ຫວຽດນາມ-ກໍາປູເຈຍ ເພີ່ມທະວີການຮ່ວມມືດ້ານປ້ອງກັນຊາດ

	ຫວຽດນາມ - ລາວ - ກໍາປູເຈຍ ຈັດການຝຶກຊ້ອມການແພດທະຫານຮ່ວມ
	ຫວຽດນາມ-ມາເລເຊຍ ເພີ່ມທະວີການຮ່ວມມືດ້ານປ້ອງກັນຊາດ

ທ່ານພົນເອກ ຟານວັນຢາງ ສະແດງຄວາມປິຕິຊົມຊື່ນເມື່ອໄດ້ຢ້ຽມຢາມກໍາປູເຈຍ ຢ່າງເປັນທາງການ, ເຂົ້າຮ່ວມການພົບປະລະຫວ່າງ 3 ລັດຖະມົນຕີກະຊວງປ້ອງກັນປະເທດ ຫວຽດນາມ-ລາວ-ກໍາປູເຈຍ ແລະຊົມການຝຶກຊ້ອມກອບກູ້ໄພພິບັດຮ່ວມລະຫວ່າງກອງທັບ 3 ປະເທດ ຫວຽດນາມ-ລາວ-ກໍາປູເຈຍ; ເຊື່ອໝັ້ນວ່າ ບັນດາເຫດການນີ້ຈະປະສົບຜົນສໍາເລັດຢ່າງຈົບງາມ, ປະກອບສ່ວນສືບຕໍ່ເຮັດໃຫ້ການພົວພັນສາມັກຄີ, ສະໜິດຕິດພັນລະຫວ່າງ ສາມປະເທດ ເວົ້າລວມ, ເວົ້າສະເພາະແມ່ນກອງທັບສາມປະເທດ ເລິກເຊິ່ງຂຶ້ນຕື່ມ.

ທ່ານພົນເອກ ຟານວັນຢາງ ເນັ້ນໜັກວ່າ ຫວຽດນາມ ຍາມໃດກໍຖືເປັນສໍາຄັນ, ສະຫງວນບຸລິມະສິດແຖວໜ້າໃຫ້ແກ່ການປັບປຸງ ແລະພັດທະນາການພົວພັນບ້ານໃກ້ເຮືອນຄຽງອັນດີງາມ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ຍືນຍົງຍາວນານກັບກໍາປູເຈຍ ຢ່າງບໍ່ຢຸດຢັ້ງ; ສະໜັບສະໜູນປະເທດ ກໍາປູເຈຍ ເອກະລາດ, ສັນຕິພາບ, ພັດທະນາວັດທະນາຖາວອນ ແລະນັບມື້ນັບສວມບົດບາດອັນໃຫຍ່ຫຼວງຂຶ້ນຕື່ມໃນເວທີສາກົນ.

ບັນຍາກາດທີ່ການພົບປະເຈລະຈາ. ພາບ: nhandan.vn

ສ່ວນທ່ານພົນເອກ Tea Seiha ສະແດງຄວາມຍິນດີຕ້ອນຮັບທ່ານພົນເອກ ຟານວັນຢາງ ທີ່ດຳເນີນການຢ້ຽມຢາມກໍາປູເຈຍ ຢ່າງເປັນທາງການ, ເຂົ້າຮ່ວມການພົບປະລະຫວ່າງ 3 ລັດຖະມົນຕີກະຊວງປ້ອງກັນປະເທດ ຫວຽດນາມ-ລາວ-ກໍາປູເຈຍ ແລະຊົມການຝຶກຊ້ອມກອບກູ້ໄພພິບັດຮ່ວມລະຫວ່າງກອງທັບ 3 ປະເທດ ຫວຽດນາມ-ລາວ-ກໍາປູເຈຍ. ທ່ານພົນເອກ Tea Seiha ຂອບໃຈກອງທັບປະຊາຊົນຫວຽດນາມ ທີ່ໄດ້ໜູນຊ່ວຍກໍ່ສ້າງກອງທັບແຫ່ງລາຊະອານາຈັກ ກໍາປູເຈຍ ພັດທະນາຄືໃນປັດຈຸບັນ; ຢັ້ງຢືນວ່າ ຈະສືບຕໍ່ສືບທອດ, ເສີມຂະຫຍາຍບັນດາໝາກຜົນທີ່ການນໍາຮຸ່ນກ່ອນ ໄດ້ເພີ່ມພູນຄູນສ້າງໃຫ້ແກ່ການພົວພັນລະຫວ່າງສອງປະເທດ, ສອງກອງທັບ.

