ພິທີລົງນາມຄັ້ງນີ້, ມີຂຶ້ນລະຫວ່າງ ທ່ານ ພຶດສະພາ ພູມມະສັກ ປະທານບໍລະສັດ AIDC ແລະ ທ່ານ ຈ້າຍ ເຫວີຍ (Dai Wei) ປະທານກຳມະການບໍລິຫານ ລັດວິສາຫະກິດສະບຽງອາຫານ ສປ ຈີນ ສາຂາ ເມືອງ ເຈີງໂຈ ແຂວງ ເຫີໜານ ພ້ອມດ້ວຍມີຜູ້ຕາງໜ້າ ຂອງລັດຖະບານລາວ ຮ່ວມລົງນາມ ເພື່ອເປັນພະຍານ ຄື ທ່ານ ໄຊສົມເພັດ ນໍລະສິງ ຫົວໜ້າກົມສົ່ງເສີມການຄ້າ ກະຊວງ ອຄ ແລະ ທ່ານ ສີປະໄພ ໄຊສົງຄາມ ຫົວໜ້າຫ້ອງການ ກະຊວງກະສິກຳ ແລະ ປ່າໄມ້.
ໃນພິທີ ທ່ານ ພຶດສະພາ ພູມມະສັກ ກ່າວວ່າ: ການໄດ້ລົງນາມຮ່ວມມື ດ້ານຍຸດທະສາດ ໃນການເອົາສີນຄ້າຈາກ ສປປ ລາວ ໄປຂາຍໃນ ສປ ຈີນ ໂດຍການຮ່ວມມືກັບ ລັດວິສາຫະກິດສະບຽງອາຫານ ສປ ຈີນ ຄັ້ງນີ້ ແມ່ນກວມເອົາສີນຄ້າກະສິກຳປຸງແຕ່ງ 9 ລາຍການໃຫຍ່ ຄື: ຖົ່ວດິນ 1 ແສນໂຕນ, ແປ້ງມັນຕົ້ນ 1 ແສນໂຕນ, ຊີ້ນງົວແຊ່ແຂງ 1 ແສນໂຕນ, ໝາກມ່ວງຫິມະພານ 2 ແສນໂຕນ, ໝາກມ່ວງ 1 ແສນໂຕນ, ຖຸລຽນ 5 ໝື່ນໂຕນ, ຖົ່ວເຫລືອງ 2 ແສນໂຕນ, ກ້ວຍ 1 ແສນໂຕນ ແລະ ນ້ຳຕານ 5 ແສນໂຕນ, ຊຶ່ງລວມມູນຄ່າການສົ່ງອອກ 1,5 ຕື້ໂດລາ ພາຍໃນປີທີ 5 ເປັນຕົ້ນໄປ, ຊຶ່ງການຮ່ວມມືດັ່ງກ່າວ ຈະສ້າງອາຊີບ ໃຫ້ແກ່ປະຊາຊົນລາວ ຫລາຍແສນຄອບຄົວ ເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນ ແລະ ຈະສ້າງລາຍຮັບ ໃຫ້ແກ່ລັດຖະບານ. ພ້ອມກັນນັ້ນ, ກໍຍັງເປັນການປັບປຸງພື້ນຖານໂຄງລ່າງ ເປັນຕົ້ນແມ່ນຖະໜົນຫົນທາງ, ໄຟຟ້າ, ນ້ຳປະປາ ແລະ ຊົນລະປະທານ ໄປພ້ອມໆກັນ.
 |
| ພິທີລົງນາມ ຈັດຊື້ສີນຄ້າກະສິກຳປຸງແຕ່ງ ຈາກ ສປປ ລາວ ສົ່ງໄປ ສປ ຈີນ. (ພາບ: KPL) |
ໂອກາດດຽວກັນ, ຍັງໄດ້ຂອບໃຈລັດຖະບານລາວ ທີ່ໄດ້ເອົາໃຈໃສ່ຊຸກຍູ້ ແລະ ສະໜັບສະໜູນ ຊຶ່ງຜ່ານມາກໍໄດ້ພ້ອມກັນ ທົດລອງເຮັດກະສິກຳ ຢູ່ຫລາຍຈຸດ ແລະ ໄດ້ກະກຽມພື້ນທີ່ປູກຝັງເຮັດການຜະລິດ ແຕ່ພາກກາງ ຫາພາກໃຕ້ ໂດຍປັດຈຸບັນໄດ້ເກືອບ 1 ແສນເຮັກຕາ. ພາຍຫລັງການລົງນາມຄັ້ງນີ້, ບໍລິສັດ ແລະ ລັດວິສາຫະກິດ ສະບຽງອາຫານ ຈີນ ຈະປຶກສາຫາລື ເຖິງລາຍລະອຽດ ດ້ານເຕັກນິກ ຂອງການປູກ-ການປຸງແຕ່ງ ແລະ ກ້າວສູ່ຂັ້ນຕອນ ການນຳສະເໜີ ໂຄງການໃຫ້ແກ່ລັດຖະບານ ໃນການຂໍໂກຕ້າ ແລະ ພະຍາຍາມ ໃຫ້ລາຄາສາມາດແຂ່ງຂັນໄດ້ ທຽບປະເທດອ້ອມຂ້າງ.
