ຢັ້ງຢືນຄຸນຄ່າຄຸນທາດທະຫານລຸງໂຮ່ ກັບເພື່ອນມິດສາກົນ

	ຢັ້ງຢືນເຄື່ອງໝາຍ Festival ເຫວ້
	ນັກອອກແບບ ຫວຽດນາມ ດ້ວຍການໂຄສະນາຊຸດເສື້ອຍາວຂອງ ຫວຽດນາມ ກັບເພື່ອນມິດສາກົນ

ພະນັກງານ, ແພດໝໍໂຮງໝໍສະໜາມ 2.4 ອອກເດີນທາງຂຶ້ນເຮືອບິນໄປປະຕິບັດໜ້າທີ່ຢູ່ຄະນະປະຕິບັດງານຮັກສາສັນຕິພາບສະຫະປະຊາຊາດ ຢູ່ຊູດັງໃຕ້ (UNMISS). ພາບ: ວັນຮ໊ຽວ.

“ຂອບໃຈພວກເພື່ອນທີ່ໄດ້ມາທີ່ນີ້!”, “ພວກເພື່ອນຈົ່ງໃຫ້ຄຳໝັ້ນສັນຍາວ່າຈະກັບຄືນບ່ອນນີ້ເດີ”... ນັ້ນແມ່ນຄໍາເວົ້າທີ່ເຕັມໄປດ້ວຍນ້ໍາໃຈ ເຊິ່ງເພື່ອນຮ່ວມອາຊີບສາກົນຢູ່ຄະນະປະຕິບັດງານຊູດັງໃຕ້ ແລະປະຊາຊົນທ້ອງຖິ່ນສະຫງວນໃຫ້ບັນດາແພດໝໍໃສ່ໝວກເບເລສີຟ້າຫວຽດນາມ, ບັນດາຜູ້ທີ່ເຂົາເຈົ້າຖືວ່າເປັນ “ບ່ອນອີງທາງດ້ານຈິດໃຈ” ເຊິ່ງມີຄວາມສໍາຄັນຢູ່ເຂດດິນທຸກຍາກ ແລະມີການປະທະກັນ.

ບັນດາໜ່ວຍຂອງໂຮງໝໍສະໜາມ ຂັ້ນ 2 ຂອງຫວຽດນາມ ບໍ່ພຽງແຕ່ຮັກສາສຸຂະພາບ ແລະປິ່ນປົວພະຍາດດ້ວຍຄຸນນະພາບສູງໃຫ້ຖັນແຖວພາລະກອນສະຫະປະຊາຊາດ ແລະປະຊາຊົນທ້ອງຖິ່ນເທົ່ານັ້ນ ຫາກຍັງຕັ້ງໜ້າປະຕິບັດບັນດາການເຄື່ອນໄຫວແລກປ່ຽນວິຊາສະເພາະ, ຝຶກແອບທັກສະດ້ານການແພດ, ແບ່ງປັນບົດຮຽນ, ໜູນຊ່ວຍໃຫ້ບັນດາໂຮງໝໍທ້ອງຖິ່ນ ແລະບັນດາໂຮງໝໍຢູ່ບໍລິເວນ.

ພິເສດ, ໂຮງໝໍສະໜາມ 2.3 ຂອງຫວຽດນາມ ໄດ້ໝູນໃຊ້ຫຼາຍເຕັກນິກໃໝ່ເຂົ້າໃນການບົ່ງມະຕິພະຍາດ ແລະປິ່ນປົວຄົນເຈັບ ໃຫ້ເໝາະສົມກັບເງື່ອນໄຂກາງສະໜາມ, ມີບັນດາເຕັກນິກທີ່ໄດ້ປະຕິບັດເປັນຄັ້ງທຳອິດຢູ່ຊູດັງໃຕ້ ເຊິ່ງບັນດາການນຳດ້ານການແພດຂອງຄະນະປະຕິບັດງານຕີລາຄາສູງ. ໂຮງໝໍສະໜາມ 2.2 ແລະໂຮງໝໍສະໜາມ 2.3 ຂອງຫວຽດນາມ ໄດ້ປະຕິບັດບົດບາດແມ່ນກົມກອງດ່ານໜ້າໃນການປ້ອງກັນ ແລະຕ້ານພະຍາດໂຄວິດ-19 ຢູ່ບໍລິເວນ.

