ໃນວັນທີ 6 ສິງຫາ 2015 ຫໍພິພິດຕະພັນ ສົງຄາມໂລກຄັ້ງທີ II ຢູ່ ບອດສຕັ້ນ ປະເທດ ອາເມລິກາ ໄດຈັດການວາງສະແດງ ເອກກະສານ "ຄຳສັ່ງ" ການຖິ້ມລະເບີດປະລຳມະນູ ລົງໃສ່ນະຄອນສອງແຫ່ງຂອງປະເທດ ຢີປຸ່ນ.
ໃນວັນທີ 6 ສິງຫາ 1945 ເອກກະສານ 1 ໃນ 2 ນີ້ໄດ້ຖືກສົ່ງມາເຖິງມືຂອງ ຮ້ອຍຕີຼ Jacob Beser ກ່ອນທີ່ລາວ ແລະ ຄະນະນັກບິນ ຈະຂື້ນເຮືອບິນລຳລຽງ B29“Enola Gay” ອອກປະຕິບັດການພາລະກິດທີ່ຂັ້ນເທິງມອບໝາຍໃຫ້ນັ້ນຄື ການໄປຖິ້ມລະເບີດປະລຳມະນູໃສ່ ນະຄອນ ຮິໂຣຊີມາ –ປະເທດ ຢີປຸ່ນ.
"ຄຳສັ່ງ" ຖິ້ມລະເບີດໃສ່ນະຄອນ Hiroshima.
ສາມາດເຫັນໄດ້ເນື້ອໃນຂອງເອກກະສານທີ່ນຳມາວາງສະແດງ, ຂໍ້ຕົກລົງສັ່ງການຖິ້ມລະເບີດ ໄດ້ເຊັນອະນຸມັດໃນວັນທີ 5 ສິງຫາ 1945, ຊື່ຂອງລູກລະເບີດໃນການໂຈມຕີບໍ່ໄດ້ລະບຸໄວ້ໃນເອກກະສານຄຳສັ່ງ ມີພຽງຕົວໜັງສືທີ່ຂຽນວ່າ: “special” (ພິເສດ).
ເນື້ອໃນສ່ວນອື່ນຂອງຄຳສັ່ງແມ່ນການປະຕິບັດທີ່ສະມາຊິກຂອງຄະນະນັກບິນທີ່ຮ່ວມໃນປະຕິບັດການໂຈມຕີຕ້ອງປະຕິບັດຕາມ ນັບແຕ່ການສູດມົນ, ການລຸກຂື້ນຈາກຕຽງນອນ, ກິນດື່ມ, ປະຊຸມ ກ່ອນຈະເລີ່ມປະຕິບັດພາລະກິດ.
ວັນທີ 6 ສິງຫາ 1945 ເຮືອບິນ B-29 Enola Gay ຂອງຝຸງບິນ 509 ໂດຍກັບຕັນ ຮ້ອຍເອກ Paul Tibbets, ອອກບິນຈາກ North Field – ຖ່ານທີ່ໝັ້ນກອງທັບອາກາດ ເທິງເກາະ Tinian ພາກຕາເວັນຕົກ ມະຫາສະໝຸດປາຊີຟິກ ຫ່າງຈາກ ຢີປຸ່ນ ປະມານ 6ຊົ່ວໂມງ.
ເຮືອບິນ B-29 ຊື່ວ່າ Enola Gay ແລະ ນັກບິນ - ຜູ້ທີ່ຂັບຍົນໄປຖິ້ມລະເບີດປະລຳມະນູ "Little Boy" ລົງໃສນະຄອນ Hiroshima 6/8/1945. (ພາບ: Wiki)
ເວລາ 8ໂມງ15 (ຕາມເວລາຂອງ Hiroshima), ເຮືອບິນ Enola Gay ໄດ້ຖິ້ມລູກລະເບີດປະລຳມະນູ "Little Boy" ເທິງອາກາດລົງໃສ່ໃຈກາງ ຮິໂຣຊີມາ. ລູກລະເບີດແຕກຟົ້ງຂື້ນຫ່າງຈາກໜ້າດິນ ປະມານ 600ແມັດ ຊຳ່ກັບແຮງລະເບີດ 13 ກິໂລຕັນ, ເຮັດໃຫ້ມີຄົນເສຍຊີວິດທັນທີ 90.000ຄົນ ແລະ ຫຼາຍກວ່າ 60.000ຄົນ ເສຍຊີວິດຫຼາຍປີຕໍ່ຈາກນັ້ນຍ້ອນບາດເຈັບ ແລະ ຍ້ອນຜົນກະທົບຈາກລັງສີ.
