |
ຕອນບ່າຍວັນທີ 23 ເມສານີ້, ຢູ່ນະຄອນ ດົ່ງເຮີຍ, ກວາງບິ່ງ, ຄະນະຜູ້ແທນຂັ້ນສູງຂອງສອງແຂວງ ກວາງບິ່ງ ແລະ ສາລະວັນ ໄດ້ດຳເນີນການພົບປະເຈລະຈາ ແລະ ລົງນາມໃນບົດບັນທຶກຊ່ວຍຈຳການຮ່ວມມື.
ທີ່ການພົບປະເຈລະຈາ, ຫົວໜ້າຄະນະຂອງສອງແຂວງ ໄດ້ແຈ້ງໃຫ້ກັນຊາບກ່ຽວກັບສະພາບການເສດຖະກິດ - ສັງຄົມ, ການປ້ອງກັນຊາດ - ປ້ອງກັນຄວາມສະຫງົບ, ວຽກງານກໍ່ສ້າງພັກ, ອຳນາດການປົກຄອງຂອງແຕ່ລະແຂວງ; ພ້ອມກັນນັ້ນ ກໍ່ສະເໜີບາງເນື້ອໃນການຮ່ວມມືລະຫວ່າງ 2 ທ້ອງຖິ່ນ.
 |
| ສະຫາຍ ເລຂາຄະນະພັກແຂວງ ກວາງບິ່ງ ຫວູດ້າຍຖັງ (ຂວາ) ມອບຂອງຂວັນໃຫ້ ສະຫາຍ ເລຂາພັກ, ເຈົ້າແຂວງສາລະວັນ (ພາບ: ໜັງສືພິມ Nhan Dan). |
ສະຫາຍ ເລຂາຄະນະພັກແຂວງ ກວາງບິ່ງ ຫວູດ້າຍຖັງ ໄດ້ແບ່ງປັນຕື່ມກ່ຽວກັບບັນດາຂໍ້ມູນເສດຖະກິດ - ສັງຄົມ, ການປ້ອງກັນຊາດ - ປ້ອງກັນຄວາມສະຫງົບຂອງແຂວງ ກວາງບິ່ງ ແລະ ຕີລາຄາກ່ຽວກັບສາຍພົວພັນລະຫວ່າງແຂວງ ກວາງບິ່ງ ກັບບັນດາແຂວງຂອງລາວ.
ຕາມນັ້ນແລ້ວ, ນອກຈາກການພົວພັນທີ່ເປັນມູນເຊື້ອອັນຍາວນານກັບບັນດາແຂວງຕິດກັບຊາຍແດນຄື ແຂວງ ຄຳມ່ວນ, ສະຫວັນນະເຂດ, ກວາງບິ່ງ ກໍ່ໄດ້ເປີດກ້ວາງການພົວພັນຮ່ວມມືກັບບັນດາແຂວງ ຈຳປາສັກ, ໄຊສົມບູນ, ບໍລິຄຳໄຊ...
ສ່ວນແຂວງ ສາລະວັນ, ເຖິງວ່າບໍ່ມີຊາຍແດນຕິດຈອດກັນກໍ່ຕາມ, ແຕ່ສອງແຂວງກໍ່ມີຄວາມຄ້າຍຄືກັນ ແລະ ສາຍພົວພັນຕິດພັນກັບການເຄື່ອນໄຫວຫຼາຍຢ່າງ. ປີ 2022, ຕາມຄຳເຊີນຂອງການນຳແຂວງ ສາລະວັນ, ຄະນະຜູ້ແທນແຂວງ ກວາງບິ່ງ ໂດຍທ່ານ ເຈີ່ນຖັງ, ປະທານຄະນະກຳມະການປະຊາຊົນແຂວງ ເປັນຫົວໜ້າຄະນະໄປຢ້ຽມຢາມ, ເຮັດວຽກຢູ່ແຂວງ ສາລະວັນ.
