| ບັນດາອົງການຈັດຕັ້ງປະຊາຊົນອວຍພອນສະຫາຍປະທານປະເທດ ແຫ່ງ ສສ ຫວຽດນາມ ເລືອງເກື່ອງ | |
| ຈົດໝາຍອວຍພອນສະຫາຍ ເລືອງເກື່ອງ ໄດ້ຮັບເລືອກຕັ້ງເປັນປະທານປະເທດຫວຽດນາມ |
ທ່ານປະທານປະເທດລາວ ທອງລຸນ ສີສຸລິດ ສະແດງຄວາມເຊື່ອໝັ້ນວ່າ ທ່ານປະທານປະເທດຫວຽດນາມ ເລືອງເກື່ອງ ພ້ອມກັບບັນດາການນຳຂັ້ນສູງ ຈະນຳພາຫວຽດນາມ ນັບມື້ນັບພັດທະນາ, ປະຕິບັດບັນດາເປົ້າໝາຍທີ່ໄດ້ວາງອອກ, ນຳຫວຽດນາມ ກາຍເປັນປະເທດອຸດສາຫະກຳພັດທະນາທີ່ມີລາຍຮັບສູງ.
 |
| ທ່ານປະທານປະເທດ ຫວຽດນາມ ເລືອງເກື່ອງ ແລະ ທ່ານເລຂາທິການໃຫຍ່, ປະທານປະເທດ ລາວ ທອງລຸນ ສີສຸລິດ ໃນການສົນທະນາທາງໄກ ໃນວັນທີ 8 ພະຈິກ. (ພາບ: ສຳນັກຂ່າວສານ ຫວຽດນາມ) |
ທ່ານເລຂາທິການໃຫຍ່, ປະທານປະເທດ ລາວ ໄດ້ຕີລາຄາສູງສາຍພົວພັນມິດຕະພາບທີ່ເປັນມູນເຊື້ອ ແລະ ຄວາມສະໜິດຕິດພັນລະຫວ່າງພັກ, ລັດ ແລະ ປະຊາຊົນ ລາວ - ຫວຽດນາມ. ທ່ານໄດ້ສະແດງຄວາມຂອບໃຈ ຫວຽດນາມ ທີ່ໄດ້ໃຫ້ການຊ່ວຍເຫລືອອັນລ້ຳຄ່າແກ່ລາວ ໃນໄລຍະຜ່ານມາ ດ້ວຍຈິດໃຈ “ເຂົ້າເມັດຫັກ, ຜັກເສັ້ນໜຶ່ງກໍ່ແບ່ງກັນກິນ”; ພິເສດແມ່ນໄດ້ໜູນຊ່ວຍຫຼາຍດ້ານເພື່ອໃຫ້ລາວ ດຳລົງຕຳແໜ່ງເປັນປະທານ ອາຊຽນ ແລະ ປະທານກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊີຕາເວັນອອກສ່ຽງໃຕ້ (AIPA) ໃນປີ 2024 ຢ່າງສຳເລັດຜົນ.
ທ່ານເລຂາທິການໃຫຍ່, ປະທານປະເທດລາວ ຢືນຢັນວ່າ ຈະສົມທົບກັນຢ່າງແໜ້ນແຟ້ນກັບ ທ່ານປະທານປະເທດ ເລືອງເກື່ອງ ຜັນຂະຫຍາຍບັນດາຂໍ້ຕົກລົງຂັ້ນສູງທີ່ບັນລຸຜົນສຳເລັດລະຫວ່າງ 2 ປະເທດ, ປະກອບສ່ວນເຂົ້າໃນການເສີມຂະຫຍາຍໃນການພົວພັນທີ່ສະໜິດຕິດພັນແບບພິເສດລະຫວ່າງ ລາວ ແລະ ຫວຽດນາມ ຕື່ມອີກ.
