| ສ.ເກົາຫຼີ ຖື ຫວຽດນາມ ເປັນທິດບຸລິມະສິດໃນບັນດາການພົວພັນຕ່າງປະເທດ | |
| ສ.ເກົາຫຼີ ຍູ້ແຮງນະໂຍບາຍດຶງດູດນັກສຶກສາສາກົນ |
ຕາມທ່ານ ຫຼີເຊື່ອງກັ່ນ ແລ້ວ, ສູນວັດທະນະທຳ ຫວຽດນາມ ຢູ່ ສ.ເກົາຫຼີ ຈະປະກອບສ່ວນຊຸກຍູ້ການພົບປະແລກປ່ຽນ, ການຮ່ວມມືກ່ຽວກັບວັດທະນະທຳລະຫວ່າງ 2 ປະເທດ, ພິເສດ ແມ່ນເມື່ອຈຳນວນຊາວ ຫວຽດນາມ ອາໄສຢູ່ ສ.ເກົາຫຼີ ນັບມື້ນັບເພີ່ມຂຶ້ນ.
ເມື່ອຫວນຄືນກົກເຄົ້າເຫງົ້າກໍຂອງເຊື້ອສາຍ ຫຼີ ຢູ່ ຫວຽດນາມ, ທ່ານ ກໍໄດ້ສະແດງຄວາມເປັນກຽດ ແລະ ພາກພູມໃຈເມື່ອໄດ້ປະກອບສ່ວນໃຫ້ການພັດທະນາການທ່ອງທ່ຽວ ຫວຽດນາມ. ນັບແຕ່ປີ 2017 ມາຮອດປະຈຸບັນ, ພາຍຫຼັງ ໄດ້ຮັບການແຕ່ງຕັ້ງເປັນເອກອັກຄະລັດຖະທູດການທ່ອງທ່ຽວ ຫວຽດນາມ ປະຈຳ ສ.ເກົາຫຼີ, ທ່ານ ໄດ້ມານະພະຍາຍາມເພື່ອມີຫຼາຍການເຄື່ອນໄຫວໂຄສະນາ, ສົ່ງເສີມການທ່ອງທ່ຽວ ຫວຽດນາມ ຢູ່ ສ.ເກົາຫຼີ.
 |
| ທ່ານຮອງລັດຖະມົນຕີ ໂຮ່ອ່ານຟ່ອງ (ຂວາ) ພົບປະກັບທ່ານເອກອັກຄະລັດຖະທູດການທ່ອງທ່ຽວ ຫວຽດນາມ ປະຈຳ ສ.ເກົາຫຼີ ຫຼີເຊື່ອງກັ່ນ. (ພາບ: bvhtdl.gov.vn) |
ທີ່ການພົບປະເຮັດວຽກ, ທ່ານຮອງລັດຖະມົນຕີ ໂຮ່ອ່ານຟ່ອງ ໃຫ້ຮູ້ວ່າ ຮຸ່ນລູກຫຼານຂອງເຊື້ອສາຍ ຫຼີ ຂອງ ຫວຽດນາມ ຢູ່ ສ.ເກົາຫຼີ ພວມນັບມື້ນັບປະກອບສ່ວນໃຫ້ແກ່ການພັດທະນາການພົວພັນລະຫວ່າງ 2 ປະເທດຢ່າງຕັ້ງໜ້າ. ໃນນັ້ນ, ທ່ານເອກອັກຄະລັດຖະທູດການທ່ອງທ່ຽວ ຫຼີເຊື່ອງກັ່ນ, ລູກຫຼານຂອງສອງຊາດ ຫວຽດນາມ - ສ.ເກົາຫຼີ ໄດ້ກາຍເປັນຂົວເຊື່ອມຕໍ່ການທ່ອງທ່ຽວລະຫວ່າງສອງຊາດ, ສອງປະເທດ.
