ວັນທີ 7 ມິຖຸນາ, ສະຖານທູດຫວຽດນາມ ປະຈໍາ ສ.ເຊັກໂກ ໄດ້ສົມທົບກັບສູນສຶກສາ ສ.ເຊັກໂກ - ຫວຽດນາມ ແລະ ວິສາຫະກິດຫວຽດນາມ ຈໍານວນໜຶ່ງເຂົ້າຮ່ວມງານບຸນວັດທະນະທຳອາຫານ ສາກົນ Prague ຄັ້ງທີ 8 ປີ 2025 ທີ່ຈັດຂຶ້ນຢູ່ສະໜາມຫຼວງ Victory, Praha.
 |
| ຮ້ານວາງສະແດງຫວຽດນາມ ປະທັບໃຈດ້ວຍສີແດງສົດໃສຂອງທຸງຊາດ ແລະ ບັນດາເຍື່ອງອາຫານພື້ນເມືອງທີ່ຫຼາກຫຼາຍ. (ພາບ: ສະຖານທູດຫວຽດນາມ ປະຈຳ ສ.ເຊັກໂກ) |
ຕາມຂໍ້ມູນຈາກສະຖານທູດຫວຽດນາມ ປະຈຳ ສ.ເຊັກໂກ, ຮ້ານວາງສະແດງ ຫວຽດນາມ ໄດ້ດຶງດູດແຂກມາຢ້ຽມຊົມເປັນຈຳນວນຫຼວງຫຼາຍດ້ວຍສີແດງສົດໃສຂອງທຸງຊາດ, ບັນດາເຍື່ອງອາຫານທີ່ຄຸ້ນເຄີຍຄື: ແນມ, ເຝີ, ກາເຟນົມເຢັນ, ນ້ຳໝາກພ້າວສົດ, ພ້ອມກັບເຄື່ອງຫັດຖະກຳພື້ນເມືອງຄືໝວກຮູບຈວຍ, ຮູບສີໄໝ, ເຄື່ອງປັ້ນດິນເຜົາ.
ຈຸດພົ້ນເດັ່ນຂອງປີນີ້ແມ່ນການນຳສະເໜີບັນດາຜະລິດຕະພັນອາຫານທະເລແຊ່ແຂງຂອງຫວຽດນາມ ເຖິງໝູ່ປະຊາຊົນ ແລະ ເພື່ອນມິດສາກົນເປັນຄັ້ງທຳອິດ. ນີ້ແມ່ນບາດກ້າວທີ່ລະອຽດເພື່ອເຜີຍຄວາມສາມາດບົ່ມຊ້ອນສົ່ງອອກ ແລະ ຢືນຢັນຄຸນນະພາບສິນຄ້າກະເສດອາຫານທະເລ ຫວຽດນາມ ຢູ່ຕະຫຼາດ ເອີລົບ.
ງານບຸນດັ່ງກ່າວມີການເຂົ້າຮ່ວມຂອງ 56 ປະເທດ, ໄດ້ຮັບການສະໜັບສະໜູນຈາກສະພາສູງ, ສະພາຜູ້ແທນລາຊະດອນ, ກະຊວງການຕ່າງປະເທດສາທາລະນະລັດເຊັກໂກ ແລະ ອຳນາດການປົກຄອງນະຄອນ Praha 6. ບັນດາການເຄື່ອນໄຫວໃນຂອບເຂດຂອງງານບຸນແມ່ນອຸດົມສົມບູນ, ຫຼາກຫຼາຍ, ນັບຈາກການສະແດງດົນຕີ, ຟ້ອນພື້ນເມືອງເຖິງ ການສະແດງສິລະປະຫັດຖະກຳ, ສ້າງບັນຍາກາດຟົດຟື້ນເພື່ອແລກປ່ຽນວັດທະນະທຳລະຫວ່າງບັນດາຊາດ.
