 |
ປິດ ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII .
ໃນໂອກາດນີ້, ທ່ານ ນາງ ປານີ ຢາທໍ່ຕູ້ ໄດ້ກ່າວສູນທອນພົດ ປິດກອງປະຊຸມຄັ້ງນີ້ວ່າ: ເປັນເວລາ 23 ວັນ ຕະຫລອດໄລຍະ ການດຳເນີນກອງປະຊຸມ ບັນດາ ສສຊ ໄດ້ປະຕິບັດສິດ ແລະ ໜ້າທີ່ດ້ວຍ ຄວາມຫ້າວຫັນ ບົນຈິດໃຈເສີມຂະຫຍາຍ ສິດປະຊາທິປະໄຕ ແລະ ຄວາມຮັບຜິດຊອບສູງ ໃນການຄົ້ນຄວ້າ, ປະກອບຄຳຄິດຄຳເຫັນຢ່າງມີເຫດຜົນ, ມີເນື້ອໃນເລິກເຊິ່ງ ແລະ ກວ້າງຂວາງ, ພ້ອມທັງມີຄວາມ ເປັນເອກະພາບສູງ ໃນການພິຈາລະນາ ແລະ ຮັບຮອງເອົາບັນດາເນື້ອໃນຕ່າງໆ ເຊັ່ນ: ບົດລາຍງານຂອງລັດຖະບານ ກ່ຽວກັບແຜນພັດທະນາ ເສດຖະກິດ-ສັງຄົມ, ແຜນເງິນຕາ, ແຜນງົບປະມານ, ບົດລາຍງານອົງ ການກວດສອບ, ອົງການໄອຍະການ ປະຊາຊົນສູງສຸດ, ສານປະຊາຊົນສູງສຸດ ກາງສະໄໝ ແລະ ປະຈຳປີ 2018 ແລະ ທິດທາງປີ 2019.
ກອງປະຊຸມໄດ້ຕີລາສູງ ຕໍ່ຄວາມພະຍາຍາມຊີ້ນຳ-ນຳພາ ຂອງລັດຖະບານ ແລະ ບັນດາອົງການທີ່ກ່ຽວຂ້ອງດັັ່ງກ່າວ, ທີ່ໄດ້ຜ່ານຂໍ້ຫຍຸ້ງຍາກ, ສິ່ງທ້າທາຍ, ສູ້ຊົນຈັດຕັ້ງປະຕິບັດມະຕິ ກອງປະຊຸມສະໄໝສາມັນ ແຕ່ລະຄັ້ງ ຂອງສະພາແຫ່ງຊາດ ຕາມຂອບສິດ ແລະ ພາລະບົດບາດຂອງຕົນ ແລະ ສາມາດຍາດໄດ້ຜົນສຳເລັດ ໃນຫລາຍດ້ານ ອັນໄດ້ປະກອບສ່ວນເຂົ້າໃນ ການສືບຕໍ່ເຮັດໃຫ້ປະ ເທດຊາດ ມີສະຖຽນລະພາບ ທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ໂດຍພື້ນ ຖານ, ມີຄວາມຍຸຕິທໍາ, ເສດຖະກິດ ແລະ ສັງຄົມສືບຕໍ່ ການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງ ແລະ ຍົກສູງດີຂຶ້ນເປັນກ້າວໆ. ກອງປະຊຸມຍັງໄດ້ວິເຄາະວິໄຈ ຕໍ່ບັນດາຈຸດອ່ອນ, ຂໍ້ຄົງຄ້າງ ແລະ ສະເໜີຫລາຍມາດຕະການ ທີ່ເປັນຮູບປະທໍາ ແລະ ແທດຕົວຈິງ ເພື່ອແກ້ໄຂສະພາບຄວາມຫຍຸ້ງຍາກ ທາງດ້ານເສດຖະກິດ, ການເງິນ, ເງິນຕາ, ການຜະລິດທຸລະກິດ, ແກ້ໄຂຜົນຂອງການກວດສອບ, ຜົນການກວດກາຕາມ ການກວດສອບ ແລະ ແກ້ໄຂປະກົດການຫຍໍ້ທໍ້ ຢູ່ໃນຂົງເຂດວຽກງານ ສານປະຊາຊົນ ແລະ ໄອຍະການປະຊາຊົນ ໃນແຕ່ລະຄັ້ງ ໃນປີຕໍ່ປີ ໃຫ້ມີຄຸນນະພາບ ແລະ ຫັນປ່ຽນຢ່າງຕັ້ງໜ້າ.
