 |
ພາບປະກອບ
ປັດຈຸບັນໂຮງໄຟຟ້າທີ່ໄດ້ດຳເນີນການຜະລິດຢູ່ລາວມີທັງໝົດ 75 ໂຄງການໃນຂອບເຂດທົ່ວປະເທດ ລວມກຳລັງຕິດຕັ້ງໄຟຟ້າທັງໝົດ 9.549,45 ເມກາວັດ (MW) ລວມພະລັງງານໄຟຟ້າທີ່ຜະລິດໄດ້ 50.563.26 GWh (ກິໂລ ວັດໂມງຕໍ່ປີ) ເຊິ່ງເຂື່ອນໄຟຟ້າທີ່ໄດ້ດຳເນີນການຜະລິດ (ກຳລັງຕິດຕັ້ງໄຟຟ້າໃຫຍ່ກວ່າ 5 MW) ປະກອບມີ 54 ໂຄງການ ມີກຳລັງຕິດຕັ້ງໄຟຟ້າ 7.576,3 MW ມີພະລັງງານໄຟຟ້າ 37.577,35 GWhຕໍ່ປີ ໂຮງຜະລິດໄຟຟ້າຖ່ານຫີນທີ່ໄດ້ດຳເນີນການຜະລິດ (ກຳລັງຕິດຕັ້ງໄຟຟ້າໃຫຍ່ກວ່າ 5 MW) ປະກອບມີ 1 ໂຄງການ ມີກຳລັງຕິດຕັ້ງໄຟຟ້າ 1.878 MW ມີພະລັງງານໄຟຟ້າ 12.582 GWhຕໍ່ປີ ໂຮງຜະລິດໄຟຟ້າຈາກພະລັງງານທົດແທນອື່ນໆທີ່ໄດ້ດຳເນີນການຜະລິດ (ກຳລັງຕິດຕັ້ງໄຟຟ້າໃຫຍ່ກວ່າ 5 MW) ປະກອບມີ 1 ໂຄງການ ມີກຳລັງຕິດຕັ້ງໄຟຟ້າ 20 MW ມີພະລັງງານໄຟຟ້າ 105 GWhຕໍ່ປີ ໂຮງຜະລິດໄຟຟ້າຈາກແສງຕາເວັນທີ່ໄດ້ດຳເນີນການຜະລິດ (ກຳລັງຕິດຕັ້ງໄຟຟ້າໃຫຍ່ກວ່າ 5 MW) ປະກອບມີ 2 ໂຄງການ ມີກຳລັງຕິດຕັ້ງໄຟຟ້າ 20,2 MW ມີພະລັງງານໄຟຟ້າ 40,32 GWhຕໍ່ປີ ໂຮງຜະລິດໄຟຟ້າທີ່ໄດ້ດຳເນີນການຜະລິດປະກອບມີ 13 ໂຄງການ ມີກຳລັງຕິດຕັ້ງໄຟຟ້າ 38,5 MW ມີພະລັງງານໄຟຟ້າ 102,12 GWh ຕໍ່ປີ ໂຮງຜະລິດໄຟຟ້າຈາກພະລັງງານທົດແທນອື່ນໆທີ່ໄດ້ດຳເນີນການຜະລິດ (ກຳລັງຕິດຕັ້ງໄຟຟ້າໃຫຍ່ກວ່າ ຫຼື ເທົ່າກັບ 5 MW) ປະກອບມີ 1 ໂຄງການ ມີກຳລັງຕິດຕັ້ງໄຟຟ້າ 5 MW ມີພະລັງງານ ໄຟຟ້າ 57,59 GWhຕໍ່ປີ ໂຮງຜະລິດໄຟຟ້າຈາກແສງຕາເວັນທີ່ໄດ້ດຳເນີນການຜະລິດປະກອບມີ 3 ໂຄງການ ມີກຳລັງຕິດຕັ້ງໄຟຟ້າ 11,8 MW ມີພະລັງງານໄຟຟ້າ 18,88 GWhປີ ນອກນີ້ ຍັງມີໂຄງການທີ່ກຳລັງກໍ່ສ້າງ 21 ໂຄງການ ລວມກຳລັງຕິດຕັ້ງທັງໝົດ 3.243,5 MW ກຳລັງສຶກສາ (ຂັ້ນ PDA) 38 ໂຄງການ ລວມກຳລັງຕິດຕັ້ງທັງໝົດ 11.791 MW ລວມພະລັງງານໄຟຟ້າທີ່ຜະລິດໄດ້ 60.934 GWhຕໍ່ປີ ແລະ ກະກຽມສຶກສາ (ຂັ້ນ MOU) 55 ໂຄງການລວມກຳລັງຕິດຕັ້ງທັງໝົດ 10.806 MW ລວມພະລັງງານໄຟຟ້າທີ່ຜະລິດໄດ້ 47.625 GWhຕໍ່ປີ.
