ເພີ່ມທະວີການຮ່ວມມືດ້ານປ້ອງກັນຊາດຫວຽດນາມ-ລາວ-ກໍາປູເຈຍ: ສັນຍາລັກແຫ່ງຄວາມສາມັກຄີພາກພື້ນ

	ເພີ່ມລະດັບການສະຫນັບສະຫນູນລາຍບ້ວງຈ່າຍບຳລຸງສ້າງສໍາລັບນັກສຶກສາ ລາວ ແລະ ກໍາປູເຈຍ
	ສົມກັບເປັນເສົາຄໍ້າທີ່ສໍາຄັນໃນການພົວພັນສາມັກຄີມິດຕະພາບ, ການຊ່ວຍເຫຼືອເຊິ່ງກັນແລະກັນລະຫວ່າງ ຫວຽດນາມ - ລາວ - ກໍາປູເຈຍ

ຕອນບ່າຍວັນທີ 25 ພະຈິກ, ທີ່ນະຄອນຫຼວງພະນົມເປັນ, ກໍາປູເຈຍ ໄດ້ດໍາເນີນກອງປະຊຸມປະຈໍາປີລັດຖະມົນຕີກະຊວງປ້ອງກັນປະເທດ 3 ປະເທດ ຫວຽດນາມ-ລາວ-ກໍາປູເຈຍ.

ຄະນະຜູ້ແທນຂັ້ນສູງກະຊວງປ້ອງກັນປະເທດຫວຽດນາມ ນໍາໂດຍທ່ານພົນເອກ ຟານວັນຢາງ, ກໍາມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ; ຄະນະຜູ້ແທນຂັ້ນສູງກະຊວງປ້ອງກັນປະເທດລາວ ນໍາໂດຍ ທ່ານພົນເອກ ຈັນສະໝອນ ຈັນຍາລາດ, ກໍາມະການກົມການເມືອງສູນກາງພັກປະຊາຊົນປະຕິວັດລາວ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດລາວ; ຄະນະຜູ້ແທນຂັ້ນສູງກະຊວງປ້ອງກັນປະເທດກໍາປູເຈຍ ນໍາໂດຍທ່ານພົນເອກ Tea Seiha, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດກໍາປູເຈຍ ເຂົ້າຮ່ວມກອງປະຊຸມ.

ການຮ່ວມມືດ້ານປ້ອງກັນຊາດ-ພື້ນຖານຂອງສັນຕິພາບ ແລະພັດທະນາ

ທີ່ກອງປະຊຸມ, ທ່ານພົນເອກ Tea Seiha ເນັ້ນໜັກວ່າ ກອງປະຊຸມປະຈໍາປີລັດຖະມົນຕີກະຊວງປ້ອງກັນປະເທດ 3 ປະເທດແມ່ນໂອກາດ ເພື່ອພ້ອມກັນຕີລາຄາຜົນການຮ່ວມມືດ້ານປ້ອງກັນຊາດລະຫວ່າງ 3 ປະເທດ ໃນໄລຍະຜ່ານມາ, ພ້ອມທັງຢັ້ງຢືນຄືນໃໝ່ຄໍາໝັ້ນສັນຍາອັນໜັກແໜ້ນໃນການເພີ່ມທະວີການພົວພັນມິດຕະພາບທີ່ເປັນມູນເຊື້ອ, ບ້ານໃກ້ເຮືອນຄຽງທີ່ດີ ເຊິ່ງນໍາເອົາຜົນປະໂຫຍດລວມມາໃຫ້ປະຊາຊົນ 3 ປະເທດ. ທ່ານພົນເອກ Tea Seiha ຕີລາຄາສູງການຮ່ວມມືຢ່າງມີປະສິດທິຜົນລະຫວ່າງກອງທັບ 3 ປະເທດ ບົນພື້ນຖານການເຄົາລົບ, ເຊື່ອໝັ້ນເຊິ່ງກັນແລະກັນ, ປະກອບສ່ວນຮັກສາສັນຕິພາບ, ສະຖຽນລະພາບ, ວັດທະນາຖາວອນຢູ່ເຂດຊາຍແດນ ກໍຄື ປະກອບສ່່ວນເຂົ້າໃນການກໍ່ສ້າງປະຊາຄົມອາຊຽນ.

