| ກູບາ ຜັນຂະຫຍາຍວີຊາເອເລັກໂຕນິກໃໝ່ ເພື່ອດຶງດູດນັກທ່ອງທ່ຽວ | |
| ເພີ່ມທະວີການຄຸ້ມຄອງແຮງງານທີ່ໄປເຮັດວຽກຢູ່ຕ່າງປະເທດ |
 |
| ປີ 2024, ຂະແໜງການທ່ອງທ່ຽວ ຫວຽດນາມ ຄາດວ່າຈະຕ້ອນຮັບນັກທ່ອງທ່ຽວສາກົນ 18 ລ້ານເທື່ອຄົນ. |
ບັນດານະໂຍບາຍໜຸນຊ່ວຍຂອງລັດຖະບານ ເພື່ອກະຕຸ້ນແຮງໃຈໃຫ້ວິສາຫະກິດພັດທະນາ
ການທ່ອງທ່ຽວ ຫວຽດນາມ ນັບແຕ່ປີ 2022 ຮອດປະຈຸບັນ ໄດ້ເຕີບໂຕຢ່າງກະໂດດຂັ້ນ. ປີກາຍນີ້, ຈຳນວນນັກທ່ອງທ່ຽວສາກົນມາ ຫວຽດນາມ ບັນລຸໄດ້ 12,6 ລ້ານເທື່ອຄົນ, ເພີ່ມຂຶ້ນ 3,5 ເທົ່າເມື່ອທຽບໃສ່ປີກາຍ ແລະ ລື່ນກາຍເປົ້າໝາຍເບື້ອງຕົ້ນ 8 ລ້ານເທື່ອຄົນ.
ຫວ່າງມໍ່ໆມານີ້, ຫວຽດນາມ ໄດ້ຕ້ອນຮັບນັກທ່ອງທ່ຽວສາກົນກ່ວາ 4,6 ລ້ານເທື່ອຄົນໃນໄຕມາດທີ 1 ປີ 2024, ເພີ່ມຂຶ້ນ 72% ເມື່ອທຽບໃສ່ໄລຍະດຽວກັນຂອງປີກາຍ ແລະ ເພີ່ມຂຶ້ນ 3,2% ເມື່ອທຽບໃສ່ລະດັບກ່ອນເກີດໂລກລະບາດໃນປີ 2019.
ທ່ານ ຟ້າມຫາຍກວິ່ງ - ຫົວໜ້າສະຖາບັນພັດທະນາການທ່ອງທ່ຽວ ອາຊີ (ATI), ປະທານສະມາຄົມການທ່ອງທ່ຽວຊຸມຊົນ ຫວຽດນາມ (VCTC) ໃຫ້ຮູ້ວ່າ “ຫວຽດນາມ ມີພື້ນຖານວັດທະນະທໍາທີ່ເປັນເອກະລັກສະເພາະ ແລະ ອຸດົມສົມບູນ, ໄດ້ສົມທົບກັນຈາກການປະສົມປະສານລະຫວາ່ງຈຸດປະເພນີທ້ອງຖິ່ນ ແລະ ອິດທິພົນຈາກບັນດາປະເທດໃກ້ຄຽງ ພ້ອມທັງບັນດາປະເທດອື່ນໆໃນໂລກ. ພື້ນຖານວັດທະນະທໍານີ້ ບໍ່ພຽງແຕ່ສະແດງອອກຜ່ານສະຖາປັດຕະຍະກຳ, ອາຫານ, ເຄື່ອງນຸ່ງອາພອນເທົ່ານັ້ນ, ຫາກຍັງໄດ້ຮັບການສະແດງອອກດ້ວຍສິລະປະ, ດົນຕີ, ການຟ້ອນ ແລະ ງານບຸນຕ່າງໆນຳອີກ. ສິ່ງນີ້ ສ້າງຄວາມດຶງດູດແບບພິເສດໃຫ້ນັກທ່ອງທ່ຽວສາກົນທີ່ຢາກຄົ້ນຫາ ແລະ ລົງຕົວຈິງວັດທະນະທຳທີ່ເປັນເອກະລັກສະເພາະຂອງ ຫວຽດນາມ. ນອກຈາກນັ້ນ, ທິວທັດທໍາມະຊາດຂອງ ຫວຽດນາມ, ນັບແຕ່ຫາດຊາຍທີ່ສວຍງາມຕະຫຼອດເຖິງປ່າໄມ້ທີ່ຕຶບຫນາ, ພູຜາປ່າດົງ ກໍຍັງເປັນຈຸດດຶງດູດພິເສດສໍາລັບນັກທ່ອງທ່ຽວ. ຫວຽດນາມ ຍັງເປັນທີ່ຮູ້ຈັກດ້ວຍລະບົບການປຸງແຕ່ງອາຫານທີ່ອຸດົມສົມບູນ ແລະ ແຊບຊ້ອຍ, ດ້ວຍອາຫານທີ່ເປັນເອກະລັກສະເພາະ ແລະ ມີລົດຊາດແຊບຊ້ອຍຈາກທົ່ວປະເທດ. ບັນດາປັດໄຈດັ່ງກ່າວທັງໝົດ ໄດ້ສົມທົບກັບຄວາມຈິງໃຈ ແລະ ຄວາມກະຕືລືລົ້ນຂອງຊາວຫວຽດນາມ ກໍໄດ້ສ້າງຈຸດໝາຍປາຍທາງທ່ອງທ່ຽວທີ່ດຶງດູດໃຈ ແລະ ບໍ່ອາດຫຼົງລືມໄດ້ໃນແຜນທີ່ການທ່ອງທ່ຽວໂລກ”.
