 |
ທ່ານ ນາງ ຫງວຽນ ເຟືອງ ງາ ປະທານສະຫະພັນອົງການມິດຕະພາບຫວຽດນາມ ໄດ້ອ່ານສານອວຍພອນປີໃໝ່ ແກ່ບັນດາເພື່ອນຜູ້ອ່ານຫນັງສືພິມເທີ່ຍດ້າຍທຸກໆທ່ານຢູ່ໃນປະເທດ ແລະ ທົ່ວໂລກ, ຊາວຫວຽດນາມຢູ່ຕ່າງແດນ ແລະ ບັນດາປະເທດເພື່ອນມິດ
ຮຽນບັນດາທ່ານທີ່ຮັກແພງ ແລະ ນັບຖື!
ເນື່ອງໃນໂອກາດປີໃຫມ່ປະຈໍາຊາດຫວຽດນາມ, ໃນນາມປະທານສະຫະພັນອົງການມິດຕະພາບຫວຽດນາມ, ຂ້າພະເຈົ້າຂໍຝາກຄໍາສະບາຍດີອັນສາມັກຄີມິດຕະພາບ ແລະ ຄໍາອວຍພອນທີ່ດີທີ່ສຸດໄປຍັງບັນດາເພື່ອນຜູ້ອ່ານຫນັງສືພິມເທີ່ຍດ້າຍທຸກໆທ່ານຢູ່ໃນປະເທດ ແລະ ທົ່ວໂລກ, ຊາວຫວຽດນາມຢູ່ຕ່າງປະເທດ ແລະ ບັນດາປະເທດເພື່ອນມິດ.
ປີ 2018 ຜ່ານມາ, ປີທີ່ມີຫລາຍເຫດການເຊິ່ງມີການປ່ຽນແປງຢ່າງໄວວາເຊິ່ງເຮັດໃຫ້ສະພາບແວດລ້ອມທາງດ້ານການເມືອງ, ຄວາມປອດໄພ, ເສດຖະກິດຂອງພາກພື້ນ ແລະ ໂລກ ທີ່ບໍ່ມີຄວາມຫມັ້ນຄົງ. ໄດ້ຜ່ານຜ່າຄວາມຫຍຸ້ງຍາກຫລາຍຢ່າງນັ້ນ, ວຽກງານການພົວພັນຕ່າງປະເທດໄດ້ບັນລຸຜົນສໍາເລັດທີ່ເປັນໜ້າເພີ່ງພໍໃຈ, ໃນນັ້ນມີການປະກອບສ່ວນທີ່ສໍາຄັນຂອງວຽກງານການພົວພັນຕ່າງປະເທດດ້ານປະຊາຊົນກັບສະຫະພັນບັນດາອົງການຈັດຕັ້ງມິດຕະພາບຫວຽດນາມເຊິ່ງເປັນກໍາລັງຫລັກແຫຼ່ງ.
ມີຄະນະຜູ້ແທນເກືອບ 70 ຄະນະໄດ້ເດີນທາງໄປເຮັດວຽກຢູ່ຕ່າງປະເທດ ແລະ ໄດ້ຕ້ອນຮັບຄະນະຜູ້ແທນຕ່າງປະເທດເກືອບ 1.400 ຄະນະທີ່ມາຈາກຫຼາຍປະເທດໂດຍມີບັນດາກິດຈະກໍາການແລກປ່ຽນ, ການຮ່ວມມືໃນຫຼາຍຂົງເຂດ, ໂດຍສະເພາະແມ່ນກິດຈະກໍາທີ່ເປັນຫນ້າຕື່ນເຕັ້ນເພື່ອສະເຫຼີມສະຫຼອງບັນດາເຫດການທີ່ຍິ່ງໃຫຍ່ໃນການພົວພັນລະຫວ່າງຫວຽດນາມກັບຫຼາຍປະເທດ, ການພົວພັນຕ່າງປະເທດດ້ານປະຊາຊົນເຊິ່ງໄດ້ຊ່ວຍໃຫ້ການເພີ່ມທະວີສາຍພົວພັນລະຫວ່າງຫວຽດນາມ ແລະ ບັນດາປະເທດຄູ່ຮ່ວມມື, ເພີ່ມທະວີຄວາມໄວ້ວາງໃຈ, ຄວາມສາມັກຄີ, ມິດຕະພາບກັບປະຊາຊົນບັນດາປະເທດ, ເພີ່ມທະວີ ແລະ ການພັດທະນາສາຍພົວພັນເພື່ອນມິດສາກົນຂອງຫວຽດນາມໃນໂລກ.
