 |
| ຜູ້ຕາງໜ້າມະຫາວິທະຍາໄລ ແຄ໋ງຮ່ວາ (ເບື້ອງຊ້າຍ) ແລະ ຄະນະປະຕິບັດງານມາຈາກ ນະຄອນຫຼວງວຽງຈັນ ໄດ້ລົງນາມໃນພິທີມອບຮັບ, ຕ້ອນຮັບນັກສຶກສາ ລາວ. |
ໃນຊຸມປີມໍ່ໆມານີ້, ແຂວງ ແຄ໋ງຮ່ວາ ໄດ້ເພີ່ມທະວີການຮ່ວມມືສາກົນ, ໂດຍສະເພາະແມ່ນການບຳລຸງສ້າງນັກສຶກສາສາກົນ, ໂດຍຜ່ານບັນດາລາຍການໃຫ້ທຶນການສຶກສາ 100% ກັບບັນດາທ້ອງຖິ່ນຂອງ ລາວ ເຊັ່ນ: ແຂວງຈຳປາສັກ, ອັດຕະປື ແລະ ນະຄອນຫຼວງວຽງຈັນ. ບັນດາການເຄື່ອນໄຫວດັ່ງກ່າວນີ້ ໄດ້ປະກອບສ່ວນຮັດແໜ້ນສາຍພົວພັນມິດຕະພາບ ແລະ ການຮ່ວມມືຮອບດ້ານລະຫວ່າງ ຫວຽດນາມ - ລາວ, ກໍ່ຄືລະຫວ່າງແຂວງ ແຄ໋ງຮ່ວາ ແລະ ບັນດາທ້ອງຖິ່ນຂອງ ລາວ ອີກດ້ວຍ.
* ນັກສຶກສາລາວ ຮັກແພງ ແຄ໋ງຮ່ວາ
ໜຶ່ງໃນບັນດານັກສຶກສາດີເດັ່ນໃນລາຍການບຳລຸງສ້າງແມ່ນ ນາງ ສະຫວັນຄຳ ວໍລະລາດ, ນັກສຶກສາຍິງ ລາວ ທີ່ຮຽນວິຊາບໍລິຫານທຸລະກິດ ຢູ່ມະຫາວິທະຍາໄລ ແຄ໋ງຮ່ວາ. ພາຍຫຼັງຮຽນພາສາ ຫວຽດນາມ 1 ປີ, ສະຫວັນຄຳ ໄດ້ມີຄວາມຄ່ອງແຄ້ວພາສາ ແລະ ຮັກແພງ ແຄ໋ງຮ່ວາ, ພິເສດແມ່ນບັນດາຄົນທີ່ເປັນມິດ ແລະ ບັນດາເຍື່ອງອາຫານ ຫວຽດນາມ ທີ່ເປັນເອກະລັກ. ນາງໃຫ້ຮູ້ວ່າ ສະພາບແວດລ້ອມການຮໍ່າຮຽນຢູ່ທີ່ນີ້ດີຫຼາຍ ແລະ ນາງຮູ້ສຶກຄືຢູ່ເຮືອນ. ນາງກໍ່ຫວັງວ່າ ພາຍຫຼັງຮຽນຈົບຈະປະກອບສ່ວນພັດທະນາບ້ານເກີດເມືອງນອນ. ກໍ່ເຊັ່ນດຽວກັນ, ທະວີໄຊ ລໍສະຫວັນ, ນັກສຶກສາຈາກນະຄອນຫຼວງວຽງຈັນ ກໍ່ໄດ້ແບ່ງປັນຄວາມດີໃຈເມື່ອໄດ້ຮັບທຶນການສຶກສາ ແລະ ບອກວ່າຈະພະຍາຍາມຮຽນພາສາ ຫວຽດນາມ ໃຫ້ເກັ່ງເພື່ອເດີນຕາມຄວາມຝັນໃນຂະແໜງ Marketing ແລະ ບໍລິຫານທຸລະກິດ.