 |
| ທ່ານ ຟ້າມຫາຍກວິ່ງ - ຫົວໜ້າສະຖາບັນພັດທະນາການທ່ອງທ່ຽວ ອາຊີ (ATI), ປະທານສະມາຄົມການທ່ອງທ່ຽວຊຸມຊົນ ຫວຽດນາມ (VCTC). |
ຕາມການສັງເກດຂອງທ່ານ ກວິ່ງ, ບັນດາຍຸດທະສາດໂຄສະນາ, ການກຳນົດທິດໃນການສ້າງຜະລິດຕະພັນທີ່ເປັນເອກະລັກສະເພາະ ແລະ ນະໂຍບາຍເປີດປະຕູຂອງລັດຖະບານໃນໄລຍະມໍ່ໆມານີ້ ໄດ້ໜູນຊ່ວຍແຫຼ່ງຊັບພະຍາກອນທຳມະຊາດ ແລະ ວັດທະນະທຳອັນອຸດົມສົມບູນທີ່ມີຢູ່ແລ້ວຢູ່ ຫວຽດນາມ ຕື່ມອີກ
“ບັນດານະໂຍບາຍຕັ້ງໜ້າຈາກລັດຖະບານ ຄືການເປີດກ້ວາງການອອກວີຊາເອເລັກໂຕນິກ ໄດ້ຊ່ວຍດຶງດູດນັກທ່ອງທ່ຽວສາກົນມາ ຫວຽດນາມ ຫຼາຍຂຶ້ນດ້ວຍຄວາມສະດວກກວ່າ. ຫວຽດນາມ ເປັນປະເທດທີ່ສວຍງາມ ດ້ວຍຫຼາຍສະຖານທີ່ທ່ອງທ່ຽວທີ່ມີຊື່ສຽງ ແລະ ພັດທະນາຢ່າງວ່ອງໄວ, ບັນດານະໂຍບາຍດັ່ງກ່າວ ຈະຊ່ວຍເພີ່ມທະວີຮູບພາບຂອງ ຫວຽດນາມ ບົນສະໜາມຫຼິ້ນສາກົນ, ຈາກນັ້ນ ກໍໄດ້ດຶງດູດນັກທ່ອງທ່ຽວສາກົນມາຢ້ຽມຢາມປະເທດ ຫວຽດນາມ ຫລາຍຂຶ້ນ”, ທ່ານ ກວິ່ງ ໃຫ້ຂໍ້ສັງເກດ.
ກ່ອນໜ້ານີ້, ຫວຽດນາມ ພຽງແຕ່ນຳໃຊ້ການອອກວີຊາເອເລັກໂຕນິກໃຫ້ 80 ປະເທດໂດຍມີກຳນົດເວລາສູງສຸດ 30 ວັນ ແລະ ມີຜົນສັກສິດສຳລັບການເຂົ້າເມືອງຄັ້ງດຽວ. ນັບແຕ່ວັນທີ 15 ສິງຫາ 2023, ວີຊາອີເລັກໂຕນິກ ໄດ້ເປີດກ້ວາງໃຫ້ພົນລະເມືອງຂອງທຸກປະເທດ, ເຂດແຄວ້ນໂດຍມີກຳນົດເວລາສູງສຸດ 90 ວັນ ແລະ ມີຜົນສັກສິດສຳລັບເຂົ້າເມືອງເທື່ອດຽວ ຫຼື ຫຼາຍເທື່ອ.
