 |
ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ລາຍງານຕໍ່ກອງປະຊຸມ ສະ ໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII. (ພາບ: ເກດສະໜາ-ຫວາດ)
ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ລາຍງານຕໍ່ກອງປະຊຸມ ສະ ໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII, ຊຶ່ງໄດ້ໄຂຂຶ້ນຢ່າງເປັນທາງການ ໃນວັນທີ 20 ພະຈິກ 2018 ມີບາງຕອນສຳຄັນວ່າ: ໃນເຄິ່ງສະໄໝທີ່ຜ່ານມາ, ລັດຖະບານ ໄດ້ພະຍາຍາມສືບ ຕໍ່ຮັກສາສະຖຽນລະພາບ ທາງດ້ານການເມືອງ ມີຄວາມະສະຫງົບ ແລະ ເປັນລະບຽບຮຽບຮ້ອຍຂອງສັງ ຄົມໄດ້ໂດຍພື້ນຖານ,ເສດຖະກິດສືບຕໍ່ ຂະຫຍາຍຕົວຢ່າງຕໍ່ເນື່ອງ, ວັດທະນະທໍາ-ສັງຄົມ ມີການພັດ ທະນາຢ່າງຕັ້ງໜ້າ, ຊີວິດການເປັນຢູ່ ຂອງປະຊາຊົນບັນດາເຜົ່າ ໄດ້ຮັບການປົວແປງ ໃຫ້ດີຂຶ້ນກວ່າເກົ່າ, ການປົກປັກຮັກສາສິ່ງແວດລ້ອມ, ການນຳໃຊ້ຊັບ ພະຍາກອນ ທໍາມະຊາດ ຕາມທິດການພັດທະນາສີ ຂຽວ-ຍືນຍົງ ໄດ້ຮັບການປະຕິບັດຢ່າງຕັ້ງໜ້າ, ນໍາພາປະເທດກ້າວສູ່ ການຫລຸດພົ້ນອອກຈາກ ສະຖານະພາບ ດ້ອຍພັດທະນາເທື່ອລະກ້າວ. 2 ປີ ກວ່າມານີ້, ລັດຖະບານ ໄດ້ມີຄວາມພະຍາ ຍາມສູງໃນການແກ້ໄຂ ບັນຫາຄວາມຫຍຸ້ງຍາກ ດ້ານເສດຖະກິດ-ການເງິນ, ໂດຍໄດ້ສຸມໃສ່ກວດກາຄືນ ແລະ ວິເຄາະວິໄຈ ສະພາບການຂະຫຍາຍຕົວ ຂອງເສດຖະກິດໂລກ ແລະ ພາກພື້ນ ລວມທັງສະພາບ ຄວາມເປັນຈິງ ພາຍໃນປະເທດ. ດັ່ງນັ້ນ, ຈຶ່ງໄດ້ສະເໜີຕໍ່ກອງປະຊຸມ ຄົບຄະນະບໍລິຫານງານສູນກາງພັກ ຄັ້ງທີ 2 ໃນປີ 2016 ເພື່ອດັດແກ້ບາງຕົວເລກ ຄາດໝາຍມະຫາພາກ ໂດຍສະເພາະ ແມ່ນຕົວເລກເຕີບໂຕທາງ ດ້ານເສດຖະກິດ ສະເລ່ຍ 4 ປີ (2017-2020) ຈາກ 7,5% ມາເປັນ 7,2%.
ການຂະຫຍາຍຕົວ ຂອງເສດຖະກິດ ແມ່ນຢູ່ໃນຈັງຫວະທີ່ຊ້າລົງ ສະເລ່ຍ 6,8% ເຫັນວ່າຫລຸດແຜນການທີ່ວາງໄວ້ 0,4% (ແຜນດັດແກ້ 4 ປີ7,2%), ສະເພາະຂະແໜງກະສິກຳ ປະຕິບັດໄດ້ 2,7% ຫລຸດແຜນ 0,7% (ແຜນດັດແກ້ສະເລ່ຍ 3,4%), ຂະແໜງອຸດສາຫະກຳ ປະຕິບັດໄດ້10,4% ລື່ນແຜນທີ່ວາງໄວ້ 1,1% (ແຜນດັດແກ້ສະເລ່ຍ 9,3%), ຂະແໜງບໍລິການປະຕິບັດ ໄດ້ 5,6% ໂດຍຫລຸດແຜນການ 2,5% (ແຜນດັດແກ້ສະເລ່ຍ 8,1%) ແລະ ອັດຕາເງິນເຟີ້ ສະເລ່ຍ 2 ປີ 8 ເດືອນ ຢູ່ໃນລະດັບ 1,66% (ຕ່ຳກວ່າອັດຕາການ ຂະຫຍາຍຕົວຂອງ GDP).
ການເກັບລາຍຮັບ ງົບປະມານປະຕິບັດໄດ້ 70.746 ຕື້ກີບ ກວມເອົາ 16,7% ຂອງ GDP (ແຜນດັດແກ້ກວມເອົາ 18,6%), ລາຍຈ່າຍປະຕິບັດໄດ້ 92.861 ຕື້ກີບ ກວມເອົາ 22% ຂອງ GDP (ແຜນດັດແກ້ກວມເອົາ 23,3%), ການຂາດດຸນງົບປະມານສະເລ່ຍ 5,7% (ແຜນດັດແກ້4,23) ແລະ ການລົງທຶນລວມຂອງສັງຄົມ ປະຕິບັດໄດ້ 128.400 ຕື້ກີບ ກວມເອົາ 30,4% ຂອງ GDP (ແຜນດັດແກ້ 29%).
