ແທັງຮວ໊າ-ຫົວພັນ: “ເຕັມໄປດ້ວຍສາຍພົວພັນຖານອ້າຍນ້ອງ” ແບບພິເສດ ຫວຽດນາມ-ລາວ

	ເຊີນລາ ໜູນຊ່ວຍແຂວງ ຫົວພັນ ແກ້ໄຂຜົນຮ້າຍຢ້ອນຫຼັງຈາກໄພທຳມະຊາດ
	ເລຂາຄະນະພັກແຂວງ ແທັງຮວ໋າ ຕ້ອນຮັບຄະນະຜູ້ແທນສະພາປະຊາຊົນແຂວງ ຫົວພັນ - ລາວ

ສາຍພົວພັນນີ້ບໍ່ພຽງແຕ່ມີລັກສະນະປະຫວັດສາດເທົ່ານັ້ນ, ຫາກຍັງສ້າງພື້ນຖານອັນໜັກແໜ້ນໃຫ້ແກ່ການພັດທະນາແບບຍືນຍົງໃນປະຈຸບັນ ແລະອະນາຄົດ, ທັງປະກອບສ່ວນຮັດແໜ້ນນໍ້າໃຈມິດຕະພາບລະຫວ່າງສອງປະເທດ.

ແຂວງແທັງຮວ໊າ-ຫົວພັນ ໃນຊຸມປີແຫ່ງການຕໍ່ຕ້ານ

ແຂວງແທັງຮວ໊າ (ຫວຽດນາມ) ແລະແຂວງຫົວພັນ ມີເສັ້ນຊາຍແດນຕິດຈອດກັນຍາວ 213 ກິໂລແມັດ, ຜ່ານ 15 ຕາແສງ ຂຶ້ນກັບ 5 ເມືອງຊາຍແດນຂອງແຂວງແທັງຮວ໊າ ແລະຕິດກັບ 33 ບ້ານຂຶ້ນກັບ 10 ກຸ່ມຊຸມຊົນຢູ່ 3 ເມືອງຂອງແຂວງຫົວພັນ. ນັບແຕ່ຊຸມປີຕົ້ນແຫ່ງການປະຕິວັດ, ພາຍໃຕ້ການນຳພາຂອງພັກກອມມູນິດຫວຽດນາມ ແລະພັກປະຊາຊົນປະຕິວັດລາວ, ນໍ້າໃຈມິດຕະພາບລະຫວ່າງສອງແຂວງໄດ້ກາຍເປັນສັນຍາລັກແຫ່ງຄວາມສາມັກຄີ ແລະຄວາມສະໜິດຕິດພັນຢ່າງແໜ້ນແຟ້ນ. ສາຍພົວພັນດັ່ງກ່າວບໍ່ພຽງແຕ່ສະແດງອອກດ້ວຍສາມັກຄີເທົ່ານັ້ນ, ຫາກຍັງແມ່ນການຮ່ວມມື, ຄຽງບ່າຄຽງໄຫຼ່ໃນການຕໍ່ສູ້ຕ້ານການຮຸກຮານຈາກພາຍນອກ, ພ້ອມກັນປົກປັກຮັກສາ ແລະສ້າງສາບ້ານເກີດເມືອງນອນ ແລະປະເທດຊາດ.

ໃນການຕໍ່ສູ້ຕ້ານລ່າເມືອງຂຶ້ນຝຣັ່ງ ແລະຈັກກະພັດອາເມລິກາ (1945-1975), ປະຊາຊົນແຂວງແທັງຮວ໊າ ນັບໝື່ນຄົນໄດ້ເຂົ້າຮ່ວມບັນດາກອງທະຫານອາສາສະໝັກ, ສູ້ຮົບ ແລະປະຕິບັດງານຢູ່ສະໜາມຮົບລາວ. ບັນດາກຳລັງປະກອບອາວຸດທ້ອງຖິ່ນແຂວງແທັງຮວ໊າ ກໍ່ໄດ້ເພີ່ມທະວີກຳລັງປ້ອງກັນຖານທີ່ໝັ້ນຂອງພັກ ແລະລັດຖະບານຕໍ່ຕ້ານຂອງລາວ ຢູ່ແຂວງຫົວພັນ.

