ຕາມນັກຂ່າວສຳນັກຂ່າວສານ ຫວຽດນາມ ປະຈຳ ນິວຢອກ ແລ້ວ, ກອງປະຊຸມຄັ້ງນີ້ມີການເຂົ້າຮ່ວມຂອງທ່ານເລຂາທິການໃຫຍ່ສະຫະປະຊາຊາດ Antonio Guterres, ລັດຖະມົນຕີການຕ່າງປະເທດບັນດາປະເທດ 20 ທ່ານ ແລະ ຜູ້ຕາງໜ້າກວ່າ 40 ປະເທດ, ໂດຍການເປັນປະທານຂອງທ່ານ Stéphane Séjourné, ລັດຖະມົນຕີກະຊວງ ເອີຣົບ ແລະ ການຕ່າງປະເທດ ຝຣັ່ງ, ປະເທດປະທານສະພາຄວາມໝັ້ນຄົງສະຫະປະຊາຊາດ ໃນເດືອນນີ້.
ກ່າວຄຳປາໄສທີ່ການປຶກສາຫາລື, ທ່ານເລຂາທິການໃຫຍ່ Guterres ໄດ້ກ່າວເຕືອນວ່າ ຄວາມສ່ຽງຂອງການຂັດແຍ້ງທີ່ແຜ່ລາມອອກເປັນວົງກ້ວາງ ພວມກາຍເປັນສະພາບຕົວຈິງ, ສະພາບການທີ່ພວມມີວິກິດການມະນຸດສະທຳນັບມື້ນັບຮ້າຍແຮງ, ປະຊາຊົນຢູ່ Gaza ພວມຕ້ອງຮັບຜົນສະທ້ອນຈາກການທຳລາຍມ້າງຢູ່ຂອບຂະໜາດ ແລະ ລະດັບຄວາມໄວທີ່ບໍ່ເຄີຍມີມາກ່ອນ, ໃນຂະນະທີ່ສະພາບການຢູ່ທະເລແດງພວມມີຄວາມວິຕົກກັງວົນ ເຮັດໃຫ້ການຄ້າທົ່ວໂລກຂາດວັກຂາດຕອນ. ຜູ້ນຳໜ້າ ສປຊ ໄດ້ຮຽກຮ້ອງໃຫ້ປ່ອຍຕົວປະກັນທັງໝົດໂດຍທັນທີ ແລະ ໂດຍບໍ່ມີເງື່ອນໄຂ; ເລັ່ງໃຫ້ທຸກຝ່າຍລະງັບໃຈຢ່າງສູງສຸດ ແລະ ຜັນຂະຫຍາຍບັນດາບາດກ້າວເພື່ອຫລຸດຜ່ອນຄວາມເຄັ່ງຕຶງ, ເຊື່ອມຕໍ່ການເຄື່ອນໄຫວສະໜອງສິນຄ້າທີ່ຈຳເປັນໃຫ້ປະຊາຊົນຢູ່ເຂດ Gaza; ຮຽກຮ້ອງໃຫ້ຢຸດຍິງໂດຍດ່ວນເພື່ອເປົ້າໝາຍດ້ານມະນຸດສະທຳຢູ່ເຂດ Gaza, ຢຸດຕິບັນດາບຸກຈົມຕີທີ່ແນໃສ່ບັນດາກ່ຳປັ່ນການຄ້າຢູ່ທະເລແດງ.
ບັນດາປະເທດທີ່ກ່າວຄຳປາໄສ ໄດ້ສະແດງຄວາມເປັນກັງວົນກ່ຽວກັບຄວາມສ່ຽງຂອງການຂັດແຍ້ງກັນທີ່ລາມອອກເປັນວົງກ້ວາງ ແລະ ວິກິດການມະນຸດສະທຳນັບມື້ນັບຮ້າຍແຮງຢູ່ເຂດແຄວ້ນນີ້, ຮຽກຮ້ອງໃຫ້ທຸກຝ່າຍຈົ່ງລະງັບໃຈ, ຫຼີກລ່ຽງຄວາມເຄັ່ງຕຶງທີ່ເພີ່ມຂຶ້ນ, ສຸມໃສ່ປົວແປງເງື່ອນໄຂຊີວິດການເປັນຢູ່ໃຫ້ປະຊາຂົນ Palestine ຢູ່ເຂດ Gaza. ຫຼາຍປະເທດຖືວ່າ ບຸລິມະສິດອັນດັບຕົ້ນໆໃນປະຈຸບັນແມ່ນການປະຕິບັດການຢຸດຍິງແບບຍືນຍົງໂດຍທັນທີ ດ້ວຍຜ່ານການປະກອບສ່ວນຂອງບັນດາຄູ່ຮ່ວມມືໃນພາກພື້ນ ແລະ ສາກົນ, ພ້ອມກັນນັ້ນ ກໍ່ຊຸກຍູ້ການໜູນຊ່ວຍດ້ານມະນຸດສະທໍາສຸກເສີນໃຫ້ແກ່ປະຊາຊົນຢູ່ເຂດ Gaza ໂດຍບໍ່ມີສິ່ງຂັດຂວາງ. ບັນດາປະເທດກໍ່ຢືນຢັນຄວາມສຳຄັນຂອງການປະຕິບັດ 2 ມະຕິທີ່ກ່ຽວຂ້ອງ ເຊິ່ງສະພາຄວາມໝັ້ນຄົງ ສປຊ ໄດ້ຮັບຮອງເມື່ອບໍ່ດົນມານີ້; ຮຽກຮ້ອງໃຫ້ເຊື່ອມຕໍ່ຄືນບັນການດາເຈລະຈາສັນຕິພາບບົນພື້ນຖານການແກ້ໄຂສອງລັດໂດຍໄວ.
