 | ຮັດແໜ້ນນ້ຳໃຈສາມັກຄີມິດຕະພາບລະຫວ່າງກະຊວງຕຳຫຼວດສອງປະເທດຫວຽດນາມ - ລາວ |
| ເຕັມໄປດ້ວຍສາຍຈິດມິດໃຈຫວຽດນາມ-ລາວ ພາຍຫຼັງພາຍຸ ນໍ້າຖ້ວມ |
ບໍລິຈາກເພື່ອໜູນຊ່ວຍປະຊາຊົນລາວ ຜ່ານຜ່າຜົນຮ້າຍຈາກໄພພິບັດທຳມະຊາດ
ທີ່ບ້ານ ມາຍ, ເມືອງຫຼວງນ້ຳທາ, ແຂວງຫຼວງນ້ຳທາ (ປະເທດລາວ), ທ່ານນາງ ວຽງ ລໍວັນຄຳ ໄດ້ອົດທົນທຳຄວາມສະອາດຂີ້ຕົມບໍລິເວນເຮືອນໃນມື້ໜຶ່ງໃນກາງເດືອນກັນຍາ 2024. ນ້ຳຖ້ວມໄດ້ເອົາເຄື່ອງເຟີນີເຈີ ແລະ ສິ່ງຂອງທີ່ຈຳເປັນຂອງນາງໄປໝົດ, ເຮັດໃຫ້ນາງ ແລະ ຄອບຄົວປະສົບກັບຄວາມຫຍຸ້ງຍາກ.
"ນໍ້າທີ່ຖ້ວມສູງກວ່າຫລັງຄາ, ຄອບຄົວຂອງຂ້າພະເຈົ້າມີລົດຈັກໄຟຟ້າພຽງຄັນດຽວເພື່ອເດີນທາງ ແລະ ພາລູກສອງຄົນໄປໂຮງຮຽນ, ແຕ່ດຽວນີ້ມັນຫັກ ແລະ ບໍ່ມີເງິນແກ້ໄຂ. ສິ່ງທັງໝົດຍັງຢູ່ນີ້ກໍ່ເປັນຂີ້ເຫຍື້ອ ແລະ ຂີ້ຕົມ. ສິ່ງທີ່ຂ້າພະເຈົ້າຕ້ອງການທີ່ສຸດໃນປັດຈຸບັນແມ່ນຢາກມີບ່ອນຢູ່ເພື່ອຂ້າພະເຈົ້າຄ່ອຍໆເຮັດໃຫ້ຊີວິດຂອງຂ້າພະເຈົ້າມີຄວາມສະຖຽນລະພາບ”, ທ່ານນາງ ວຽງ ລໍວັນຄຳ ກ່າວ.
ໂດຍສະພາບຄືກັນ, ທ່ານ ຄຳແກ້ວ ໄຊໄລຄຳ, ປະຊາຊົນຜູ້ໜຶ່ງຢູ່ບ້ານ ຄອນ, ເມືອງຫຼວງນ້ຳທາ ກໍ່ໃຫ້ຮູ້ວ່າ ບ້ານຂອງລາວຖືກນໍ້າຖ້ວມໜັກ, ປະຊາຊົນປະສົບກັບຄວາມຫຍຸ້ງຍາກ ເມື່ອເຄື່ອງໃຊ້, ເຄື່ອງຈັກໃນການຜະລິດເສຍຫາຍໝົດ.
 |
| ຜູ້ຕາງໜ້າປະຊາຄົມຊາວຫວຽດນາມ ປະຈຳລາວ ໜູນຊ່ວຍປະຊາຊົນແຂວງຫຼວງນ້ຳທາ ທີ່ໄດ້ຮັບຜົນກະທົບຈາກພະຍຸ Yagi, ເດືອນກັນຍາ 2024. (ພາບ: Thich Minh Quang) |
ຕໍ່ການສູນເສຍດັ່ງກ່າວ, ປະຊາຄົມຊາວຫວຽດນາມ ຢູ່ລາວ ໄດ້ບໍລິຈາກເພື່ອຊ່ວຍເຫຼືອໃຫ້ແກ່ປະຊາຊົນລາວ ດ້ວຍບັນດາຂອງຂວັນທີ່ແທດຈິງຄື: ເງິນສົດ, ອາຫານ ແລະ ເຄື່ອງນຸ່ງຫົ່ມ, ຊ່ວຍປະຊາຊົນຜ່ານຜ່າຄວາມຫຍຸ້ງຍາກໃນເບື້ອງຕົ້ນ.