ເມື່ອສັນຕິພາບກັບຕ່າວຄືນມາໃນປີ 1954, ແຂວງແທັງຮວ໊າ ໄດ້ປະຕິບັດບົດບາດເປັນແນວຫຼັງໃຫ້ການຕໍ່ຕ້ານລາວ. ແຂວງແທັງຮວ໊າ ໄດ້ສ້າງຕັ້ງສະຖານທີ່ຕ້ອນຮັບບັນດາກຳລັງຕໍ່ຕ້ານລາວ, ເປີດເສັ້ນທາງ 217 ເພື່ອຮັບໃຊ້ການຂົນສົ່ງລຳລຽງ, ພ້ອມທັງໜູນຊ່ວຍບັນດາລາຍການບໍາລຸງສ້າງພະນັກງານການແພດ ແລະວັດທະນະທຳ. ການເຊັນສັນຍາການຄ້າລະຫວ່າງແຂວງແທັງຮວ໊າ ແລະຫົວພັນໃນປີ 1965 ໄດ້ຂີດໝາຍພື້ນຖານຂອງສາຍພົວພັນຮ່ວມມື, “ຖານອ້າຍນ້ອງ” ລະຫວ່າງສອງແຂວງ ແລະສອງປະເທດ.

ຄະນະຜູ້ແທນສະພາປະຊາຊົນສອງແຂວງແທັງຮວ໊າ-ຫົວພັນ ວາງພວງມາລາ ແລະຖະຫວາຍທູບທຽນອາໄລຫາປະທານໂຮ່ຈີມິນ ຢູ່ເຂດວັດທະນະທຳອາໄລຫາປະທານໂຮ່ຈີມິນ, ແຂວງແທັງຮວ໊າ ໃນເດືອນ ພຶດສະພາ 2024. ພາບ: ໜັງສືພິມແທງຮວ໊າ

ແຕ່ປີ 1965-1975, ແຂວງແທັງຮວ໊າ ສືບຕໍ່ເປັນແນວຫຼັງຍຸດທະສາດໃຫ້ແກ່ການປະຕິວັດລາວ, ປະກອບສ່ວນກໍ່ສ້າງ ແລະປົກປັກຮັກສາແຂວງຫົວພັນ - ຖານທີ່ໝັ້ນຕໍ່ຕ້ານຂອງລາວ. ແຂວງແທັງຮວ໊າ ໄດ້ສົ່ງຄະນະຊ່ຽວຊານຫຼາຍຄະນະໄປສຳຫຼວດ ແລະຊ່ວຍເຫຼືອເພື່ອນມິດໃນຂົງເຂດກະສິກຳ, ຊົນລະປະທານ ແລະສາທາລະນະສຸກ, ພ້ອມທັງເຂົ້າຮ່ວມບັນດາຂໍ້ຕົກລົງຮ່ວມມືດ້ານເສດຖະກິດ, ວັດທະນະທຳ, ການເມືອງ ແລະການປ້ອງກັນຊາດ-ປ້ອງກັນຄວາມສະຫງົບ.

ສັນຍາປາຣີ ໄດ້ຮັບການລົງນາມໃນປີ 1973, ແມ່ນໄຊຊະນະອັນໃຫຍ່ຫຼວງຂອງປະຊາຊົນອິນດູຈີນ ເວົ້າລວມ ແລະຫວຽດນາມ-ລາວ ເວົ້າສະເພາະ. ແຂວງແທັງຮວ໊າ ສືບຕໍ່ຊ່ວຍແຂວງຫົວພັນພັດທະນາກະສິກຳ, ຊົນລະປະທານ ແລະພື້ນຖານໂຄງລ່າງ, ຍູ້ແຮງຂະບວນການຜະລິດ ແລະບຳລຸງສ້າງພະນັກງານ, ກຳມະກອນເຕັກນິກໃຫ້ຫຼາຍຂົງເຂດ. ການປະກອບສ່ວນດັ່ງກ່າວແມ່ນພະຍານຫຼັກຖານທີ່ມີຊີວິດຊີວາໃຫ້ນໍ້າໃຈສາມັກຄີ, ສັດຊື່ບໍລິສຸດ ແລະເປັນພື້ນຖານອັນໜັກແໜ້ນຊ່ວຍໃຫ້ສອງປະເທດຮ່ວມກັນຍາດເອົາເອກະລາດ ແລະເສລີພາບ.

