ຄ້າຍພັກແລ້ງ ຫວຽດນາມ ປີ 2022 ຢູ່ກ໋ວາງນາມ: ເຊື່ອມຕໍ່ຊາວຫວຽດນາມ ອາໄສຢູ່ຕ່າງປະເທດ ກັບບ້ານເກີດເມືອງນອນ | |
ຄວາມງາມຂອງບັນດາໝູ່ບ້ານຫາປ່າຢູ່ ຫວຽດນາມ |
ການເຊື່ອມຕໍ່ມິດຕະພາບຢູ່ເຂດຊາຍແດນ
ປີ 2009, ຕາແສງ ເຊີນກິມ 1, (ເມືອງ ເຮືອງເຊີນ, ແຂວງ ຮ່າຕິ້ງ) ແລະ ບ້ານທົ່ງແປ (ເມືອງ ຄຳເກີດ, ແຂວງ ບໍລິຄຳໄຊ, ລາວ) ໄດ້ພ້ອມກັນເຊັນບົດບັນທຶກກ່ຽວກັບການແຮກສ່ຽວ. ທັງສອງຝ່າຍເຫັນດີເປັນເອກະພາບ ຈະສົມທົບກັນເພື່ອໂຄສະນາເຜີຍແຜ່, ຂົນຂວາຍປະຊາຊົນກໍ່ສ້າງ, ເພີ່ມພູນຄູນສ້າງຄວາມສາມັກຄີ, ມິດຕະພາບ, ມູນເຊື້ອຂອງສອງພັກ, ສອງລັດ, ສອງທ້ອງຖິ່ນ ແລະ ມູນເຊື້ອອັນດີງາມຂອງພີ່ນ້ອງໃນຕະກຸນດຽວ ຫຼື ເຊື້ອສາຍ ທີ່ມີມາແຕ່ດົນນານຢູ່ສອງຟາກຂອງຊາຍແດນ. ໂດຍການມາຢ້ຽມຢາມ ແລະ ປຸກລະດົມເຊິ່ງກັນ ແລະ ກັນເປັນປະຈໍາ ໃນຍາມງານບຸນ, ປີໃໝ່, ເວລາເຈັບປ່ວຍ ແລະ ຊ່ວຍເຫຼືອເຊິ່ງກັນ ແລະ ກັນ ໃນການພັດທະນາເສດຖະກິດ, ສ້າງບ້ານໃຫ້ຮັ່ງມີ ແລະ ສວຍງາມ.
ທ່ານ ອູໄດ, ນາຍບ້ານທົ່ງແປ ໃຫ້ຮູ້ວ່າ, ນັບແຕ່ມື້ທີ່ແຮກສ່ຽວ, ປະຊາຊົນຢູ່ສອງຟາກເຂດຊາຍແດນ ໄດ້ປຸກລະດົມເຊິ່ງກັນ ແລະ ກັນເປັນປະຈໍາຄື ປະຕິບັດຂໍ້ກຳນົດເຂດຊາຍແດນດ້ວຍຄວາມສະໝັກໃຈ. ແຕ່ລະຝ່າຍແກ້ໄຂໄດ້ບັນດາວຽກງານທີ່ກ່ຽວຂ້ອງຢ່າງສົມເຫດສົມຜົນ, ທັງຮັບປະກັນການປະຕິບັດຖືກຕ້ອງຕາມກົດໝາຍ, ທັງຮັກສາຄວາມສາມັກຄີ, ມິດຕະພາບ. ພິເສດ, ສຸກສາລາແພດທະຫານ ແລະ ສຸຂາພິບານປະຊາຊົນ ບ້ານທົ່ງແປ ໄດ້ລົງທຶນອຸປະກອນການແພດ, ພ້ອມກັນນັ້ນ ກໍມີການຮ່ວມເດີນທາງຂອງບັນດາທ່ານໝໍຂອງສຸກສາລາຕາແສງ ເຊີນກິມ 1 ເຊິ່ງໄດ້ມີການໜູນຊ່ວຍຢ່າງຕັ້ງໜ້າໃນການດູແລ ສຸຂະພາບໃຫ້ປະຊາຊົນບ້ານທົ່ງແປ. “ພວກຂ້າພະເຈົ້າຈະສືບຕໍ່ເພີ່ມພູນຄູນສ້າງຄວາມເປັນມິດຕະພາບໃຫ້ນັບມື້ນັບແໜ້ນແຟ້ນ, ໃຫຍ່ໂຕມະໂຫຖານເໝືອນຄືສາຍພູຫຼວງ, ພ້ອມກັນພັດທະນາ, ເພື່ອໃຫ້ປະຊາຊົນສອງປະເທດຢູ່ສອງຟາກຂອງຊາຍແດນ ມີຊີວິດການເປັນຢູ່ທີ່ນັບມື້ນັບອີ່ມໜໍາສໍາລານ ແລະ ມີຄວາມຜາສຸກ…”, ທ່ານ ອູໄດ ແບ່ງປັນ.