ພຣະອາຈານ ທິກມິງກວາງ, ເຈົ້າອາວາດວັດ ເຟີດຕິກ ນະຄອນຫຼວງວຽງຈັນ, ຫົວໜ້າຄະນະປະສານງານສະມາຄົມພຸດທະສາສະໜາຫວຽດນາມ ປະຈໍາລາວ ໃຫ້ຮູ້ວ່າ ໄດ້ສົ່ງເງິນຈໍານວນ 500 ລ້ານກີບ ໄປໃຫ້ປະຊາຊົນໃນເຂດປະສົບໄພ (1 ລ້ານກີບ/ຄອບຄົວ), ສະແດງໃຫ້ເຫັນເຖິງຄວາມຮັກແພງຂອງປະຊາຄົມຊາວຫວຽດນາມ ຢູ່ລາວ ດ້ວຍຄວາມຫວັງວ່າ ປະຊາຊົນຈະສາມາດມີຊີວິດການເປັນຢູ່ທີ່ເປັນປົກກະຕິໂດຍໄວ.
ທ່ານ ນັນວອນ ສິດປະເສີດ, ເລຂາໜ່ວຍພັກ, ນາຍບ້ານ ຄອນ ໄດ້ສະແດງຄວາມຂອບອົກຂອບໃຈຕໍ່ການໜູນຊ່ວຍຂອງປະຊາຊົນຊາວຫວຽດນາມ. ທ່ານໃຫ້ຮູ້ວ່າ ນີ້ບໍ່ພຽງແຕ່ແມ່ນການຊ່ວຍເຫຼືອດ້ານວັດຖຸເທົ່ານັ້ນ, ຫາກຍັງສະແດງໃຫ້ເຫັນຄວາມຮັກແພງອັນເລິກເຊິ່ງຂອງຊາວຫວຽດນາມ ທີ່ມີຕໍ່ປະຊາຊົນລາວ. ທ່ານ ຈັນທອງ ແກ້ວປະເສີດ, ຮອງເລຂາພັກແຂວງ ຫຼວງນ້ຳທາ ກໍ່ຢືນຢັນວ່າ ການຊ່ວຍເຫຼືອຈາກປະຊາຄົມຊາວຫວຽດນາມ ຢູ່ລາວ ສະແດງໃຫ້ເຫັນເຖິງຄວາມສາມັກຄີ, ຄວາມຮັກແພງ ແລະ ຄວາມຕິດພັນອັນເລິກເຊິ່ງລະຫວ່າງປະຊາຊົນສອງປະເທດ.
ວັນທີ 16 ກັນຍາ, ຄະນະຜູ້ແທນປະຊາຄົມຊາວຫວຽດນາມ ຢູ່ລາວ ໂດຍທ່ານ ຟານມິງຈ້ຽນ, ອຸປະທູດຊົ່ວຄາວສະຖານທູດຫວຽດນາມ ປະຈຳລາວ ນຳໜ້າ ໄດ້ມອບເງິນຊ່ວຍເຫຼືອແກ່ລັດຖະບານລາວ ຈໍານວນ 300 ລ້ານກີບ ໃຫ້ປະຊາຊົນທີ່ໄດ້ຮັບຜົນກະທົບ. ທີ່ພິທີຕ້ອນຮັບ, ທ່ານນາຍົກລັດຖະມົນຕີລາວ ສອນໄຊ ສີພັນດອນ ໄດ້ສະແດງຄວາມຮູ້ສຶກຕື້ນຕັນໃຈເມື່ອຫວນຄືນມູນເຊື້ອ “ເກືອເມັດຫັກ, ຜັກເສັ້ນໜຶ່ງກໍ່ແບ່ງກັນກິນ” ແລະ ໄດ້ສະແດງຄວາມຂອບໃຈຕໍ່ປະຊາຄົມຊາວຫວຽດນາມ ຢູ່ລາວ. ທ່ານນາຍົກລັດຖະມົນຕີຢືນຢັນວ່າ ນີ້ແມ່ນການຊ່ວຍເຫຼືອອັນລ້ຳຄ່າໃນສະພາບການທີ່ຫວຽດນາມ ກໍ່ໄດ້ຮັບຜົນກະທົບຢ່າງໜັກໜ່ວງຈາກພະຍຸ Yagi.