ກອງປະຊຸມປະຈໍາປີລັດຖະມົນຕີກະຊວງປ້ອງກັນປະເທດ 3 ປະເທດ ຫວຽດນາມ-ລາວ-ກໍາປູເຈຍ. ພາບ: TTXVN

ກ່າວຄໍາເຫັນທີ່ກອງປະຊຸມ, ທ່ານພົນເອກ ຟານວັນຢາງ ເນັ້ນໜັກວ່າ ຫວຽດນາມ, ລາວ ແລະກໍາປູເຈຍ ແມ່ນປະເທດບ້ານໃກ້ເຮືອນຄຽງທີ່ສະໜິດສະໜົມ. ບັນດາປັດໄຈທາງດ້ານປະຫວັດສາດ, ທໍາມະຊາດໄດ້ສ້າງທ່າຮ່ວມສໍາພັນອັນໜັກແໜ້ນ, ໝັ້ນແກ່ນຊ່ວຍ 3 ປະເທດ ສາມາດໜູນຊ່ວຍ, ເພີ່ມເຕີມໃຫ້ກັນເພື່ອພ້ອມກັນຄົງຕົວ, ພັດທະນາ ແລະປົກປ້ອງເຊິ່ງກັນ ແລະກັນ. 3 ປະເທດ ເຄີຍມີພັກກອມມູນິດອິນດູຈີນ ນຳພາໃນພາລະກິດຕໍ່ສູ້ຕ້ານພວກລ່າເມືອງຂຶ້ນ, ຈັກກະພັດ, ຍາດເອົາເອກະລາດແຫ່ງຊາດມາໃຫ້ແຕ່ລະປະເທດໃນເມື່ອກ່ອນ. ພຶດຕິກຳຕົວຈິງໄດ້ພິສູດໃຫ້ເຫັນວ່າ ການເພີ່ມທະວີຄວາມສາມັກຄີ, ສະໜິດຕິດພັນລະຫວ່າງ 3 ປະເທດ, 3 ກອງທັບແມ່ນປັດໄຈພາວະວິໄສ, ແມ່ນກົດເກນເປັນຕາຍ ແລະແມ່ນປັດໄຈສໍາຄັນແຖວໜ້າໃນການຮັບປະກັນສັນຕິພາບ, ສະຖຽນລະພາບ ແລະການພັດທະນາຂອງແຕ່ລະປະເທດ. ທ່ານພົນເອກ ຟານວັນຢາງ ຊີ້ແຈ້ງວ່າ, ຫວຽດນາມ ຍາມໃດກໍເຄົາລົບນັບຖືການສະໜັບສະໜູນ, ການຊ່ວຍເຫຼືອຢ່າງໝົດຈິດໝົດໃຈຂອງລາວ ແລະກໍາປູເຈຍ ໃນພາລະກິດຕໍ່ສູ້ປົດປ່ອຍຊາດ, ທ້ອນໂຮມປະເທດຊາດ ເປັນເອກະພາບໃນເມື່ອກ່ອນ, ກໍຄືໃນພາລະກິດສ້າງສາ ແລະປົກປັກຮັກສາປະເທດຊາດໃນປັດຈຸບັນ; ຢັ້ງຢືນວ່າ ຫວຽດນາມ ຍາມໃດກໍສະຫງວນບຸລິມະສິດແຖວໜ້າໃຫ້ແກ່ການເພີ່ມທະວີ, ປັບປຸງການພົວພັນທີ່ໄວ້ເນື້ອເຊື່ອໃຈ, ສະໜິດຕິດພັນກັບລາວ ແລະກໍາປູເຈຍ ຢ່າງບໍ່ຢຸດຢັ້ງ.

