| ງານວາງສະແດງ “ປະທານໂຮ່ຈິມິນ ກັບຂະບວນການ ດ້ຽນບຽນຝູ” | |
| ຄວາມໝາຍຂອງ ໄຊະນະ ດ້ຽນບຽນຝູ ໃນຄວາມສາມັກຄີພິເສດ ຫວຽດນາມ-ລາວ |
ຕອນເຊົ້າວັນທີ 07 ພຶດສະພາ, ຢູ່ຫໍປະຊຸມແຫ່ງຊາດ, ທີ່ນະຄອນຫຼວງ ວຽງຈັນ ໄດ້ດຳເນີນພິທີໂຮມຊຸມນຸມມິດຕິງລະດັບຊາດ ເນື່ອງໃນໂອກາດສະເຫຼີມສະຫຼອງວັນໄຊຊະນະປະຫວັດສາດ ດ້ຽນບຽນຝູ ຄົບຮອບ 70ປີ (07 ພຶດສະພາ 1954 - ວັນທີ 7 ພຶດສະພາ 2024). ເຂົ້າຮ່ວມພິທີ, ມີທ່ານນາງ ປານີ ຢາທໍ່ຕູ້ ຮອງປະທານປະເທດ; ທ່ານ ສອນໄຊ ສີພັນດອນ ນາຍົກລັດຖະມົນຕີ ລາວ; ການນຳ, ອະດີດການນຳພັກ, ລັດລາວ; ກຳລັງປະກອບອາວຸດ ພ້ອມດ້ວຍປະຊາຊົນລາວບັນດາເຜົ່າໄດ້ເຂົ້າຮ່ວມເປັນຈຳນວນຫຼາຍ.
ກ່າວສູນທອນພົດໄຂພິທີ, ທ່ານນາງ ປານີ ຢາທໍ່ຕູ້ ຮອງປະທານປະເທດ ລາວ ໃຫ້ຮູ້ວ່າ ໄຊຊະນະ ດ້ຽນບຽນຝູ ໄດ້ສົ່ງຜົນກະທົບໂດຍກົງຕໍ່ການປະຕິວັດ ລາວ, ສ້າງເງື່ອນໄຂສະດວກໃຫ້ແກ່ການຕໍ່ຕ້ານຂອງປະຊາຊົນລາວຢູ່ບັນດາສະໜາມຮົບ:
ໄຊຊະນະ ດ້ຽນບຽນຝູ ບໍ່ພຽງແຕ່ແມ່ນໄຊຊະນະຂອງປະຊາຊົນ ຫວຽດນາມ ເທົ່ານັ້ນ ຫາກຍັງແມ່ນໄຊຊະນະຂອງປະຊາຊົນລາວ ແລະ ກຳປູເຈຍ ທີ່ເປັນພັນທະມິດເພື່ອຕໍ່ສູ້ຕ້ານກັບສັດຕູທົ່ວໄປ ເພື່ອປົດປ່ອຍປະເທດຊາດ. ໄຊຊະນະດັ່ງກ່າວໄດ້ດັບສູນຄວາມມຸ່ງມາດປາຖະໜາທີ່ຈະຮຸກຮານລັດທິອານານິຄົມແບບເກົ່າ, ບັງຄັບໃຫ້ລັດຖະບານອານານິຄົມຝລັ່ງ ລົງນາມໃນສັນຍາເຈນີວາປີ 1954, ຟື້ນຟູສັນຕິພາບຢູ່ອິນດູຈີນ, ໄດ້ຮັບຮູ້ເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຫວຽດນາມ, ລາວ ແລະ ກຳປູເຈຍ.