ນອກຈາກນະໂຍບາຍເປີດກວ້າງການອອກວີຊາແລ້ວ, ການນຳໃຊ້ບັນດານະໂຍບາຍໜູນຊ່ວຍ ແລະ ອຳນວຍຄວາມສະດວກໃຫ້ແກ່ນັກທ່ອງທ່ຽວຍັງໄດ້ຊ່ວຍຍົກສູງຄຸນນະພາບການບໍລິການທ່ອງທ່ຽວ ຫວຽດນາມ, ກະຕຸ້ນແຮງໃຈໃຫ້ວິສາຫະກິດທ່ອງທ່ຽວພັດທະນາ ແລະ ສະໜອງບັນດາຜະລິດຕະພັນທ່ອງທ່ຽວໃໝ່ ແລະ ຫຼາກຫຼາຍກວ່າອີກ.ຈາກນັ້ນ, ການທ່ອງທ່ຽວ ຫວຽດນາມ ກໍຈະສາມາດດຶງດູດນັກທ່ອງທ່ຽວຫຼາຍເປົ້າໝາຍກ່ວາ, ນັບແຕ່ນັກທ່ອງທ່ຽວລະດັບສູງໄປຮອດນັກທ່ອງທ່ຽວທີ່ຕ້ອງການໄປທ່ຽວແບບປະຢັດ.
ສ້າງບຸກທະລຸຈາກການທ່ອງທ່ຽວ MICE ເພື່ອນໍາມາເຊິ່ງລາຍໄດ້ທີ່ຫຼາຍກວ່າ
ໃນສະພາບການທີ່ ຫວຽດນາມ ພວມກາຍເປັນຈຸດໝາຍປາຍທາງສຳລັບການເຮັດວຽກ ແລະ ການບັນເທິງທີ່ໄດ້ຮັບຄວາມນິຍົມຢູ່ ອາຊີ - ປາຊີຟິກ, ການທ່ອງທ່ຽວສົມທົບກັບບັນດາການເຄື່ອນໄຫວກອງປະຊຸມ, ສຳມະນາ, ຍ້ອງຍໍ, ງານວາງສະແດງ (MICE) ພວມມີທ່າພັດທະນາເປັນຢ່າງດີ. ນັກຊ່ຽວຊານດ້ານການທ່ອງທ່ຽວຫຼາຍທ່ານກ່າວວ່າ ນີ້ແມ່ນໜຶ່ງໃນບັນດາຜະລິດຕະພັນທີ່ສາມາດສ້າງບາດກ້າວບຸກທະລຸ, ນຳມາເຊິ່ງລາຍຮັບຢ່າງຫຼວງຫຼາຍ. ການທ່ອງທ່ຽວ MICE ໃນຊຸມປີມໍ່ໆມານີ້ ໄດ້ມີການປ່ຽນແປງທັງດ້ານຄຸນນະພາບ ແລະ ປະລິມານ, ອັນໄດ້ສ້າງບັນດາຄວາມປະທັບໃຫ້ນັກທ່ອງທ່ຽວ ແລະ ຄູ່ຮ່ວມງານສາກົນ.
 |
| ຕົວແບບທ່ອງທ່ຽວ MICE ສ້າງລາຍຮັບຫຼາຍກວ່າການທ່ອງທ່ຽວແບບປົກກະຕິ 6 ເທົ່າ. |
ຕາມກົມທ່ອງທ່ຽວແຫ່ງຊາດ ຫວຽດນາມ ແລ້ວ, ການທ່ອງທ່ຽວ MICE ໄດ້ກາຍເປັນທ້ອງຕະຫຼາດສຳຄັນທີ່ບັນດາປະເທດໃນພາກພື້ນຄື ສິງກະໂປ, ໄທ, ມາເລເຊຍ, ຈີນ ໃຫ້ຄວາມສົນໃຈ, ລົງທຶນພັດທະນາ. ຕົວແບບທ່ອງທ່ຽວ MICE ສ້າງລາຍຮັບຫຼາຍກວ່າການທ່ອງທ່ຽວແບບປົກກະຕິ 6 ເທົ່າ. ຢູ່ ຫວຽດນາມ, ການທ່ອງທ່ຽວ MICE ກໍ່ໄດ້ຮັບຖືວ່າແມ່ນໜຶ່ງໃນບັນດາເປົ້າໝາຍຂອງຍຸດທະສາດພັດທະນາຂະແໜງການທ່ອງທ່ຽວ.
