ລາວ-ໄທ ຮ່ວມໃຈກັນຕ້ານໄຟໄໝ້ລາມປ່າ

ດັ່ງນັ້ນ, ໃນວັນທີ 18 ກຸມພາ 2019 ນີ້, ການນໍາຂອງ3 ແຂວງ, 2 ແຜ່ນດິນດັ່ງກ່າວ ຈຶ່ງຮ່ວມກັນຈັດງານມະຫາກໍາແກ້ໄຂບັນຫາໄຟໄໝ້ລາມປ່າ ແລະ ໝອກຄວັນ 2 ແຜ່ນດິນ ໄທ-ລາວ ແລະ ລາວ-ໄທ ປະຈໍາປີ 2019 ຂຶ້ນທີ່ສວນອຸດທິຍານແຫ່ງຊາດ ພູຊີ້ຟ້າ ຕໍາບົນ ຕັບເຕົ່າ, ອໍາເພີເທິງ, ຈັ່ງຫວັດ ຊຽງລາຍ. ເຂົ້າຮ່ວມງານດັ່ງກ່າວ ຝ່າຍລາວ ແຂວງ ໄຊຍະບູລີ ນໍາໂດຍ ທ່ານ ພົງສະຫວັນ ສິດທະວົງ, ເຈົ້າແຂວງ ພ້ອມດ້ວຍຄະນະ, ແຂວງ ບໍ່ແກ້ວ ນໍາໂດຍ ທ່ານ ສົມລິດ ສີພາວັນ ປະທານສະພາປະຊາຊົນແຂວງ ພ້ອມດ້ວຍຄະນະ, ແລະຝ່າຍໄທ ນໍາໂດຍ ທ່ານ ປຣະຈົນ ປຣະສະກຸນ, ຜູ້ວ່າລາຊະການ ຈັງຫວັດ ຊຽງລາຍ ພ້ອມດ້ວຍການນໍາ ຈັງຫວັດ, ອໍານາດການປົກຄອງ ແລະ ປະຊາຊົນ ພາຍໃນ ຕໍາບົນ ຕັບເຕົ່າ, ອໍາເພີເທິງ ເຂົ້າຮ່ວມຢ່າງຫຼວງຫຼາຍ.

ປະຊາຊົນທີ່ຢູ່ລຽບຊາຍແດນຈົ່ງຮ່ວມໃຈກັນ ແລະ ເປັນເຈົ້າການໃນການຕ້ານ ແລະ ສະກັດກັ້ນ ບັນຫາໄຟປ່າ

ການຈັດງານມະຫາກໍາ ແກ້ໄຂບັນຫາໄຟໄໝ້ລາມປ່າ ແລະ ໝອກຄວັນ 2 ແຜ່ນດິນ ໄທ-ລາວ, ລາວ-ໄທ ປະຈໍາປີ 2019 ແມ່ນເພື່ອປະສານການຮ່ວມມືກັບອໍານາດການປົກຄອງແຕ່ລະຂັ້ນຂອງທັງ 3 ແຂວງ 2 ປະເທດ, ໂດຍສະເພາະແມ່ນປະຊາຊົນຂອງທັງສອງປະເທດທີ່ຢູ່ລຽບຊາຍແດນ ໃນການປ້ອງກັນ ແລະ ແກ້ໄຂບັນຫາໄຟປ່າ ແລະ ໝອກຄວັນ ຮ່ວມກັນ ແລະ ທັງເພື່ອເປັນການເຊື່ອມສໍາພັນໄມຕີຈິດ, ມິດຕະພາບທີ່ດີຕໍ່ກັນລະຫວ່າງທັງ 2 ປະເທດ ເວົ້າລວມ, ເວົ້າສະເພາະແມ່ນ 3 ແຂວງ ທີ່ມີຊາຍແດນຕິດຈອດກັນ. ໃນພິທີດັ່ງກ່າວ, ການນໍາຂອງແຕ່ລະແຂວງ ແມ່ນໄດ້ຜັດປ່ຽນກັນຂຶ້ນກ່າວຕ້ອນຮັບ ແລະ ມີຄໍາເຫັນຕໍ່ວຽກງານປ້ອງກັນ, ແລະ ແກ້ໄຂບັນຫາໄຟປ່າ ແລະ ໝອກຄວັນ ຂອງສອງປະເທດ ເຊິ່ງແຕ່ລະທ່ານ ແມ່ນໄດ້ຍົກໃຫ້ເຫັນຜົນຮ້າຍຂອງການເຜົາປ່າ, ເຊິ່ງສົ່ງຜົນກະທົບຕໍ່ການທໍາມາຫາກິນ, ຕໍ່ຊັບພະຍາກອນທໍາມະຊາດ, ຕໍ່ລະບົບການເດີນຫາຍໃຈ, ຕໍ່ການຄົມມະນາຄົມ ແລະ ອື່ນໆ, ອັນໄດ້ກໍ່ໃຫ້ເກີດຜົນເສຍຫາຍຢ່າງມະຫາສານໃຫ້ທັງ ສອງປະເທດ.

ງານມະຫາກໍາແກ້ໄຂບັນຫາໄຟໄໝ້ລາມປ່າ ແລະ ໝອກຄວັນ 2 ແຜ່ນດິນ ໄທ-ລາວ ແລະ ລາວ-ໄທ ປະຈໍາປີ 2019

ພ້ອມດຽວກັນ, ການນໍາຂອງທັງ 3 ແຂວງ ຍັງໄດ້ຮຽກຮ້ອງມາຍັງປະຊາຊົນຂອງທັງສອງປະເທດ, ໂດຍສະເພາະແມ່ນປະຊາຊົນທີ່ຢູ່ລຽບຊາຍແດນ ຈົ່ງຮ່ວມໃຈກັນ ແລະ ເປັນເຈົ້າການໃນການຕ້ານ ແລະ ສະກັດກັ້ນ ບັນຫາໄຟປ່າ ເພື່ອບໍ່ໃຫ້ເກີດມີໝອກຄວັນລ່ອງລອຍຕາມອາກາດ. ໃນຕອນທ້າຍຂອງພິທີ, ການນໍາ ຂອງທັງ 3 ແຂວງກໍ່ໄດ້ມອບຂອງທີ່ລະນຶກໃຫ້ເຊິ່ງກັນ ແລະ ກັນ ພ້ອມທັງໄດ້ມອບ ອຸປະກອນໃນການດັບໄຟປ່າ, ແລະ ເຮັດທົດລອງໃນການປ້ອງກັນບໍ່ໃຫ້ເກີດມີໄຟໄໝ້ລາມປ່າ.

（ແຫຼ່ງ​ຂໍ້​ມູນ​： https://lnr.org.la/）