ທີ່ການພົບປະສອງຝ່າຍ, ທ່ານພົນເອກ ຟານວັນຢາງ ແລະທ່ານພົນເອກ Tea Seiha ສະແດງຄວາມປິຕິຊົມຊື່ນເມື່ອເຫັນວ່າ ການພົວພັນດ້ານປ້ອງກັນຊາດສອງຝ່າຍ ນັບມື້ນັບພັດທະນາອັນດີງາມ. ບັນດາຂົງເຂດໃນອະນຸສັນຍາວ່າດ້ວຍການຮ່ວມມືດ້ານປ້ອງກັນຊາດ ໄລຍະ 2020-2024 ໄດ້ຜັນຂະຫຍາຍ ຢ່າງມີປະສິດທິຜົນ. ການແລກປ່ຽນຄະນະຜູ້ແທນທຸກຂັ້ນ, ໂດຍສະເພາະແມ່ນ ຂັ້ນສູງ ໄດ້ຖືເປັນສໍາຄັນ; ບັນດາຮູບການ, ກົນໄກຮ່ວມມືນັບມື້ນັບອຸດົມສົມບູນຂຶ້ນກວ່າເກົ່າ, ມີປະສິດທິຜົນແທດຈິງກວ່າ. ການຮ່ວມມືຄຸ້ມຄອງ, ປົກປັກຮັກສາຊາຍແດນທາງບົກ, ໃນທະເລຢ່າງມີປະສິດທິຜົນ, ປະກອບສ່ວນສໍາຄັນເຂົ້າໃນການປັບປຸງປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍຢູ່ເຂດຊາຍແດນສອງປະເທດ. ການຮ່ວມມືກໍ່ສ້າງ, ຊອກຄົ້ນ, ທ້ອນໂຮມ, ຈັດສົ່ງອັດຖິທະຫານອາສາສະໝັກ ແລະຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມຢູ່ກໍາປູເຈຍ ກັບຄືນປະ ເທດ... ສືບຕໍ່ໄດ້ຮັບການຊຸກຍູ້ ແລະບັນລຸໝາກຜົນແທດຈິງຫຼາຍຢ່າງ. ສອງຝ່າຍໄດ້ສົມທົບກັນຢ່າງແໜ້ນແຟ້ນ, ສະໜັບສະໜູນເຊິ່ງກັນແລະກັນທີ່ເວທີປາໄສຫຼາຍຝ່າຍ ແລະບັນດາເຫດການສາກົນ ໂດຍແຕ່ລະຝ່າຍ ຈັດຕັ້ງ, ໂດຍສະເພາະແມ່ນໃນປີປະທານອາຊຽນ 2020 ຂອງຫວຽດນາມ ແລະປີປະທານອາຊຽນ 2022 ຂອງກໍາປູເຈຍ.