ຕາມຄວາມທັດສະນະຂອງ ທ່ານ ຟ້າມຫາຍກວິ່ງ ແລ້ວ, ມີປັດໄຈຈຳນວນໜຶ່ງທີ່ເຮັດໃຫ້ ຫວຽດນາມ ກາຍເປັນຈຸດໝາຍປາຍທາງທີ່ເປັນໜ້າສົນໃຈໃຫ້ບັນດາເຫດການຂອງ MICE ສາກົນ:
ທີໜຶ່ງ, ທີ່ຕັ້ງພູມສາດທີ່ເອື້ອອຳນວຍ. ຫວຽດນາມ ຕັ້ງຢູ່ໃຈກາງ ອາຊີຕາເວັນອອກສຽງໃຕ້, ລະຫວ່າງ ຈີນ ກັບບັນດາປະເທດ ອາຊີຕາເວັນອອກສ່ຽງໃຕ້, ແມ່ນຈຸດເຊື່ອມຕໍ່ຂອງສາຍການບິນສາກົນ ແລະ ພາກພື້ນ.
ທີສອງ ແມ່ນພື້ນຖານໂຄງລ່າງພັດທະນາ. ຫວຽດນາມ ໄດ້ລົງທຶນຢ່າງແຮງເຂົ້າໃນພື້ນຖານໂຄງລ່າງການທ່ອງທ່ຽວ, ນັບແຕ່ໂຮງແຮມ, ສູນກອງປະຊຸມ ຕະຫຼອດເຖິງບັນດາການຄົມມະນາຄົມຂົນສົ່ງທີ່ສະດວກ.
ທີສາມ ແມ່ນຄວາມຫຼາກຫຼາຍກ່ຽວກັບການລົງຕົວຈິງຂອງການທ່ອງທ່ຽວ. ຈາກຕົວເມືອງໃຫຍ່, ຫາດຊາຍທະເລທີ່ສວຍງາມ, ສະຖານທີ່ທ່ອງທ່ຽວພັກຕາກອາກາດໄປເຖິງບັນດາມໍລະດົກວັດທະນະທຳທີ່ໄດ້ຮັບຄວາມນິຍົມຊົມຊອບນັ້ນ, ການທ່ອງທ່ຽວວັດທະນະທຳຊຸມຊົນ, ຫວຽດນາມ ກໍໄດ້ສະເໜີທາງເລືອກທີ່ຫຼາກຫຼາຍໃຫ້ແກ່ນັກທ່ອງທ່ຽວ.
ສຸດທ້າຍ ແມ່ນສະພາບແວດລ້ອມທາງດຳເນີນທຸລະກິດທີ່ເອື້ອອໍານວຍ. ນະໂຍບາຍໜູນຊ່ວຍຂອງລັດຖະບານ, ລະບຽບການເຂົ້າອອກເມືອງທີ່ສະດວກ, ສະພາບແວດລ້ອມແຫ່ງການດຳເນີນທຸລະກິດແບບໝັ້ນຄົງ ເຮັດໃຫ້ ຫວຽດນາມ ກາຍເປັນສະພາບແວດລ້ອມທີ່ສະດວກໃຫ້ແກ່ບັນດາເຫດການ MICE ສາກົນ.
ການທ່ອງທ່ຽວ ຫວຽດນາມ ເຮັດຫຍັງເພື່ອດຶງດູດນັກທ່ອງທ່ຽວສາກົນ 18 ລ້ານເທື່ອຄົນ?
ຕາມການພົບປະກັບສະມາຄົມວິສາຫະກິດການທ່ອງທ່ຽວແລ້ວ, ສາມາດເຫັນໄດ້ວ່າ ເຂົາເຈົ້າຂ້ອນຂ້າງເສຍດາຍ ເພາະພວກເຮົາມີຄວາມໄດ້ປຽບທາງດ້ານການພັດທະນາຫຼາຍດ້ານ ແຕ່ຍັງບໍ່ທັນໄດ້ມີການສື່ສານໂຄສະນາ, ພົບປະຢ່າງທັນການ, ມີຄວາມຫຼາກຫຼາຍຢູ່ຕ່າງປະເທດ. ວິສາຫະກິດຫຼາຍແຫ່ງປາດຖະໜາຢາກໃຫ້ ຫວຽດນາມ ສ້າງຕັ້ງສຳນັກງານຜູ້ຕາງໜ້າການທ່ອງທ່ຽວ ຫວຽດນາມ ຢູ່ບາງທ້ອງຕະຫຼາດເປົ້າໝາຍຂອງການທ່ອງທ່ຽວຫວຽດນາມ.
