| ສປປ.ລາວ: ແຂວງພາກເໜືອສືບຕໍ່ ເອົາໃຈໃສ່ ສົ່ງເສີມການຜະລິດສິນຄ້າ ຫລຸດຜ່ອນການນຳເຂົ້າ | |
| ຮອງນາຍົກ ເນັ້ນຂະແໜງ ຂະແໜງອຸດສາຫະກຳ ແລະ ການຄ້າ ເອົາໃຈໃສ່ ອຳນວຍຄວາມສະດວກການ ດຳເນີນທຸລະກິດ |
ໜູນຊ່ວຍຢ່າງແທດຈິງ
ຫວ່າງແລ້ວນີ້, ວິທະຍາໄລເຫວ້ ໄດ້ລົງທຶນຊື້ພາຫະນະເພື່ອຮັບ-ສົ່ງນັກສຶກສາລາວ ຈຳນວນ 80 ຄົນ ທີ່ໄປຮຽນທຸກໆມື້ໂດຍບໍ່ເກັບຄ່າ. ທຸກໆມື້ ລົດຈະໄປຮັບພວກນ້ອງຈາກຫໍພັກນັກສຶກສາໄປໂຮງຮຽນ ແລະກົງກັນຂ້າມແມ່ນ 4 ຖ້ຽວ. ລົດຮັບ-ສົ່ງພວກນ້ອງ ໄດ້ຂຽນໜັງສືຕິດໃສ່ວ່າ ວິທະຍາໄລເຫວ້ ຮ່ວມເດີນທາງພ້ອມກັບນັກສຶກສາຕ່າງປະເທດ, ຊ່ວຍພວກນ້ອງອຸ່ນອຽນໃຈຮ່ຳຮຽນຢູ່ເຫວ້. ໄລຍະທາງເຖິງວ່າບໍ່ໄກປານໃດກໍ່ຕາມ, ແຕ່ວ່າສຳລັບນັກສຶກສາຕ່າງປະເທດ ເມື່ອມາປະເທດໃໝ່ແລ້ວ, ສະພາບແວດລ້ອມໃໝ່, ໄດ້ຊ່ວຍໃຫ້ພວກນ້ອງມີຄວາມອຸ່ນອຽນໃຈກວ່າເມື່ອມາໂຮງຮຽນ.
ບໍ່ພຽງແຕ່ເອົາໃຈໃສ່ຕໍ່ການໄປມາເທົ່ານັ້ນ, ຢູ່ຫໍພັກນັກສຶກສາຂອງໂຮງຮຽນ, ບັນດານັກສຶກສາຍັງໄດ້ຈັດໃຫ້ມີບ່ອນກິນ, ຢູ່ພັກເຊົາ ແລະບ່ອນດຳລົງຊີວິດດ້ວຍ 112 ຫ້ອງ. ນອກຈາກນັ້ນ, ຢູ່ຫ້ອງຄົວກິນ, ຫ້ອງດຳເນີນຊີວິດລວມ, ເດີ່ນແອບກາຍ, ຫຼີ້ນກິລາ... ຍັງໄດ້ປະກອບວັດຖຸອຸປະກອນຢ່າງຄົບຖ້ວນ ແລະທັນສະໄໝເພື່ອຮັບໃຊ້ຄວາມຕ້ອງການໃນການດຳເນີນຊີວິດ, ພ້ອມທັງອຳນວຍຄວາມສະດວກໃຫ້ພວກນ້ອງໄດ້ຮ່ຳຮຽນ, ພົບປະແລກປ່ຽນ, ລະຫຼິ້ນ, ບັນເທີງ, ແອບກາຍຫຼິ້ນກິລາ.