ໃນໄລຍະຈະມາເຖິງ, ສອງຝ່າຍເຫັນດີເປັນເອກະພາບນໍາການຮ່ວມມືດ້ານປ້ອງກັນຊາດສອງຝ່າຍ ໃຫ້ນັບມື້ນັບເຂົ້າສູ່ລວງເລິກ, ມີປະສິດທິຜົນ, ແທດຈິງ, ສືບຕໍ່ປັບປຸງຖານະບົດບາດ, ທີ່ຕັ້ງແມ່ນໜຶ່ງໃນບັນດາເສົາຄໍ້າສໍາຄັນໃນການພົວພັນ ຫວຽດນາມ-ກໍາປູເຈຍ. ໃນນັ້ນສຸມໃສ່ເຂົ້າໃນບັນດາຂົງເຂດ: ຮັກສາການພົບປະຂັ້ນສູງ ແລະບັນດາກົນໄກຮ່ວມມືທີ່ມີໃນປັດຈຸບັນ; ເພີ່ມທະວີການຮ່ວມມືໃນຂົງເຂດການເມືອງ, ແນວຄິດ, ຍູ້ແຮງການໂຄສະນາເຜີບແຜ່, ສຶກສາອົບຮົມກ່ຽວກັບປະຫວັດສາດ, ຄວາມໝາຍ, ຄວາມສໍາຄັນຂອງການພົວພັນສາມັກຄີ ຫວຽດນາມ-ກໍາປູເຈຍ; ເພີ່ມທະວີການຮ່ວມມືຄຸ້ມຄອງ, ປົກປັກຮັກສາຊາຍແດນທາງບົກ, ໃນທະເລ; ແບ່ງປັນຂໍ້ມູນຂ່າວສານ, ສະພາບການ, ເພີ່ມທະວີການລາດຕະເວນຮ່ວມເປັນປົກກະຕິ, ຄົ້ນພົບຢ່າງທັນການ ແລະສົມທົບກັນແກ້ໄຂບັນຫາທີ່ເກີດຂຶຶ້ນຈາກຮາກຖານ ຢ່າງມີປະສິດທິຜົນ, ຕໍ່ສູ້ກັບອາດຊະຍາກໍາຂ້າມຊາຍແດນປະເພດຕ່າງໆຢ່າງມີປະສິດທິຜົນ; ສ້າງເງື່ອນໄຂສະດວກໃຫ້ແກ່ປະຊາຊົນທີ່ຢູ່ສອງ ຟາກຊາຍແດນ ແລະຊາວປະມົງ ພັດທະນາເສດຖະກິດ; ຍົກສູງປະສິດທິຜົນ, ຄຸນນະພາບການກໍ່ສ້າງຊັບພະຍາກອນມະນຸດ; ສືບຕໍ່ສະໜັບສະໜູນເຊິ່ງກັນ ແລະກັນໃນບັນດາບັນຫາສາກົນ, ພາກພື້ນ, ປະກອບສ່ວນສໍາຄັນເຂົ້າໃນ ຄວາມສາມັກຄີ ແລະບົດບາດໃຈກາງຂອງອາຊຽນ...

ທ່ານພົນເອກ ຟານວັນຢາງ ແລະທ່ານພົນເອກ Tea Seiha ທີ່ພິທີລົງນາມ. ພາບ: nhandan.vn

ສິ້ນສຸດການພົບປະສອງຝ່າຍ, ທ່ານພົນເອກ ຟານວັນຢາງ ແລະທ່ານພົນເອກ Tea Seiha ໄດ້ເຊັນອະນຸສັນຍາວ່າດ້ວຍການຮ່ວມມືດ້ານປ້ອງກັນຊາດ ໄລຍະ 2025-2029 ແລະແຜນການຮ່ວມມື ປີ 2025 ລະຫວ່າງສອງກະຊວງປ້ອງກັນປະເທດ.

ຕອນບ່າຍວັນດຽວກັນ, ທ່ານພົນເອກ ຟານວັນຢາງ ໄດ້ເຂົ້າຢ້ຽມຂໍ່ານັບທ່ານ Hun Manet ນາຍົກລັດຖະມົນຕີກຳປູເຈຍ ເນື່ອງໃນໂອກາດນຳໜ້າຄະນະຜູ້ແທນຂັ້ນສູງກະຊວງປ້ອງກັນປະເທດຫວຽດນາມ ຢ້ຽມຢາມກຳປູເຈຍ ຢ່າງເປັນທາງການ, ເຂົ້າຮ່ວມການພົບປະລະຫວ່າງ 3 ລັດຖະມົນຕີກະຊວງປ້ອງກັນປະເທດຫວຽດນາມ - ລາວ - ກຳປູເຈຍ ແລະເປັນສັກຂີພິຍານການຝຶກຊ້ອມກູ້ໄພພິບັດຮ່ວມລະຫວ່າງກອງທັບ 3 ປະເທດ ຫວຽດນາມ-ລາວ-ກຳປູເຈຍ.