ຄ້າຍທະຫານປ້ອງກັນຊາຍແດນ ອາເດິິດ ແລະ ບັນດາກໍາລັງທີ່ມີໜ້າທີ່ ໄດ້ມອບສິ່ງທີ່ຈຳເປັນໃຫ້ຊີວິດປະຈຳວັນ, ອຸປະກອນການແພດໃຫ້ຊາວບ້ານກາໂລ. ພາບ: ແອງຢຸງ |
ພາຍຫຼັງທີ່ບ້ານ ອາຕິນ (ຕາແສງ ອາເດິິດ, ເມືອງ ອາເລື໋ອຍ, ແຂວງ ເທື່ອທຽນເຫ້ວ) ແລະ ບ້ານກາໂລ (ເມືອງ ກະລືມ, ແຂວງເຊກອງ, ລາວ) ໄດ້ແຮກສ່ຽວກັນ, ຄະນະກຳມະການປົກຄອງແຂວງ ເທື່ອທຽນເຫ້ວ, ກອງບັນຊາການທະຫານປ້ອງກັນຊາຍແດນ ແຂວງ ໄດ້ໜູນຊ່ວຍປະຊາຊົນຂອງບ້ານກາໂລໃນການສ້າງເຮືອນຢູ່, ເສັ້ນທາງ. ຄ້າຍທະຫານປ້ອງກັນຊາຍແດນຂອງຕາແສງ ອາເດິິດ, ກອງບັນຊາການທະຫານປ້ອງກັນຊາຍແດນ ເທື່ອທຽນເຫ້ວ ແລະ ປະຊາຊົນບ້ານ ອາຕິນ ໄດ້ສົມທົບກັນເພື່ອຮຽກຮ້ອງແຫຼ່ງກໍາລັງໜູນຊ່ວຍດ້ານວັດຖຸ, ກວດ ແລະ ປິ່ນປົວພະຍາດ, ດູແລສຸຂະພາບ; ໜູນຊ່ວຍນັກຮຽນທີ່ທຸກຍາກຂາດເຂີນ ໂດຍອີງຕາມໂຄງການ “ຊ່ວຍເຫຼືອນ້ອງນັກຮຽນໄປໂຮງຮຽນ”, ຍົກສູງຊີວິດດ້ານວັດຖຸ ແລະ ຈິດໃຈໃຫ້ແກ່ປະຊາຊົນບ້ານ ກາໂລ ເປັນເທື່ອລະກ້າວ.
"ພະຍາດ ໂຄວິດ-19 ລະບາດ ແລະ ຜັນແປຢ່າງສັບສົນ, ປະຊາຊົນທັງສອງຝ່າຍຕ້ອງຈຳກັດການໄປມາຢ້ຽມຢາມ. ອຳນາດການປົກຄອງທ້ອງຖິ່ນ, ຊາວບ້ານ ອາຕິນ ໄດ້ຂົນຂວາຍງົບປະມານເພື່ອໜູນຊ່ວຍຊາວບ້ານ ກາໂລ ດ້ານສະບຽງອາຫານ, ອຸປະກອນການແພດ ເພື່ອຮັບປະກັນການປ້ອງກັນ, ຕ້ານໂລກລະບາດ ແລະ ເຮັດໃຫ້ຊີວິດການເປັນຢູ່ເປັນປົກກະຕິ”. ພັນເອກ ອາລຽງຮ່າ, ຜູ້ຮັບຜິດຊອບຝ່າຍການເມືອງ ຄ້າຍທະຫານປ້ອງກັນຊາຍແດນ ດ່ານ ອາເດິດ ໃຫ້ຮູ້.