ທ່ານນາງ Hiroko Hirahara, ຫົວໜ້າຖານທັບ Bentiu ຂອງຄະນະປະຕິບັດງານຊູດັງໃຕ້ ໃຫ້ຮູ້ວ່າໄດ້ຮັບການຕີລາຄາສູງກ່ຽວກັບວຽກທີ່ໂຮງໝໍສະໜາມຫວຽດນາມ ເຮັດໄດ້. ທ່ານນາງ ຕີລາຄາສູງຕໍ່ການອຸທິດສ່ວນ, ເຮັດວຽກຢ່າງສຸດຈິດສຸດໃຈ ແລະມີລັກສະນະເປັນມືອາຊີບຂອງບັນດາແພດໝໍໃສ່ໝວກເບເລສີຟ້າຫວຽດນາມ. ສ່ວນທ່ານພັນເອກ Waleed Elazizy-ຫົວໜ້າຮັບຜິດຊອບດ້ານການແພດຂອງຄະນະປະຕິບັດງານຢັ້ງຢືນວ່າ ບັນດາພາລະກອນຂອງສະຫະປະຊາຊາດ ຢູ່ທີ່ນີ້ລ້ວນແຕ່ຮູ້ສຶກມີຄວາມປອດໄພ ແລະອຸ່ນອ່ຽນໃຈເມື່ອມາປິ່ນປົວຢູ່ໂຮງໝໍສະໜາມຫວຽດນາມ.

ໃນເງື່ອນໄຂທຸກຍາກ, ອາກາດຮ້າຍແຮງ, ເງື່ອນໄຂຂາດສະຖຽນລະພາບ... ບັນດາແພດໝໍໃສ່ໝວກເບເລສີຟ້າຫວຽດນາມ ບໍ່ພຽງແຕ່ເຮັດສຳເລັດໜ້າທີ່ວິຊາສະເພາະເທົ່ານັ້ນ ຫາກຍັງຕັ້ງໜ້າ, ເປັນເຈົ້າການເຂົ້າຮ່ວມການເຄື່ອນໄຫວກຸສົນ, ມະນຸດສະທຳຊ່ວຍປັບປຸງຊີວິການເປັນຢູ່ຂອງປະຊາຊົນທ້ອງຖິ່ນ.

ຫາກໍ່ກັບເມືອປະເທດຈາກ ຊູດັງໃຕ້ ພາຍຫຼັງສິ້ນສຸດອາຍຸການໜຶ່ງປີທີ່ເຂົ້າຮ່ວມພາລະກຳສາກົນ, ທ່ານນາງຮ້ອຍເອກ ຕົ໊ງເວິນແອັງ, ແພດຍິງໜຶ່ງດຽວຂອງໂຮງໝໍສະໜາມ 2.3 ໄດ້ແບ່ງປັນອະນຸສອນຫຼາຍຢ່າງທີ່ສຸດ, ແຕ່ວ່າເອື້ອຍຈື່ດີທີ່ສຸດນັ້ນແມ່ນການເຂົ້າຮ່ວມໜູນຊ່ວຍປະຊາຊົນທ້ອງຖິ່ນ; ການອອກຈາກຖານທັບລົງໂຮງໝໍ ຫຼື ໄປບ່ອນລີ້ໄພເພື່ອມອບຂອງຂວັນ, ສອນພວກນ້ອງນ້ອຍຮຽນແຕ້ມຮູບ, ປູກຕົ້ນໄມ້ເພື່ອປັບປຸງສິ່ງແວດລ້ອມ ແລະລະຫຼີ້ນກັບພວກນ້ອງນ້ອຍ. ທ່ານນາງ ຕົ໊ງເວິນແອັງ ປາດຖະໜາຢາກເຮັດໄດ້ຫຼາຍວຽກກວ່າເພື່ອຊ່ວຍເຫຼືອເຂົາເຈົ້າ.

ຕາມທ່ານນາງພັນໂທ ຈິ້ງໝີຮວ່າ, ຜູ້ອຳນວຍການໂຮງໝໍສະໜາມ 2.3 ແລ້ວ, ໃນຊຸມວັນສຸດທ້າຍກ່ອນທີ່ຈະອອກຈາກບໍລິເວນ Bentiu ເພື່ອກັບເມືອປະເທດພາຍຫຼັງສໍາເລັດໜ້າທີ່, ໂຮງໝໍສະໜາມ 2.3 ໄດ້ເຮັດສຳເລັດກິດຈະກຳກຸສົນ, ມະນຸດສະທຳສຸດທ້າຍໃນຈຳນວນ 12 ກິດຈະກໍາທີ່ທະຫານ ແລະປະຊາຊົນສົມທົບກັນຈັດຕັ້ງ ດ້ວຍຄວາມປາດຖະໜາຢາກປະກອບສ່ວນເຫື່ອແຮງເລັກໆນ້ອຍເພື່ອໃຫ້ປະຊາຊົນມີຊີວິດດີງາມກວ່າ. ໂຕະຕັ່ງ 20 ຊຸດ ໄດ້ມອບໃຫ້ນັກຮຽນຢູ່ໂຮງຮຽນປະຖົມສຶກສາ Liech ແມ່ນຂອງຂວັນທີ່ມີຄວາມໝາຍ ແລະແທດຈິງທີ່ສຸດ. ຜ້າອັດປາກ-ອັດດັງ, ເຄື່ອງໃຊ້ການຮຽນ ຫຼືເຄື່ອງຫຼີ້ນໄດ້ເຮັດເອງທີ່ເຕັມໄປດ້ວຍອາລົມຈິດຂອງແພດໝໍໃສ່ໝວກເບເລສີຟ້າຫວຽດນາມ ໄດ້ນຳມາເຊິ່ງຄວາມເບີກບານມ່ວນຊື່ນໃຫ້ພວກນ້ອງນ້ອຍ.

