| ປະທານແນວໂຮມປະເທດຊາດ ອວຍພອນພໍ່ແມ່ປະຊາຊົນຊາວຂະແມ ເນື່ອງໃນໂອກາດບຸນເຕັດ Chol Chnam Thmay | |
| ກະຊວງສາທາລະນະສຸກ: ສ້າງເງື່ອນໄຂສະດວກ ໃຫ້ປະຊາຊົນເຂົ້າເມືອງຫວຽດນາມ ໃນໄລຍະບຸນປີໃຫມ່ (ບຸນເຕັດ) |
ທີ່ງານສະຫຼອງບຸນປິໃໝ່ ມີການເຂົ້າຮ່ວມຂອງທ່ານ ນາງ ລັດຕະນາ ສີຫາລາດ, ຮອງເອກອັກຄະລັດຖະທູດ ລາວ ປະຈໍາ ຫວຽດນາມ; ທ່ານ ຮສ.ປອ ເຢື່ອງຈຸ່ງອີ໋ - ຮອງຜູ້ອຳນວຍການສະຖາບັນການເມືອງແຫ່ງຊາດ ໂຮ່ຈີມິນ ພ້ອມກັບຜູ້ຕາງໜ້າການນຳ, ພະນັກງານ, ຄູອາຈານ, ນັກສຶກສາລາວ ທີ່ພວມຮ່ຳຮຽນຢູ່ສະຖາບັນສູນກາງ ແລະ ບັນດາສະຖາບັນຂຶ້ນກັບຢູ່ເຂດພາກເໜືອ.
ໃນພິທີ, ທ່ານ ຮສ.ປອ ເຢື່ອງຈຸ່ງອີ໋ ຕາງໜ້າໃຫ້ຄະນະອຳນວຍການ ພ້ອມພະນັກງານທັງໝົດຢູ່ສະຖາບັນ ສົ່ງຄຳອວຍພອນປີໃໝ່ເຖິງພະນັກງານ, ລັດຖະກອນຂອງສະຖານທູດ ລາວ ແລະ ບັນດານັກສຶກສາລາວທີ່ຮຽນຢູ່ສະຖາບັນ.
 |
| ບັນດາຜູ້ແທນ ໄດ້ຜູກແຂນ ເພື່ອຂໍຄວາມໂຊກດີໃນປີໃໝ່ (ພາບ: Minh Anh) |
ບັນດາຜູ້ແທນ ໄດ້ພ້ອມກັນຫວນຄືນສາຍພົວພັນມິດຕະພາບທີ່ເປັນມູນເຊື້ອອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ - ຫວຽດນາມ ແລະ ພ້ອມກັນຂໍໃຫ້ປະຊາຊົນສອງປະເທດມີໂຊກລາບ ແລະ ມີແຕ່ສິ່ງດີໆໃນປີໃໝ່. ບັນດາຜູ້ແທນ ຍັງໄດ້ຊອກຮູ້ບັນດາຈຸດງາມຂອງວັນບຸນປີໃໝ່ ລາວ, ຄ້ອງພວງມະໄລດອກຈຳປາ (ດອກໄມ້ປະຈຳຊາດລາວ), ເຂົ້າຮ່ວມພິທີບາສີສູ່ຂວັນ, ມ່ວນຊື່ນກັບບັນດາທຳນອງເພງ, ຊິມອາຫານພື້ນເມືອງຂອງປະເທດ ລາວ, ພ້ອມກັນຟ້ອນລຳວົງ, ມອບຄວາມຮັກແພງທີ່ສະໜິດສະໜົມໃຫ້ກັນໂດຍຜ່ານບັນດາເນື້ອເພງ ແລະ ການຮ້ອງເພງກ່ຽວກັບມິດຕະພາບ ຫວຽດນາມ - ລາວ.
