ສະຖາບັນຄົ້ນຄວ້າການພັດທະນາແບບຍືນຍົງຂອງເຂດ ຫາກໍສົມທົບກັບແຂວງ ກວາງຈີ້ ໄດ້ຈັດຕັ້ງການສຳມະນາກ່ຽວກັບການລາຍງານຜົນການຄົ້ນຄ້ວາໂຄງການ “ການຮ່ວມມືຜັນຂະຫຍາຍແລວເສດຖະກິດ ກວາງຈີ້ (ຫວຽດນາມ) - ສາລະວັນ (ລາວ) - ອຸບົນຣາດຊະທານີ (ໄທ)” ຢູ່ນະຄອນ ດົ່ງຮ່າ, ແຂວງ ກວາງຈີ້.
ທີ່ການສຳມະນາ, ທ່ານຮອງປະທານຄະນະກຳມະການປະຊາຊົນແຂວງ ກວາງຈີ້ ຮວ່າງນາມ ເນັ້ນໜັກວ່າ ກວາງຈີ້ ແມ່ນທ້ອງຖິ່ນຕັ້ງຢູ່ໃຈກາງຂອງສາມແຍກອິນດູຈີນ, ຕາມແກນຕັ້ງທີ່ຕິດກັບເຂດເສດຖະກິດຈຸນສຸມທາງພາກກາງ ແລະ ຕາມລວງນອນແມ່ນຈຸດທຳອິດຕິດກັບເຂດທະເລ ປາຊີຟິກ ບົນແລວເສດຖະກິດຕາເວັນອອກ-ຕາເວັນຕົກ (EWEC); ເປັນທ້ອງຖິ່ນທີ່ເປັນຂົວຕໍ່ທີ່ສຳຄັນໃນຍຸດທະສາດລະຫວ່າງພາຍໃນ ແລະ ລະຫວ່າງຕ່າງປະເທດ.
 |
| ທ່ານ ຮວ່າງນາມ, ຮອງປະທານຄະນະກຳມະການປະຊາຊົນແຂວງ ກວາງຈີ້ ກ່າວຄຳປາໄສທີ່ການສຳມະນາ. |
ວັນທີ 25 ມິຖຸນາ 2014, ລັດຖະບານ ຫວຽດນາມ ແລະ ລາວ ໄດ້ເລີ່ມເປີດຄູ່ຊາຍແດນສາກົນລະເລ (ກວາງຈີ້) - ລາເລ (ສາລະວັນ) ຢ່າງເປັນທາງການ;ນີ້ແມ່ນດ່ານຊາຍແດນສາກົນແຫ່ງທີ 2 ລະຫວ່າງ ຫວຽດນາມ ແລະ ລາວ ຢູ່ແຂວງ ກວາງຈີ້, ພ້ອມທັງສ້າງເປັນແລວຄົມມະນາຄົມຂະໜານກັນກັບ EWEC, ເຊື່ອມຕໍ່ ກວາງຈີ້ - ສາລະວັນ - ອຸບົນຣາດຊະທານີ ແລະ ເປີດກວ້າງໄປຍັງບັນດາແຂວງພາກໃຕ້ຂອງລາວ ແລະ ພາກຕາເວັນອອກສຽງເໜືອຂອງໄທ.
ການຄົ້ນຄວ້າເພື່ອພັດທະນາແລວເສດຖະກິດ ກວາງຈີ້-ສາລະວັນ-ອຸບົນຣາດຊະທານີ ຖືວ່າແມ່ນໜຶ່ງໃນບັນດາມາດຕະການເພື່ອຊ່ວຍເພີ່ມທະວີການເຊື່ອມຕໍ່, ຮັດແໜ້ນການພົວພັນຮ່ວມມືມິດຕະພາບ ກໍຄືຫຼຸດຊ່ອງວ່າງພັດທະນາເສດຖະກິດລະຫວ່າງບັນດາແຂວງ, ທ້ອງຖິ່ນ, ປະກອບສ່ວນຮັກສາຄວາມໝັ້ນຄົງ, ການເມືອງ, ຄວາມເປັນລະບຽບຮຽບຮ້ອຍຄວາມປອດໄພທາງສັງຄົງ - ທ່ານຮອງປະທານຄະນະກຳມະການປະຊາຊົນແຂວງ ຮວ່າງນາມ ເນັ້ນໜັກ.