ບັນດາໜ່ວຍຂອງໂຮງໝໍສະໜາມ ຂັ້ນ 2 ຂອງຫວຽດນາມ ໄດ້ສືບທອດກັນມາບໍ່ພຽງແຕ່ເປັນການສືບຕໍ່ຢັ້ງຢືນອິດທິພົນຊື່ສຽງ ແລະລະດັບວິຊາສະເພາະເທົ່ານັ້ນ ຫາກຍັງເປັນເຈົ້າການປະຕິບັດຫຼາຍການເຄື່ອນໄຫວ CIMIC, ໄດ້ຮັບຄວາມຊົມເຊີຍຈາກບັນດາອົງການຂອງຄະນະປະຕິບັດງານ. ຜ່ານນັ້ນ, ບັນດາແພດທະຫານຫວຽດນາມ ບໍ່ພຽງແຕ່ເສີມຂະຫຍາຍຄຸນທາດອັນສູງສົ່ງຂອງທະຫານລຸງໂຮ່, ສ້າງຄວາມປະທັບໃຈຕໍ່ເພື່ອນມິດສາກົນເທົ່ານັ້ນ ຫາກຍັງປະກອບສ່ວນແຜ່ຂະຫຍາຍຈິດໃຈມະນຸດສະທຳຂອງນັກຮົບໃສ່ໝວກເບເລສີຟ້ານຳອີກ ຍາມໃດສະຫະປະຊາຊາດ ກໍ່ໃຫ້ການສົ່ງເສີມ.

ທ່ານພົນຈັດຕະວາ Dhananjay Joshi, ຮັກສາການຜູ້ບັນຊາການກໍາລັງສະຫະປະຊາຊາດ ຢູ່ຊູດັງໃຕ້ ໄດ້ຊົມເຊີຍໂຮງໝໍສະໜາມ 2.3 ວ່າ ເຖິງວ່າມີຫຼາຍວຽກເຮັດດ້ານວິຊາສະເພາະ ແຕ່ວ່າທາງໂຮງໝໍຍັງມານະພະຍາຍາມເຂົ້າຮ່ວມບັນດາການເຄື່ອນໄຫວ CIMIC ທີ່ມີຄວາມໝາຍຄືໃຫ້ຄຳປຶກສາ HIV/AIDS, ໜູນຊ່ວຍໂຮງໝໍ Bentiu, ແຈກຢາຍຢຸກຢາ ແລະວັດຖຸອຸປະກອນໃຫ້ບັນດາອົງການກ່ຽວຂ້ອງຢູ່ທ້ອງຖິ່ນ... ບັນດາແພດໝໍໃສ່ໝວກເບເລສີຟ້າຫວຽດນາມ ໄດ້ແນະນຳໃຫ້ປະຊາຊົນ, ໂດຍສະເພາະແມ່ນຜູ້ຍິງທ້ອງຖິ່ນຮູ້ວິທີຮັກສາສຸຂະພາບຕົນເອງໃນເງື່ອນໄຂດ້ານສາທາລະນະສຸກຂາດແຄນຢູ່ທ້ອງຖິ່ນ.

ປະຕິບັດພາລະກຳສາກົນອັນສູງສົ່ງ, ບັນດາແພດໝໍໃສ່ໝວກເບເລສີຟ້າຫວຽດນາມ ໄດ້ປະຕິບັດບົດບາດ “ນັກການທູດ” ໄດ້ເປັນຢ່າງດີ, ແນະນໍາຮູບພາບທະຫານລຸງໂຮ່ ເຕັມໄປດ້ວຍຄຸນທາດ, ສະຕິປັນຍາ ແລະນ້ຳໃຈກຸສົນຢ່າງກວ້າງຂວາງໃຫ້ບັນດາປະເທດ ແລະເພື່ອນມິດສາກົນ.