ການມີສ່ວນຮ່ວມຢ່າງຕັ້ງໜ້າ ແລະ ການເປັນເຈົ້າການຂອງບັນດາອົງການຈັດຕັ້ງສັນຕິພາບ, ມິດຕະພາບຫວຽດນາມຢູ່ບັນດາເວທີປາໄສຫຼາຍຝ່າຍໄດ້ປະກອບສ່ວນເຂົ້າໃນການຍົກສູງບົດບາດ, ຕໍາແຫນ່ງສາກົນຂອງຫວຽດນາມ. ການຊ່ວຍເຫຼືອຈາກບັນດາອົງການຈັດຕັ້ງທີ່ບໍ່ຂຶ້ນກັບລັດຖະບານຕ່າງປະເທດບັນລຸຫຼາຍຮ້ອຍລ້ານໂດລາສະຫະລັດ, ເຊິ່ງປະກອບສ່ວນອັນມີຄວາມໝາຍໃນການຫຼຸດຜ່ອນຄວາມທຸກຍາກ ແລະ ການພັດທະນາເສດຖະກິດ - ສັງຄົມຂອງປະເທດ.
ນີ້ແມ່ນຜົນງານທີ່ມາຈາກຄວາມພະຍາຍາມຢ່າງໃຫຍ່ຫຼວງ, ຄວາມທົນທານໜຽວແໜ້ນ, ມີຄວາມທຸ້ມເທ ແລະ ຈິດໃຈສ້າງສັນ, ການຕັດສິນໃຈໃນການແກ້ໄຂຄວາມຫຍຸ້ງຍາກຂອງພະນັກງານຜູ້ທີ່ເຮັດໜ້າທີ່ວຽກງານການພົວພັນຕ່າງປະເທດດ້ານປະຊາຊົນຢູ່ທົ່ວປະເທດ ແລະ ຫມູ່ເພື່ອນຈໍານວນຫຼວງຫຼາຍ, ຄູ່ຮ່ວມງານຂອງສະຫະພັນມິດຕະພາບທັງຢູ່ພາຍໃນປະເທດ ແລະ ຢູ່ຕ່າງປະເທດ. ໃນໂອກາດນີ້, ຂ້າພະເຈົ້າຂໍສະແດງຄວາມຂອບໃຈຢ່າງຈິງໃຈຕໍ່ຜູ້ນໍາອາວຸໂສ ແລະ ພະນັກງານທັງຫມົດໃນລະບົບສະຫະພັນມິດຕະພາບຂັ້ນສູນກາງ ແລະ ທ້ອງຖິ່ນ, ຊາວຫວຽດນາມຢູ່ຕ່າງປະເທດ ແລະ ບັນດາປະເທດເພື່ອນມິດກ່ຽວກັບການປະກອບສ່ວນທີ່ມີຄຸນຄ່າສໍາລັບຄວາມສໍາເລັດໂດຍລວມຂອງສະມາຄົມມິດຕະພາບໃນໄລຍະຜ່ານມາ.
ສະຖານະການໃນໂລກ, ພາກພື້ນໃນປີ 2019 ໄດ້ຄາດວ່າຈະສືບຕໍ່ມີຄວາມສັບສົນ, ທີ່ບໍ່ສາມາດຄາດຄະເນໄດ້, ສົ່ງຜົນກະທົບໃນຫລາຍດ້ານຕໍ່ທຸກປະເທດ, ລວມທັງມີປະເທດຫວຽດນາມ. ສິ່ງສະດວກ ແລະ ຄວາມຫຍຸ້ງຍາກ, ກາລະໂອກາດ ແລະ ສິ່ງທ້າທາຍຕ່າງໆທີ່ຕ້ອງການໃຫ້ພວກເຮົາຕ້ອງສຸມໃສ່ໃນການພະຍາຍາມຢ່າງເຕັ່ມທີ່, ເປັນເຈົ້າການ, ການນໍາໃຊ້ຄວາມຄິດສ້າງສັນທາງດ້ານການພົວພັນຕ່າງປະເທດຂອງທ່ານປະທານ ໂຮ່ຈິມິນ ກ່ຽວກັບຄວາມສັນຕິພາບ, ສອດຄ່ອງປອງດອງກັນດີ, ຊື່ສັດ, ມະນຸດສະທໍາ ແລະ ຄວາມເປັນທໍາ, ຖືສັດເພື່ອເຮັດໄດ້ດີໃນວຽກງານທາງດ້ານການພົວພັນຕ່າງປະເທດເປັນຕົ້ນຄື: ຄວາມສາມັກຄີມິດຕະພາບ, ການຮ່ວມມືດ້ານປະຊາຊົນ; ວຽກງານບໍ່ຂຶ້ນກັບລັດຖະບານຕ່າງປະເທດ; ຂໍ້ມູນການຕ່າງປະເທດ.