ຕາມທ່ານ ຟ່ອງ ແລ້ວ, ໃນໄລຍະມໍ່ໆມານີ້ ການພົວພັນຮ່ວມມືລະຫວ່າງ ຫວຽດນາມ ແລະ ສ.ເກົາຫຼີ ກໍໄດ້ພັດທະນາຢ່າງເຂັ້ມແຂງ, ຮອບດ້ານໃນທຸກຂົງເຂດ. ໃນນັ້ນ, ການຮ່ວມມືດ້ານວັດທະນະທຳ, ກິລາ ແລະ ທ່ອງທ່ຽວ ບັນລຸໄດ້ບັນດາໝາກຜົນສຳຄັນຫລາຍຢ່າງ. ສະເພາະຂົງເຂດການທ່ອງທ່ຽວ, ປີ 2023 ຍອດການແລກປ່ຽນນັກທ່ອງທ່ຽວສອງສົ້ນລະຫວ່າງ ຫວຽດນາມ ແລະ ສ.ເກົາຫຼີ ບັນລຸໄດ້ປະມານ 4 ລ້ານເທື່ອຄົນ. ສ.ເກົາຫຼີ ແມ່ນທ້ອງຕະຫຼາດສົ່ງນັກທ່ອງທ່ຽວໃຫຍ່ທີ່ສຸດຂອງ ຫວຽດນາມ ດ້ວຍນັກທ່ອງທ່ຽວ 3,6 ລ້ານເທື່ອຄົນ. ກົງກັນຂ້າມ, ຫວຽດນາມ ກໍ່ແມ່ນທ້ອງຕະຫຼາດແຫຼ່ງນັກທ່ອງທ່ຽວແຖວໜ້າຂອງ ສ.ເກົາຫຼີ ໃນພາກພື້ນ ອາຊີຕາເວັນອອກສ່ຽງໃຕ້ ດ້ວຍນັກທ່ອງທ່ຽວປະມານ 420.000 ເທື່ອຄົນ.
ເຖິງແນວນັ້ນກໍຄຕາມ, ທ່ານ ຟ່ອງ ກໍເອົາໃຈໃສ່ວ່າ ພື້ນທີ່ການຮ່ວມມືລະຫວ່າງ ຫວຽດນາມ ແລະ ສ.ເກົາຫຼີ ຍັງມີຫຼາຍຢູ່. ສິ່ງນີ້ ຮຽກຮ້ອງໃຫ້ພວກເຮົາຕ້ອງພະຍາຍາມຫຼາຍກວ່າເກົ່າ, ເຮັດໃຫ້ດີກວ່າອີກ ເພື່ອບັນລຸໄດ້ບັນດາໝາກຜົນທີ່ໃຫຍ່ກວ່າ. ທ່ານ ປາດຖະໜາວ່າ ທ່ານເອກອັກຄະລັດຖະທູດ ຫຼີເຊື່ອງກັ່ນ ຈະສືບຕໍ່ຄົ້ນຄວ້າ ເພື່ອບໍ່ພຽງແຕ່ເປັນຂົວຕໍ່ໂຄສະນາ, ສົ່ງເສີມການທ່ອງທ່ຽວເທົ່ານັ້ນ ຫາກຍັງຍົກອອກບັນດາແນວຄວາມຄິດ, ຂໍ້ສະເໜີ ເພື່ອພ້ອມກັນສ້າງຜະລິດຕະພັນທ່ອງທ່ຽວໃໝ່, ຍົກສູງຄວາມຮັບຮູ້, ບຳລຸງສ້າງແຫຼ່ງຊັບພະຍາກອນການທ່ອງທ່ຽວ, ຍູ້ແຮງການຂົນສົ່ງທາງອາກາດ, ສົ່ງເສີມຈຸດປາຍທາງ, ເຊື່ອມຕໍ່ການໄປທ່ອງທ່ຽວ...
ທ່ານຮອງລັດຖະມົນຕີ ໂຮ່ອ່ານຟ່ອງ ກໍສະເໜີໃຫ້ກົມທ່ອງທ່ຽວແຫ່ງຊາດ ຫວຽດນາມ, ກົມຮ່ວມມືສາກົນ ແລະ ບັນດາທ້ອງຖິ່ນ, ວິສາຫະກິດ ຫວຽດນາມ ຖອດຖອນເອົາບົດບາດເປັນຂົວຕໍ່ການທ່ອງທ່ຽວຂອງທ່ານເອກອັກຄະລັດຖະທູດ ຫຼີເຊື່ອງກັ່ນ ເພື່ອຍູ້ແຮງການຮ່ວມມື, ພັດທະນາການທ່ອງທ່ຽວຢ່າງມີປະສິດທິຜົນກ່ວາອີກ.
ມິງດຶກ
