ລາວກຽມຈັດດອກປີກໄກ່ເບຍລາວ ອິນເຕີ ຊີຣີ 2019
ທ່ານ ບຸນຍະແສງ ນະຊຽງຄຳ ຮອງເລຂາທິການສະຫະພັນດອກປີກໄກ່ແຫ່ງຊາດລາວໃຫ້ສຳພາດວັນທີ 22 ມັງກອນ 2019 ວ່າ: ວັນທີ 21 ມັງກອນ ຜ່ານມາ ສະຫະພັນດອກປີກໄກ່ສາກົນໄດ້ແຈ້ງໃຫ້ສະຫະພັນດອກປີກໄກ່ແຫ່ງຊາດລາວເຊິ່ງຕາງໜ້າ ສປປ ລາວ ຮັບກຽດເປັນເຈົ້າພາບຈັດການແຂ່ງຂັນກີລາດອກປີກໄກ່ຊີງແຊັມນາໆຊາດປະຈຳປີ 2019 ຫຼື ລາຍການດອກປີກໄກ່ເບຍລາວອິນເຕີເນເຊິນນອລ ຊີຣີ 2019 ເພື່ອເປັນການສະສົມຄະແນນລະດັບໂລກ “ເວີລແລັງກິງ” ຈັດຂຶ້ນວັນທີ 19-24 ກຸມພາ ທີ່ຈະມາເຖິງຢູ່ສະໂມສອນດອກປີກໄກ່ເຊດຖາ, ເມືອງສີສັດຕະນາກ, ນະຄອນຫຼວງວຽງຈັນ.
ສະຫະພັນດອກປີກໄກ່ສາກົນໄດ້ປິດຮັບສະໝັກການເຂົ້າຮ່ວມແຂ່ງຂັນລາຍການດັ່ງກ່າວເປັນທາງການພາຍຫຼັງທີ່ໄດ້ແຈ້ງການແຕ່ທ້າຍປີ 2018 ເຊິ່ງມີນັກກີລາດອກປີກໄກ່ 14 ປະເທດຈາກທົ່ວໂລກ 150 ກວ່າຄົນໃນລະດັບທອບ 100 ອັນດັບຂອງໂລກແຈ້ງເຈດຈຳນົງເຂົ້າຮ່ວມແຂ່ງຂັນປະກອບມີ ສປປ ລາວ ໄທ ສສ ຫວຽດນາມ ມາເລເຊຍ ສິງກະໂປ ອົດສະຕາລີ ຍີ່ປຸ່ນ ອິນເດຍ ສ ອາເມຣິກາ ອັງກິດ ການາດາ ຊູແອັດ ເດັນມາກ ແລະ ອິນໂດເນເຊຍ ການແຂ່ງຂັນມີການຊີງໄຊ 5 ລາຍການ ຄື: ປະເພດທີມຄູ່ຍິງ-ຊາຍ ທີມຄູ່ປະສົມ ແລະ ດ່ຽວຍິງ-ຊາຍ.
ສຳລັບນັກກີລາດອກປີກໄກ່ທີມຊາດລາວມີອັນດັບເວີລແລັງກິງປັດຈຸບັນອັນດັບ 500 ຂອງໂລກຈະສົ່ງເຂົ້າຮ່ວມແຂ່ງຂັນລາຍການດັ່ງກ່າວ 30 ຄົນ ຍິງ 6 ຄົນປັດຈຸບັນທຸກຄົນໄດ້ເລີ່ມເກັບຕົວເຝິກຊ້ອມຢູ່ສະໂມສອນດອກປີກໄກ່ເຊດຖາ.
(ແຫຼ່ງຂໍ້ມູນ: vientianemai.net)