ຢ່າງໃດກໍຕາມພາຍຫລັງເຂົ້າຮັບໜ້າທີ່, ລັດຖະບານຊຸດທີ 8 ກໍໄດ້ປັບປຸງ ແລະ ຊັບຊ້ອນບາງກົງຈັກການຈັດຕັ້ງ ຂອງກົງຈັກລັດຖະບານ ຕາມທິດກະທັດຮັດ, ປະຢັດງົບປະມານ, ຫລຸດຜ່ອນພາລະບົດບາດທັບຊ້ອນ ໃຫ້ສົມເຫດສົມຜົນ, ໄດ້ກວດກາ ແລະ ຮັດແຄບຊ່ອງຫວ່າງ ການຮົ່ວໄຫລ ຂອງການເກັບລາຍຮັບງົບປະມານ ໂດຍການກວດກາ ແລະ ຢຸດຕິການຍົກເວັ້ນພາສີ-ອາກອນ ນຳເຂົ້າພາຫະ ນະ, ນ້ຳມັນເຊື້ອໄຟ, ວັດສະດຸກໍ່ສ້າງ,ສິນຄ້າຟຸມເຟືອຍ, ສິນຄ້າອຸປະໂພກ-ບໍລິໂພກ, ປັບປຸງຄຸ້ມຄອງລະບົບ ການເງິນ-ງົບປະມານ ຢ່າງຮອບດ້ານ, ໂດຍໄດ້ປັບປຸງການຈັດຕັ້ງ, ຊັບຊ້ອນບຸກຄະລາກອນ ໃຫ້ແທດເໝາະຂຶ້ນ, ນຳໃຊ້ລະບົບເຄື່ອງມືທັນສະໄໝ ໄປພ້ອມກັບລະບົບ ການຖືບັນຊີ ເຂົ້າໃນການຈັດເກັບ ລາຍຮັບພາສີ-ອາກອນ ແລະ ຄ່າທຳນຽມຕ່າງໆ, ໄດ້ເລັ່ງກວດກາ ແລະ ສ້າງແຜນປະຕິຮູບບັນດາ ລັດວິສາຫະກິດຂະໜາດໃຫຍ່ ແລະ ກາງ ທີ່ດຳເນີນທຸລະກິດ ຂາດປະສິດທິຜົນ ໂດຍສະເພາະແມ່ນ ລັດວິສາຫະກິດໄຟຟ້າລາວ ແລະ ລັດວິສາຫະກິດການບິນລາວ, ໃນຂະນະດຽວກັນ ຂະແໜງການອື່ນໆ ກໍໄດ້ຮັບການປັບປຸງ ແລະ ປະຕິຮູບເຊັ່ນດຽວກັນ.
ທ່ານນາຍົກລັດຖະມົນຕີ ຊີ້ໃຫ້ເຫັນຕື່ມວ່າ: ສະພາບພົ້ນເດັ່ນໃນໄລຍະ 2 ປີກວ່າຜ່ານມາ ແມ່ນລັດຖະບານ ໄດ້ສຸມໃສ່ການເຄື່ອນໄຫວຂອງລັດ ແລະ ສັງຄົມ ເຂົ້າສູ່ກົດໝາຍ ແລະ ລະບຽບການ, ເດັດດ່ຽວແກ້ໄຂ ການລະເມີດກົດໝາຍ ແລະ ລະບຽບການຢ່າງເຂັ້ມງວດ, ຮັກສາໄດ້ສະຖຽນລະພາບທາງ ດ້ານກາງເມືອງຢ່າງໜັກແໜ້ນ, ເສດຖະກິດມະຫາພາກ ເຖິງວ່າປະສົບຄວາມ ຫຍຸ້ງຍາກຫລາຍຢ່າງ ແຕ່ກໍມີຄວາມໝັ້ນທ່ຽງ ແລະ ເຕີບໂຕ ໃນລະດັບດີ, ສາມາດຄວບຄຸມໄດ້ ບໍ່ໃຫ້ມີໂຄງການນອກແຜນ, ປັບປຸງໄດ້ບັນດາກົນໄກ ການເກັບລາຍຮັບ ເຮັດໃຫ້ສາມາດເກັບລາຍໄດ້ເພີ່ມຂຶ້ນ. ພ້ອມດຽວກັນນີ້, ຍັງສໍາເລັດການສ້າງ ແລະ ປັບປຸງກົດໝາຍ ເພື່ອນຳສະເໜີສະພາ ແຫ່ງຊາດຮັບຮອງ ແລະ ຜັນຂະຫຍາຍອອກ ເປັນນິຕິກຳລຸ່ມກົດໝາຍ ເຮັດໃຫ້ການຄຸ້ມຄອງລັດ, ຄຸ້ມຄອງສັງຄົມ ດ້ວຍກົດໝາຍມີຄວາມເຂັ້ມງວດ, ເດັດຂາດ ແລະ ມີປະສິດທິພາບສູງຂຶ້ນ ຢ່າງຈະແຈ້ງ.
（ແຫຼ່ງຂໍ້ມູນ： ສິງຄຳ/ຂປລ）