 |
ທ່ານນາງ ປານີ ຢາທໍ່ຕູ້ ຮອງປະທານປະເທດ ລາວ ກ່າວສູນທອນພົດ (ພາບ: VOV) |
“ພວກຂ້າພະເຈົ້າຮູ້ສຶກເປັນກຽດຢ່າງຍິ່ງ ເມື່ອກອງທັບປະຊາຊົນລາວ ໄດ້ມີການປະກອບສ່ວນເຂົ້າໃນໄຊຊະນະ ດ້ຽນບຽນຝູ ດ້ວຍການເປີດບັ້ນບຸກໂຈມຕີຕ່າງໆຢູ່ ພາກກາງລາວ, ສົມທົບກັບທະຫານອາສາສະໝັກ ແລະ ນັກຊ່ຽວຊານ ຫວຽດນາມ ເປີດບັນດາບັ້ນຮົບຢູ່ພາກໃຕ້ ຮອດ ພາກເໜືອ ລາວ, ພິເສດແມ່ນບັ້ນຮົບ ນ້ຳອູ່ ທີ່ໄດ້ມ້າງທຳລາຍບ່ອນອາໄສ ແລະ ເສັ້ນທາງຖອນກຳລັງຂອງສັດຕູ, ສ້າງເງື່ອນໄຂໃຫ້ກອງທັບ ຫວຽດນາມ ເປີດບັ້ນຮົບດັບສູນຖານທີ່ໝັ້ນ ດ້ຽນບຽນຝູ”.
ທ່ານນາງຮອງປະທານປະເທດ ລາວ ປານີ ຢາທໍ່ຕູ້ ປາດຖະໜາວ່າ ພະນັກງານ, ລັດຖະບານ, ສະມາຊິກພັກ ແລະ ປະຊາຊົນລາວບັນດາເຜົ່າ ທຸກຄົນ ຈະສືບຕໍ່ເສີມຂະຫຍາຍມູນເຊື້ອວິລະຊົນຂອງນັກຮົບປະຕິວັດສອງຊາດ ລາວ - ຫວຽດນາມ, ພິເສດແມ່ນຄົນລຸ້ນໜຸ່ມມີຄວາມເຂົ້າໃຈກ່ຽວກັບການອຸທິດສ່ວນ ແລະ ການເສຍສະຫຼະອັນຍິ່ງໃຫຍ່ຂອງນັກຮົບປະຕິວັດສອງປະເທດໃນເມື່ອກ່ອນ ເພື່ອມີສັນຕິພາບຄືໃນວັນນີ້. ພ້ອມທັງສືບຕໍ່ຖະໜຸຖະໜອມ ແລະ ເພີ່ມພູນຄູນສ້າງສາຍພົວພັນມິດຕະພາບອັນໃຫຍ່ຫຼວງ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ, ພ້ອມກັນພັດທະນາປະເທດຊາດ.
ທ່ານນາງຮອງປະທານປະເທດ ຢືນຢັນວ່າ: ລາວ ແລະ ຫວຽດນາມ ຕ້ອງສືບຕໍ່ເສີມຂະຫຍາຍມູນເຊື້ອໄຊຊະນະດ້ຽນບຽນຝູ ເພື່ອຮັດແໜ້ນນ້ຳໃຈສາມັກຄີແບບພິເສດລະຫວ່າງສອງພັກ, ສອງລັດ ແລະ ປະຊາຊົນສອງປະເທດ, ເພື່ອຜົນປະໂຫຍດຂອງປະຊາຊົນສອງປະເທດ ແລະ ສືບຕໍ່ສຶກສາອົບຮົມປະຊາຊົນ, ພິເສດແມ່ນລຸ້ນໜຸ່ມຂອງສອງປະເທດໃຫ້ເຂົ້າໃຈຢ່າງຈະແຈ້ງກ່ຽວກັບສາຍພົວພັນແບບພິເສດລາວ-ຫວຽດນາມ, ແລະ ເຫັນໄດ້ຄວາມຮັບຜິດຊອບໃນການສືບຕໍ່ປົກປັກຮັກສາ ແລະ ຮັກສາສາຍພົວພັນທີ່ຫາຍາກນີ້ໃຫ້ໝັ້ນຄົງຕະຫຼອດໄປ.
ຄຳຮຸ່ງ