ທີ່ການສຳມະນາ, ຜູ້ຕາງໜ້າກຸ່ມຄົ້ນຄວ້າຂອງສະຖາບັນຄົ້ນຄວ້າການພັດທະນາແບບຍືນຍົງຂອງພາກພື້ນໄດ້ລາຍງານຜົນການຄົ້ນຄ້ວາກ່ຽວກັບໂຄງການ “ການຮ່ວມມືຜັນຂະຫຍາຍແລວເສດຖະກິດ ກວາງຈີ້-ສາລະວັນ-ອຸບົນຣາດຊະທານີ”.
ຕາມນັ້ນແລ້ວ, ນອກຈາກພາກແນະນຳ, ລາຍງານຂອງໂຄງການລວມມີ 4 ພາກສ່ວນຕົ້ນຕໍ. ພາກທີ I ສຸມໃສ່ວິເຄາະກ່ຽວກັບພື້ນຖານວິທະຍາສາດຂອງການສ້າງແລວທາງເສດຖະກິດເຊັ່ນ ບັນດານິຍາມ, ລັກສະນະພິເສດ, ບັນດາປັດໄຈອິດທິພົນ ແລະ ເງື່ອນໄຂເພື່ອສ້າງແລວເສດຖະກິດ. ພາກທີ II ສຸມໃສ່ວິເຄາະກ່ຽວກັບສະພາບຕົວຈິງຂອງເສັ້ນທາງຄົມມະນາຄົມ ເພື່ອເຊື່ອມຕໍ່ແລວທາງ PARA-EWEC ແລະ ລະດັບພັດທະນາຂອງບັນດາແຂວງ, ການພົວພັນການຄ້າລະຫວ່າງບັນດາທ້ອງຖິ່ນຜ່ານດ່ານຊາຍແດນ. ພ້ອມກັນນັ້ນ ກໍຊີ້ແຈງກາລະໂອກາດ ແລະ ສິ່ງທ້າທາຍຂອງການພັດທະນາແລວທາງຂະໜານກັນໃນອະນາຄົດ. ພາກທີ III ຂອງໂຄງການ ໄດ້ກ່າວກ່ຽວກັບສະພາບການພາຍໃນ ແລະ ຕ່າງປະເທດ ໃນໄລຍະກາງ ແລະ ໄລຍະຍາວ ທີ່ມີຜົນກະທົບຕໍ່ການສ້າງ ແລະ ພັດທະນາແລວທາງ.
ບົນພື້ນຖານບັນດາການວິເຄາະໃນພາກທີ I, II, III, ພາກທີ IV ຂອງບົດລາຍງານຂອງໂຄງການໄດ້ສຸມໃສ່ຍົກອອກບັນດາທັດສະນະການກຳນົດທິດໃນການພັດທະນາແລວທາງ. ພິເສດແມ່ນ ຍົກອອກບັນດາມາດຕະການ, ກົນໄກນະໂຍບາຍທີ່ແຕກຕ່າງກັນກ່ຽວກັບສົ້ນການເຕີບໂຕ, ລະດົມທຶນລົງທຶນ, ບຳລຸງສ້າງ, ແຮງງານ ແລະ ການຈັດຕັ້ງປະຕິບັດໂຄງການ.
ການສຳມະນາ ໄດ້ໃຊ້ເວລາສ່ວນໃຫຍ່ເພື່ອໃຫ້ບັນດາຜູ້ແທນສຸມໃສ່ປຶກສາຫາລື, ວິເຄາະ, ຕີລາຄາບັນດາເນື້ອໃນໂຄງການ. ບັນດາຄຳເຫັນທັງໝົດ ໄດ້ເນັ້ນໜັກເຖິງຄວາມສຳຄັນຂອງແລວເສດຖະກິດ PARA-EWEC; ກາລະໂອກາດ ແລະ ສິ່ງທ້າທາຍຂອງບັນດາທ້ອງຖິ່ນ ແລະ ຄວາມຮຽກຮ້ອງຕ້ອງການຂອງການຮ່ວມມືຜ່ານແລວທາງ PARA-EWEC ໃນໄລຍະຈະມາເຖິງ. ນອກນີ້, ຍັງຕ້ອງອັບເດດ, ເພີ່ມເຕີມຂໍ້ມູນຫຼ້າສຸດ, ຍົກອອກທັດສະນະ, ຍຸດທະສາດພັດທະນາທີ່ເໝາະສົມ...