 |
| ພາບປະກອບ: ວິທະຍາໄລເຫວ້ |
ນັກສຶກສາລາວ ແບ່ງປັນວ່າ ການໜູນຊ່ວຍຂອງວິທະຍາໄລເຫວ້ ໄດ້ອຳນວຍຄວາມສະດວກໃນການຮ່ຳຮຽນ ແລະໜ້າໄວ້ເນື້ອເຊື່ອໃຈເມື່ອພວກນ້ອງຢູ່ຫ່າງໄກຈາກຄອບຄົວ, ໄປສຶກສາຢູ່ປະເທດໃໝ່. ນັກສຶກສາ ວົງຈຳປາ ຕົວນິດາ ໃຫ້ຮູ້ວ່າ ສິ່ງທີ່ນ້ອງເປັນຫ່ວງທີ່ສຸດເມື່ອມາຫວຽດນາມ ໃນຄັ້ງທຳອິດແມ່ນບ່ອນພັກເຊົາ ແລະພາຫະນະໄປມາ. ແຕ່ວ່າ, “ເມື່ອຮຽນຢູ່ໂຮງຮຽນວິທະຍາໄລເຫວ້, ຄວາມຫຍຸ້ງຍາກດັ່ງກ່າວທາງໂຮງຮຽນໄດ້ໜູນຊ່ວຍແກ້ໄຂໃຫ້ແລ້ວ. ພວກນ້ອງໄປໂຮງຮຽນຢ່າງປອດໄພແຕ່ວ່າບໍ່ເສຍເງິນຈັກດົ່ງເລີຍ. ພິເສດ, ຄູອາຈານ ເພື່ອນມິດຄົນຫວຽດນາມ ໄດ້ຊ່ວຍເຫຼືອໃນການຮຽນ ແລະດຳລົງຊີວິດອີກດ້ວຍ. ສິ່ງນີ້ຊ່ວຍນັກສຶກສາຕ່າງປະເທດມີຄວາມອຸ່ນອ່ຽນໃຈໃນວິວັດການຮຽນກວ່າ”.
ທ່ານ ຮວ່າງບາວຮຸ່ງ ຫົວໜ້າວິທະຍາໄລເຫວ້ ແບ່ງປັນວ່າ ວຽກງານຄຸ້ມຄອງ, ບຳລຸງສ້າງ ແລະຊ່ວຍເຫຼືອນັກສຶກສາເມື່ອມາຮ່ຳຮຽນຢູ່ເຫວ້, ຄະນະກຳມະການປະຊາຊົນແຂວງເທື່ອທຽນເຫວ້ ໄດ້ເອົາໃຈໃສ່ເປັນພິເສດ. ໃນຊຸມປີຜ່ານມາ, ອຳນາດການປົກຄອງທ້ອງຖິ່ນ, ບັນດາອົງການຈັດຕັ້ງ, ຮາກຖານການສຶກສາໄດ້ມີຄວາມເອົາໃຈໃສ່ລົງທຶນ, ອຳນວຍຄວາມສະດວກ ແລະສົມທົບໜູນຊ່ວຍດ້ວຍບັນດາລາຍການ, ກິດຈະກຳທີ່ແທດຈິງ.
ທ່ານ ຮຸ່ງ ເວົ້າວ່າ: “ນອກຈາກນັ້ນ, ຄວາມມານະພະຍາຍາມຂອງໂຮງຮຽນວິທະຍາໄລເຫວ້ ໃນການໜູນຊ່ວຍ ແລະຮ່ວມເດີນທາງພ້ອມກັບນັກສຶກສາລາວ ຍັງໄດ້ປະກອບສ່ວນສ້າງສະພາບແວດລ້ອມແຫ່ງການຮ່ຳຮຽນຢ່າງຮອບດ້ານ ແລະເປັນມິດ, ສະແດງໃຫ້ເຫັນຈິດໃຈຮ່ວມມື ແລະມິດຕະພາບອັນເລິກເຊິ່ງລະຫວ່າງສອງປະເທດ”.