ທ່ານພົນເອກ ຈັນສະໝອນ ຈັນຍາລາດ ເນັ້ນໜັກວ່າ ກອງປະຊຸມປະຈໍາປີລະຫວ່າງລັດຖະມົນຕີກະຊວງປ້ອງກັນປະເທດ 3 ປະເທດ ແມ່ນສັນຍາລັກແຫ່ງນໍ້າໃຈສາມັກຄີມິດຕະພາບ ລາວ-ຫວຽດນາມ-ກໍາປູເຈຍ. ພັກ, ລັດຖະບານ, ກອງທັບ ແລະປະຊາຊົນ 3 ປະເທດ ໄດ້ປັບປຸງ, ເພີ່ມພູນຄູນສ້າງນໍ້າໃຈມິດຕະພາບ, ຄວາມສາມັກຄີ ລາວ-ຫວຽດນາມ-ກໍາປູເຈຍ ໃຫ້ນັບມື້ນັບແຕກດອກອອກຜົນຢ່າງບໍ່ຢຸດຢັ້ງ. ທ່ານພົນເອກ ຈັນສະໝອນ ຈັນຍາລາດ ຊີ້ແຈ້ງວ່າ ກອງທັບ 3 ປະເທດແມ່ນກໍາລັງຫຼັກແຫຼ່ງແກ່ນສານໃນການສ້າງສາ, ປົກປັກຮັກສາ ແລະພັດທະນາການພົວພັນມິດຕະພາບ, ຄວາມສາມັກຄີອັນລໍ້າຄ່າລະຫວ່າງ 3 ປະເທດ.

ບັນດາຂໍ້ລີ້ເລີ່ມຊຸກຍູ້ການຮ່ວມມືຮອບດ້ານ

ກໍທີ່ກອງປະຊຸມ, ລັດຖະມົນຕີກະຊວງປ້ອງກັນປະເທດ 3 ປະເທດ ຕີລາຄາວ່າ ພ້ອມກັບການພັດທະນາອັນດີງາມຂອງການພົວພັນ ຫວຽດນາມ-ລາວ-ກໍາປູເຈຍ, ການຮ່ວມມືດ້ານປ້ອງກັນຊາດລະຫວ່າງ 3 ປະເທດ ສືບຕໍ່ບັນລຸໄດ້ໝາກຜົນທີ່ໜ້າເອກອ້າງທະນົງໃຈ, ນັບມື້ນັບແທດຈິງ ແລະມີປະສິດທິຜົນ.

ເພື່ອສືບຕໍ່ເຮັດໃຫ້ການຮ່ວມມືດ້ານປ້ອງກັນຊາດລະຫວ່າງ 3 ປະເທດໃນໄລຍະຈະມາເຖິງເລິກເຊິ່ງຂຶ້ນຕື່ມ, ລັດຖະມົນຕີກະຊວງປ້ອງກັນປະເທດ 3 ປະເທດ ເຫັນດີເປັນເອກະພາບຕໍ່ບັນດາເນື້ອໃນຮ່ວມມືທີ່ແທດຈິງ. ທີໜຶ່ງ, ຮັກສາກົນໄກກອງປະຊຸມປະຈໍາປີລະຫວ່າງ 3 ລັດຖະມົນຕີກະຊວງປ້ອງກັນປະເທດຢ່າງມີປະສິດທິຜົນ, ກໍານົດວ່າ ນີ້ແມ່ນໜຶ່ງໃນບັນດາການເຄື່ອນໄຫວຈຸດສຸມໃນແຜນການຮ່ວມມືດ້ານປ້ອງກັນຊາດແຕ່ລະປີລະຫວ່າງ 3 ປະເທດ ເພື່ອແບ່ງປັນບັນດາບັນຫາຍຸດທະສາດ, ສົມທົບກັນເປັນເສນາທິການໃຫ້ການນໍາຂັ້ນສູງ 3 ປະເທດ ກ່ຽວກັບການທະຫານ, ການປ້ອງກັນຊາດ; ຈັດຕັ້ງການຫັດແອບ, ຝຶກຊ້ອມຮ່ວມກັນແຕ່ລະປີລະຫວ່າງກອງທັບ 3 ປະເທດ ເພື່ອຮັບມືກັບສິ່ງທ້າທາຍຄວາມໝັ້ນຄົງບໍ່ແມ່ນທາງການທະຫານ, ຄື: ສະກັດກັ້ນ ແລະຕ້ານໂລກລະບາດ, ກອບກູ້ໄພພິບັດ, ສະກັດກັ້ນ ແລະຕ້ານອາດຊະຍາກໍາຂ້າມຊາຍແດນ...