ທ່ານພົນເອກ ຟານວັນຢາງ ຊົມເຊີຍ ກຳປູເຈຍ ບັນລຸໄດ້ຜົນງານອັນໃຫຍ່ຫຼວງ, ຮອບດ້ານພາຍໃຕ້ການນຳພາຂອງພັກປະຊາຊົນກຳປູເຈຍ (CPP) ໃນຕະຫຼອດໄລຍະ 70 ປີຜ່ານມາ; ສະແດງຄວາມເຊື່ອໝັ້ນວ່າ ພາຍໃຕ້ການນຳພາຂອງພັກປະຊາຊົນກຳປູເຈຍ, ປະເທດກໍາປູເຈຍ ຈະບັນລຸໄດ້ຜົນງານອັນໃຫຍ່ຫຼວງກວ່າອີກໃນໄລຍະຈະມາເຖິງ. ທ່ານພົນເອກ ຟານວັນຢາງ ຢືນຢັນວ່າ ຫວຽດນາມ ຍາມໃດກໍ່ຖືເປັນສໍາຄັນ ແລະໃຫ້ບຸລິມະສິດສູງສຸດແກ່ການປັບປຸງ ແລະພັດທະນາການພົວພັນຖານບ້ານໃກ້ເຮືອນຄຽງອັນດີງາມ, ນໍ້າໃຈມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ ແລະຍືນຍົງຍາວນານກັບກໍາປູເຈຍ; ຍາມໃດກໍ່ໃຫ້ການສະໜັບສະໜູນສູງສຸດແກ່ພັກປະຊາຊົນກໍາປູເຈຍ, ສະໜັບສະໜູນປະເທດກຳປູເຈຍ ເປັນເອກະລາດ, ສັນຕິພາບ, ພັດທະນາ ແລະນັບມື້ນັບສວມບົດບາດອັນໃຫຍ່ຫຼວງໃນເວທີສາກົນ.

ທ່ານພົນເອກ ຟານວັນຢາງ ເຂົ້າຢ້ຽມຂໍ່ານັບທ່ານ Hun Manet ນາຍົກລັດຖະມົນຕີກໍາປູເຈຍ. ພາບ: qdnd.vn

ທ່ານ Hun Manet ຊົມເຊີຍຜົນງານສຳຄັນທີ່ຫວຽດນາມ ບັນລຸໄດ້; ເຊື່ອໝັ້ນວ່າ ພາຍໃຕ້ການນຳພາຂອງພັກກອມມູນິດຫວຽດນາມ, ຫວຽດນາມ ສືບຕໍ່ໄດ້ຮັບຜົນງານໃໝ່ ແລະໃຫຍ່ຫຼວງກວ່າອີກ, ນັບມື້ນັບພັດທະນາວັດທະນາຖາວອນ. ທ່ານນາຍົກລັດຖະມົນຕີ Hun Manet ຕີລາຄາສູງການພົວພັນລະຫວ່າງກຳປູເຈຍ ກັບຫວຽດນາມ ນັບມື້ນັບໄດ້ຮັບການປັບປຸງ ແລະພັດທະນາໃນທຸກຂົງເຂດ, ນຳມາເຊິ່ງຜົນປະໂຫຍດໃຫ້ແກ່ປະຊາຊົນແຕ່ລະປະເທດ, ປະກອບສ່ວນເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະພັດທະນາຢູ່ພາກພື້ນ ແລະໃນໂລກ; ທ່ານ Hun Manet ຂອບໃຈຝ່າຍຫວຽດນາມ ຍາມໃດກໍສະໜັບສະໜູນ ແລະຊ່ວຍເຫຼືອກຳປູເຈຍ ໃນພາລະກິດຕໍ່ສູ້ປົດປ່ອຍຊາດ, ກູ້ຊ່ວຍປະຊາຊົນກຳປູເຈຍ ຫຼຸດພົ້ນອອກຈາກລະບອບດັບສູນເຊື້ອຊາດໃນເມື່ອກ່ອນ ແລະໃນກິດຈະການສ້າງສາ ແລະພັດທະນາປະເທດໃນປະຈຸບັນ; ຢັ້ງຢືນວ່າ ກໍາປູເຈຍ ຈະພ້ອມກັບຫວຽດນາມ ປົກປັກຮັກສາ, ເພີ່ມພູນຄູນສ້າງສາຍພົວພັນລະຫວ່າງສອງປະເທດໃຫ້ນັບມື້ນັບພັດທະນາຂຶ້ນສູ່ລະດັບສູງໃໝ່ ແລະຖ່າຍທອດໃຫ້ຄົນລຸ້ນຕໍ່ໄປ.