 | |
|
ກ່າວຄຳປາໄສທີ່ການປຶກສາຫາລື, ທ່ານອັກຄະລັດຖະທູດທີ່ປຶກສາ ຫງວຽນຮວ່າງຫງວຽນ, ຮອງຫົວໜ້າຄະນະຜູ້ແທນ ຫວຽດນາມ ປະຈຳ ສປຊ ໄດ້ສະແດງຄວາມເປັນກັງວົນຢ່າງເລິກເຊິ່ງກ່ຽວກັບສະພາບການສຶບຕໍ່ຜັນແປສັບສົນ ທີ່ພວມແຜ່ລາມອອກເປັນວົງກ້ວາງຢູ່ ຕາເວັນອອກກາງ, ພິເສດແມ່ນການປະທະກັນທີ່ເຄັ່ງຕຶງຂຶ້ນຢູ່ເຂດ Gaza ພວມເຮັດໃຫ້ມີຜູ້ເສຍຊີວິດຢ່າງຫຼວງຫຼາຍ, ມີຄວາມເສຍຫາຍຢ່າງຫຼວງຫຼາຍຕໍ່ພື້ນຖານໂຄງລ່າງພົນລະເຮືອນ ແລະ ບັນດາຮາກຖານຂອງ ສປຊ ແລະ ວິກິດການມະນຸດສະທຳຢ່າງຮ້າຍແຮງ, ພ້ອມກັບບັນດາເຫດທີ່ເກີດຂຶ້ນຢູ່ທະເລແດງພວມເພີ່ມທະວີຄວາມວິຕົກກັງວົນຂອງທົ່ວໂລກ, ພິເສດແມ່ນກ່ຽວກັບຄວາມປອດໄພ ແລະ ຄວາມເສລີພາບໃນການເດີນທະເລ, ພ້ອມກັນນັ້ນ ກໍ່ສົ່ງຜົນກະທົບເຖິງອະທິປະໄຕຂອງບັນດາປະເທດທີ່ຖືກຜົນສະທ້ອນ.
ຜູ້ຕາງໜ້າຂອງ ຫວຽດນາມ ໄດ້ເນັ້ນໜັກເຖິງຄວາມຕ້ອງການກ່ຽວກັບການຢຸດຍິງໂດຍໄວ; ຮຽກຮ້ອງໃຫ້ບັນດາຝ່າຍທີ່ກ່ຽວຂ້ອງຕ້ອງເຄົາລົບກົດໝາຍສາກົນ, ລະງັບໃຈສູງສຸດ, ຫຼີກລ່ຽງທຸກກະທຳທີ່ກໍ່ຄວາມເຄັ່ງຕຶງ, ຄວາມຮຸນແຮງ ແລະ ສ້າງສະພາບແວດລ້ອມທີ່ສະດວກໃຫ້ແກ່ການເຈລະຈາສັນຕິພາບ; ຮຽກຮ້ອງໃຫ້ສະພາຄວາມໝັ້ນຄົງ ສປຊ ເພີ່ມທະວີຄວາມພະຍາຍາມເພື່ອແກ້ໄຂວິກິດການຢ່າງຮີບດ່ວນ. ທ່ານ ຫງວຽນຮວ່າງຫງວຽນ ກໍ່ໄດ້ຢືນຢັນຄືນຫຼັກໝັ້ນຂອງ ຫວຽດນາມ ໃນການສະໜັບສະໜູນການແກ້ໄຂມາດຕະການສອງລັດດ້ວຍການສ້າງຕັ້ງລັດ Palestine ເອກະລາດ, ຢູ່ຮ່ວມກັນໂດຍສັນຕິຄຽງຄູ່ກັບລັດ ອິດສະຣາແອນ, ມີຊາຍແດນກ່ອນປີ 1967 ແລະ ກັບ ເຢຣູຊາແລັມ ຕາເວັນອອກ ເປັນນະຄອນຫຼວງ, ເໝາະສົມກັບມະຕິທີ່ກຽວຂ້ອງຂອງ ສປຊ.
ມິງດຶກ