ຕາມທ່ານ ປອ ຟານດຶກຫງ້າຍ, ຫົວໜ້າຫ້ອງການວິທະຍາສາດ ແລະ ການຮ່ວມມືຕ່າງປະເທດ ຂອງມະຫາວິທະຍາໄລ ແຄ໋ງຮ່ວາ ແລ້ວ, ບັນດານັກສຶກສາ ລາວ ໄດ້ຕີລາຄາສູງສະພາບແວດລ້ອມແຫ່ງການຮໍ່າຮຽນຢູ່ໂຮງຮຽນດ້ວຍພື້ນຖານວັດຖຸຢ່າງຄົບຖ້ວນ ແລະ ການໜູນຊ່ວຍຈາກບັນດາຄູອາຈານ ແລະ ໝູ່ເພື່ອນ. ນັກສຶກສາ ລາວ ຫຼາຍຄົນໄດ້ເຂົ້າຮ່ວມກິດຈະກໍາວັດທະນະທໍາ-ສິລະປະຢູ່ໂຮງຮຽນ, ສະແດງໃຫ້ເຫັນເຖິງນໍ້າໃຈສາມັກຄີ ແລະ ການເຊື່ອມໂຍງສູງ.
 |
| ທ່ານ ສົມພອນ ສອນດາລາ ຫົວໜ້າພະແນກສຶກສາ ແລະກິລານະຄອນຫຼວງວຽງຈັນ (ກາງ) ໄດ້ບອກໃຫ້ບັນດານັກສຶກສາ ລາວ ຕັ້ງໃຈຮ່ຳຮຽນ ຢູ່ແຂວງ ແຄ໋ງຮ່ວາ, ສສ ຫວຽດນາມ. |
* ຍູ້ແຮງການຮ່ວມມືສາກົນ
ເມື່ອບໍ່ດົນມານີ້, ມະຫາວິທະຍາໄລ ແຄ໋ງຮ່ວາ ໄດ້ຮັບນັກສຶກສາຈາກ ນະຄອນຫຼວງວຽງຈັນ ເພີ່ມຂຶ້ນຕາມບົດບັນທຶກຊ່ວຍຈຳການຮ່ວມມືໄລຍະ 2024-2028. ທ່ານ ສົມພອນ ສອນດາລາ ຫົວໜ້າພະແນກການສຶກສາ ແລະ ກິລາ ນະຄອນຫຼວງວຽງຈັນ ໃຫ້ຮູ້ວ່າ ຂະແໜງການສຶກສາ ນະຄອນຫຼວງວຽງຈັນ ເອົາໃຈໃສ່ເຖິງຄຸນນະພາບຂອງນັກຮຽນ ພາຍຫຼັງທີ່ໄປຮຽນຢູ່ຫວຽດນາມ, ມີຫຼາຍຄົນໄດ້ສ້າງເງື່ອນໄຂເພື່ອເຮັດວຽກຢູ່ບັນດາອົງການແຫ່ງລັດຂອງ ລາວ. ທ່ານກໍ່ປາດຖະໜາວ່າ ມະຫາວິທະຍາໄລ ແຄ໋ງຮ່ວາ ແລະ ແຂວງ ແຄ໋ງຮ່ວາ ຈະສືບຕໍ່ສ້າງເງື່ອນໄຂອຳນວຍຄວາມສະດວກໃຫ້ບັນດານັກສຶກສາ ລາວ ໃຫ້ຮໍ່າຮຽນເກັ່ງ.
ທ່ານ ຟານຝຽນ, ຜູ້ອຳນວຍການມະຫາວິທະຍາໄລ ແຄ໋ງຮ່ວາ ໃຫ້ຮູ້ວ່າ: ປະຈຸບັນ, ມະຫາວິທະຍາໄລ ແຄ໋ງຮ່ວາ ພວມບຳລຸງສ້າງນັກສຶກສາ ລາວ 20 ຄົນ, ສ່ວນຫຼາຍແມ່ນວິຊາການທ່ອງທ່ຽວ, ບໍລິຫານທຸລະກິດ ແລະ ຂາຍຍ່ອຍ. ບັນດານັກສຶກສາເຫຼົ່ານີ້ ໄດ້ຮັບການບຳລຸງສ້າງພາສາ ຫວຽດນາມ ໃນປີທຳອິດ ແລະ ໄດ້ຮັບທຶນການສຶກສາ 100%, ລວມມີຄ່າທີ່ພັກ ແລະ ຄ່າຮຽນ.