ຊົມເຊີຍໝາກຜົນການພົບປະສອງຝ່າຍລະຫວ່າງທ່ານພົນເອກ ຟານວັນຢາງ ກັບທ່ານພົນເອກ Tea Seiha ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດກຳປູເຈຍ, ທ່ານ Hun Manet ເນັ້ນໜັກວ່າ ການຮ່ວມມືດ້ານປ້ອງກັນຊາດລະຫວ່າງກຳປູເຈຍ - ຫວຽດນາມ ນັບມື້ນັບເຂົ້າສູ່ລວງເລິກ, ມີປະສິດທິຜົນ, ແທດຈິງ. ທ່ານ Hun Manet ຢືນຢັນວ່າ ກຳປູເຈຍ ຖືເປັນສຳຄັນການຊຸກຍູ້ການຮ່ວມມືດ້ານປ້ອງກັນຊາດກັບຫວຽດນາມ.

ຕອນບ່າຍວັນທີ 24 ພະຈິກ, ຢູ່ນະຄອນຫຼວງພະນົມເປັນ, ທ່ານພົນເອກ ຟານວັນຢາງ ພ້ອມດ້ວຍຄະນະຜູ້ແທນຂັ້ນສູງກະຊວງປ້ອງກັນປະເທດຫວຽດນາມ ໄດ້ໄປຢ້ຽມຢາມທະນາຄານການຄ້າຫຸ້ນສ່ວນກອງທັບ (MB) ກຳປູເຈຍ.

ນະທີ່ນີ້, ທ່ານພົນເອກ ຟານວັນຢາງ ໄດ້ຊົມເຊີຍ ແລະຕີລາຄາສູງຄວາມມານະພະຍາຍາມຢ່າງບໍ່ຢຸດຢັ້ງ ພ້ອມກັບຜົນງານທີ່ສຳຄັນເຊິ່ງທະນາຄານ MB ກຳປູເຈຍ ບັນລຸໄດ້ໃນໄລຍະຜ່ານມາ, ສະເໜີວ່າໃນໄລຍະຈະມາເຖິງ, ທະນາຄານ MB ກຳປູເຈຍ ຈະສືບຕໍ່ຮັກສາຈິດໃຈສາມັກຄີ, ເປັນເອກະພາບລະຫວ່າງພະນັກງານ, ພາລະກອນ, ທັງຊາວກຳປູເຈຍ ແລະຊາວຫວຽດນາມ. ເບິ່ງແຍງດູແລເຖິງວຽກງານບໍາລຸງກໍ່ສ້າງຖັນແຖວຊັບພະຍາກອນມະນຸດໃຫ້ມີພູມປັນຍາ, ຄຸນທາດການເມືອງອັນໜັກແໜ້ນ, ມີຄວາມສາມາດໃນການຄົ້ນຄວ້າ, ໝູນໃຊ້ ແລະເປັນເຈົ້າຂອງວິທະຍາສາດ-ເຕັກໂນໂລຢີ; ເອົາໃຈໃສ່ເຖິງຊີວິດການເປັນຢູ່ຂອງພະນັກງານ-ພາລະກອນຢ່າງບໍ່ຢຸດຢັ້ງ ເພື່ອເສີມຂະຫຍາຍກໍາລັງພາຍໃນດ້ານມະນຸດ, ເປັນປະຖົມປັດໄຈໃຫ້ການເຕີບໂຕ ແລະການພັດທະນາແບບຍືນຍົງ.

