ວັນທີ 5 ຕຸລາ, ຢູ່ຮ່າໂນ້ຍ, ທ່ານນາງ ຫງວຽນເຟືອງງາ, ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ (VUFO) ໄດ້ມີການເຮັດວຽກກັບຄະນະຜູ້ແທນຄະນະກຳມະການສັນຕິພາບ ແລະ ສາມັກຄີລາວ ນຳໂດຍທ່ານ ສົມມາດ ພົນເສນາ ກໍາມະການສູນກາງພັກ, ຮອງປະທານສະພາແຫ່ງຊາດລາວ, ປະທານຄະນະກຳມະການສັນຕິພາບ ແລະ ສາມັກຄີລາວ ເປັນຫົວໜ້າຄະນະ.
ທ່ານປະທານ ຫງວຽນເຟືອງງາ ໃຫ້ຮູ້ວ່າ: “ສະເດັດເຈົ້າ ສຸພານຸວົງ, ທັງເປັນ ປະທານແນວລາວອິດສະຫຼະ ແລະ ປະທານປະເທດ ສປປ ລາວ ໄດ້ເຂົ້າຮ່ວມກອງປະຊຸມໃຫຍ່ສ້າງຕັ້ງຄະນະກຳມະການປົກປັກຮັກສາສັນຕິພາບໂລກ ຂອງຫວຽດນາມ (ປະຈຸບັນ, ແມ່ນຄະນະກຳມະການສັນຕິພາບ ຫວຽດນາມ) ໃນວັນທີ 19 ພະຈິກ 1950. ຂ້າພະເຈົ້າດີໃຈທີ່ຄະນະປະທານຄະນະກຳມະການລຸ້ນຕ່າງໆທັງສອງຄະນະປະຈຸບັນພວມສືບຕໍ່ເສີມຂະຫຍາຍມູນເຊື້ອນັ້ນ. ສອງຝ່າຍໄດ້ຮັກສາການແລກປ່ຽນຄະນະຜູ້ແທນ, ສົມທົບກັນ ແລະ ໜູນຊ່ວຍເຊິ່ງກັນແລະກັນຢູ່ບັນດາເວທີປາໄສຫຼາຍຝ່າຍຢ່າງແທດຈິງ ແລະ ມີປະສິດທິຜົນ.
 |
| ທ່ານນາງ ຫງວຽນເຟືອງງາ ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ ໄດ້ໃຫ້ການຕ້ອນຮັບຄະນະຜູ້ແທນຄະນະກຳມະການສັນຕິພາບ ແລະ ສາມັກຄີລາວ. ພາບ: ທູຮ່າ |
ຕາມທ່ານນາງປະທານ ຫງວຽນເຟືອງງາ ແລ້ວ, VUFO ຈະສ້າງທຸກເງື່ອນໄຂໃນຄວາມສາມາດເພື່ອໃຫ້ສະມາຄົມມິດຕະພາບຫວຽດນາມ - ລາວ, ຄະນະກຳມະການສັນຕິພາບຫວຽດນາມ ແລະ ບັນດາອົງການສະມາຊິກອື່ນໆສືບຕໍ່ເພີ່ມທະວີການພົວພັນກັບບັນດາອົງການຈັດຕັ້ງຂອງປະເທດລາວຢ່າງບໍ່ຢຸດຢັ້ງ; ຈັດການພົບປະແລກປ່ຽນມິດຕະພາບລະຫວ່າງສອງປະເທດ, ສືບຕໍ່ສົມທົບກັນກັບເພື່ອນລາວໃນບັນດາກົນໄກຮ່ວມມືລະຫວ່າງປະຊາຊົນຫຼາຍຝ່າຍຢ່າງແໜ້ນແຟ້ນ.