ນ້ຳໃຈໄມຕີຈິດມິດຕະພາບ ຫວຽດນາມ-ລາວ
ໂດຍແມ່ນໂຮງຮຽນວິທະຍາໄລແຫ່ງໜຶ່ງດຽວຢູ່ບໍລິເວນແຂວງ ທີ່ດຳເນີນການບຳລຸງສ້າງ ແລະມອບໃບຢັ້ງຢືນພາສາຫວຽດ ໃຫ້ແກ່ນັກສຶກສາລາວ, ແຕ່ສົກປີ 2002-2003 ມາຈົນຮອດປະຈຸບັນ, ທາງໂຮງຮຽນໄດ້ບຳລຸງສ້າງ ແລະໜູນຊ່ວຍນັກສຶກສາລາວ ທີ່ມາຈາກບັນດາແຂວງຢູ່ພາກກາງ ແລະພາກໃຕ້ລາວ ດ້ວຍຈຳນວນ 1.500 ຄົນ. ສົກຮຽນ 2024-2025, ທາງໂຮງຮຽນ ໄດ້ຮັບ ແລະໜູນຊ່ວຍບ່ອນພັກເຊົາໃຫ້ແກ່ນັກສຶກສາລາວ ຈຳນວນ 82 ຄົນທີ່ມາຈາກແຂວງເຊກອງ, ສາລະວັນ, ອັດຕະປື, ຈຳປາສັກ, ສະຫວັນນະເຂດ ແລະຄຳມ່ວນ. ພ້ອມທັງຈັດພາຫະນະເພື່ອຮັບ-ສົ່ງນັກສຶກສາລາວ ຮັບປະກັນຄວາມປອດໄພເມື່ອເຂົ້າຮ່ວມການສັນຈອນ.
ຢູ່ສຳນັກງານຂອງໂຮງຮຽນ ເລກທີ 82 ຖະໜົນຮຸ່ງເວືອງ, ນະຄອນເຫວ້, ທາງໂຮງຮຽນໄດ້ຈັດຫ້ອງຮຽນ, ຫ້ອງຝຶກການຟັງ, ການເວົ້າ, ການອ່ານ, ການຂຽນ; ລະບົບຫ້ອງຄອມພິວເຕີ ສາມາດຕອບສະໜອງທັກສະການເສັງປະເມີນລະດັບຄວາມຮູ້ພາສາຫວຽດ; ມີຫໍສະໝຸດທີ່ທັນສະໄໝຮັບໃຊ້ຄວາມຕ້ອງການໃນການຮ່ຳຮຽນ ແລະຄົ້ນຄວ້າ. ໄປພ້ອມກັບຄວາມເອົາໃຈໃສ່ພື້ນຖານດ້ານວັດຖຸ, ທາງໂຮງຮຽນໄດ້ເອົາໃຈໃສ່ໃນການພົບປະແລກປ່ຽນດ້ານວັດທະນະທຳ ແລະເພີ່ມທະວີການເຊື່ອມຕໍ່ລະຫວ່າງນັກສຶກສາລາວ ແລະນັກສຶກສາຫວຽດນາມ, ຄື: ຈັດງານບຸນປີໃໝ່, ສ້າງສະໂມສອນພາສາຫວຽດ ແລະພານັກສຶກສາລາວ ໄປຢ້ຽມຊົມບັນດາຮ່ອງຮອຍວັດທະນະທຳຢູ່ເຫວ້, ຂຶ້ນແຜນການ ແລະປຸກລະດົມຄູອາຈານຂອງໂຮງຮຽນຮັບອຸປະກາລະນັກສຶກສາລາວ ແຕ່ 1-2 ຄົນ... ທ່ານ ຮຸ່ງ ເວົ້າວ່າ: “ບັນດາກິດຈະກຳນີ້ບໍ່ພຽງແຕ່ຊ່ວຍໃຫ້ພວກນ້ອງເຂົ້າໃຈດ້ານວັດທະນະທຳຂອງຫວຽດນາມ ເທົ່ານັ້ນ ຫາກຍັງຊ່ວຍຮັດແໜ້ນການພົວພັນສາມັກຄີລະຫວ່າງສອງປະເທດອີກດ້ວຍ”.
ທີ່ກອງປະຊຸມສະຫຼຸບວຽກງານບຳລຸງສ້າງ ແລະຄຸ້ມຄອງນັກສຶກສາລາວ ສົກຮຽນ 2023-2024 ແລະຜັນຂະຫຍາຍແຜນການສົກຮຽນ 2024-2025 ໃນກາງເດືອນຕຸລາ ຜ່ານມາ, ທ່ານ ສຸພັນ ຫາດາວເຮືອງ ຫົວໜ້າສະຖານກົງສູນໃຫຍ່ລາວ ປະຈໍາ ນະຄອນດ່ານັ້ງ ແບ່ງປັນວ່າ ເທື່ອທຽນເຫວ້ ມີການພົວພັນຮ່ວມມືຮອບດ້ານກັບບັນດາແຂວງຢູ່ພາກໃຕ້-ພາກກາງລາວ; ໃນນັ້ນ, ວຽກງານບຳລຸງສ້າງຊັບພະຍາກອນມະນຸດ ຈຶ່ງໄດ້ໃຫ້ບຸລິມະສິດແຖວໜ້າ. ສອງຝ່າຍໄດ້ເອົາໃຈໃສ່ຍົກສູງຄຸນນະພາບວຽກງານການສຶກສາເພື່ອແນໃສ່ສ້າງຊັບພະຍາກອນມະນຸດທີ່ມີຄຸນນະພາບ.