ແຂວງແທັງຮວ໊າ-ຫົວພັນ ໃນການກໍ່ສ້າງ ແລະພັດທະນາ

ພາຍຫຼັງວັນທີ 30 ເມສາ 1975, ເມື່ອຫວຽດນາມ ຍາດໄດ້ເອກະລາດ, ເຖິງວ່າສະພາບການເສດຖະກິດ-ສັງຄົມຍັງປະສົບກັບຄວາມຫຍຸ້ງຍາກຫຼາຍກໍ່ຕາມ, ແຕ່ແຂວງແທັງຮວ໊າ ແລະຫົວພັນ ໄດ້ຮັກສາ ແລະເສີມຂະຫຍາຍສາຍພົວພັນສະໜິດຕິດພັນ, ຜ່ານຜ່າສິ່ງທ້າທາຍເພື່ອກໍ່ສ້າງພື້ນຖານໂຄງລ່າງ ແລະພັດທະນາເສດຖະກິດ. ໃນໄລຍະ 1986-2010, ແຂວງແທັງຮວ໊າ ໄດ້ໃຫ້ການຊ່ວຍເຫຼືອລ້າ, ຊ່ວຍແຂວງຫົວພັນ ກໍ່ສ້າງກິດຈະກໍາສຳຄັນໃນຂົງເຂດເສດຖະກິດ, ວັດທະນະທຳ, ການປ້ອງກັນຊາດ-ປ້ອງກັນຄວາມສະຫງົບ.

ແຕ່ປີ 2010-2022, ດ້ວຍການຊີ້ນຳນຳພາຂອງສອງພັກ, ສອງລັດ, ອົງຄະນະພັກ, ອຳນາດການປົກຄອງ ແລະປະຊາຊົນສອງແຂວງໄດ້ຍູ້ແຮງການຮ່ວມມືໃນຫຼາຍຂົງເຂດ, ຄື: ການເມືອງ, ເສດຖະກິດ, ສັງຄົມ, ການປ້ອງກັນຊາດ-ປ້ອງກັນຄວາມສະຫງົບ, ແນໃສ່ປັບປຸງສາຍພົວພັນມິດຕະພາບແບບພິເສດລະຫວ່າງສອງປະເທດຫວຽດນາມ-ລາວ ກໍ່ຄືແຂວງແທັງຮວ໊າ ແລະຫົວພັນ.

ທາງດ້ານການເມືອງ, ແຕ່ລະປີ, ການນຳສອງແຂວງຜັດປ່ຽນກັນຈັດຕັ້ງການພົບປະເຈລະຈາຂັ້ນສູງແນໃສ່ຕີລາຄາການປະຕິບັດບັນດາຂໍ້ຕົກລົງຮ່ວມມືໃນປີ ແລະສ້າງແຜນການໃນຊຸມປີຕໍ່ໜ້າ. ມາຮອດປະຈຸບັນ, ໄດ້ມີ 35 ອົງການ, ຫົວໜ່ວຍຂອງແຂວງແທັງຮວ໊າ ລົງນາມໃນການຮ່ວມມືກັບອົງການ, ຫົວໜ່ວຍຂອງແຂວງຫົວພັນ.