ເພື່ອຈັດຕັ້ງປະຕິບັດໜ້າທີ່ວຽກງານດັ່ງກ່າວ, ພວກເຮົາຕ້ອງສ້າງລະບົບສະຫະພັນມິດຕະພາບທີ່ເຮັດວຽກຢ່າງມີປະສິດທິຜົນ,ເປັນມືອາຊີບ. ກໍາລັງແຮງຂອງພວກເຮົາແມ່ນຈິດໃຈຂອງຄວາມສາມັກຄີ, ເປັນຄວາມເອກະພາບ, ການຮ່ວມມືຢ່າງໃກ້ຊິດ, ການປະສານງານຢ່າງເປັນລະບົບລະຫວ່າງບັນດາຫນ່ວຍງານຂອງສະຫະພັນມິດຕະພາບ, ລະຫວ່າງສະມາຄົມມິດຕະພາບກັບອົງການຈັດຕັ້ງສາມາຊິກ ແລະ ລະຫວ່າງສະຫະພັນມິດຕະພາບກັບບັນດາກະຊວງ, ຂະແໜງການ, ທ້ອງຖິ່ນ. ດ້ວຍເປົ້າຫມາຍດັ່ງກ່າວ, ພວກເຮົາຈະມີການກະກຽມຢ່າງຕັ້ງໜ້າ ແລະ ຈັດຕັ້ງປະຕິບັດຢ່າງປະສົບຜົນສໍາເລັດກອງປະຊຸມໃຫຍ່ຄັ້ງທີ VI ຂອງສະມາຄົມມິດຕະພາບໃນປີນີ້.
ຂ້າພະເຈົ້າເຊື່ອໝັ້ນ ແລະ ມີຄວາມມຸ່ງຫວັງວ່າ, ດ້ວຍຄວາມເອົາໃຈໃສ່ຂອງພັກ ແລະ ລັດ, ການຮ່ວມມື ແລະ ສະຫນັບສະຫນູນຂອງບັນດາກະຊວງ, ຂະແໜງການ, ທ້ອງຖິ່ນ, ຄູ່ຮ່ວມງານສາກົນ ແລະ ໂດຍສະເພາະແມ່ນຄວາມຕັ້ງຕໍ່ຢ່າງສຸດໃຈ, ມີຄວາມທຸ້ມເທ, ຄວາມພະຍາຍາມຂອງບັນດາພະນັກງານຜູ້ທີ່ເຮັດວຽກຢູ່ໃນລະບົບສະຫະພັນມິດຕະພາບ, ພວກເຮົາຈະສ້າງຜົນສໍາເລັດອັນໃຫມ່ໃນຫຼາຍດ້ານໃນປີ 2019, ປະກອບສ່ວນຢ່າງຕັ້ງຫນ້າຕໍ່ການສ້າງສາ, ການພັດທະນາແບບຍືນຍົງ ແລະ ປົກປັກຮັກສາປະເທດຫວຽດນາມ.
ເນື່ອງໃນໂອກາດປີໃໝ່ປະຈໍາຊາດຫວຽດນາມ, ຂ້າພະເຈົ້າຂໍອວຍພອນໃຫ້ທຸກທ່ານ ແລະ ບັນດາຫມູ່ເພື່ອນຈົ່ງມີສຸຂະພາບເຂັ້ມແຂງ, ປະສົບຜົນສໍາເລັດ, ມີຄວາມສຸກ. ອວຍພອນໃຫ້ວຽກງານການພົວພັນຕ່າງປະເທດດ້ານປະຊາຊົນຂອງພວກເຮົາຈົ່ງປະສົບຜົນສໍາເລັດອັນດີງາມ!
ຫງວຽນ ເຟືອງ ງາ
ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ
（ໄຊພອນ）