ໃນເດືອນ ມິຖຸນາ 2023, ແຂວງ ສາລະວັນ ກໍ່ໄດ້ຈັດຕັ້ງຄະນະໂດຍທ່ານຮອງເຈົ້າແຂວງນຳໜ້າ ມາຢ້ຽມຢາມ, ເຮັດວຽກຢູ່ແຂວງ ກວາງບິ່ງ. ນັບແຕ່ປີ 2022 ມາຮອດປະຈຸບັນ, ແຕ່ລະປີ ແຂວງ ກວາງບິ່ງ ກໍ່ໄດ້ໜູນຊ່ວຍການບຳລຸງສ້າງພາສາ ຫວຽດນາມ ໃຫ້ແກ່ພະນັກງານ 2 ທ່ານ ແລະ ບຳລຸງສ້າງວິຊາສະເພາະໃຫ້ນັກສຶກສາ 5 ຄົນ ຢູ່ບັນດາຮາກຖານບຳລຸງສ້າງຂອງແຂວງ ກວາງບິ່ງ.
ບົນຈິດໃຈສາຍພົວພັນມິດຕະພາບອັນຍິ່ງໃຫຍ່ລະຫວ່າງສອງພັກ, ສອງລັດ ແລະ ປະຊາຊົນ ຫວຽດນາມ - ລາວ, ນອກຈາກ ເນື້ອໃນຍູ້ແຮງການເຜີຍແຜ່, ສຶກສາພະນັກງານ, ປະຊາຊົນ, ພິເສດແມ່ນລຸ້ນໜຸ່ມ, ຊາວໜຸ່ມກ່ຽວກັບສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດລະຫວ່າງ ຫວຽດນາມ ແລະ ລາວ ແລ້ວ, ຄະນະຜູ້ແທນຂັ້ນສູງສອງແຂວງ ກວາງບິ່ງ ແລະ ແຂວງ ສາລະວັນ ກໍ່ໄດ້ປຶກສາຫາລື ແລະ ເຫັນດີເປັນເອກະພາບລົງນາມໃນບົດບັນທຶກການພົບປະເຈລະຈາໂດຍມີເນື້ອໃນຄື:
ແຕ່ລະປີ, ແຂວງ ກວາງບິ່ງ ຈະໜູນຊ່ວຍແຂວງ ສາລະວັນ ໃນການບຳລຸງສ້າງພະນັກງານ ແລະ ນັກສຶກສາລົງເລິກຂະແໜງຮຽນພາສາ ຫວຽດນາມ 10 ຄົນຢູ່ບັນດາຮາກຖານບຳລຸງສ້າງຂອງແຂວງ.
ແຂວງ ສາລະວັນ ຈະໜູນຊ່ວຍແຂວງ ກວາງບິ່ງ ໃນການບຳລຸງສ້າງພະນັກງານ/ນັກສຶກສາ ຄົນໜຶ່ງຮຽນລະດັບປະລິນຍາຕີຢູ່ມະຫາວິທະຍາໄລແຫ່ງຊາດລາວ.
ສອງແຂວງ ໄດ້ຊຸກຍູ້ການຮ່ວມມືດ້ານການຄ້າ, ການທ່ອງທ່ຽວ... ຢ່າງຕັ້ງໜ້າ; ສົ່ງເສີມ ແລະ ສ້າງເງື່ອນໄຂໃຫ້ບັນດາວິສາຫະກິດລົງທຶນທຳການຜະລິດ, ດຳເນີນທຸລະກິດໃນບັນດາຂົງເຂດທີ່ເໝາະສົມກັບກຳລັງບົ່ມຊ້ອນ, ທ່າແຮງຂອງແຕ່ລະແຂວງ.
ໃນໄລຍະຈະມາເຖິງ, ສອງແຂວງ ຈະສືບຕໍ່ຍູ້ແຮງການເຜີຍແຜ່, ສຶກສາພະນັກງານ, ປະຊາຊົນ, ພິເສດແມ່ນລຸ້ນໜຸ່ມ, ຊາວໜຸ່ມກ່ຽວກັບສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດລະຫວ່າງ ຫວຽດນາມ ແລະ ລາວ. ສອງແຂວງ ໄດ້ສົ່ງໂທລະເລກຊົມເຊີຍ, ຢ້ຽມຢາມເຊິ່ງກັນ ແລະ ກັນໃນບັນດາວັນບຸນ, ເຕັດ ແລະ ວັນສະເຫຼີມສະຫຼອງຂອງ 2 ປະເທດ; ຊ່ວຍເຫຼືອເຊິ່ງກັນ ແລະ ກັນ ເມື່ອເກີດໄພພິບັດທຳມະຊາດ, ພະຍາດລະບາດ.
ມິງດຶກ
