ບຸນເຕັດອາດຈະແມ່ນໂອກາດພິເສດທີ່ສຸດຂອງແມ່ຍິງຫວຽດນາມ. ກິນອາຫານ ໃນບຸນເຕັດ, ລະຫຼີ້ນໃນບຸນເຕັດ, ຄົນເຮົາສາມາດຊື້ເຄື່ອງທີ່ປຸ່ງແຕ່ງແລ້ວໃນທາງ ອອນລາຍ, ຫຼື ໄປຕະຫຼາດ, ໄປຊຸບເປີມາເກັດ... ແຕ່ກໍ່ຍັງມີຄົນທີ່ມັກເຮັດເອງ ແຕ່ງເຍື່ອງອາຫານ, ບ໊ວຍຫມາກໄມ້ໃນວັນບຸນເຕັດ.
ພາເຂົ້າປະເພນີ…
ໃນວັນບຸນເຕັດ, ແນ່ນອນວ່າ ຄອບຄົວໃດກໍ່ລ້ວນແຕ່ຢາກມີອາຫານພື້ນເມືອງຢູ່ພາເຂົ້າ. ສຳລັບບັນດາຄອບຄົວທີ່ມີຫຼາຍລຸ້ນຄົນ, ບາງເທື່ອເຍື່ອງອາຫານພື້ນເມືອງນີ້ແມ່ນໄດ້ຮັບການປຶກສາ ແລະ “ບັນຊາ” ໂດຍກົງຈາກແມ່ຕູ້ ແລະ ແມ່, ດ້ວຍປະສົບການ ແລະ ຄວາມຮູ້ທີ່ໄດ້ຮັກສາ ແລະ ສືບທອດຕໍ່ມາຈາກຫຼາຍລຸ້ນຄົນ. ວິທີການເຮັດອາຫານເຫຼົ່ານີ້ມີທັງງ່າຍ ທັງຍາກ. ມັນງ່າຍເພາະ ມັນກາຍເປັນຄວາມລຶ້ງເຄີຍ, ກາຍເປັນມູນເຊື້ອຈາກປີນີ້ຮອດໜ້າ. ມັນເປັນເລື່ອງຍາກ ເພາະວ່າ ຕ້ອງປະຕິບັດຕາມກົດທີ່ບໍ່ໄດ້ຂຽນໄວ້ໃນອາຫານ, ບໍ່ສາມາດປ່ຽນແປງເປັນແນວໃດກໍ່ໄດ້. ຕົວຢ່າງວ່າ, ເຂົ້າໜຽວຫມາກເຂົ້າຕ້ອງມີນ້ຳມັນໄກ່ໜ້ອຍໜຶ່ງ ເພື່ອໃຫ້ມັນເຫຼື້ອມ, ໜຶ້ງເຂົ້າໜຽວບໍ່ໃຫ້ສອງຄົນໜຶ້ງ. ເຂົ້າຕົ້ມ ມີສີຂຽວຢູ່ພາຍນອກ, ພາຍໃນສີຂາວ, ເປືອກນອກແໜ້ນ ແກນໃນອ່ອນ.
ເຍື່ອງອາຫານ "ເຮັດຢູ່ເຮືອນ"
 |
| ພາບປະກອບ: nhandan.vn |
ເຮັດອາຫານບຸນເຕັດເອງຢູ່ເຮືອນ ສ່ວນໃດສ່ວນໜຶ່ງເລິ່ມມາຈາກໄລຍະເກື້ອກູນ, ຊຸມເດືອນປີທີ່ປະສົບກັບຄວາມຫຍຸ້ງຍາກໃນທຸກສິ່ງທຸກຢ່າງເຮັດໃຫ້ແມ່ບ້ານຕ້ອງເຮັດບັນດາເຍື່ອງອາຫານເອງເພື່ອພຽງພໍຈັດໃນວັນບຸນເຕັດໄດ້ຄົບຖ້ວນ. ຂຽບໝູ ແມ່ນຫນຶ່ງໃນບັນດາເຍື່ອງອາຫານຄືດັ່ງນັ້ນ.