ກ່າວຄຳປາໄສສະຫຼຸບການສຳມະນາ, ທ່ານ ຮວ່າງນາມ ຮອງປະທານຄະນະກຳມະການປະຊາຊົນແຂວງ ເນັ້ນໜັກວ່າ ການຄົ້ນຄວ້າເສັ້ນທາງຄົມມະນາຄົມ, ແລວເສດຖະກິດໃໝ່ ເພື່ອເຊື່ອມຕໍ່ບັນດາແຂວງ ກວາງຈີ້ - ສາລະວັນ - ອຸບົນຣາດຊະທານີ ແມ່ນມີຄວາມໝາຍສຳຄັນໃນການກຳນົດທິດບັນດາໂຄງການຮ່ວມມືລະຫວ່າງແຂວງ ກວາງຈີ້ ກັບບັນດາທ້ອງຖິ່ນຂອງລາວ ແລະ ໄທ ໃນໄລຍະຈະມາເຖິງ.
ສະນັ້ນ, ທ່ານຮອງປະທານຄະນະກຳມະການປະຊາຊົນແຂວງ ໄດ້ສະເໜີກຸ່ມຄົ້ນຄວ້າຮັບເອົາຄຳເຫັນທີ່ການສຳມະນາ ເພື່ອສຳເລັດໂຄງການທີ່ມີຄວາມສາມາດບົ່ມຊ້ອນສູງ ແລະ ສາມາດຍົກລະດັບເປັນຂອບຂະຫນາດລະດັບຊາດ, ດຶງດູດຄວາມສົນໃຈຂອງບັນດາປະເທດ, ອົງການຈັດຕັ້ງສາກົນ. ພ້ອມກັນນັ້ນ ກໍຕ້ອງເຮັດແຈ້ງເຖິງເຫດຜົນເປັນຫຍັງທີ່ຕ້ອງມີ PARA-EWEC ກ່ວາອີກ; ບົດບາດຂອງແຂວງ ກວາງຈີ້ ບົນແລວເສດຖະກິດນີ້ມີຄືແນວໃດ; ວິເຄາະບົດບາດ ແລະ ຜົນປະໂຫຍດຂອງບັນດາຝ່າຍທີ່ເຂົ້າຮ່ວມໂຄງການນີ້...
ບັນດາພະແນກ, ຂະແໜງການ, ທ້ອງຖິ່ນເປັນເຈົ້າການໃນການຄົ້ນຄວ້າກົນໄກ, ຮູບແບບການຮ່ວມມືເພື່ອຂຸດຄົ້ນບັນດາຄວາມສາມາດບົ່ມຊ້ອນທ່າແຮງຂອງ PARA-EWEC. ພ້ອມກັນນັ້ນ ກໍລະດົມ, ປະສົມປະສານບັນດາແຫຼ່ງກຳລັງກໍ່ສ້າງລະບົບພື້ນຖານໂຄງລ່າງຢ່າງມີປະສິດທິຜົນ, ພິເສດ ແມ່ນພັດທະນາພື້ນຖານໂຄງລ່າງຄົມມະນາຄົມ, ຜັນຂະຫຍາຍບັນດາເສັ້ນທາງຄົມມະນາຄົມທີ່ສຳຄັນແຫ່ງຊາດ ເຊິ່ງພວມ ແລະ ຈະໄດ້ຮັບການລົງທຶນໂດຍຜ່ານບໍລິເວນແຂວງ ກວາງຈີ້ ຢ່າງມີປະສິດທິຜົນ.
ມິງດຶກ
