| ເອກອັກຄະລັດຖະທູດລາວ ແລະ ຈີນ ໄດ້ສະແດງຄວາມຊົມເຊີຍຕໍ່ການໄຊຊະນະດ້ຽນບຽນຝູ | |
| ນັກຮຽນຮູ້ໄທ ໄດ້ຕີລາຄາບັນດາປັດໄຈທີ່ເຮັດໃຫ້ການໄຊຊະນະດ້ຽນບຽນຝູ |
ໃນວັນທີ 2 ພຶດສະພາ, ບັນດາໜັງສືພິມໃຫຍ່ຂອງ ອາກຊັງຕິນ ໄດ້ລົງພິມບົດຂຽນກ່ຽວກັບໄຊຊະນະ ດ້ຽນບຽນຝູ ຂອງ ຫວຽດນາມ, ຢັ້ງຢືນວ່າ ໄຊຊະນະດ້ຽນບຽນຝູ ບໍ່ພຽງແຕ່ສົ່ງຜົນສະທ້ອນເຖິງປະຫວັດສາດຂອງຫວຽດນາມ ເທົ່ານັ້ນ, ຫາກຍັງປ່ຽນແປງສະພາບການໂລກ, ພ້ອມກັນນັ້ນກໍ່ຖືວ່າ ໄຊຊະນະດ້ຽນບຽນຝູ ເລີ່ມຈາກກຳລັງຄວາມສາມັກຄີອັນຍິ່ງໃຫຍ່ຂອງປະຊາຊົນພາຍໃຕ້ການນຳພາຂອງພັກ ແລະ ປະທານໂຮ່ຈິມິນ.
ເວັບໄຊ ABC Mundial ໄດ້ລົງພິມບົດຄວາມເນັ້ນໜັກວ່າ ໄຊຊະນະ ດ້ຽນບຽນຝູ ບໍ່ພຽງແຕ່ແມ່ນຂີດໝາຍຈຸດສິ້ນສຸດຂອງລັດທິລ່າເມືອງຂຶ້ນຝະລັ່ງ ຢູ່ ຫວຽດນາມ ເທົ່ານັ້ນ, ຫາກຍັງໄດ້ສ້າງຂີດໝາຍທີ່ບໍ່ອາດຫຼົງລືມໄດ້ໃນປະຫວັດສາດຂອງມວນມະນຸດ.
ຕາມ ABC Mundial ແລ້ວ, ເມື່ອ 70 ປີກ່ອນ, ແຕ່ວັນທີ 13 ມີນາ – 7 ພຶດສະພາ 1954, ທະຫານ ແລະ ປະຊາຊົນຫວຽດນາມ ພາຍໃຕ້ການນຳພາຂອງພັກກອມມູນິດຫວຽດນາມ ໂດຍທ່ານປະທານ ໂຮ່ຈີມິນ ນຳໜ້າ ໄດ້ດຳເນີນບັ້ນຮົບຍຸດທະສາດ ດ້ຽນບຽນຝູ ໄດ້ຮັບໄຊຊະນະຢ່າງສະຫງ່າລາສີ, ໄດ້ເປັນການຫັນປ່ຽນອັນໃຫຍ່ຫຼວງໃນປະຫວັດສາດແຫ່ງການຕໍ່ສູ້ສ້າງສາ ແລະ ປົກປັກຮັກສາປະເທດຊາດຂອງປະຊາຊົນຫວຽດນາມ.
 |
ນັກຂຽນບົດໄດ້ຢືນຢັນວ່າ ໄຊຊະນະດ້ຽນບຽນຝູ ແມ່ນສັນຍາລັກແຫ່ງການຕໍ່ສູ້ຢ່າງຮອບດ້ານຂອງປະຊາຊົນຫວຽດນາມ.
ຈາກການຕໍ່ຕ້ານໃນສະໜາມຮົບຈົນເຖິງການຕໍ່ສູ້ທາງດ້ານການເມືອງ, ເສດຖະກິດ, ການທູດ, ທຸກຂະແໜງການຂອງສັງຄົມຫວຽດນາມ ໄດ້ພ້ອມກັນຕໍ່ສູ້ຂັບໄລ່ສັດຕູຜູ້ຮຸກຮານ.
ພ້ອມກັນນັ້ນ, ReporteAsia ກໍ່ໄດ້ເນັ້ນໜັກເຖິງບົດບາດນຳພາຂອງພັກກອມມູນິດຫວຽດນາມ ແລະ ປະທານ ໂຮ່ຈີມິນ ໃນພາລະກິດແຫ່ງການຕໍ່ສູ້ທົ່ວປວງຊົນ, ເຕົ້າໂຮມກຸ່ມກ້ອນມະຫາສາມັກຄີທົ່ວປວງຊົນທັງຊາດ, ເສີມຂະຫຍາຍນ້ຳໃຈຮັກຊາດສູງສຸດເພື່ອຍາດເອົາໄຊຊະນະດ້ຽນບຽນຝູ.