ແຕ່ກີ້ແຕ່ກ່ອນ, ພາບທີ່ເຮືອນທຸກຫຼັງລ້ວນແຕ່ມີໜັງໝູຕັດເປັນສີ່ຫຼ່ຽມສຽບເຂົ້າໄມ້ໄຜ່ເພື່ອຕາກຢູ່ນອກປະຕູ, ແມ່ນຄຸ້ນເຄີຍທີ່ສຸດ. ຊີ້ນໝູມີຈຳນວນໜ້ອຍ ຕ້ອງຊື້ຕາມບັດ, ເຂົາຕັດໜັງໝູເປັນປ່ຽງ, ແຖຂົນໃຫ້ສະອາດ, ລ້າງດ້ວຍເຫຼົ້າ ຂີງ ຫຼື ຫີນສົ້ມ, ສຽບໃສ່ໄມ້ໄຜ່ ແລ້ວຕາກແດດ ຫຼື ຝີງໃສ່ຖ່ານ. ປະຈຸບັນນີ້ ບໍ່ມີຫຼາຍຄົນທີ່ມັກກິນອີກ, ອາຫານຊະນິດນີ້ສາມາດຫາຊື້ໄດ້ງ່າຍດາຍ, ສະນັ້ນ ບໍ່ມີຫຼາຍຄົນທີ່ເຮັດກິນເອງ. ແຕ່ກໍໍ່ຍັງມີຄົນລະນຶກເຖິງສີມືເດີມຂອງແມ່ເຖົ້າ ແລະ ແມ່ເຊິ່ງເອົາໜັງໝູມາຕັດເປັນປ່ຽງ, ສຽບໃສ່ໄມ້ໄຜ່, ຕາກໃຫ້ແຫ້ງຄືໃນສະໄໝກ່ອນ.
ເຍື່ອງອາຫານອີກອັນໜຶ່ງ, ບໍ່ຄ່ອຍໄດ້ກ່າວເຖິງແຕ່ກ່ອນຮອດບຸນເຕັດ, ແມ່ເຖົ້າ ແມ່ ກໍ່ເຮັດ ແລະ ນຳໃສ່ພາ, ກະດົ້ງຕາກໃຫ້ແຫ້ງຢູ່ນອກເດີ່ນບ້ານ, ຢູ່ເທິງຫຼັງຄາ, ເຊິ່ງແມ່ນຫົວຜັກກາດແຫ້ງ. ຫົວຜັກກາດຖືກຊອຍໃຫ້ບາງໆ, ຂັດ, ແລະ ຕາກແດດໃຫ້ແຫ້ງ. ໃກ້ບຸນເຕັດ, ອາກາດມືດຄຶ້ມ, ມີແດດໜ້ອຍໜຶ່ງ, ເຮືອນໃດມີເຕົາໃຊ້ຟືນ ກໍຈະໝູນໃຊ້ເພື່ອຝີງຫົວຜັກກາດຢູ່ເທິງ. ຫົວຜັກກາດແຫ້ງແມ່ນເກັບໄວ້, ມັກໃຊ້ໃນເຍື່ອງອາຫານທີ່ສົ້ມໆຫວານໆ ຫຼື ກິນກັບ ເຂົ້າປຸ້ນທາງ, ເຊິ່ງເປັນຊີ້ນທີ່ເຫຼືອຫຼັງຈາກບຸນເຕັດ.