ທ່ານ ທອງຄຸນ ບຸນເລີດ, ນັກສຶກສາ K30 ຂະແໜງການເມືອງວິທະຍາ ເລົ່າວ່າ “ນີ້ແມ່ນປີທີ 2 ທີ່ຂ້າພະເຈົ້າຕ້ອນຮັບບຸນໃໝ່ລາວ ຢູ່ ຫວຽດນາມ. ບຸນປີໃໝ່ລາວ ຢູ່ປະເທດເພື່ອນໄດ້ມີການເຂົ້າຮ່ວມຢ່າງຄຶກຄື້ນຂອງຜູ້ຕາງໜ້າສະຖານທູດ ລາວ ປະຈຳ ຫວຽດນາມ, ຂອງບັນດານັກສຶກສາລາວ ພ້ອມກັບບັນດາຄູອາຈານ, ເພື່ອນມິດ ຫວຽດນາມ. ໃນວັນງານບຸນ, ກໍມີບັນດາພິທີທີ່ທີ່ເປັນປະເພນີຂອງ ລາວ ຄືກັນກັບຢູ່ລາວ ເຊັ່ນ: ພິທີບາສີສູ່ຂວັນ, ຫົດນ້ຳ. ບັນຍາກາດທີ່ສະໜິດສະໜົມ, ອົບອຸ່ນ ພ້ອມກັບຄວາມຮັກແພງ, ຄວາມເອົາໃຈໃສ່ຂອງບັນດາຄູສອນ, ເພື່ອນມິດ ຫວຽດນາມ ໄດ້ຊ່ວຍໃຫ້ພວກຂ້າພະເຈົ້າບັນເທົາຄວາມຄິດຮອດບ້ານ, ພ້ອມກັນນັ້ນ ກໍ່ຮູ້ສຶກໄດ້ເຖິງຄວາມສາມັກຄີມິດຕະພາບລະຫວ່າງສອງປະເທດຫຼາຍກວ່າອີກ”.
“ໄປຮຽນຢູ່ໄກບ້ານ, ບໍ່ສາມາດຕ້ອນຮັບບຸນປີໃໝ່ລາວ ກັບຄອບຄົວ, ຍາດຕິພີ່ນ້ອງ ແຕ່ນັກສຶກສາລາວ ຍັງຮູ້ສຶກອົບອຸ່ນ, ມີຄວາມສຸກຄືຢູ່ບ້ານ ເພາະເຂົາເຈົ້າໄດ້ຮັບຄວາມຮັກແພງ, ຄວາມເອົາໃຈໃສ່, ຊ່ວຍເຫຼືອຈາກຄູອາຈານ ຫມູ່ເພື່ອນຢູ່ໃນສະຖາບັນ. ຫວຽດນາມ ກໍ່ໄດ້ກາຍເປັນບ້ານເກີດເມືອງນອນແຫ່ງທີ 2 ຂອງບັນດານັກສຶກສາລາວ ເຮົາ". ທ່ານ ນາງ ທອງມີ ສີຫາວົງ, ຜູ້ຕາງໜ້າຄະນະນັກສຶກສາລາວ ທີ່ສະຖາບັນການເມືອງແຫ່ງຊາດ ໂຮ່ຈີມິນ ກ່າວ.
ໂດຍແລກປ່ຽນກັບນັກຂ່າວຂອງວາລະສານຍຸກສະໄໝ, ທ່ານ ຮສ.ປອ ເຢື່ອງຈຸ່ງອີ໋ - ຮອງຜູ້ອຳນວຍການສະຖາບັນການເມືອງແຫ່ງຊາດ ໂຮ່ຈີມິນ ໃຫ້ຮູ້ວ່າ ປະຈຸບັນ ມີນັກສຶກສາລາວ ປະມານ 200 ກວ່າຄົນທີ່ພວມຮ່ຳຮຽນຢູ່ລະບົບສະຖາບັນ, ໃນນັ້ນ ສະຖາບັນສູນກາງມີນັກສຶກສາລາວ 116 ຄົນ. ແຕ່ລະປີ, ຢູ່ສະຖາບັນການເມືອງແຫ່ງຊາດ ໂຮ່ຈີມິນ ສູນກາງ ແລະ ບັນດາສະຖາບັນທີ່ຂຶ້ນກັບ ໄດ້ສົມທົບກັບຄະນະນັກສຶກສາລາວ ຈັດພິທີຕ້ອນຮັບປີໃໝ່ລາວ ໃຫ້ແກ່ນັກສຶກສາລາວ. ປີນີ້, ບຸນປີໃໝ່ລາວ ກໍ່ໄດ້ຮັບການຈັດຂື້ນດ້ວຍຂອບຂະໜາດໃຫຍ່ກ່ວາອີກ. ແທນທີ່ຈະຈັດຢູ່ແຕ່ຮາກຖານຕ່າງຫາກ, ສະຖາບັນໄດ້ເຊີນນັກສຶກສາລາວທຸກຄົນທີ່ຮຽນຢູ່ສະຖາບັນສູນກາງ, ສະຖາບັນການເມືອງເຂດ I, ສະຖາບັນໂຄສະນາ ແລະ ຂ່າວສານ ເຂົ້າຮ່ວມງານສະຫຼອງບຸນປີໃໝ່ຢູ່ສະຖາບັນສູນກາງ. ພິທີດັ່ງກ່າວແມ່ນໂອກາດເພື່ອໃຫ້ບັນດາພະນັກງານ, ຄູອາຈານຢູ່ສະຖາບັນ ໄດ້ມີການພະປະແລກປ່ຽນກັບບັນດານັກສຶກສາລາວ, ພ້ອມຮັບຊົມບັນດາຈຸດຄວາມງາມທີ່ຍອດຍິ່ງ, ຈຸດທີ່ເປັນເອກະລັກພິເສດໃນວັດທະນະທຳຮີດຄອງປະເພນີຂອງປະເທດ, ມີຄວາມເຂົ້າໃຈກ່ຽວກັບປະເທດຊາດ, ປະຊາຊົນ ລາວ ຫລາຍຂຶ້ນ.