ລູກລະເບີດປະລຳມະນູ Little Boy. (ພາບ: ສະຖາບັນສຳເນົາແຫ່ງຊາດ ອາເມລິກາ)
ຫຼັງຈາກນັ້ນ 3 ວັນ, ຮ້ອຍຕຼີ Beser ໄດ້ຮັບເອກກະສານທີ່ມີເນື້ອໃນຄຳສັ່ງຄືກັນ ແລະ ພາລະກິດໂຈມຕີດ້ວຍລະເບີດປະລຳມະນູໜ່ວຍທີ 2 ເກືອບຄ້າຍຄືກັບພາລະກິດ ຢູ່ ຮິໂຣຊີມາ. ຄືກັນກັບເອກກະສານ "ຄຳສັ່ງ" ສະບັບທຳອິດ ຊື່ຂອງລູກລະເບີດກໍ່ໄດ້ລະບູໄວ້ໃນເອກກະສານ ມີພຽງຄຳວ່າ "ພິເສດ".
"ຄຳສັ່ງ" ຖິ້ມລະເບີດໃສ່ນະຄອນ Nagasaki.
ຕອນເຊົ້າວັນທີ 9 ສິງຫາ 1945 ສູນຄວບຄຸມການບິນ B-29 Bock's Car, ໂດຍການເປັນກັບຕັນຂອງ ພັນຕຼີ Charles W. Sweeney ນຳລູກລະເບີດປະລຳມະນູ "Fat Man" ໂດຍເປົ້າໝາຍອັນດັບ 1 ແມ່ນ Kokura, ເປົ້າໝາຍທີ 2 ແມ່ນ Nagasaki. ເມື່ອບິນມາຮອດ Kokura ທ້ອງຟ້າຖືກປົກຄຸມດ້ວຍເມກໝອກ ເຮັດໃຫ້ທັດສະນະວິໄສໃນການເບິ່ງບໍ່ດີ ພັນຕຼີ Sweeney ຕັດສິນໃຈບິນກັບໄປຫາເປົ້າໝາຍທີ 2 ຄື: Nagasaki.
ເຮືອບິນ B29 "Rockscar" . (ພາບ: AFP)
ເວລາ 11ໂມງ 01 ລູກລະເບີດ"Fat Man", ມີຫົວລົບໜັກປະມານ 6,5 ກິໂລ Plutonium 239 ໄດ້ຖືກຖິ້ມລົງໃສ່ ນິຄົມອຸດສາຫະກຳ ຂອງນະຄອນ Nagasaki. 43 ວິນາທີຕໍ່ມາ ລະເບີດປະລຳມະນູແຕກຟົ້ງສູງຂື້ນກວ່າ 469ແມັດຈາກພື້ນດິນ, ລະຫວ່າງໂຮງງານເຫັຼກ ແລະ ອາວຸດ ຂອງ Misubishi ຢູ່ໂຮງງານປະກອບ ຕໍປີໂດ ຂອງ Misubishi-Urakami. ການລະເບີດມີຄວາມແຮງຊຳ່ກັບ 21 ກິໂລຕັນ ເຮັດໃຫ້ມີຜູ້ເສຍຊີວິດທັນທີ 70.000ຄົນ ແລະ ອີກປະມານ 60.000 ບາດເຈັບ.
ຫຼາຍປີພາຍຫຼັງສຳເລັດປະຕິບັດພາລະກິດ, ຮ້ອຍໂທ Beser, ຜູ້ທຳອິດທີ່ເຂົ້າຮ່ວມທັງສອງພາລະກິດ ພົບກັບ Kenneth Rendell, ຜູ້ກໍ່ຕັ້ງຫໍພິພິດຕະພັນ ສົງຄາມໂລກຄັ້ງທີ II ຢູ່ Boston, ປະເທດອາເມລິກາ ແລະ ມອບໃຫ້ເອກກະສານ ສອງສະບັບດັ່ງກ່າວໃຫ້ລາວ. Rendell ໄດ້ໃຫ້ສຳພາດກັບສຳນັກຂ່າວ Time ວ່າ: "ເອກກະສານນີ້ແມ່ນກະແຈເປີດໃຫ້ເຫັນສິ່ງທີເກີດຂື້ນ ເຮັດໃຫ້ໂລກປ່ຽນແປງຊົ່ວກາລະນານ".
(ຫັດທະບູນ)