ນອກຈາກບັນດາເຍື່ອງອາຫານໃສ່ໃນພາເຂົ້າແລ້ວ, ບ໊ວຍຫມາກໄມ້ ແມ່ນເຍື່ອງທີ່ແມ່ເຖ້າ, ແມ່ເຮືອນໄດ້ເຮັດເອງອີກ. ຫມາກໂປມ, ຫມາກດາວ, ໝາກແປ້ນ ... ແມ່ນຫມາກໄມ້ທີ່ໄດ້ເລືອກເຮັດຫຼາຍທີ່ສຸດ ຍ້ອນເຮັດ... ງ່າຍ. ຫມາກ ໂປມ ເລືອກຫມາກໂປມສີຂຽວ, ກອບ, ບໍ່ຄວນເລືອກຫມາກໂປມແປ້ງເພາະວ່າ ມັນກ່ຽວຂ້ອງກັບຄວາມໜຽວນຸ່ມຂອງຜະລິດຕະພັນທີ່ເຮັດສໍາເລັດ. ຫມາກໂປມ ຖືກລ້າງໃຫ້ສະອາດ, ໃຊ້ໄມ້ຈີ້ມແຂ້ວແຫຼມ ຈີ້ມ ຫຼື ມີດຂີດໆອ້ອມຫມາກໂປມ. ແຊ່ຫມາກໂປມໃນນ້ໍາປູນຂາວປະມານ 8 ຊົ່ວໂມງເພື່ອໃຫ້ມີຄວາມໜຽວນຸ່ມ. ຈາກນັ້ນນຳມາຈຸ່ມນ້ຳຮ້ອນແລ້ວລ້າງອອກ. ແຊ່ຫມາກໂປມດ້ວຍນໍ້າຕານ, ຈົນນໍ້າຕານລະລາຍເປັນນ້ຳ, ຫຼັງຈາກນັ້ນເອົາໄປຂົ້ວຈົນຫມາກໂປມມີສີເຫຼືອງຊ້ໍາ. ແຜ່ຫມາກໂປມໃສ່ພາ ຫຼື ກະດົ້ງ ເພື່ອຕາດແຫ້ງ ຫຼື ອົບແຫ້ງ.
… ເຖິງເຍື່ອງອາຫານທັນສະໄໝ
ໃນປະຈຸບັນ, ການພັດທະນາຢ່າງກວ້າງຂວາງຂອງອິນເຕີເນັດ ແລະ ອຸປະກອນມືຖື ໄດ້ຊ່ວຍແມ່ບ້ານຫຼາຍຄົນຢ່າງຫຼວງຫຼາຍ. ບໍ່ພຽງແຕ່ເທົ່ານັ້ນ, ທ່າອ່ຽງຫຼາຍດ້ານກ່ຽວກັບເຍື່ອງອາຫານເຮັດເອງໃນບຸນເຕັດ ກໍຍັງໄດ້ຮັບຄວາມນິຍົມຊົມຊອບ, ດຶງດູດການເຂົ້າຮ່ວມຂອງເອື້ອຍນ້ອງແມ່ຍິງເປັນຈຳນວນຫລວງຫລາຍ.
ໃນຊຸມປີກ່ອນ, ກ່ອນບຸນປີໃໝ່ປະຈໍາຊາດປະມານໜື່ງເດືອນ ແມ່ນເວລາທີ່ຜູ້ຍິງຫລາຍຄົນມັກແຊ່ເຫຼົ້າແວງດ້ວຍຫມາກໄມ້. ເຫຼົ້າແວງຫມາກໄມ້ ຕົວຈິງແລ້ວ ແມ່ນຄ້າຍຄື ຊີໂຣ, ເພີ່ມເຫຼົ້າເລັກນ້ອຍ. ຫມາກໄມ້ປະກອບມີຫຼາຍຊະນິດ ຄື: ຫມາກໂປມ, ສະຕໍເບີຣີ, ຫມາກອະງຸ່ນ, ຫມາກກ້ຽງ, ຫມາກນັດ, ຫມາກກີວີ… ເຫຼົ້າແວງໝາກໄມ້ສ້າງຄວາມນິຍົມ ຕົ້ນຕໍແມ່ນຍ້ອນ ໝາກໄມ້ສ້າງຮູບຊົງທີ່ ສວຍງາມ ແລະ ເປັນຕາຈັບໃຈໃຫ້ແຫ່ໄຫເຫຼົ້າ. ຫມາກໄມ້ໄດ້ຊອຍເປັນປ່ຽງ ບາງໆແຊ່ນ້ໍາດ້ວຍບີຕານ, ຕື່ມເຫຼົ້າເຂົ້າຫນຽວເລັກນ້ອຍ ຫຼື vodka. ເຫຼົ້າແຊ່ປະມານຫນຶ່ງເດືອນແມ່ນສາມາດດື່ມໄດ້, ຫວານ, ມີກິ່ນຫອມ ແລະ ດື່ມງ່າຍ, ເຫມາະກັບແມ່ຍິງດື່ມ. ງາມ ແລະ ດື່ມງ່າຍ, ສະນັ້ນ ໃນໄລຍະຍາວ ວິທີແຊ່ເຫຼົ້າໝາກໄມ້ໄດ້ສ້າງຄວາມນິຍົມຕໍ່ແມ່ຄົວໃນທົ່ວສື່ສັງຄົມອອນລາຍ.
