ເວທີສາວງາມນະຄອນຫລວງວຽງຈັນ ເປັນອີກເວທີໜຶ່ງ ທີ່ມີຄວາມໝາຍສໍາຄັນທີ່ເອື້ອຍນ້ອງແມ່ຍິງທົ່ວນະຄອນຫລວງວຽງຈັນສົນໃຈເພາະເປັນເວທີແຫ່ງການເປີດໂອກາດໃຫ້ສາວລາວຍຸກໃໝ່ໄດ້ເກັບກ່ຽວຄວາມຮູ້, ປະສົບການຊີວິດຫລາຍດ້ານບໍ່ວ່າຈະເປັນມາລະຍາດທາງສັງຄົມ, ວັດທະນະທໍາ ແລະ ສະຖານທີ່ທ່ອງ ທ່ຽວລວມເຖິງ ການສ້າງບຸກຄະລິກທີ່ດີຂອງແມ່ຍິງລາວໃຫ້ຫລາຍຂຶ້ນເໝືອນດັ່ງນາງ ພັດທະນາ (ໂຕມີວ) ສາວງາມຕົວແທນຈາກເມືອງໄຊເສດຖາທີ່ກ້າວເຂົ້າສູ່ເວທີນີ້ເພື່ອເກັບກ່ຽວປະສົບການຊີວິດ ແລະ ຢາກມີສ່ວນຮ່ວມສືບທອດວັດທະນະທໍາທີ່ດີງາມຂອງຊາດລາວ.
ນາງ ພັດທະນາ ເວົ້າຕື່ມວ່າ: ໃນນາມເປັນແມ່ຍິງລາວຄົນໜຶ່ງກໍຂໍເປັນອີກໜຶ່ງກະບອກສຽງ ເພື່ອເຊີນໝູ່ເພື່ອນຊາວໜຸ່ມຍຸກໃໝ່ ໃຫ້ຫັນມາເອົາໃຈໃສ່ເສີມຂະຫຍາຍວັດທະນະທຳເພື່ອເຮັດໃຫ້ປະເທດລາວພົ້ນເດັ່ນໃນສາຍຕາຂອງຄົນທົ່ວໂລກ ແລະ ຂໍໃຫ້ທຸກຄົນຕິດຕາມຊ່ວຍໂຫວດເປັນກຳລັງໃຈໃຫ້ໂຕມີວ (MVT20) ແດ່ໂດຍການພິມ MVT20*1=1 ຄະແນນສົ່ງໄປຫາໝາຍເລກ 2018 ແລະ ພິມ MVT20*10=10 ຄະແນນສົ່ງໄປໝາຍ 2018 ເບີທີ່ໃຊ້ໂຫວດຄືເບີຫລັກ 2 ເທົ່ານັ້ນ ຈົນຮອດວັນທີ 6 ເມສາ 2019 ເຊິ່ງຈະປະກວດຢູ່ ໂຮງແຮມແລນມາກແມ່ຂອງລີເວີໄຊຊັ້ນ 2.
ນາງ ພັດທະນາ ຄິດາພອນ (ໂຕມີວ) ປັດຈຸບັນ ພວມສຶກສາຢູ່ສະຖາບັນລັດດຕະນະ ບໍລິຫານທຸລະກິດປີ 3 ສາຂາການເງິນ-ການທະນາຄານ ເຜີຍຄວາມຮູ້ສຶກສູ່ຟັງວ່າ: ການທີ່ມາປະກວດໃນເວທີອັນຊົງກຽດນີ້ເນື່ອງຈາກກອງປະກວດສາວນະຄອນຫລວງ ເປັນເວທີທີ່ທຸກຄົນສົນໃຈຈຶ່ງລອງເປີດໂອກາດ ໃຫ້ໂຕເອງໄດ້ເຮັດສິ່ງໃໝ່ໆຄັ້ງໜຶ່ງໃນຊີວິດເຊິ່ງຄວາມຈິງ ແລ້ວມັນກະຄືຄວາມຝັນຂອງໂຕເອງຫັ້ນລະ ແລະ ເມື່ອຝັນແລ້ວຖ້າ ບໍ່ລົງມືເຮັດເຮົາຈະບໍ່ຮູ້ເລີຍວ່າຜົນອອກມາຈະເປັນແບບໃດ. ຂ້ອຍທັງພູມໃຈທັງຕື່ນເຕັ້ນຫລາຍທີ່ໄດ້ມາຢືນຢູ່ຈຸດ ນີ້ ແລະ ກໍຈະພະຍາຍາມ ເຮັດໜ້າທີ່ໃຫ້ດີທີ່ສຸດເຖິງວ່າຈະໄດ້ຫລືບໍ່ໄດ້ ຢ່າງໜ້ອຍເຮົາກໍໄດ້ປະສົບການໄດ້ໝູ່ຄູ່, ເອື້ອຍ, ອ້າຍ, ນ້ອງ ແລະ ໄດ້ຮຽນຮູ້ຫລາຍໆ ຢ່າງຈາກກອງປະກວດເປັນຕົ້ນ: ການແອບບົດລະຄອນວິຖີຊີວິດຊາວໄຮ່ຊາວນາປະສົມປະສານກັບການການຟ້ອນແບບລາວໆ ເພາະໂຕເອງບໍ່ເຄີຍສະແດງລະຄອນມາກ່ອນເລີຍຕ້ອງໄດ້ແອບສະແດງຕ້ອງ ຫລິ້ນໜ້າຫລິ້ນຕາວາງທ່າທີໄປນຳມັນຍາກຫລາຍ ແຕ່ຈະບໍ່ທໍ້ຖອຍ ເພາະເຮົາມາຢູ່ຈຸດນີ້ແລ້ວແນວໃດເຮົາກໍຕ້ອງເຮັດໃຫ້ອອກມາດີໃຫ້ສົມກັບເພິ່ນໃຫ້ໂອກາດເຮົາມາ.
(ແຫຼ່ງຂໍ້ມູນ: ຂປລ)