ຕາມທ່ານ ຮສ.ປອ ເຢື່ອງຈຸ່ງອີ໋ - ຮອງຜູ້ອຳນວຍການສະຖາບັນການເມືອງແຫ່ງຊາດ ໂຮ່ຈີມິນ ກ່າວ: ນັກສຶກສາ, ສຳມະນາກອນລາວ ຍາມໃດກໍປະຕິບັດລະບຽບຂອງສະຖາບັນຢ່າງເຂັ້ມງວດ, ດຸໝັ່ນ, ພາກພຽນໃນການຮ່ຳຮຽນ, ຄົ້ນຄວ້າ.
ສະຖາບັນ ໄດ້ ແລະ ພວມຜັນຂະຫຍາຍຫຼາຍໝວດມາດຕະການແກ້ໄຂຢ່າງຄົບຊຸດ ເພື່ອຊຸກຍູ້, ເພີ່ມທະວີຍົກສູງຄຸນນະພາບຂອງການບຳລຸງສ້າງພະນັກງານສໍາລັບນັກສຶກສາລາວ. ໃນນັ້ນ ມີການສຸມໃສ່ການປ່ຽນແປງໃໝ່ບັນດາເນື້ອໃນຫຼັກສູດການບຳລຸງສ້າງ, ຮັບປະກັນທັງມີລັກສະນະລະບົບພື້ນຖານ ແລະ ທັນສະໄໝ, ຕິດແທດລັກສະນະຕົວຈິງ, ພິເສດແມ່ນສະພາບຕົວຈິງຢູ່ພາຍໃນ ແລະ ຕ່າງປະເທດ ກັບເພື່ອນລາວ. ເອົາໃຈໃສ່ປັບປຸງວິທີການສອນຕາມທິດທີ່ແທດຈິງ, ມີປະສິດທິຜົນ, ເໝາະສົມກັບແຕ່ລະເປົ້າໝາຍບຳລຸງສ້າງ, ເສີມຂະຫຍາຍກຳລັງຄວາມສາມາດໃນຄວາມຄິດສ້າງຂອງຜູ້ຮຽນຢ່າງສູງສຸດ; ຝຶກທັກສະເປັນຜູ້ນຳ, ຄຸ້ມຄອງ ແລະ ແກ້ໄຂບັນດາສະພາວະການທີ່ເກີດຂຶ້ນໃນຕົວຈິງ. ພ້ອມກັນນັ້ນ, ກໍ່ຍົກສູງຄຸນນະພາບຂອງຄູອາຈານ ແລະ ພະນັກງານທີ່ເຮັດວຽກງານຄຸ້ມຄອງການບຳລຸງສ້າງ; ຍູ້ແຮງການນຳໃຊ້ເຕັກໂນໂລຢີຂໍ້ມູນໃນການບຳລຸງສ້າງ; ຍົກລະດັບພື້ນຖານໂຄງລ່າງ, ພື້ນຖານວັດຖຸ ເພື່ອນຳໃຊ້ໃນການຄົ້ນຄວ້າສຶກສາໃຫ້ແກ່ເພື່ອນລາວ.
ມິງດຶກ