ທະນາຄານ MB ກໍາປູເຈຍ ຕ້ອງກວດກາຄືນຍຸດທະສາດດໍາເນີນທຸລະກິດຢ່າງເປັນປະຈໍາ ເພື່ອປັບຕົວກັບສະພາບການໃໝ່ຢ່າງວ່ອງໄວ; ສືບຕໍ່ປະຕິບັດບັນດາໂຄງການຮັບປະກັນຊີວິດສັງຄົມ, ປະກອບສ່ວນຫຼາຍກວ່າອີກໃຫ້ແກ່ວົງຄະນະຍາດ; ສືບຕໍ່ສະໜິດຕິິດພັນ, ສົມທົບກັບບັນດາກົມກອງ, ວິສາຫະກິດກອງທັບຫວຽດນາມ ປະຈຳ ກຳປູເຈຍ ເພື່ອເຜີຍແຜ່ຄຸນຄ່າວັດທະນະທຳວິສາຫະກິດ; ເຄົາລົບກົດໝາຍ ແລະສ້າງຄວາມໄວ້ເນື້ອເຊື່ອໃຈຕໍ່ກັບລັດຖະບານ, ກອງທັບ ແລະປະຊາຊົນກຳປູເຈຍ.

ກ່ອນໜ້ານັ້ນ, ຕອນເຊົ້າວັນດຽວກັນ, ທ່ານພົນເອກ ຟານວັນຢາງ ແລະຄະນະຜູ້ແທນຂັ້ນສູງກະຊວງປ້ອງກັນປະເທດຫວຽດນາມ ໄດ້ໄປຖະຫວາຍທູບທຽນ, ວາງພວງມາລາ ຢູ່ອະນຸສາວະລີມິດຕະພາບ ຫວຽດນາມ-ກໍາປູເຈຍ ຢູ່ນະຄອນຫຼວງພະນົມເປັນ.

ສົມກັບເປັນເສົາຄໍ້າທີ່ສໍາຄັນໃນການພົວພັນສາມັກຄີມິດຕະພາບ, ການຊ່ວຍເຫຼືອເຊິ່ງກັນແລະກັນລະຫວ່າງ ຫວຽດນາມ - ລາວ - ກໍາປູເຈຍ ຍສໝ - ໃນການພົວພັນ ຫວຽດນາມ-ລາວ, ຫວຽດນາມ-ກໍາປູເຈຍ ໃນຫຼາຍທົດສະວັດຜ່ານມາ, ການຮ່ວມມືດ້ານປ້ອງກັນຊາດ ນັບມື້ນັບເຂົ້າສູ່ລວງເລິກ, ມີປະສິດທິຜົນ ແລະແທດຈິງ, ສົມເປັນໜຶ່ງໃນບັນດາເສົາຄໍ້າສໍາຄັນຢ່າງແທ້ຈິງ.

ສານກ່ຽວກັບນໍ້າໃຈສາມັກຄີມິດຕະພາບ, ການຊ່ວຍເຫຼືອເຊິ່ງກັນແລະກັນລະຫວ່າງ ຫວຽດນາມ - ລາວ - ກໍາປູເຈຍ: ນໍາການຮ່ວມມືລະຫວ່າງກອງທັບ ຫວຽດນາມ-ລາວ-ກໍາປູເຈຍ ຂຶ້ນສູ່ລະດັບສູງໃໝ່ ຍສໝ - ໂດຍແມ່ນສາມປະເທດບ້ານໃກ້ເຮືອນຄຽງທີ່ສະໜິດສະໜົມ, ຫວຽດນາມ, ລາວ ແລະກໍາປູເຈຍ ມີການພົວພັນມິດຕະພາບທີ່ເປັນມູນເຊື້ອ, ມີຄວາມສະໜິດຕິດພັນກັນມາແຕ່ບູຮານນະການ.