 |
ທ່ານເລກ໊ວກຟອງ ແລະ ທ່ານ AlexanderBugaev ລົງນາມເຂົ້າຂໍ້ຕົກລົງການຮ່ວມມືລະຫວ່າງຄະນະກຳມະການຊາວໜຸ່ມແຫ່ງຊາດຫວຽດນາມ ແລະ ອົງການຊາວໜຸ່ມສະຫະພັນລັດເຊຍ ກ່ຽວກັບ ວຽກງານຊາວໜຸ່ມ.(ພາບ: TTXVN)
ເວທີປາໄສໄດ້ດຳເນີນໃນລະຫວ່າງ ວັນທີ 23 – 29 ກໍລະກົດ ຢູ່ຮ່າໂນ້ຍ, ນະຄອນ ໂຮ່ຈີມິນ ແລະ ແຂວງ ກ໋ວາງນິງ ເພື່ອແນໃສ່ຊົມເຊີຍເຫດການເຄື່ອນໄຫວປີ ຫວຽດນາມ - ລັດເຊຍ, ລັດເຊຍ - ຫວຽດນາມ; ສະເຫຼີມສະຫຼອງ 25 ປີ ແຫ່ງວັນລົງນາມສົນທິສັນຍາກ່ຽວກັບບັນດາຫຼັກການພື້ນຖານຂອງການພົວພັນມິດຕະພາບ ລະຫວ່າງ ຫວຽດນາມ - ລັດເຊຍ. ເວທີປາໄສຊາວໜຸ່ມ ຫວຽດນາມ - ສະຫະພັນ ລັດເຊຍ ໄດ້ຈັດຕັ້ງພ້ອມກັບເວທີປາໄສຊາວໜຸ່ມ ສະຫະພັນລັດເຊຍ - ຫວຽດນາມ, ເຊິ່ງຈະດຳເນີນໃນລະຫວ່າງວັນທີ 24 ກັນຍາ - 1 ຕຸລາ 2019 ຢູ່ ມົດສະກູ ແລະ Saint Peterburg (ສະຫະພັນ ລັດເຊຍ).
ກ່າວຄຳເຫັນທີ່ ພິທີ, ທ່ານ ເລກ໊ວກຟອງ ເລຂາຜູ້ທີ 1 ສູນກາງຄະນະຊາວໜຸ່ມ, ຫົວໜ້າຄະນະກຳມະການຊາວໜຸ່ມແຫ່ງຊາດ ຫວຽດນາມ, ຢັ້ງຢືນວ່າ ເວທີປາໄສແມ່ນໂອກາດທີ່ດີເພື່ອໃຫ້ອົງການຮັບຜິດຊອບຊາວໜຸ່ມ ແລະ ຊາວໜຸ່ມສອງປະເທດແລກປ່ຽນຂໍ້ມູນຂ່າວສານ, ແບ່ງປັນບົດຮຽນ, ປະສົບການ ກ່ຽວກັບ ວຽກງານຊາວໜຸ່ມຂອງແຕ່ລະປະເທດ, ເປັນຕົ້ນແມ່ນ ໃນຂົງເຂດຊາວໜຸ່ມອາສາສະໝັກ, ເຂົ້າຮ່ວມການສ້າງຊົນນະບົດໃໝ່ ແລະ ຂົງເຂດເລີ່ມຕົ້ນທຸລະກິດ start up.
ເວທີປາໄສໄດ້ຈັດຕັ້ງເພື່ອແນໃສ່ປະກອບສ່ວນເພີ່ມທະວີການສຶກສາມູນເຊື້ອມິດຕະພາບອັນດີງາມ ລະຫວ່າງ ຫວຽດນາມ - ລັດເຊຍ ໃຫ້ແກ່ຊາວໜຸ່ມສອງປະເທດ, ຍົກສູງຄວາມຮັບຮູ້ກ່ຽວກັບການພົວພັນມິດຕະພາບທີ່ເປັນມູນເຊື້ອ, ຄູ່ຮ່ວມມືຍຸດທະສາດຮອບດ້ານລະຫວ່າງ ຫວຽດນາມ - ລັດເຊຍ, ພ້ອມທັງເປັນໂອກາດເພື່ອຍູ້ແຮງການໂຄສະນາ, ແນະນຳກ່ຽວກັບ ປະເທດ ຊາດ, ຊາວ ຫວຽດນາມ ແລະ ຜົນສຳເລັດ30ກ່ວາປີການພັດທະນາ ປ່ຽນແປງໃໝ່ຂອງຫວຽດນາມ.
（ແຫຼ່ງຂໍ້ມູນ： VOVWORLD）