ທ່ານນາງ ຫງວຽນເຟືອງງາ ສະເໜີວ່າ ໃນໄລຍະຈະມາເຖິງ, ສອງຝ່າຍຄວນສົມທົບກັນຈັດຕັ້ງບັນດາການເຄື່ອນໄຫວພົບປະແລກປ່ຽນ ແລະ ການຮ່ວມມື ເພື່ອປະຕິບັດບົດບາດເປັນຂົວຕໍ່ຮ່ວມມືລະຫວ່າງສອງປະເທດໃນທຸກຂົງເຂດຢ່າງມີປະສິດທິຜົນ. ພິເສດແມ່ນຕ້ອງເພີ່ມທະວີການສຶກສາມູນເຊື້ອໃຫ້ປະຊາຊົນສອງປະເທດ, ເປັນຕົ້ນແມ່ນລຸ້ນໜຸ່ມ ໄດ້ມີຄວາມເຂົ້າໃຈກ່ຽວກັບສາຍພົວພັນມິດຕະພາບທີ່ຫາຍາກ ແລະ ບໍລິສຸດຜຸດຜ່ອງຂອງຫວຽດນາມ - ລາວ ຢ່າງເລິກເຊິ່ງ.
 |
| ທ່ານນາງ ຫງວຽນເຟືອງງາ ມອບວາລະສານສະບັບພິເສດ “60 ປີແຫ່ງການພົວພັນມິດຕະພາບຫວຽດນາມ - ລາວ: ຮ່ວມສາຍພູຫຼວງເຈື່ອງເຊີນ” ຂອງວາລະສານຍຸກສະໄໝ ໃຫ້ ທ່ານ ສົມມາດ ພົນເສນາ ປະທານຄະນະກຳມາະການສັນຕິພາບ ແລະ ສາມັກຄີລາວ. ພາບ: ທູຮ່າ |
 |
 |
ກ່າວຄຳເຫັນທີ່ການຕ້ອນຮັບ, ທ່ານ ສົມມາດ ພົນເສນາ ປະທານຄະນະກຳມະການສັນຕິພາບ ແລະ ສາມັກຄີລາວ ໃຫ້ຮູ້ວ່າ: ທ່ານໄດ້ເລືອກຫວຽດນາມເປັນປະເທດທຳອິດທີ່ຈະມາຢ້ຽມຢາມພາຍຫຼັງໄດ້ຮັບການມອບໝາຍໜ້າທີ່ໃໝ່. ການຢ້ຽມຢາມໄດ້ດຳເນີນເນື່ອງໃນໂອກາດສະເຫຼີມສະຫຼອງປີສາມັກຄີມິດຕະພາບ ຫວຽດນາມ - ລາວ, ລາວ - ຫວຽດນາມ 2022, ແລະ ສອງປະເທດພວມດຳເນີນບັນດາການເຄື່ອນໄຫວສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດ ແລະ 45 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມືລະຫວ່າງ ຫວຽດນາມ ແລະ ລາວ. ໜ້າທີ່ຂອງຄະນະກຳມະການສັນຕິພາບ ແລະ ສາມັກຄີແລາວແມ່ນການສ້າງສາ ແລະ ເພີ່ມພູນຄູນສ້າງສາຍພົວພັນທາງການທູດປະຊາຊົນລະຫວ່າງສອງປະເທດ.
ໃນໂອກາດນີ້, ທ່ານ ສົມມາດ ພົນເສນາ ໄດ້ເຊີນປະທານ VUFO ໄປຢ້ຽມຢາມ ສປປ ລາວ ໃນເວລາທີ່ເໝາະສົມ ແລະ ແລກປ່ຽນປະສົບການກ່ຽວກັບດ້ານການທູດຂອງປະຊາຊົນ.
ທ່ານນາງ ຫງວຽນເຟືອງງາ ໃຫ້ຮູ້ວ່າ VUFO ພ້ອມແລ້ວທີ່ຈະແບ່ງປັນປະສົບການກິດຈະກໍາເຄື່ອນໄຫວກັບຄະນະກຳມະການສັນຕິພາບ ແລະ ສາມັກຄີລາວ. ທ່ານນາງ ເຊື່ອໝັ້ນວ່າ ຄະນະກຳມະການຈະປະສົບຜົນສຳເລັດໃນການປະຕິບັດໜ້າທີ່, ຊຸກຍູ້ການຮ່ວມມືໃນທຸກຊ່ອງທາງການພົວພັນປະຊາຊົນ, ເສີມຂະຫຍາຍບົດບາດ ແລະ ກຳລັງແຮງຂອງລາວ, ເພີ່ມທະວີທີ່ຕັ້ງບົດບາດຂອງລາວ ໃນເວທີປາໄສປະຊາຊົນສາກົນກວ່າອີກ.
ບູນມີ