ກ່ຽວກັບເລື່ອງນີ້, ທ່ານ ກວິ່ງ ໃຫ້ຂໍ້ສັງເກດວ່າ: “ຕາມຄວາມຄິດເຫັນຂອງຂ້າພະເຈົ້າແລ້ວ, ການສ້າງຕັ້ງສຳນັກງານຜູ້ຕາງໜ້າການທ່ອງທ່ຽວ ຫວຽດນາມ ຢູ່ບັນດາທ້ອງຕະຫຼາດເປົ້າໝາຍ ແມ່ນແນວຄວາມຄິດທີ່ດີເພື່ອຍົກສູງການມີໜ້າ ແລະ ໂຄສະນາການທ່ອງທ່ຽວ ຫວຽດນາມ ໃນທ້ອງຕະຫຼາດສາກົນ. ສິ່ງນີ້ ຊ່ວຍເພີ່ມທະວີການໂຄສະນາຮູບພາບປະເທດຊາດ ແລະ ບັນດາຜະລິດຕະພັນທ່ອງທ່ຽວ ຫວຽດນາມ, ດຶງດູດຄວາມສົນໃຈ ແລະ ຄວາມໜ້າສົນໃຈຂອງບັນດາລູກຄ້າສາກົນ. ນອກຈາກນັ້ນ, ການມີໜ້າໂດຍກົງຢູ່ບັນດາທ້ອງຕະຫຼາດເປົ້າໝາຍ ຍັງຊ່ວຍໃຫ້ວິສາຫະກິດທ່ອງທ່ຽວ ຫວຽດນາມ ເຂົ້າເຖິງຂໍ້ມູນທ້ອງຕະຫຼາດໄດ້ຢ່າງງ່າຍດາຍ, ຊອກຮູ້ກ່ຽວກັບຄວາມຕ້ອງການຂອງລູກຄ້າ ແລະ ຕອບສະໜອງໄດ້ຢ່າງສະດວກ. ພ້ອມກັນນັ້ນ, ຜ່ານບັນດາຫ້ອງການຜູ້ຕາງໜ້າ, ຫວຽດນາມ ຍັງສາມາດສ້າງຕັ້ງການພົວພັນຄູ່ຮ່ວມມື, ຮ່ວມມືກັບບັນດາຄູ່ຮ່ວມມືທ້ອງຖິ່ນຢູ່ຕ່າງປະເທດ ເພື່ອພັດທະນາການທ່ອງທ່ຽວຢ່າງມີປະສິດທິຜົນກ່ວາອີກ. ສິ່ງດັ່ງກ່າວ ຈະປະກອບສ່ວນຊຸກຍູ້ການພັດທະນາແບບຍືນຍົງຂອງຂະແໜງການທ່ອງທ່ຽວ ຫວຽດນາມ ຢູ່ທ້ອງຕະຫຼາດສາກົນ”.
 |
| ຫວຽດນາມ ໄດ້ຕ້ອນຮັບນັກທ່ອງທ່ຽວສາກົນ 4,6 ລ້ານເທື່ອຄົນໃນໄຕມາດທີ 1 ປີ 2024, ເພີ່ມຂຶ້ນ 72% ເມື່ອທຽບໃສ່ໄລຍະດຽວກັນຂອງປີກາຍ. |
ຮອດໝົດປີ 2024, ຂະແຫນງທ່ອງທ່ຽວ ຫວຽດນາມ ຄາດວ່າຈະຕ້ອນຮັບນັກທ່ອງທ່ຽວສາກົນ 18 ລ້ານເທື່ອຄົນ. ຕາມທ່ານ ກວິ່ງ ແລ້ວ, ເພື່ອບັນລຸໄດ້ ກໍຄືທັງລື່ນກາຍບັນດາເປົ້າໝາຍໃໝ່ທີ່ໄດ້ວາງອອກ, ນອກຈາກບັນດາວຽກງານທີ່ພວມເຮັດ, ຫວຽດນາມ ຍັງສາມາດນຳໃຊ້ບັນດາຍຸດທະສາດຄື:
ທີໜຶ່ງ, ພັດທະນາບັນດາຜະລິດຕະພັນການທ່ອງທ່ຽວທີ່ເປັນເອກະລັກສະເພາະ ແລະ ມີຄວາມຫຼາກຫຼາຍຄື: ລົງທຶນເຂົ້າບັນດາຜະລິດຕະພັນທ່ອງທ່ຽວທີ່ເປັນເອກະລັກສະເພາະ, ລົງຕົວຈິງທາງດ້ານວັດທະນະທຳ, ອາຫານ, ທຳມະຊາດ ແລະ ປະຫວັດສາດຂອງ ຫວຽດນາມ ເພື່ອດຶງດູດນັກທ່ອງທ່ຽວສາກົນ.