 |
| ພາບປະກອບ: nhandan.vn |
ຫນຶ່ງໃນບັນດາເຍື່ອງອາຫານກໍ່ເຄີຍສ້າງຄວາມນິຍົມທີ່ສຸດໃນສື່ສັງຄົມອອນລາຍ ແລະ ມາຮອດປັດຈຸບັນຍັງມີຫຼາຍຄົນນິຍົມ, ນັ້ນແມ່ນຊີ້ນຂາງົວແຊ່ນ້ໍາປາ. ລົດຊາດສົ້ມໆ ເຄັມໆ ແລະ ກອບ, ຫອມ, ເຍື່ອງອາຫານນີ້ໄດ້ກາຍເປັນ ເຍື່ອງທີ່ ມີຈຸດກົງກັນຂ້າມກັບເຂົ້າຕົ້ມທີ່ຊີ້ນມີມັນຫຼາຍ ກໍ່ເຮັດໃຫ້ກິນໄດ້ຍາກໃນຊຸມວັນບຸນເຕັດ. ຊີ້ນຂາງົວແຊ່ນໍ້າປາເຮັດງ່າຍທີ່ສຸດ, ພຽງແຕ່ເລືຶອກຊື້ຊີ້ນຂາງົວທີ່ເປັນຕາແຊບ, ຕົ້ມກັບນໍ້າໃສ່ຫົວຂີງຈີ່, ຫົວຜັກບົ່ວຈີ່, ແຄ່, ຫມາກແໜ່ງ ແລະ ນ້ຳປາເລັກນ້ອຍ. ຫຼັງຈາກນັ້ນ, ປະສົມນ້ຳປາ, ນ້ຳຕານ, ນ້ຳສົ້ມຕາມລົດຊາດໃຫ້ແຊບໆ, ຕົ້ມໃຫ້ຟົດ, ໄວ້ໃຫ້ເຢັນແລ້ວເອົາຊີ້ນງົວໃສ່, ໃສ່ຫົວຜັກທຽມ, ຫມາກຜັດ ແລະ ຫມາກພິກໄທຂຽວໃສ່ໃຫ້ຫອມ, ມີລົດຊາດເຜັດເລັກນ້ອຍ ແລະ ເບິ່ງງາມຕາມອີກ.
ໃນຍຸກສະໄໝເຕັກໂນໂລຢີ 4.0, ພຽງແຕ່ມີສະມາດໂຟນເຊື່ອມຕໍ່ອິນເຕີເນັດ, ແມ່ບ້ານບາງຄັ້ງບໍ່ຈຳເປັນຕ້ອງເຮັດຫຍັງໃນເຮືອນຄົວ, ພຽງແຕ່ກົດລະຈະມີ ເຍື່ອງອາຫານທຸກເຍື່ອງທີ່ເຕັມພາເຂົ້າໃນບຸນເຕັດ, ຄົບຖ້ວນ ນັບແຕ່ເຍື່ອງບ໊ວຍຫມາກໄມ້, ໝາກໄມ້ແຫ້ງເອືອບເກືອຈົນຮອດແກ່ນ ໝາກທຸກປະເພດ. ແຕ່ສໍາລັບຫຼາຍຄົນ, ເລື່ອງເຮັດອາຫານເອງໃນບຸນເຕັດບໍ່ພຽງ ແຕ່ຝາກຄວາມຮັກແພງໃຫ້ແກ່ຄອບຄົວໃນບັນດາເຍື່ອງອາຫານ, ຝາກຄວາມແຊບໆ, ຫວານໆ ເຂົ້າໃນນັ້ນເທົ່ານັ້ນ, ຫາກບາງທີກໍ່ຍັງແມ່ນຄວາມຊົງຈໍາ ຄິດເຖິງວັນບຸນເຕັດເກົ່າທີ່ມີແມ່ເຖົ້າ, ມີແມ່ຢູ່ຄຽງຂ້າງກັນ...
ບູນມີ