ທ່ານ ຄຳແພງ ໄຊສົມແພງ ກ່າວວ່າ: ພາຍຫລັງທີ່ ລາວ-ຈີນ ໄດ້ສຳເລັດການ ເຊັນສັນຍາຊື້-ຂາຍເຂົ້າ 20 ພັນໂຕນ ແລະ ສືບຕໍ່ສົ່ງອອກ ເຂົ້າ 50 ພັນໂຕນ ໃນອະນາຄົດ; ການລົງນາມໃນຄັ້ງນີ້ ກໍເປັນອີກສິ່ງໜຶ່ງ ທີ່ມີຄວາມໝາຍສຳຄັນຍິ່ງ ເປັນໂອກາດ ທີ່ເປີດຊ່ອງທາງ ໃຫ້ສາມາດສ້າງມູນຄ່າການຄ້າ ຂອງທັງສອງປະເທດເພີ່ມຂຶ້ນ ແລະ ປະກອບສ່ວນເຂົ້າໃນ ການພັດທະນາ ເສດຖະກິດ-ສັງຄົມ ຂອງ ສປປ ລາວ ແລະ ທັງເປັນໂອກາດ ໃນການສົ່ງອອກສີນຄ້າກະສິກຳ ທີ່ເປັນສີນຄ້າທີ່ເປັນທ່າແຮງຂອງລາວ. ນອກນີ້, ຍັງເປັນການສົ່ງເສີມການຜະລິດ, ດຶງດູດການລົງທຶນ ເພື່ອກ້າວຜ່ານອຸປະສັກທີ່ເກີດຈາກໂຄວິດ-19 ແລະ ຍັງເປັນການຮອງຮັບໃຫ້ແກ່ຜົນສຳເລັດ ຂອງການກໍ່ສ້າງທາງລົດໄຟລາວ-ຈີນ ໃນທ້າຍປີ 2021 ນີ້ ກໍຄືຍຸດທະສາດໜຶ່ງເລວໜຶ່ງເສັ້ນທາງ ໃຫ້ປະກົດຜົນເປັນຈິງ, ຊຶ່ງເຊື່ອໝັ້ນວ່າ ການສົ່ງອອກສີນຄ້າ ຜ່ານການຂົນສົ່ງທາງລົດໄຟ ຈະຊ່ວຍຫລຸດຕົ້ນທຶນ ແລະ ສາມາດແຂ່ງຂັນກັບ ສີນຄ້າຂອງບັນດາປະເທດ ແລະ ຂອງສາກົນໄດ້.