ໜັງສືພິມດັ່ງກ່າວໃຫ້ຮູ້ວ່າ: 70 ປີຜ່ານມາ, ພາຍຫຼັງ 56 ວັນ ແລະ ຄືນແຫ່ງການຕໍ່ສູ້ຢ່າງອົງອາດກ້າຫານ, ມີກົນໄກ, ສ້າງສັນ, ກອງທັບ ແລະ ປະຊາຊົນ ຫວຽດນາມ ໄດ້ທຳລາຍກຸ່ມຖານທີ່ໝັ້ນ ດ້ຽນບຽນຝູ ທັງໝົດ, ທຳລາຍມ້າງ ແລະ ຈັບຕົວທະຫານຝະລັ່ງ ຢູ່ທີ່ນີ້; ໄດ້ຍິງເຮືອບິນ, ພາຫະນະ ແລະ ອາວຸດຍຸດໂທປະກອນທັງໝົດ, ສາງເກັບເຄື່ອງ, ອຸປະກອນການທະຫານຂອງກອງທັບຝລັ່ງ.
ນອກຈາກນ້ຳໃຈມະຫາສາມັກຄີ ແລະ ການປະກອບສ່ວນອັນຍິ່ງໃຫຍ່ຂອງກຳລັງມະນຸດ ແລະ ດ້ານວັດຖຸເຂົ້າໃນຂະບວນການ ດ້ຽນບຽນຝູ, ຄວາມກ້າຫານ ແລະ ສະຕິປັນຍາຂອງຫວຽດນາມ ຍັງໄດ້ສະແດງໃຫ້ເຫັນເຖິງນ້ຳໃຈແຫ່ງຄວາມຕັດສິນໃຈຕໍ່ສູ້ ແລະ ຄວາມຕັດສິນໃຈຍາດເອົາໄຊຊະນະຂອງທົ່ວປວງຊົນທັງຊາດ.
ພາຍໃຕ້ການນຳພາ ແລະ ການຈັດຕັ້ງຂອງພັກກອມມູນິດ ຫວຽດນາມ ໂດຍປະທານ ໂຮ່ຈີມິນ ນຳພາ, ແຫຼ່ງກຳເນີດແຫ່ງກຳລັງແຮງທາງດ້ານຈິດໃຈຂອງຊາວ ຫວຽດນາມ ໄດ້ຮັບການປຸກລະດົມ ແລະ ຫັນເປັນກຳລັງວັດຖຸເພື່ອຍາດເອົາໄຊຊະນະ.
ໜັງສືພິມ Ámbito Internacional ໄດ້ມີບົດຂຽນຢືນຢັນວ່າ ໄຊຊະນະດ້ຽນບຽນຝູ ແມ່ນຂີດໝາຍການປາບປາມລັດທິອານານິຄົມທີ່ໂຫດຮ້າຍ ແລະ ໃຫ້ຄຳເຫັນວ່າ ເກືອບ 70 ປີໄດ້ຜ່ານໄປ, ແຕ່ຄວາມໝາຍອັນໃຫຍ່ຫຼວງ ແລະ ຄວາມໝາຍປະຫວັດສາດຂອງໄຊຊະນະດ້ຽນບຽນຝູ ຍັງຄົງຮັກສາຄຸນຄ່າອັນດີງາມນີ້.
ໄຊຊະນະ ດ້ຽນບຽນຝູ ໄດ້ປະກອບສ່ວນອັນໃຫຍ່ຫຼວງໃຫ້ແກ່ຄວາມກ້າວໜ້າຂອງມວນມະນຸດ, ພ້ອມດຽວກັນນັ້ນ ກໍ່ໄດ້ພິສູດໃຫ້ເຫັນຄວາມຈິງວ່າ, ຊົນຊາດທີ່ຖືກກົດຂີ່ຂົ່ມເຫັງ ແລະ ຮຸກຮານ, ຖ້າມີເຈດຈຳນົງ ແລະ ແນວທາງທີ່ຖືກຕ້ອງ ແລະ ມີຫົວຄິດປະດິດສ້າງ, ມີຄວາມສາມັກຄີ, ຕໍ່ສູ້ເພື່ອເອກະລາດ ແລະ ເສລີພາບ, ຊາດນັ້ນກໍ່ຈະໄດ້ຮັບໄຊຊະນະຢ່າງແນ່ນອນ./.
ຄຳຮຸ່ງ