ກອງປະຊຸມສະເໜີມາຍັງ ບັນດາຂະແໜງການສູນກາງ, ທ້ອງຖິ່ນ ຈົ່ງໄດ້ເຊີດຊູ ຄວາມຮັບຜິດ ຊອບຂອງອົງການຕົນ ສູ້ຊົນຈັດຕັ້ງປະຕິບັດ ຄາດໝາຍໃຫຍ່ທີ່ໄດ້ກໍານົດໄວ້ ໃນມະຕິຕ່າງໆ ຂອງກອງ ປະຊຸມຄັ້ງນີ້ ດ້ວຍບັນດານະໂຍບາຍ ມາດຕະການທີ່ບຸກທະລຸ ຢ່າງແຂງແຮງ, ແທດຕົວຈິງຫລາຍຂຶ້ນກວ່າເກົ່າ ແນໃສ່ກະຕຸ້ນເສດຖະກິດ ແລະ ສັງຄົມ ໃນການພັດທະນາ ປະເທດຊາດ ໃຫ້ມີການຂະຫຍາຍ ຕົວຢ່າງຕໍ່ເນື່ອງ ແລະ ເປັນຮູບປະທຳ. ກອງປະຊຸມ ຍັງໄດ້ຕິດຕາມກວດກາການຈັດຕັ້ງປະຕິບັດມະຕິ ຂອງກອງປະຊຸມສະພາແຫ່ງຊາດ ໃນຄັ້ງຜ່ານມາ ເຊັ່ນ: ການພັດທະນາຊົນນະບົດ ແລະ ແກ້ໄຂຄວາມ ທຸກຍາກ ຂອງປະຊາຊົນ, ຮັບຟັງການຊີ້ແຈງອະທິບາຍຈາກ 10 ກະຊວງ, ອົງການ ໃນບາງດ້ານທີ່ພົ້ນເດັ່ນ ແລະ ຮີບດ່ວນ ພົວພັນເຖິງຜົນປະໂຫຍດລວມ ຂອງຊາດ ແລະ ປະຊາຊົນສ່ວນຫລາຍເປັນຕົ້ນ: ຄຸນນະພາບໃນ ການກໍ່ສ້າງ ແລະ ສ້ອມແປງຖະໜົນຫົນທາງ, ຄຸນນະພາບການບໍລິການ ການປິ່ນປົວຢູ່ໂຮງໝໍ ແລະ ສຸກສາລາ ແລະ ການແກ້ໄຂປະກົດການ ຫຍໍ້ທໍ້ ໃນການລະເມີດ ສັນຍາກູ້ຢືມ.
ກອງປະຊຸມມີຄວາມເຊື້ອໝັ້ນ ບັນດາຂະແໜງການດັ່ງກ່າວ ຈະສືບຕໍ່ເສີມຂະຫຍາຍ ບັນດາຜົນງານ, ຜົນສຳເລັດທີ່ຍາດມາໄດ້ ໃນຊຸມປີຜ່ານມາ, ສູ້ຊົນຈຳກັດ ແລະ ແກ້ໄຂບັນດາປະກົດ ການຫຍໍ້ທໍ້, ສິ່ງກີດຂວາງໃນຂົງເຂດ ວຽກງານທີ່ຕົນຮັບຜິດຊອບ ໃຫ້ມີການຫັນປ່ຽນດີຂຶ້ນ ຢ່າງຈະແຈ້ງ, ປະກອບ ສ່ວນເຂົ້າ ໃນການແກ້ໄຂສະພາບ ການລະເມີດວິໄນແຜນການ ແລະ ການເງິນ, ການນຳໃຊ້ງົບປະ ມານທີ່ມີຈຳກັດ ຢ່າງປະຢັດ, ມີຄຸນນະພາບ, ມີປະສິດທິຜົນ, ເກັບກູ້ ແລະ ລວມສູນລາຍຮັບເຂົ້າງົບປະ ມານແຫ່ງລັດຕາມກົດໝາຍ ງົບປະມານກຳນົດໄວ້, ສ້າງລະບົບບໍລິການ ສຸຂະພາບທີ່ມີຄຸນນະພາບ ໂດຍຖືເອົາຄົນເປັນໃຈກາງ, ຍົງສູງການບໍລິຫານຄະດີ ໃຫ້ມີຄຸນນະພາບ, ຖືກຕ້ອງຕາມກົດໝາຍ ແລະ ຮັບ ປະກັນຄວາມຍຸຕິທຳໃນສັງຄົມ. ກອງປະຊຸມໄດ້ຮັບຮອງ ເອົາການສະເໜີ ແຕ່ງຕັ້ງສະມາຊິກ ລັດຖະບານຈຳນວນ 2 ທ່ານ ຕາມການສະເໜີ ຂອງນາຍົກລັດຖະມົນຕີ ຄື: ແຕ່ງຕັ້ງທ່ານ ພົນໂທ ວິໄລ ຫລ້າຄຳຟອງ ເປັນລັດຖະມົນຕີກະຊວງ ປ້ອງກັນຄວາມສະຫງົບ ແລະ ແຕ່ງຕັ້ງ ທ່ານ ສອນໄຊ ສິດພະໄຊ ເປັນຜູ້ວ່າການທະນາຄານ ແຫ່ງ ສປປ ລາວ, ພ້ອມທັງໄດ້ຮັບຮອງເອົາຊົນເຜົ່າບຣູ ເປັນເຜົ່າທີ 50 ຂອງລາວ. ນອກຈາກນັ້ນ, ກອງປະຊຸມ ໄດ້ພິຈາລະນາຮັບເອົາ ບົດລາຍງານການ ເຄື່ອນໄຫວວຽກງານ ກາງສະໄໝ ແລະ ປະຈຳປີ 2018 ແລະ ທິດທາງແຜນການ ຮອດປີ 2020 ແລະ ວຽກງານຈຸດສຸມປີ 2019 ຂອງສະພາແຫ່ງຊາດ.