ທ່ານນາງ ຟ້ານທິທູກູກ, ຮອງຫົວໜ້າພະແນກພົວພັນຕ່າງປະເທດແຂວງ ແຄ໋ງຮ່ວາ ໃຫ້ຮູ້ວ່າ: ບັນດານັກສຶກສາ ລາວ ແມ່ນການເຄື່ອນໄຫວສະແດງໃຫ້ເຫັນການພົວພັນຮ່ວມມືມິດຕະພາບແບບພິເສດ, ນ້ຳໃຈສາມັກຄີ, ຄວາມເຂົ້າໃຈເຊິ່ງກັນ ແລະ ກັນລະຫວ່າງ ຫວຽດນາມ ແລະ ລາວ ເວົ້າລວມ, ລະຫວ່າງ ແຂວງ ແຄ໋ງຮ່ວາ ແລະ ນະຄອນຫຼວງວຽງຈັນ ເວົ້າສະເພາະ. ແຂວງ ແຄ໋ງຮ່ວາ ໜູນຊ່ວຍທຶນສຶກສາ 100% ໃຫ້ນັກສຶກສານະຄອນຫຼວງວຽງຈັນ, ກົງກັນຂ້າມ ນະຄອນຫຼວງວຽງຈັນ ກໍ່ໄດ້ໜູນຊ່ວຍແຂວງ ແຄ໋ງຮ່ວາ ບຳລຸງສ້າງໃຫ້ພະນັກງານແຂວງ 2 ໂຄຕາ/ປີ.
ນອກຈາກມະຫາວິທະຍາໄລ ແຄ໋ງຮ່ວາ, ນັກສຶກສາ ລາວ ຍັງຮຽນຢູ່ບັນດາມະຫາວິທະຍາໄລ ຍາຈ່າງ, ໂຮງຮຽນທະຫານຂໍ້ມູນຂ່າວສານ ແລະ ໂຮງຮຽນທະຫານກອງທັບອາກາດ, ຜ່ານບັນດາລາຍການທຶນການສຶກສາອື່ນໆ ໂດຍລັດຖະບານ ຫວຽດນາມ ແລະ ແຂວງ ແຄ໋ງຮວ່າ ອຸປະຖຳ. ບັນດາໂຄງການດັ່ງກ່າວ ບໍ່ພຽງແຕ່ຊ່ວຍໃຫ້ນັກສຶກສາ ລາວ ມີໂອກາດໄດ້ຮຽນຮູ້ ແລະ ພັດທະນາວິຊາຊີບເທົ່ານັ້ນ, ຫາກຍັງເປັນການປັບປຸງສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດ, ສ້າງພື້ນຖານໃຫ້ແກ່ການພັດທະນາແບບຍືນຍົງໃນອະນາຄົດ.
 | ສາມັກຄີສ້າງເສັ້ນຊາຍແດນຫວຽດນາມ-ລາວ ຢ່າງມີສັນຕິພາບ, ມິດຕະພາບ, ການຮ່ວມມື ແລະພ້ອມກັນພັດທະນາ ຍສໝ - ພາຍຫຼັງ 6 ປີແຫ່ງການເຄື່ອນໄຫວຢູ່ເທິງຍອດພູທີ່ອັນຕະລາຍ, ສະພາບອາກາດທີ່ຮ້າຍແຮງ, ດ້ວຍຄວາມຕັດສິນໃຈ ແລະຈິດໃຈສະໜັບສະໜູນເຊິ່ງກັນ ແລະກັນ, ກຳລັງຂີດເສັ້ນ, ປັກຫຼັກໝາຍຊາຍແດນຂອງທັງສອງຝ່າຍໄດ້ເຮັດສຳເລັດໜ້າທີ່. ລະບົບຫຼັກໝາຍຊາຍແດນແຫ່ງຊາດຫວຽດນາມ - ລາວ ໄດ້ຮັບການກໍ່ສ້າງສຳເລັດ 202 ຫຼັກ/ 2.067 ກິໂລເມັດ |
 | ຫວຽດນາມ - ລາວ: ສ້າງຄວາມມິດຕະພາບຜ່ານການຮ່ວມມື ໃນການຝຶກອົບຮົມພະນັກງານຄະນະຊາວໜຸ່ມ ຍສໝ - ຮອດທ້າຍປີ 2022, ຄະນະສູນກາງ ຊາວໜຸ່ມກອມມູນິດ ໂຮ່ຈີມິນ ໄດ້ຝຶກອົບຮົມພະນັກງານທຸກຂັ້ນຂອງຄະນະຊາວໜຸ່ມປະຊາຊົນປະຕິວັດລາວ ຈຳນວນ 1147 ຄົນ. ບັນດານັກສຶກສາໄດ້ກາຍເປັນຂົວຕໍ່ຮັດແໜ້ນສາຍພົວພັນມິດຕະພາບອັນເປັນມູນເຊື້ອ ຂອງສອງອົງການຊາວໜຸ່ມເວົ້າສະເພາະ ແລະ ຂອງປະຊາຊົນສອງປະເທດ ລາວ ແລະ ຫວຽດນາມ ເວົ້າລວມ. |
ແທັງຮັ່ງ