ທ່ານ ເພັດ ພົມພິພັກ ໄດ້ກ່າວວ່າ: ປັດຈຸບັນ, ລາວ-ຈີນ ໄດ້ສຳເລັດອະນຸສັນຍາສອງຝ່າຍ ຊຶ່ງສາມາດສົ່ງອອກພືດ ແລະ ຜະລິດຕະພັນພືດໄປສປ ຈີນ ມີ 7 ຊະນິດພືດ ຄື: ສາລີ, ມັນຕົ້ນ, ກ້ວຍ, ເຂົ້າສານ, ໝາກໂມ, ມັນດ້າງ, ພືດຕະກູນຖົ່ວ. ນອກນີ້, ມີ ງົວ ຕື່ມອີກ. ກະຊວງ ກະສິກຳ ແລະ ປ່າໄມ້, ຍັງສຳເລັດການ ຮ່າງອະນຸສັນຍາ ເພື່ອລໍຖ້າເຊັນລົງນາມ ໃນການສົ່ງພືດ ແລະ ຜະລິດຕະພັນພືດໄປ ສປ ຈີນ ອີກ 6 ຊະນິດ ເຊັ່ນ: ໝາກຜຸ, ໝາກກ້ຽງ, ໝາກນາວ, ໝາກໜ໊ອດ, ພືດເປັນຢາ, ໃບໝາກຕູມແຫ້ງ, ຊຶ່ງແຕ່ນີ້ຮອດປີ 2025 ແມ່ນຈະສືບຕໍ່ເຈລະຈາ ທາງດ້ານເຕັກນິກເປີດຕະຫລາດກັບ ສປ ຈີນ ຫລາຍກວ່າ 90 ລາຍການພືດ. ຫລັງຈາກເຊັນສັນຍາໃນຄັ້ງນີ້, ກະຊວງກະສິກຳ ແລະ ປ່າໄມ້ ຈະດຳເນີນການເຈລະຈາ ເພື່ອຂໍໂກຕ້າສົ່ງອອກໄປ ສປ ຈີນ 5 ລາຍການ ທີ່ນອນໃນອະນຸສັນຍາທີ່ ລາວ-ຈີນ ໄດ້ລົງນາມແລ້ວ ທີ່ມີໃນ 9 ລາຍການສິນຄ້າ ທີ່ໄດ້ລົງນາມໃນພິທີຄັ້ງນີ້.
ພາຍຫລັງພິທີລົງນາມ ດັ່ງກ່າວສຳເລັດ, ທ່ານ ລັດຖະມົນຕີ ທັງສອງກະຊວງ ພ້ອມດ້ວຍຄະນະ ກໍໄດ້ສືບຕໍ່ເຂົ້າຮ່ວມ ການປະຊຸມແບບທາງໄກ ລະຫວ່າງ ບໍລິສັດ AIDC ແລະ ບໍລິສັດ COFCO Sundry ປັກກິ່ງ, ຊຶ່ງຝ່າຍບໍລິສັດຈາກ ສປ ຈີນ ມີ ທ່ານ ຫວັງ ເຜິງ ຫົວໜ້າຜູ້ຈັດການທົ່ວໄປ ພະແນກທຸລະກິດ ຂອງບໍລິສັດດັ່ງກ່າວເຂົ້າຮ່ວມ. ການເຂົ້າຮ່ວມກອງປະຊຸມ ຂອງ ທ່ານລັດຖະມົນຕີ ທັງສອງກະຊວງ ພ້ອມຄະນະຄັ້ງນີ້, ເພື່ອເປັນການຊຸກຍູ້ການຮ່ວມມື ຂອງ ສອງບໍລິສັດ ລາວ-ຈີນ, ຊຶ່ງນັບແຕ່ປີ 2019 ສອງບໍລິສັດໄດ້ຮ່ວມມື ຝ່າຍລາວໄດ້ສົ່ງອອກ ສີນຄ້າຫລາຍກວ່າ 11 ລາຍການ. ໃນນີ້, ສະເພາະໝາກມ່ວງຫີນມະພານ ມີມູນຄ່າສົ່ງອອກເຖິງ 15 ລ້ານໂດລາ ໃນປີ 2019 ແລະ ປັດ ຈຸບັນ ໝາກເຜັດກຳລັງເປັນອີກ 1 ລາຍການສີນຄ້າ ທີ່ມີທ່າແຮງສົ່ງອອກໄປ ສປ ຈີນ. ບໍລິສັດ AIDC ມີມູນຄ່າການສົ່ງອອກ ໃນການຮ່ວມມືກັບ ບໍລິສັດ COFCO ປະມານ 1 ຕື້ກວ່າໂດລາ.
ໃນກອງປະຊຸມຄັ້ງນີ້, ບໍລິສັດ COFCO ຈະໃຫ້ການຊ່ວຍເຫລືອ ໃນການສະເໜີ ຂໍເພີ່ມໂກຕ້າໃນການສົ່ງອອກສິນຄ້າ ຈາກ ລາວ ໄປ ສປ ຈີນ, ຈະສະເໜີ ການຍົກເວັ້ນພາສີສີນຄ້າຂອງ 9 ລາຍ ການສີນຄ້າທີ່ ບໍລິສັດ AIDC ລົງນາມຮ່ວມມືກັບ ລັດວິສາຫະກິດ ສະບຽງອາຫານ ຈີນ ແລະ ຈະໃຫ້ ຄໍາແນະນຳທາງ ດ້ານເຕັກນິກວິຊາການ ໃນການປຸງແຕ່ງສິນຄ້າ ແລະ ອື່ນໆ ທີ່ຈຳເປັນ ເພື່ອໃຫ້ການຮ່ວມມື ຂອງສອງບໍລິສັດ ສາມາດສ້າງຜົນປະໂຫຍດ ມາໃຫ້ສອງຝ່າຍ ກໍຄື ຜົນປະໂຫຍດດ້ານການຄ້າມາສູ່ສອງປະເທດ ສປປ ລາວ ແລະ ສປ ຈີນ.
 | ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ ມອບເງິນຊ່ວຍເຫຼືອປະຊາຊົນພາກກາງ ແລະ ເຂດໄຕຫງວຽນ ຫວຽດນາມ ທີ່ຖືກຜົນກະທົບຈາກໄພທຳມະຊາດ ໃນວັນທີ 24 ທັນວາ 2020 ຢູ່ທີ່ສຳນັກງານສູນກາງແນວໂຮມປະເທດຊາດຫວຽດນາມ ໄດ້ມີພິທີມອບຮັບເງິນຊ່ວຍເຫຼືອຈາກສະຖານເອກອັກຄະລັດຖະທູດແຫ່ງ ສປປ ລາວ ປະຈຳ ສສ ຫວຽດນາມ ຈຳນວນ 165.000.000 ດົງ (ໜຶ່ງຮ້ອຍຫົກສິບຫ້າລ້ານດົງ) ເພື່ອນຳໄປຊ່ວຍເຫຼືອປະຊາຊົນຢູ່ພາກກາງ ແລະ ເຂດໄຕຫງວຽນ ຫວຽດນາມ ທີ່ໄດ້ຮັບຜົນກະທົບຈາກໄພທຳມະຊາດ. |
 | ພິທີລົງນາມ ຈົດໝາຍແລກປ່ຽນ ລະຫວ່າງ ສປປ ລາວ ແລະ ຍີ່ປຸ່ນ ໃນວັນທີ 16 ທັນວາ 2020 ຢູ່ກະຊວງການຕ່າງປະເທດ, ໄດ້ມີພິທີລົງນາມຈົດໝາຍ ແລກປ່ຽນ ລະຫວ່າງ ສປປ ລາວ ແລະ ຍີ່ປຸ່ນ (Exchange Notes) ເພື່ອຜັນຂະຫຍາຍສັນຍາວ່າດ້ວຍການຮ່ວມມື ດ້ານເຕັກນິກ-ວິຊາການ ລະຫວ່າງ ອາຊຽນ-ຍີ່ປຸນ ທີ່ໄດ້ລົງນາມກັນ ໃນເດືອນພຶດ ສະພາ ຜ່ານມາ. ຕາງໜ້າຝ່າຍລາວ ຮ່ວມລົງນາມ ຄັ້ງນີ້, ແມ່ນ ທ່ານ ທອງຜ່ານ ສະຫວັນເພັດ ຮອງລັດຖະມົນຕີ ກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ ... |
 | ວາລະສານ ຍຸກສະໄໝ ອວຍພອນ ສະຖານທູດ ສປປ.ລາວ ປະຈຳ ຫວຽດນາມ ເນື່ອງໃນໂອກາດສະເຫຼີມສະຫຼອງວັນຊາດ ຂອງ ສປປ.ລາວ ຄົບຮອບ 45 ປີ ຍສໝ - ເນື່ອງໃນໂອກາດສະເຫຼີມສະຫຼອງວັນຊາດ ຂອງສປປ.ລາວ ຄົບຮອບ 45 ປີ (2 ທັນວາ 1975 - 2 ທັນວາ 2020), ສະຖານທູດສປປ.ລາວ ປະຈຳຫວຽດນາມ ໄດ້ສະເໜີລິເລີ່ມວ່າ “ຫັນປ່ຽນຄ່າຊື້ດອກໄມ້ ມາເປັນເປັນການບໍລິຈາກສະໜັບສະໜູນ ໃຫ້ແກ່ປະຊາຊົນເຂດພາກກາງຫວຽດນາມ ທີ່ໄຮັບຜົນກະທົບຈາກໄພພິບັດທຳມະຊາດ ແລະ ນ້ຳຖ້ວມໃນເມື່ອບໍ່ດົນມານີ້.” |
kpl.gov.la