ທີສອງ, ເພີ່ມທະວີການສົມທົບກັນໂຄສະນາ, ສຶກສາອົບຮົມກ່ຽວກັບປະຫວັດສາດ, ຄວາມໝາຍ, ຄວາມສໍາຄັນຂອງການພົວພັນສາມັກຄີລະຫວ່າງ 3 ປະເທດ, 3 ຊາດ; ຕອບໂຕ້ຖ້ອຍທໍານອງທີ່ບິດເບືອນ, ເລ່ລ່ຽມຕ້ານທໍາລາຍການພົວພັນ 3 ປະເທດຂອງອິດທິກໍາລັງປໍລະປັກ ຢ່າງມີປະສິດທິຜົນ. ທີສາມ, ສືບຕໍ່ເພີ່ມທະວີການຮ່ວມມືຄຸ້ມຄອງ, ປົກປັກຮັກສາຊາຍແດນ, ປະກອບສ່ວນຫັນວິໄສທັດຂອງການນໍາຂັ້ນສູງ 3 ປະເທດ ກ່ຽວກັບເຂດຊາຍແດນ 3 ປະເທດ ແຫ່ງສັນຕິພາບ, ຮ່ວມມື ແລະພັດທະນາແບບຍືນຍົງໃຫ້ປະກົດຜົນເປັນຈິງ; ແບ່ງປັນຂໍ້ມູນຂ່າວສານ, ສະພາບການ, ເພີ່ມທະວີການລາດຕະເວນຮ່ວມເປັນປະຈໍາ, ຄົ້ນພົບ ແລະສົມທົບກັນແກ້ໄຂບັນດາບັນຫາທີ່ເກີດຂຶ້ນຢູ່ຮາກຖານຢ່າງທັນການ ແລະມີປະສິດທິຜົນ, ຕໍ່ສູ້ກັບອາດຊະຍາກໍາຂ້າມຊາຍແດນປະເພດຕ່າງໆຢ່າງມີປະສິດທິຜົນ; ສ້າງເງື່ອນໄຂສະດວກໃຫ້ແກ່ປະຊາຊົນຢູ່ເຂດຊາຍແດນພັດທະນາເສດຖະກິດ. ທີສີ່, ສືບຕໍ່ປຶກສາຫາລື, ສະໜັບສະໜູນເຊິ່ງກັນແລະກັນທີ່ເວທີປາໄສຫຼາຍຝ່າຍສາກົນ ແລະພາກພື້ນ, ໂດຍສະເພາະແມ່ນບັນດາກົນໄກໃນອາຊຽນ, ຄື: ກອງປະຊຸມລັດຖະມົນຕີປ້ອງກັນປະເທດອາຊຽນ (ADMM), ກອງປະຊຸມລັດຖະມົນຕີປ້ອງກັນປະເທດອາຊຽນ ບວກ (ADMM+), ຜ່ານນັ້ນຍົກສູງຖານະບົດບາດ, ທີ່ຕັ້ງຂອງແຕ່ລະປະເທດ, ປະກອບສ່ວນສໍາຄັນເຂົ້າໃນຄວາມສາມັກຄີ ແລະບົດບາດໃຈກາງຂອງ ອາຊຽນ.

ພົນເອກ ຟານວັນຢາງ, ພົນເອກ ຈັນສະໝອນ ຈັນຍາລາດ ແລະພົນເອກ Tea Seiha ທີ່ພິທີລົງນາມບົດບັນທຶກກອງປະຊຸມປະຈໍາປີລະຫວ່າງລັດຖະມົນຕີກະຊວງປ້ອງກັນປະເທດ ຫວຽດນາມ-ລາວ-ກໍາປູເຈຍ. ພາບ: TTXVN