ທ່ານປະທານປະເທດ ເລືອງເກື່ອງ ໄດ້ຂອບໃຈ ທ່ານເລຂາທິການໃຫຍ່, ປະທານປະເທດລາວ ທອງລຸນ ສີສຸລິດ ທີ່ເປັນຜູ້ນຳຕ່າງປະເທດທຳອິດທີ່ສົ່ງຈົດໝາຍອວຍພອນ ແລະ ຈັດຕັ້ງການສົນທະນາທາງໄກ ພາຍຫຼັງທີ່ປະທານປະເທດໄດ້ຮັບການເລືອກຕັ້ງໃຫ້ດຳລົງຕຳແໜ່ງໃໝ່. ທ່ານຢືນຢັນໃນຖານະຕຳແໜ່ງໃໝ່ຂອງທ່ານ ຈະສືບຕໍ່ສົມທົບກັນຢ່າງແໜ້ນແຟ້ນກັບທ່ານເລຂາທິການໃຫຍ່, ປະທານປະເທດ ລາວ ແລະ ບັນດາການນຳຂັ້ນສູງຂອງລາວ ເພື່ອເສີມສ້າງສາຍພົວພັນອັນດີງາມ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດ.
 |
| ວັນທີ 8 ພະຈິກ, ທ່ານປະທານປະເທດ ເລືອງເກື່ອງ ໄດ້ມີການສົນທະນາທາງໄກກັບ ທ່ານເລຂາທິການໃຫຍ່, ປະທານປະເທດ ລາວ ທອງລຸນ ສີສຸລິດ. (ພາບ: ສຳນັກຂ່າວສານ ຫວຽດນາມ) |
ການນຳ 2 ທ່ານໄດ້ແຈ້ງໃຫ້ກັນຊາບກ່ຽວກັບສະພາບການຢູ່ແຕ່ລະປະເທດ; ເຫັນດີເປັນເອກະພາບສືບຕໍ່ເອົາໃຈໃສ່ຢ່າງໃກ້ ຊິດ, ຊີ້ນຳບັນດາອົງການທີ່ກ່ຽວຂ້ອງຂອງ 2 ຝ່າຍສຸມໃສ່ຜັນຂະຫຍາຍໝາກຜົນການພົບປະຂອງສອງກົມການເມືອງ ແລະ ບັນລຸໄດ້ບັນດາຂໍ້ຕົກລົງຂັ້ນສູງ. ພ້ອມກັນນັ້ນ, ກໍ່ຕັ້ງໜ້າກະກຽມໃຫ້ແກ່ກອງປະຊຸມຊຸດທີ 47 ຂອງຄະນະກຳມະການລະຫວ່າງລັດຖະບານສອງປະເທດໃນໄລຍະທີ່ຈະມາເຖິງ; ຍູ້ໄວການແກ້ໄຂຄວາມຫຍຸ້ງຍາກຂອງໂຄງການຈຸດສຸມຈຳນວນໜຶ່ງ ເພື່ອນຳການຮ່ວມມືດ້ານເສດຖະກິດລະຫວ່າງສອງປະເທດໃຫ້ພັດທະນາແບບຍືນຍົງ ແລະ ມີປະສິດທິຜົນອີກດ້ວຍ.
ການນຳສອງທ່ານກໍ່ເຫັນດີເປັນເອກະພາບສືບຕໍ່ຍູ້ແຮງໂຄສະນາເຜີຍແຜ່, ສຶກສາກ່ຽວກັບປະຫວັດສາດທີ່ເປັນມູນເຊື້ອແຫ່ງການພົວພັນແບບພິເສດ ຫວຽດນາມ - ລາວ, ເພີ່ມທະວີການແບ່ງປັນຂໍ້ມູນຂ່າວສານຢ່າງທັນການ ແລະ ສົມທົບກັນຢ່າງແໜ້ນແຟ້ນ, ສະໜັບສະໜູນເຊິ່ງກັນ ແລະ ກັນຢູ່ບັນດາເວທີພາກພື້ນ ແລະ ສາກົນ.
ແທັງຮັ່ງ