ນ້ຳໃຈມິດຕະພາບຂອງປະຊາຊົນລາວ ທີ່ມີຕໍ່ຫວຽດນາມ
ກ່ອນໜ້ານັ້ນ, ມີຂໍ້ມູນວ່າພະຍຸເລກທີ 3 ໄດ້ພັດເຂົ້າຫວຽດນາມ ໃນວັນທີ 6 – 7 ກັນຍາ, ໄດ້ສ້າງຄວາມເສຍຫາຍຢ່າງໜັກໜ່ວງຕໍ່ຊີວິດ ແລະ ຊັບສິນ, ໃນວັນທີ 9 ກັນຍາ, ທ່ານເລຂາທິການໃຫຍ່, ປະທານປະເທດລາວ ທອງລຸນ ສີສຸລິດ ແລະ ທ່ານນາຍົກລັດຖະມົນຕີລາວ ສອນໄຊ ສີພັນດອນ ໄດ້ສົ່ງໂທລະເລກຢື້ຢາມເຖິງທ່ານເລຂາທິການໃຫຍ່, ປະທານປະເທດ ຫວຽດນາມ ໂຕເລີມ ແລະ ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ.
ໃນໂທລະເລກ, ບັນດາການນຳຂັ້ນສູງຂອງລາວ ໄດ້ສົ່ງຄຳຢື້ຢາມຢ່າງຈິງໃຈ ແລະ ສະແດງຄວາມເຫັນໃຈຢ່າງເລິກເຊິ່ງບັນດາການນຳຂັ້ນສູງຂອງຫວຽດນາມ, ກໍ່ຄືເຖິງພັກ, ລັດຖະບານ ແລະ ປະຊາຊົນ ຫວຽດນາມ ອ້າຍນ້ອງ, ພິເສດແມ່ນອຳນາດການປົກຄອງ ແລະ ຄອບຄົວຜູ້ປະສົບເຄາະຮ້າຍຈາກໄພທຳມະຊາດຄັ້ງນີ້. ພ້ອມກັນນັ້ນ, ບັນດາການນຳລາວ ກໍ່ໄດ້ສະແດງຄວາມເຊື່ອໝັ້ນວ່າ ພາຍໃຕ້ການນຳພາ ແລະ ຄວາມເອົາໃຈໃສ່ຢ່າງໃກ້ຊິດຂອງພັກ, ລັດຖະບານ ຫວຽດນາມ ນັບແຕ່ສູນກາງຮອດທ້ອງຖິ່ນ, ປະຊາຊົນຊາວຫວຽດນາມ ຈະຜ່ານຜ່າຄວາມຫຍຸ້ງຍາກ ແລະ ຈະມີການດຳລົງຊີວິດທີ່ເປັນປົກກະຕິໂດຍໄວ.
ໃນການໄປຢ້ຽມຢາມທາງລັດຖະກິດຫວຽດນາມ ໃນເດືອນກັນຍາ 2024, ທ່ານເລຂາທິການໃຫຍ່, ປະທານປະເທດ ລາວ ທອງລຸນ ສີສຸລິດ ພ້ອມກັບພັນລະຍາ ແລະ ຄະນະຜູ້ແທນຂັ້ນສູງໄດ້ເຂົ້າຮ່ວມພິທີປຸກລະດົມການໜູນຊ່ວຍປະຊາຊົນຜູ້ປະສົບເຄາະຮ້າຍຈາກພະຍຸເລກທີ 3 ຢູ່ນະຄອນໂຮ່ຈິມິນ. ຢູ່ທີ່ນີ້, ທ່ານເລຂາທິການໃຫຍ່, ປະທານປະເທດລາວ ທອງລຸນ ສີສຸລິດ ແລະ ພັນລະຍາ ໄດ້ບໍລິຈາກເພື່ອຊ່ວຍເຫຼືອໃຫ້ປະຊາຊົນຫວຽດນາມ ຜ່ານຜ່າຜົນສະທ້ອນຈາກພະຍຸ ແລະ ໄພນໍ້າຖ້ວມ.