ຄວາມຕ້ອງການ ນໍາໃຊ້ພະລັງງານໄຟຟ້າພາຍໃນ ສປປ ລາວ ໃນຊຸມປີຜ່ານມາແມ່ນນັບມື້ນັບຂະຫຍາຍຕົວຂຶ້ນ ຍ້ອນມີການຂະຫຍາຍຕົວຂອງພົນລະເຮືອນ ແລະ ໂຮງຈັກໂຮງງານ ສະເພາະ ປີ 2019 ການຊົມ ໃຊ້ໄຟຟ້າພາຍໃນປະເທດແມ່ນ 1.222 ເມກາວັດ, ແຕ່ກະຊວງ ພະລັງງານ ແລະ ບໍ່ແຮ່ ຍັງໃຫ້ຮູ້ຕື່ມວ່າ ປະລິມານການຊົມໃຊ້ພະລັງງານໄຟຟ້າພາຍໃນ ຈະເພີ່ມຂຶ້ນເຖິງ 1.800 ເມກາວັດ ໃນລະຫວ່າງ ປີ 2020-2025. ສະນັ້ນ, ເພື່ອກຽມ ຮັບມືກັບຄວາມຕ້ອງການດັ່ງກ່າວ ກະຊວງພະລັງງານ ແລະ ບໍ່ແຮ່ ສົມທົບກັບລັດວິສາຫະກິດໄຟຟ້າລາວ ຮ່ວມກັນວາງແຜນການຜະລິດໄຟຟ້າ ໃຫ້ພຽງພໍ ກັບຄວາມຕ້ອງການພາຍໃນ ທີ່ນັບມື້ນັບເພີ່ມຂື້ນ ໂດຍສະເພາະ ແມ່ນກຽມພ້ອມສະໜອງໃຫ້ພຽງພໍຕໍ່ ການຊົມໃຊ້ໃນຄົວເຮືອນ, ເຂດເສດຖະກິດພິເສດ, ເຂດເສດຖະກິດສະເພາະ, ເຂດອຸດສາຫະກໍາ, ທາງລົດໄຟ, ທາງດ່ວນ, ແລະ ບັນດາໜໍ່ແໜງອຸດສາຫະກໍາໜັກ ແລະ ອຸດສາຫະກໍາປຸງແຕ່ງ ໃນຂອບເຂດທົ່ວປະເທດ.
ໃນຊຸມປີຕໍ່ໜ້າ ຂະແໜງພະລັງງານ ແລະ ບໍ່ແຮ່ ມີແຜນຈະຂະຫຍາຍຕະຫລາດຈຳໜ່າຍໄຟຟ້າ ຄື ຕະຫລາດພາຍໃນ ແລະ ຕ່າງປະເທດ, ເຊິ່ງຂະແໜງດັ່ງກ່າວໄດ້ສ້າງແຜນພັດທະນາທີ່ມີລັກສະນະເຊື່ອມສານຢ່າງກົມກຽວ ກັບຫລາຍຂະແໜງການພາຍໃນປະເທດ ເພື່ອກຳນົດຄວາມຕ້ອງການພາຍໃນໃຫ້ຊັດເຈນ ເຊັ່ນ: ການຊົມໃຊ້ໄຟຟ້າໃນເຂດເສດຖະກິດພິເສດ, ເຂດເສດຖະກິດສະເພາະ, ເຂດອຸດສາຫະກຳ, ບັນດາໜໍ່ແໜງອຸດສາຫະກຳໜັກ-ອຸດສາຫະກຳປຸງແຕ່ງຕ່າງໆ ທີ່ຈະເກີດຂຶ້ນຢູ່ແຕ່ລະແຂວງ ໃນຊຸມປີຕໍ່ໜ້າ ແລະ ເພື່ອສະໜອງແຫລ່ງພະລັງງານໄຟຟ້າຢ່າງພຽງພໍ ແລະ ມີຄຸນນະພາບລວມທັງນະໂຍບາຍຕ່າງໆ ກ່ຽວກັບການດຶງດູດນັກລົງທຶນໄປພ້ອມໆກັນ ເພື່ອໃຫ້ທຸກພາກ ສ່ວນເສດຖະກິດ ສາມາດເຂົ້າເຖິງໄຟຟ້າ, ພຽງພໍ ລາຄາສົມເຫດສົມຜົນ ໃນຂອບເຂດທົ່ວປະເທດ ໂດຍສະເພາະອັດຕາການຊົມໃຊ້ໄຟຟ້າຂອງພໍ່ແມ່ປະຊາຊົນ ໃຫ້ບັນລຸ 98%. ໃນໄລຍະແຕ່ ປີ 2020-2030 ສປປ ລາວ ຈະສາມາດສົ່ງອອກໄຟຟ້າ ປະມານ 20.000 ເມກາວັດ, ປີ 2020-2030 ຄາດຄະເນລັດຖະບານໄທ ຕ້ອງການນໍາເຂົ້າໄຟຟ້າ ຈາກ ສປປ ລາວ ປະມານ 9.000 ເມກາວັດ, ກໍາປູເຈຍ 6.000 ເມກາວັດ, ສສ.ຫວຽດນາມ 5.000 ເມກາວັດ, ມຽນມາ 300 ເມກາວັດ ແລະ ມາເລເຊຍ 300 ເມກາວັດ, ສໍາລັບປະເທດສິງກາໂປ ແມ່ນຢູ່ໃນໄລຍະເຈລະຈາຊື້-ຂາຍ.
（ໄຊພອນ）