ກອງປະຊຸມຄັ້ງນີ້, ຍັງໄດ້ພິຈາລະນາ ແລະ ຮັບຮອງເອົາກົດໝາຍຈຳນວນ 8 ສະບັບ ຄື: ປະມວນກົດໝາຍແພ່ງ, ກົດໝາຍວ່າດ້ວຍ ທະນາຄານທຸລະກິດ (ສະບັບປັງປຸງ), ກົດໝາຍວ່າດ້ວຍຄວາມ ປອດໄພຈາກລັງສີ, ກົດໝາຍວ່າດ້ວຍ ລາຍເຊັນເອເລັກໂຕຣນິກ, ກົດໝາຍວ່າດ້ວຍການລົດໄຟ, ກົດໝາຍວ່າດ້ວຍ ການປະກັນສຸຂະພາບ, ກົດໝາຍວ່າດ້ວຍຄົນພິການ ແລະ ກົດໝາຍວ່າດ້ວຍສຳນັກ ງານຜູ້ຕາງໜ້າ ສປປ ລາວ ປະຈຳຢູ່ຕ່າງປະເທດ. ໃນຂະນະດຽວກັນ, ກອງປະຊຸມຍັງໄດ້ປະກອບ ຄຳຄິດຄຳເຫັນໃສ່ຮ່າງ ກົດໝາຍວ່າດ້ວຍທີ່ດິນ ເພື່ອແນໃສ່ຮັບປະກັນ ຈັດຕັ້ງຜັນຂະຫຍາຍ ທິດຊີ້ນຳຂອງ ສູນກາງພັກກ່ຽວກັບ ວຽກງານທີ່ດິນໃນໄລຍະໃໝ່, ເພີ່ມທະວີການຄຸ້ມຄອງຂອງລັດ, ການນໍາໃຊ້ທີ່ດິນ ທີ່ເປັນຊັບພະຍາກອນອັນລ້ຳຄ່າ ແລະ ເປັນທ່າແຮງຂອງຊາດ ໃຫ້ມີປະສິດທິຜົນ, ມີຄວາມຍືນຍົງ, ປະກອບສ່ວນເຂົ້າໃນ ການພັດທະນາ ເສດຖະກິດ-ສັງຄົມ ກໍຄື ປັບປຸງຊີວິດການເປັນຢູ່ ຂອງປະຊາຊົນລາວ ບັນດາເຜົ່າໃຫ້ນັບມື້ນັບດີຂຶ້ນ.
ກອງປະຊຸມ ຍັງໄດ້ຮຽກຮ້ອງມາຍັງອົງການ ຈັດຕັ້ງລັດທຸກພາກສ່ວນ, ທຸກຂັ້ນພ້ອມດ້ວຍ ປະຊາຊົນລາວບັນດາເຜົ່າ ແລະ ຜູ້ປະກອບການທັງພາຍໃນ ແລະ ຕ່າງປະເທດ ຈົ່ງພ້ອມກັນນຳເອົາຜົນສຳເລັດ ຂອງກອງປະຊຸມຄັ້ງນີ້ ໄປຈັດຕັ້ງຜັນຂະຫຍາຍ ຕາມຂອບເຂດ, ໜ້າທີ່ ແລະ ສິດຂອງຕົນ ດ້ວຍຄວາມເປັນເຈົ້າການ ເພື່ອແນໃສ່ຮັບປະກັນ ເຮັດໃຫ້ປະເທດຊາດ ສືບຕໍ່ມີກາພັດທະນາ ຢ່າງໜັກ ແໜ້ນໃນຊຸມປີຕໍ່ໜ້າ.
（ແຫຼ່ງຂໍ້ມູນ： ຂປລ）