ພະນັກງານ, ນັກຮົບຄ້າຍທະຫານຊາຍແດນຕາມຈູງ, ເມືອງເມື່ອງລ໊າດ, ແຂວງແທັງຮວ໊າ (ຫວຽດນາມ) ແລກປ່ຽນສະພາບການຄຸ້ມຄອງ, ປົກປັກຮັກສາຊາຍແດນ ແລະປ້ອງກັນ, ຕ້ານພະຍາດໂຄວິດ-19 ກັບກໍາລັງປະກອບອາວຸດເມືອງສົບເບົາ, ແຂວງຫົວພັນ. ພາບ: ໜັງສືພິມແທງຮວ໊າ

ໃນຂົງເຂດເສດຖະກິດ, ການຄ້າລະຫວ່າງແຂວງແທັງຮວ໊າ ແລະຫົວພັນ ມີການພັດທະນາກະໂດດຂັ້ນ. ກ່ຽວກັບດ້ານການສຶກສາ, ວັດທະນະທຳ-ສັງຄົມ, ແຕ່ປີ 2010-2022, ແຂວງແທັງຮວ໊າ ໄດ້ບໍາລຸງກໍ່ສ້າງພະນັກງານ, ນັກສຶກສາ, ນັກຮຽນແຂວງຫົວພັນ 1.629 ຄົນ ໄປຮໍ່າຮຽນຢູ່ໂຮງຮຽນການເມືອງແຂວງ ແລະມະຫາວິທະຍາໄລ, ວິທະຍາໄລໃນບໍລິເວນແຂວງ...

ແຂວງແທັງຮວ໊າ-ຫົວພັນ ຮ່ວມກັນມຸ່ງໄປເຖິງອະນາຄົດ

ສາຍພົວພັນອັນດີງາມລະຫວ່າງແຂວງແທັງຮວ໊າ ແລະຫົວພັນ ແມ່ນໜຶ່ງໃນບັນດາຕົວຢ່າງແຫ່ງຄວາມສາມັກຄີ, ມິດຕະພາບຫວຽດນາມ-ລາວ. ບໍ່ພຽງແຕ່ມີຢູ່ໃນໜ້າປະຫວັດສາດອັນສະຫງ່າອົງອາດໃນການຕໍ່ຕ້ານເທົ່ານັ້ນ, ຄວາມສາມັກຄີນີ້ຍັງສະແດງອອກຢ່າງຈະແຈ້ງໃນສັນຕິພາບ, ຜ່ານບັນດາໂຄງການຮ່ວມມືພັດທະນາເສດຖະກິດ, ການສຶກສາ, ສາທາລະນະສຸກ ແລະປ້ອງກັນຊາດ, ສ້າງພື້ນຖານອັນໜັກແໜ້ນໃຫ້ແກ່ການພັດທະນາແບບຍືນຍົງຂອງສອງແຂວງ.

ໃນອະນາຄົດ, ສາຍພົວພັນລະຫວ່າງແຂວງແທັງຮວ໊າ ແລະຫົວພັນ ຍັງມີຄວາມສາມາດບົ່ມຊ້ອນອັນໃຫຍ່ຫຼວງ, ບໍ່ພຽງແຕ່ໃນບັນດາຂົງເຂດຮ່ວມມືທີ່ມີຢູ່ແລ້ວເທົ່ານັ້ນຫາກຍັງເປີດກາລະໂອກາດໃໝ່ທາງດ້ານການຄ້າ, ການທ່ອງທ່ຽວ ແລະການປົກປັກຮັກສາສິ່ງແວດລ້ອມ, ຕອບສະໜອງຄວາມຮຽກຮ້ອງຕ້ອງການພັດທະນາແບບຍືນຍົງຂອງສອງແຂວງ. ພິເສດ, ໃນສະພາບການເຊື່ອມໂຍງກັບສາກົນນັບມື້ນັບເລິກເຊິ່ງກວ້າງຂວາງ, ສາຍພົວພັນນີ້ແມ່ນສັນຍາລັກແຫ່ງນໍ້າໃຈມິດຕະພາບທີ່ເປັນແບບຢ່າງ, ສາມາດແມ່ນພື້ນຖານໃຫ້ບັນດາຮູບແບບຮ່ວມມືຢູ່ເຂດຊາຍແດນອື່ນ, ປະກອບສ່ວນຊຸກຍູ້ການແລກປ່ຽນການຄ້າ, ອະນຸລັກຮັກສາວັດທະນະທໍາ ແລະພ້ອມກັນຮັບມືກັບສິ່ງທ້າທາຍທົ່ວໂລກ.

