 |
ສຳລັບ ການສະກັດກັ້ນໄພເງິນເຟີ້ ແລະ ປັບປຸງນະໂຍບາຍເງິນຕາ, ລັດຖະບານໄດ້ມອບໃຫ້ທະນາຄານແຫ່ງ ສປປ ລາວ ເປັນເຈົ້າການປະສານສົມທົບ ກັບພາກສ່ວນທີ່ກ່ຽວຂ້ອງ ຈັດຕັ້ງປະຕິບັດບັນດາໜ້າວຽກ ຄື: ຄວບຄຸມປະລິມານເງິນອອກສູ່ຂອດຈໍລະຈອນ M2 ໃຫ້ເພີ່ມຂຶ້ນຢູ່ໃນກອບ ທີ່ສະພາແຫ່ງຊາດຮັບຮອງ; ນຳໃຊ້ນະໂຍບາຍອັດຕາແລກປ່ຽນ ຕາມກົນໄກຕະຫລາດ ທີ່ມີການຄຸ້ມຄອງຢ່າງຮັດກຸມຂອງລັດ, ຕິດຕາມກວດກາການເຄື່ອນໄຫວ ທຸລະກິດຂອງຮ້ານແລກປ່ຽນເງິນຕາ ຢ່າງເຂັ້ມງວດເພື່ອຈຳກັດຊ່ອງຫວ່າງ ແລະ ປະກົດການຫຍໍ້ທໍ້ຕ່າງໆ. ພ້ອມທັງຄວບຄຸມສ່ວນຕ່າງອັດຕາແລກປ່ຽນ ລະຫວ່າງ ທະນາຄານ ແລະ ຕະຫລາດ ບໍ່ໃຫ້ເກີນ 2%; ເອົາໃຈໃສ່ຄຸ້ມຄອງເງິນຕາຕ່າງປະເທດ, ເພີ່ມຄັງສຳຮອງເງິນຕາຕ່າງປະເທດ ໂດຍການອຳນວຍຄວາມສະດວກ, ຊຸກຍູ້ ແລະ ຊ່ວຍເຫລືອໃຫ້ມີການຜະລິດສິນຄ້າ ເພື່ອສົ່ງອອກ ແລະ ສົ່ງເສີມການຊຳລະສະສາງ ຜ່ານລະບົບທະນາຄານໃຫ້ຫລາຍຂຶ້ນ; ກຳນົດສັດສ່ວນຕ່າງໆ ຂອງອັດຕາດອກເບ້ຍເງິນຝາກ ແລະ ເງິນກູ້ ໃຫ້ແທດເໝາະກັບສະພາບຕົວຈິງ ຂອງຕະຫລາດ; ເອົາໃຈໃສ່ພັດທະນາຕະຫລາດທຶນ ແລະ ຊຸກຍູ້ຕະຫລາດຫລັກຊັບລາວ ໃຫ້ຂະຫຍາຍຕົວເພື່ອລະດົມທຶນຮອນ ແລະ ມີການເຄື່ອນໄຫວ ທຸລະກຳຫລາຍຂຶ້ນ; ເລັ່ງລັດກວດກາ ແລະ ປັບປຸງທະນາຄານທຸລະກິດລັດ ໃຫ້ໄດ້ຄົບຕາມເງື່ອນໄຂ ແລະ ມາດຖານ ກ່ອນການຊອກຫາຄູ່ຮ່ວມທຶນ ໃນການດຳເນີນກິດຈະການ.
ພ້ອມນີ້, ຍັງມອບໃຫ້ກະຊວງອຸດສາຫະກຳ ແລະ ການຄ້າ ສົມທົບກັບພາກສ່ວນທີ່ກ່ຽວຂ້ອງ ຈັດຕັ້ງປະຕິບັດໜ້າວຽກ ຄື ກຳນົດໂຄງປະກອບ, ກວດກາ, ດັດປັບ ແລະ ຄຸ້ມຄອງລາຄານ້ຳມັນ, ສິນຄ້າອຸປະໂພກ-ບໍລິໂພກທີ່ເປັນພື້ນຖານ ແລະ ມີຜົນກະທົບໄວຕໍ່ການດຳລົງຊີວິດຂອງປະຊາຊົນ ໃຫ້ເໝາະສົມ ແລະ ສອດຄ່ອງກັບສະພາບຕົວຈິງ; ສົ່ງເສີມການຜະລິດ ແລະ ນຳໃຊ້ພະລັງງານທົດແທນ ແລະ ພະລັງງານທາງເລືອກ, ສິນຄ້າອຸປະໂພກ-ບໍລິໂພກ ທີ່ປະເທດເຮົາມີທ່າແຮງ ເພື່ອສ້າງຄວາມເຂັ້ມແຂງ ໃຫ້ແກ່ການຜະລິດພາຍໃນ ແລະ ຫລຸດຜ່ອນ ການນຳເຂົ້າສິນຄ້າຈາກຕ່າງປະເທດ; ດັດສົມຈຳນວນບໍລິສັດນຳເຂົ້ານ້ຳມັນ ແລະ ບໍລິການນຳມັນເຊື້ອໄຟ ທີ່ມີມາດຕະຖານ ຕາມດຳລັດວ່າດ້ວຍທຸລະກິດນ້ຳມັນເຊື້ອໄຟ ເລກທີ 331/ນຍ ລົງວັນທີ 27 ຕຸລາ 2017 ແລະ ແຈ້ງການສະບັບເລກທີ 140/ຫສນຍ, ກລຂ ລົງວັນທີ 25 ມັງກອນ 2017 ເພື່ອໃຫ້ຈຳນວນບໍລິສັດທຸລະກິດ ນຳເຂົ້າຫລຸດລົງບໍ່ໃຫ້ເກີນ 5 ຫລື 6 ບໍລິສັດ; ກວດກາ ແລະ ດັດສົມຈຳນວນບໍລິສັດ ແລະ ຮ້ານຕົວແທນຈຳໜ່າຍ ພາຫະນະທີ່ບໍ່ໄດ້ມາດຕະຖານເພື່ອຊຸກຍູ້ ແລະ ສົ່ງເສີມການນຳເຂົ້າ ແລະ ການ ບໍລິການຫລັງການຂາຍ ທີ່ມີຄຸນນະພາບ, ຮັບປະກັນທາງດ້ານເຕັກນິກ ແລະ ຄຸ້ມຄອງຕາມກົດໝາຍ ແລະ ລະບຽບການໄດ້ຢ່າງຮັດກຸມ; ຊຸກຍູ້ສົ່ງເສີມ ແລະ ອຳນວຍຄວາມສະດວກ ໃຫ້ແກ່ການຜະລິດສິນຄ້າ ໃຫ້ນັບມື້ຫລາຍຂຶ້ນ.
ສ່ວນການປັບປຸງສະພາບແວດລ້ອມ ແລະ ອຳນວຍຄວາມສະດວດ ໃນການດຳເນີນທຸລະກິດ ມອບໃຫ້ກະຊວງແຜນການ ແລະ ການລົງທຶນ ເປັນເຈົ້າການສົມທົບກັບກະຊວງອຸດສາຫະກຳ ແລະ ການຄ້າ, ກະຊວງການເງິນ ແລະ ພາກສ່ວນກ່ຽວຂ້ອງ ສືບຕໍ່ຕິດຕາມ ແລະ ຊຸກຍູ້ການຈັດຕັ້ງປະຕິບັດຄຳສັ່ງເລກທີ 02/ນຍ ລົງວັນທີ 1 ກຸມພາ 2018 ຢ່າງເຂັ້ມງວດ; ເອົາໃຈໃສ່ປັບປຸງກົນໄກປະສານງານໃຫ້ຄ່ອງຕົວ ແລະ ມີປະສິດທິຜົນກວ່າເກົ່າ; ປັບປຸງຂັ້ນຕອນການອະນຸມັດການລົງທຶນ, ການນຳເຂົ້າ, ການສົ່ງອອກ ແລະ ການເຄື່ອນໄຫວ ທຸລະກິດຕ່າງໆ ໃຫ້ຖືກກົດໝາຍ, ລະບຽບການ, ໂປ່ງໃສ, ວ່ອງໄວ ແລະ ມີປະສິດທິຜົນສູງ; ຮີບຮ້ອນແກ້ໄຂບັນຫາທີ່ເປັນຂອດຄົງຄ້າງ, ອຸດຕັນຫລື ຖ່ວງດຶງໂຄງການລົງທຶນ ຂອງພາກທຸລະກິດ ທັງພາຍໃນ ແລະ ຕ່າງປະເທດ ທີ່ໄດ້ຮັບການອະນຸມັດໄປແລ້ວ ໃຫ້ສາມາດເຄື່ອນໄຫວໄດ້ສະດວກ ແລະ ມີໝາກຜົນ; ສືບຕໍ່ຕິດຕາມ, ກວດກາ, ປະເມີນຜົນ ແລະ ຖອດຖອນບົດຮຽນການຈັດຕັ້ງປະຕິບັດ ກົນໄກປະຕູດຽວ, ພ້ອມທັງສະຫລຸບລາຍງານລັດຖະບານ ເປັນແຕ່ລະໄລຍະ ເພື່ອຊາບ ແລະ ຊີ້ນຳການປັບປຸງປ່ຽນແປງໃຫ້ດີຂຶ້ນເລື້ອຍໆ; ຮີບຮ້ອນແກ້ໄຂບັນຫາທີ່ພົວພັນ ກັບການສະໜອງທີ່ເປັນປົກກະຕິ ແລະ ຕົ້ນທຶນ ທີ່ເໝາະສົມ ຂອງການດຳເນິນທຸລະກິດ ເປັນຕົ້ນ ການສະໜອງ ແລະ ບໍລິການໄຟຟ້າ, ນ້ຳປະປາ, ເກັບມ້ຽນສິ່ງເສດເຫລືອ, ຂົນສົ່ງ ແລະ ອື່ນໆ.
（ຫັດທະບູນ）