 |
| ຮ້ານວາງສະແດງຂອງຫວຽດນາມ ໄດ້ດຶງດູດນັກທ່ອງທ່ຽວ. (ພາບ: ສະຖານທູດຫວຽດນາມ ປະຈຳ ສ.ເຊັກໂກ) |
ກ່າວຄຳປາໄສທີ່ເຫດການ, ທ່ານເອກອັກຄະລັດຖະທູດ ຫວຽດນາມ ປະຈຳ ສ.ເຊັກໂກ ເຢືອງຮວ່າຍນາມ ໃຫ້ຮູ້ວ່າ: “ງານບຸນວັດທະນະທຳອາຫານ ແມ່ນໂອກາດອັນລ້ຳຄ່າເພື່ອແນໃສ່ໂຄສະນາພາບພົດປະເທດ, ປະຊາຊົນ ແລະ ວັດທະນະທຳ ຫວຽດນາມ ໃຫ້ແກ່ເພື່ອນມິດສາກົນ, ພ້ອມກັນນັ້ນ ກໍ່ເພີ່ມທະວີການແລກປ່ຽນປະຊາຊົນ ແລະ ຄວາມເຂົ້າໃຈເຊິ່ງກັນ ແລະ ກັນລະຫວ່າງບັນດາຊາດ. ໃນໄລຍະມໍ່ໆມານີ້, ການພົວພັນຫວຽດນາມ - ເຊັກໂກ ນັບມື້ນັບພັດທະນາຢ່າງຕັ້ງໜ້າ, ສອງຝ່າຍຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດ ເນື່ອງໃນການເດີນທາງໄປຢ້ຽມຢາມຂອງທ່ານນາຍົກລັດຖະມົນຕີ ຟ້າມມິງຈິ້ງ ໃນເດືອນ ມັງກອນ 2025. ບັນດາການເຄື່ອນໄຫວໂຄສະນາວັດທະນະທຳປີນີ້ ຈະປະກອບສ່ວນເຂົ້າໃນການປະຕິບັດບັນດາເນື້ອໃນຂອງການພົວພັນຄູ່ຮ່ວມມືຍຸດທະສາດຕາມທິດທາງແທດຈິງ, ມີປະສິດທິຜົນ, ເໝາະກັບຂະໜາດການພົວພັນລະຫວ່າງ 2 ປະເທດ”.
ການເຂົ້າຮ່ວມບັນດາການເຄື່ອນໄຫວໂຄສະນາວັດທະນະທໍາຢ່າງຕັ້ງໜ້າບໍ່ພຽງແຕ່ຊ່ວຍເຜີຍແຜ່ຄຸນຄ່າຂອງຫວຽດນາມ ອອກສູ່ໂລກເທົ່ານັ້ນ, ຫາກຍັງສະແດງໃຫ້ເຫັນບົດບາດເຊື່ອມຕໍ່ຂອງສະຖານທູດ, ປະກອບສ່ວນຍົກສູງຮູບພາບ ແລະ ທີ່ຕັ້ງຂອງປະຊາຄົມຊາວຫວຽດນາມ ຢູ່ ສ.ເຊັກໂກ.
 | ເອກອັກຄະລັດຖະທູດເຢຍລະມັນ ປະຈຳ ຫວຽດນາມ: ປີ 2025 ແມ່ນປີມິດຕະພາບລະຫວ່າງສອງປະເທດ ຍສໝ - ປີ 2025, ສະຖານທູດເຢຍລະມັນ ປະຈຳ ຮ່າໂນ້ຍ, ສະຖານກົງສຸນໃຫຍ່ເຢຍລະມັນ ປະຈຳ ນະຄອນໂຮ່ຈີມິນ ຈະສົມທົບກັບບັນດາພາກສ່ວນທີ່ກ່ຽວຂ້ອງຈັດຕັ້ງຫຼາຍເຫດການ ເພື່ອສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ເຢຍລະມັນ. |
 | ຄະນະກຳມະການສັນຕິພາບ ຫວຽດນາມ ຍູ້ແຮງການເຄື່ອນໄຫວການສຶກສາສັນຕິພາບໃນປີ 2025 ຍສໝ - ຫວ່າງມໍ່ໆມານີ້, ຢູ່ ຮ່າໂນ້ຍ, ກອງປະຊຸມຄະນະປະຈຳ - ຄະນະປະທານຄະນະກຳມະການສັນຕິພາບ ຫວຽດນາມ ໄດ້ດຳເນີນເພື່ອແນໃສ່ສະຫຼຸບວຽກງານປີ 2024 ແລະ ກຳນົດທິດທາງ ແລະ ໜ້າທີ່ປີ 2025. ກອງປະຊຸມໄດ້ກຳນົດການສຶກສາສັນຕິພາບແມ່ນການເຄື່ອນໄຫວໃຈກາງຂອງຄະນະກຳມະການສັນຕິພາບ ຫວຽດນາມ ໃນປີ 2025. |
ແທັງຮັ່ງ