ໃນຫຼາຍປີຜ່ານມາ, ແຂວງເທື່ອທຽນເຫວ້ ໄດ້ມອບຫຼາຍທຶນການສຶກສາໃຫ້ແກ່ພະນັກງານ, ນັກສຶກສາລາວ. ສະຫາຍ ສຸພັນ ຫາດາວເຮືອງ ເນັ້ນໜັກວ່າ ພາຍຫຼັງຮຽນຈົບຢູ່ມະຫາວິທະຍາໄລ, ວິທະຍາໄລ ຢູ່ທ້ອງຖິ່ນຂອງພວກເພື່ອນ, ນັກສຶກສາລາວ ເມື່ອກັບຄືນປະເທດຈະໝູນໃຊ້ຄວາມຮູ້ທີ່ໄດ້ຮຽນມາເພື່ອປະກອບສ່ວນເຂົ້າໃນການສ້າງສາ ແລະພັດທະນາປະເທດຢູ່ບັນດາອົງການລັດ ແລະວິສາຫະກິດ, ບໍລິສັດເອກະຊົນ. ສິ່ງນີ້ໄດ້ພິສູດໃຫ້ເຫັນໝາກຜົນຂອງວຽກງານບຳລຸງກໍ່ສ້າງຊັບພະຍາກອນມະນຸດທີ່ມີປະສິດທິຜົນ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ 6 ແຂວງຢູ່ພາກໃຕ້-ພາກກາງຂອງລາວ, ພ້ອມດ້ວຍການໜູນຊ່ວຍ, ເອົາໃຈໃສ່ຂອງໂຮງຮຽນ, ຂອງຄູອາຈານທີ່ມີຕໍ່ກັບນັກສຶກສາລາວ ໃນຕະຫຼອດໄລຍະຜ່ານມາ.
 | ນັກສຶກສາລາວ ເຂົ້າຮ່ວມການແຂ່ງຂັນເວົ້າພາສາຫວຽດນາມ ຍສໝ - ຈຸດປະສົງຂອງການແຂ່ງຂັນແມ່ນເພື່ອແນໃສ່ຊຸກຍູ້ຂະບວນການຮຽນພາສາຫວຽດນາມ ສໍາລັບນັກສຶກສາລາວ, ສ້າງເງື່ອນໄຂໃຫ້ນັກສຶກສາລາວ ທີ່ພວມຮ່ຳຮຽນຢູ່ຕາມມະຫາວິທະຍາໄລ, ວິທະຍາໄລແຫ່ງຕ່າງໆໃນບໍລິເວນແຂວງທ໊າຍງວຽນ... |
 | ນັກສຶກສາລາວ ແລະ ຄວາມຊົງຈຳວັນບຸນປີໃໝ່ທີ່ອົບອຸ່ນໃນບ້ານເກີດເມືອງນອນແຫ່ງທີສອງ ຍສໝ - ຕ້ອນຮັບບຸນປີໃໝ່ຢູ່ຫວຽດນາມ, ນັກສຶກສາລາວ ຍັງໄດ້ຮັບອັ່ງເປົ່າຕາມຮີດຄອງປະເພນີຂອງຊາວຫວຽດນາມ. ຍ້ອນມັກຮີດຄອງປະເພນີນີ້, ຫຼາຍໆຄົນ ກໍ່ຕື່ນເຕັ້ນໃຫ້ໝູ່ເພື່ອນຖ່າຍຮູບກັບອັ່ງເປົ່າຊອງແດງ ແລ້ວແຊລົງເຟສບຸກ ໃຫ້ໝູ່ເພື່ອນ ແລະ ຍາດຕິພີ່ນ້ອງຢູ່ບ້ານເກີດເມືອງນອນ... |
ແສງເດືອນ