ທີສອງ, ສ້າງລະບົບພື້ນຖານໂຄງລ່າງການທ່ອງທ່ຽວທີ່ທັນສະໄໝ: ຍົກລະດັບພື້ນຖານໂຄງລ່າງຄົມມະນາຄົມ, ໂຮງແຮມ, ຮ້ານອາຫານ, ສະໜອງການບໍລິການທີ່ອຳນວຍຄວາມສະດວກຂັ້ນສູງເພື່ອເພີ່ມທະວີການລົງຕົວຈິງຂອງນັກທ່ອງທ່ຽວ.
ທີສາມ, ຊຸກຍູ້ມາດຕະຖານຄຸນນະພາບການບໍລິການທ່ອງທ່ຽວ: ບຳລຸງສ້າງແຫຼ່ງຊັບພະຍາກອນມະນຸດດ້ານການທ່ອງທ່ຽວທີ່ເປັນມືອາຊີບ, ເພີ່ມທະວີລະບົບຜູ້ນຳທ່ຽວ, ຜູ້ນຳທ່ຽວການນຳທ່ຽວທີ່ມີລະດັບວິຊາສະເພາະ ແລະ ຄວາມສາມາດສື່ສານດີ.
ທີສີ່, ເພີ່ມທະວີຍຸດທະນາການໂຄສະນາ: ສ້າງຍຸດທະນາການຢ່າງມີປະສິດທິຜົນໃນດ້ານສື່ມວນຊົນ, ສົນທະນາທາງອິນເຕີແນັດ ແລະ ເຄືອຂ່າຍສັງຄົມ ເພື່ອສ້າງຄວາມໜ້າສົນໃຈໃຫ້ ຫວຽດນາມ ເປັນຈຸດໝາຍປາຍທາງການທ່ອງທ່ຽວທີ່ດຶງດູດໃຈ.
ທີຫ້າ, ການຮ່ວມມືສາກົນ ແລະ ເພີ່ມທະວີການພົບປະແລກປ່ຽນວັດທະນະທຳ: ເຊື່ອມໂຍງເຂົ້າກັບບັນດາຄູ່ຮ່ວມມືສາກົນ ເພື່ອພັດທະນາບັນດາໂຄງການທ່ອງທ່ຽວສົບທົບກັນ ແລະ ສ້າງຂົວເຊື່ອມຕໍ່ວັດທະນະທຳລະຫວ່າງ ຫວຽດນາມ ແລະ ບັນດາປະເທດ.
ສຸດທ້າຍ ແມ່ນເພີ່ມທະວີການສົມມະນາຄຸນ ແລະ ນະໂຍບາຍໜຸນຊ່ວຍການທ່ອງທ່ຽວ: ສ້າງເງື່ອນໄຂສະດວກໃຫ້ແກ່ນັກທ່ອງທ່ຽວສາກົນ ດ້ວຍນະໂຍບາຍວີຊາທີ່ປ່ຽນແປງໄດ້, ຫຼຸດລາຄາປີ້ຍົນ, ຫຼຸດລາຄາໃຫ້ບັນດາການທ່ອງທ່ຽວ ແລະ ການບໍລິການອື່ນໆ.
ດ້ວຍການປະຕິບັດບັນດາຍຸດທະສາດດັ່ງກ່າວ, ຫວຽດນາມ ຈະສາມາດຮັກສາທີ່ຕັ້ງຂອງຕົນບົນທ້ອງຕະຫຼາດການທ່ອງທ່ຽວສາກົນ, ດຶງດູດນັກທ່ອງທ່ຽວນັບມື້ນັບຫຼາຍຂຶ້ນ ແລະ ພັດທະນາແບບຍືນຍົງກວ່າອີກໃນອະນາຄົດ.
ມິງດຶກ