ສາຍພົວພັນລະຫວ່າງແຂວງແທັງຮວ໊າ ແລະຫົວພັນ ໄດ້, ພວມ ແລະຈະສືບຕໍ່ເປັນສັນຍາລັກແຫ່ງຄວາມສາມັກຄີຫວຽດນາມ-ລາວ, ເປັນພະຍານຫຼັກຖານທີ່ມີຊີວິດຊີວາໃຫ້ກໍາລັງແຮງຂອງນໍ້າໃຈໝູ່ເພື່ອນທີ່ບໍ່ມີພົມແດນ, ເປັນມໍລະດົກອັນລໍ້າຄ່າທີ່ຄົນລຸ້ນຫຼັງຄວນສືບຕໍ່ຮັກສາ ແລະເສີມຂະຫຍາຍ. ບົນພື້ນຖານນັ້ນ, ປະຊາຊົນສອງແຂວງຕັດສິນໃຈສາມັກຄີ, ຄຽງບ່າຄຽງໄຫຼ່, ພ້ອມກັນກ້າວຂຶ້ນບົນເສັ້ນທາງກໍ່ສ້າງອະນາຄົດວັດທະນາຖາວອນ, ພັດທະນາແບບຍືນຍົງ ແລະສັນຕິພາບໃຫ້ສອງປະເທດຫວຽດນາມ-ລາວ, ສືບຕໍ່ສ້າງໜ້າປະຫວັດສາດໃໝ່ໃຫ້ສາຍພົວພັນບໍລິສຸດຜຸດຜ່ອງນີ້ຢ່າງບໍ່ຢຸດຢັ້ງ.

ຫົວພັນ ແລະ ແທັງຫວ໋າ ຮ່ວມມືກັນປົກປັກຮັກສາປ່າ ທ້າຍອາທິດທີ່ຜ່ານມານີ້, ພະແນກກະສິກຳ ແລະ ປ່າໄມ້ແຂວງຫົວພັນຮ່ວມກັບພະແນກກະສິກຳ ແລະ ພັດທະນາຊົນນະບົດແຂວງແທັງຮວ່າໄດ້ຈັດກອງປະຊຸມສະຫຼຸບການຈັດຕັ້ງປະຕິບັດແຜນການຮ່ວມມືວຽກງານປົກປັກຮັກສາປ່າໄມ້, ປ້ອງກັນ ແລະ ດັບມອດໄຟໄໝ້ລາມປ່າເຂດຊາຍແດນຫົວພັນ-ແທັງຮວ່າປີ 2019 ແລະ ວາງທິດທາງການຮ່ວມມືປີ 2020 ຢູ່ທີ່ຫໍວັດທະນະທຳແຂວງຫົວພັນໂດຍການເຂົ້າຮ່ວມຝ່າຍແຂວງຫົວພັນ

ກອງບັນການທະຫານຊາຍແດນແຂວງເຊີນລາ ແລະ ກອງຮ້ອຍທະຫານຊາຍແດນ 231, ປກຊ ແຂວງ ຫົວພັນ ຈັດກອງປະຊຸມສ່ອງແສງ ຍສໝ - ວັນທີ 12 ເດືອນມິຖຸນາ, ກອງບັນຊາການທະຫານຊາຍແດນແຂວງເຊີນລາ ແລະ ກອງຮ້ອຍຊາຍແດນ 213, ປກຊແຂວງຫົວພັນ, ສປປ ລາວ ໄດ້ຈັດກອງປະຊຸມສ່ອງແສງການຈັດຕັ້ງປະຕິບັດວຽກງານ ກ່ຽວກັບການຄຸ້ມຄອງ ແລະ ການປົກປັກຮັກສາຊາຍແດນ ໃນ 6 ເດືອນຕົ້ນປີ 2019.