ວັນທີ 18 ກັນຍາ, ທ່ານ ຄຳຂັນ ຈັນທະວີສຸກ, ເລຂາພັກ, ເຈົ້າແຂວງໆຫຼວງພະບາງ ໄດ້ມາຍັງສະຖານກົງສຸນໃຫຍ່ ຫວຽດນາມ ປະຈຳ ຫຼວງພະບາງ ເພື່ອຢ້ຽມຢາມ ແລະ ມອບເງິນ 1 ຕື້ດົ່ງ ເພື່ອໜູນຊ່ວຍບັນດາແຂວງ ກວາງນິງ, ໄທງວຽນ, ເຊີນລາ, ລາວກາຍ, ອຽນບ໋າຍ ເພື່ອແກ້ໄຂຜົນສະທ້ອນຂອງພະຍຸ ແລະ ໄພນ້ຳຖ້ວມ.
ທ່ານ ຄຳຂັນ ຈັນທະວິສຸກ ໄດ້ແບ່ງປັນກັບຄວາມຫຍຸ້ງຍາກ, ຄວາມເສຍຫາຍທີ່ປະຊາຊົນບັນດາແຂວງພາກເໜືອຫວຽດນາມ ປະສົບພາຍຫຼັງພາຍຸ. ທ່ານເຊື່ອໝັ້ນວ່າ ຫວຽດນາມ ຈະຟື້ນຟູ ແລະ ສືບຕໍ່ພັດທະນາໂດຍໄວ, ຊີວິດການເປັນຢູ່ຂອງປະຊາຊົນຈະກັບຄືນສູ່ສະພາບປົກກະຕິໂດຍໄວ.
ບັນດາກະທຳແບ່ງປັນລະຫວ່າງປະຊາຊົນສອງປະເທດ ຫວຽດນາມ - ລາວ ໄດ້ ແລະ ພວມປັບປຸງສາຍພົວພັນສາມັກຄີແບບພິເສດ, ເຊິ່ງສະແດງໃຫ້ເຫັນຢ່າງຈະແຈ້ງຜ່ານບັນດາການກະທຳໃນຍາມທີີ່ຫຍຸ້ງຍາກ. ນ້ຳໃຈມິດຕະພາບນັ້ນຈະແມ່ນຊັບສົມບັດອັນລ້ຳຄ່າ, ເປັນພື້ນຖານອັນໜັກແໜ້ນເພື່ອໃຫ້ປະຊາຊົນສອງປະເທດພ້ອມກັນ ແລະ ແບ່ງປັນໃນທຸກຄວາມຫຍຸ້ງຍາກ ແລະ ສິ່ງທ້າທາຍ.
 | ຍສໝ - ຄະນະປະຕິບັດງານຂອງສະມາຄົມມິດຕະພາບ ລາວ-ຫວຽດນາມ ແຂວງ ເຊກອງ (ລາວ) ໂດຍທ່ານນາງ ບຸນຮຽງ ບຸນຈິດ ປະທານແນວລາວສ້າງຊາດ ແຂວງ ເຊກອງ, ປະທານສະມາຄົມມິດຕະພາບ ລາວ-ຫວຽດນາມ ແຂວງ ເຊກອງ ໄດ້ມີການໄປຢ້ຽມຢາມ ແລະ ເຮັດວຽກກັບສະມາຄົມມິດຕະພາບ ຫວຽດນາມ - ລາວ ແຂວງ ກວາງນາມ. |
 | ນ້ຳຖ້ວມຢູ່ແມ່ນ້ຳ ທາວ ທີ່ອຽນບ໋າຍ ເກີນຂີດສະຖິຕິໃນປະຫວັດສາດເມື່ອປີ 1968 ເກືອບ 1 ແມັດ ຍສໝ - ເວລາ 05:00 ໂມງຂອງວັນທີ 10 ກັນຍາ, ນໍ້າຖ້ວມນ້ຳແກ່ງຢູ່ແມ່ນ້ຳ ທາວ ຢູ່ ອຽນບ໋າຍ ມີຄວາມສູງ 35,22 ແມັດ, ສູງກວ່າລະດັບນ້ຳຖ້ວມໃນປະຫວັດສາດປີ 1968 (34,42 ແມັດ) 0,8 ແມັດ. ຄາດວ່າ, ປະຈຸປັນ ລະດັບນ້ຳຈະສືບຕໍ່ເພີ່ມຂຶ້ນ ແລະ ຮັກສາລະດັບສູງກວ່າລະດັບນ້ຳຖ້ວມໃນປະຫວັດສາດ. |
ມີງດຶກ