ທ່ານພົນເອກ ຟານວັນຢາງ ເນັ້ນໜັກວ່າ ໃນເດືອນທັນວາ ຈະມາເຖິງນີ້, ກະຊວງປ້ອງກັນປະເທດຫວຽດນາມ ຈະຈັດຕັ້ງພິທີສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ, 35 ປີແຫ່ງວັນບຸນປ້ອງກັນຊາດທົ່ວປວງຊົນ ແລະງານວາງສະແດງປ້ອງກັນຊາດສາກົນຫວຽດນາມ ຄັ້ງທີສອງຢູ່ຮ່າໂນ້ຍ. ທ່ານພົນເອກ ຟານວັນຢາງ ຂອບໃຈທ່ານພົນເອກ ຈັນສະໝອນ ຈັນຍາລາດ ແລະທ່ານພົນເອກ Tea Seiha ທີ່ຕອບຮັບຄໍາເຊີນເຂົ້າຮ່ວມພິທີສະເຫຼີມສະຫຼອງ ແລະງານວາງສະແດງ; ສະແດງຄວາມລໍຄອຍຕ້ອນຮັບທ່ານພົນເອກ ຈັນສະໝອນ ຈັນຍາລາດ ແລະທ່ານພົນເອກ Tea Seiha ພ້ອມດ້ວຍຄະນະຜູ້ແທນຂັ້ນສູງກະຊວງປ້ອງກັນປະເທດ, ກອງທັບລາວ ແລະ ກໍາປູເຈຍ ກໍຄື ວິສາຫະກິດປ້ອງກັນຊາດສອງປະເທດ ຢູ່ງານວາງສະແດງ.

ໃນວັນດຽວກັນ, ທ່ານພົນເອກ ຟານວັນຢາງ ແລະຄະນະຜູ້ແທນຂັ້ນສູງຫວຽດນາມ ໄດ້ໄປຢ້ຽມຢາມໂຮງຮຽນມັດທະຍົມຕອນປາຍ Tep Pronom. ນະທີ່ນີ້, ທ່ານພົນເອກ ຟານວັນຢາງ ໄດ້ຕາງໜ້າກະຊວງປ້ອງກັນປະເທດຫວຽດນາມ ມອບຄອມພິວເຕີ 30 ຊຸດ ໃຫ້ໂຮງຮຽນ ເພື່ອຮັບໃຊ້ວຽກງານສິດສອນ, ຮໍ່າຮຽນ.

ສານກ່ຽວກັບນໍ້າໃຈສາມັກຄີມິດຕະພາບ, ການຊ່ວຍເຫຼືອເຊິ່ງກັນແລະກັນລະຫວ່າງ ຫວຽດນາມ - ລາວ - ກໍາປູເຈຍ: ນໍາການຮ່ວມມືລະຫວ່າງກອງທັບ ຫວຽດນາມ-ລາວ-ກໍາປູເຈຍ ຂຶ້ນສູ່ລະດັບສູງໃໝ່ ຍສໝ - ໂດຍແມ່ນສາມປະເທດບ້ານໃກ້ເຮືອນຄຽງທີ່ສະໜິດສະໜົມ, ຫວຽດນາມ, ລາວ ແລະກໍາປູເຈຍ ມີການພົວພັນມິດຕະພາບທີ່ເປັນມູນເຊື້ອ, ມີຄວາມສະໜິດຕິດພັນກັນມາແຕ່ບູຮານນະການ.

ຫວຽດນາມ - ລາວ - ກໍາປູເຈຍ ຈັດການຝຶກຊ້ອມການແພດທະຫານຮ່ວມ ຍສໝ - ເພື່ອເປັນເຈົ້າການຮັບມືກັບໄພທຳມະຊາດ, ໄພພິບັດ; ປະຕິບັດຕາມການຊີ້ນຳຂອງລັດຖະມົນຕີກະຊວງປ້ອງກັນປະເທດ 3 ປະເທດ ຫວຽດນາມ - ລາວ - ກໍາປູເຈຍ, ກຳລັງການແພດທະຫານຂອງ 3 ປະເທດໄດ້ຈັດຕັ້ງການຝຶກຊ້ອມຮ່ວມ, ສົມທົບກັບກຳລັງການແພດທ້ອງຖິ່ນເພື່ອປິ່ນປົວຜູ້ປະສົບເຄາະຮ້າຍຈາກໄພພິບັດແຜ່ນດິນໄຫວແນໃສ່ຍົກລະດັບການຈັດຕັ້ງ, ການປະສານງານ, ການສົມທົບ ແລະກຽມພ້ອມເຂົ້າຮ່ວມການກູ້ຊ່ວຍດ້ານການແພດໃນພາກພື້ນ ແລະໂລກເມື່ອມີຄວາມຮຽກຮ້ອງຕ້ອງການ.