ນໍາການເຊື່ອມຕໍ່ເຂົ້າສູ່ລວງເລິກ
ໂດຍຕາມທ່ານພົນຈັດຕະວາ ເຈີນດິງຢູງ, ອະດີດຮອງຜູ້ບັນຊາການ, ຫົວໜ້າເສນາທິການທະຫານປ້ອງກັນຊາຍແດນ, ອະດີດຫົວໜ້າກອງບັນຊາການທະຫານປ້ອງກັນຊາຍແດນ ກ໊ວາງຈິ, ແມ່ນ “ພໍ່” ຂອງຮູບແບບ “ການແຮກສ່ຽວບ້ານຕໍ່ບ້ານ”, ປະຊາຊົນຢູ່ເຂດຊາຍແດນຫວຽດນາມ - ລາວ ມີສາຍພົວພັນມິດຕະພາບອັນຍາວນານ. ບັນດາກິດຈະກຳ, ຮີດຄອງປະເພນີ, ການອອກແຮງງານ ແລະ ການປູກຝັງມີລັກສະນະຄ້າຍຄືກັນຫຼາຍຢ່າງ. “ການແຮກສ່ຽວບ້ານຕໍ່ບ້ານ” ໄດ້ຍົກສູງຄວາມຮັບຮູ້ເປັນເທື່ອລະກ້າວໃຫ້ແກ່ປະຊາຊົນບັນດາເຜົ່າຢູ່ສອງຟາກຂອງຊາຍແດນຄື ມີສະຕິຄວາມຮັບຜິດຊອບຕໍ່ອະທິປະໄຕຜືນແຜ່ນດິນຂອງປະເທດຊາດ.
ຈາກກິດຈະກໍາແຮກສ່ຽວ, ອຳນາດການປົກຄອງ ແລະ ປະຊາຊົນຢູ່ສອງຟາກຂອງຊາຍແດນໄດ້ມີເງື່ອນໄຂເພື່ອຈັດຕັ້ງຫຼາຍກິດຈະກໍາທີ່ໜູນຊ່ວຍ ແລະ ຊ່ວຍເຫຼືອເຊິ່ງກັນ ແລະ ກັນໃນທຸກດ້ານຄື ແບ່ງປັນສະບຽງອາຫານໃນເວລາເກີດໄພທຳມະຊາດ ແລະ ມີໂລກລະບາດ; ແລກປ່ຽນປະສົບການໃນການຜະລິດ, ໜູນຊ່ວຍແນວພັນພືດ ແລະ ສັດ, ນຳໃຊ້ເຕັກນິກເຂົ້າໃນການຜະລິດ, ສ້າງເງື່ອນໄຂສະດວກໃຫ້ການຈະລາຈອນຜະລິດຕະພັນທີ່ກາຍເປັນສິນຄ້າ ແລະ ສ້າງລາຍຮັບໃຫ້ແກ່ປະຊາຊົນ.
“ການພົວພັນທາງການທູດລະຫວ່າງສອງປະເທດຢູ່ເຂດຊາຍແດນກໍໄດ້ຮັບຄວາມສະດວກກວ່າ. ຄວາມສາມັກຄີມິດຕະພາບແບບພິເສດລະຫວ່າງສອງປະເທດ, ສອງຊົນເຜົ່າ ນັບມື້ນັບສະໜິດແໜ້ນ ແລະ ແໜ້ນແຟ້ນ”, ທ່ານພົນຈັດຕະວາ ເຈີນດິງຢູງ ໃຫ້ຮູ້.
ມາຮອດປະຈຸບັນ, ຫວຽດນາມ - ລາວ ກໍໄດ້ຈັດຕັ້ງໃຫ້ຄູ່ບ້ານຢູ່ຕໍ່ໜ້າຂອງສອງຟາກຊາຍແດນໄດ້ແຮກສ່ຽວກັນເປັນຈໍານວນ 103 ຄູ່ບ້ານ. ໃນໄລຍະຈະມາເຖິງ, ກິດຈະກໍາເຊື່ອມຕໍ່ ແລະ ໜູນຊ່ວຍ, ອຳນາດການປົກຄອງທ້ອງຖິ່ນຂອງສອງປະເທດຈະສົມທົບກັນຜັນຂະຫຍາຍ, ນຳເອົາ “ການແຮກສ່ຽວບ້ານຕໍ່ບ້ານ” ເຂົ້າສູ່ລວງເລິກ, ນຳມາເຊິ່ງປະສິດທິຜົນຫຼາຍຢ່າງໃຫ້ແກ່ປະຊາຊົນ, ປະກອບສ່ວນເຂົ້າໃນການປ່ຽນແປງໂສມໜ້າຢູ່ເຂດຊາຍແດນ, ກໍຄືສ້າງເຂດຊາຍແດນໃຫ້ເປັນເຂດແຫ່ງສັນຕິພາບ, ມິດຕະພາບ ແລະ ພັດທະນາ.
ຫອມມາລາ