 | ທ່ານນາຍົກລັດຖະມົນຕີ ຫວຽດນາມ: ນຳແຂວງ ຢຸນໜານ ແລະ ແຂວງ ລາວກາຍ ກາຍເປັນສູນເຊື່ອມຕໍ່ການຄ້າລະຫວ່າງຈີນ ກັບ ອາຊຽນ |
| ໂຄສະນາ ແລະເຜີຍແຜ່ພາບພົດຂອງປະເທດຊາດ, ວັດທະນະທຳ ແລະ ປະຊາຊົນ ຫວຽດນາມ ຢູ່ ອາເມລິກາ |
ງານບຸນແລກປ່ຽນວັດທະນະທຳ ອາຊີ ໄດ້ດຳເນີນຢູ່ເຂດປົກຄອງພິເສດ ຮົງກົ່ງ (ຈີນ) ໂດຍກົມທ່ອງທ່ຽວ ກົມວັດທະນະທຳ ແລະ ການບັນເທິງ ຮົງກົ່ງ ສົມທົບກັບສະຖານກົງສຸນໃຫຍ່ປະເທດຕ່າໆ ແລະ ບັນດາອົງການວັດທະນະທຳຕ່າງປະເທດ ຈັດຕັ້ງຢູ່ ຮົງກົ່ງ. ກິດຈະກຳດັ່ງກ່າວ ເພື່ອແນໃສ່ສ້າງສະໜາມຫຼິ້ນໃຫ້ແກ່ບັນດາປະເທດ ອາຊຽນ ເຊິ່ງສະແດງສີສັນຂອງຕົນໂດຍຜ່ານດົນຕີພື້ນເມືອງ, ບັນດາການຟ້ອນ, ຊຸດອາພອນ, ຫັດຖະກຳ...
 |
| ຮ້ານວາງສະແດງຂອງ ຫວຽດນາມ ທີ່ງານບຸນແລກປ່ຽນວັດທະນະທຳ ອາຊີ ທີ່ດຳເນີນຢູ່ເຂດປົກຄອງພິເສດ ຮົງກົ່ງ (ຈີນ). (ພາບ: TTXVN) |
ເຫດການ ໄດ້ດຶງດູດການເຂົ້າຮ່ວມຂອງບັນດາຄະນະຈາກ 23 ປະເທດ ແລະ ເຂດແຄວ້ນໃນພາກພື້ນຄື ຫວຽດນາມ, ລາວ, ກຳປູເຈຍ, ສ.ເກົາຫຼີ, ມົງໂກລີ, ປາກີສະຖານ, ລັດເຊຍ... ເຂົ້າຮ່ວມງານບຸນ, ນັກທ່ອງທ່ຽວ ໄດ້ຊົມການວາງສະແດງຊຸດອາພອນປະຈຳຊາດຂອງປະຊາຊົນທົ່ວ ອາຊີ ໃນບັນດາງານບຸນ, ການສະແດງການຟ້ອນລຳ ແລະ ບັນດາໂອກາດຕ່າງໆຕະຫຼອດປີ.
ຕາງໜ້າໃຫ້ ຫວຽດນາມ, ທີມຟ້ອນຂອງຊຸມຊົນຊາວ ຫວຽດນາມ ຢູ່ ຮົງກົ່ງ ໄດ້ນຳມາທີ່ລາຍການແລກປ່ຽນວັດທະນະທຳບັນດາຊົນເຜົ່າມີຫຼາຍການສະແດງທີ່ເປັນເອກະລັກສະເພາະ ພ້ອມກັບບັນດາບົດເພງພື້ນເມືອງອາລົມຈິດ ເຂັ້ມໄປດ້ວຍສີສັນວັດທະນະທຳພື້ນເມືອງຂອງຊາດ ຫວຽດນາມ. ບັນດາການສະແດງໄດ້ຮັບການຊົມເຊີຍຢ່າງກະຕືລືລົ້ນຈາກຜູ້ຊົມ ແລະ ເພື່ອນມິດສາກົນກໍ່ໄດ້ຍ້ອງຍໍ ແລະ ຕີລາຄາສູງ.
ນອກຈາກສະແດງສິລະປະ, ກົງສຸນໃຫຍ່ ຫວຽດນາມ ປະຈໍາ ຮົງກົ່ງ ແລະ ມາກາວ ກໍ່ມີຮ້ານແນະນຳວາງສະແດງບັນດາຜະລິດຕະພັນພິເສດຂອງ ຫວຽດນາມ ເຊັ່ນ ກາເຟ, ໝາກມ່ວງຫິມະພານ ແລະ ປື້ມຫຼາຍຫົວທີ່ເກັບກຳບັນດາບົດຂ່າວຮູບພາບແນະນຳວັດທະນະທຳ, ການທ່ອງທ່ຽວ ແລະ ອາຫານ ຫວຽດນາມເຖິງແຂກທີ່ມາທ່ຽວຊົມ.
 |
| ເພື່ອນມິດສາກົນຊອກຮູ້ກ່ຽວກັບບັນດາຜະລິດຕະພັນພິເສດຂອງ ຫວຽດນາມ. (ພາບ: TTXVN) |
ທີ່ງານບຸນວັດທະນະທຳອາຫານການກິນປະຈຳປີ ຄັ້ງທີ 24 ທີ່ດຳເນີນຢູ່ເຂດປົກຄອງພິເສດ ມາກາວ (ຈີນ), ປະຊາຄົມຊາວ ຫວຽດນາມ ຢູ່ ມາກາວ ກໍ່ມີຮ້ານແນະນຳວາງສະແດງ, ຂາຍຜະລິດຕະພັນ ແລະ ເຂົ້າຮ່ວມບັນດາການສະແດງສີລະປະທີ່ເປັນເອກະລັກສະເພາະ ເພື່ອແນໃສ່ໂຄສະນາວັດທະນະທຳ ຫວຽດນາມ ໃຫ້ແກ່ເພື່ອນມິດປະຈຳຖິ່ນ ແລະ ສາກົນ.
ງານບຸນໄດ້ດຳເນີນແຕ່ວັນທີ 15 ພະຈິກ ຫາ ວັນທີ 1 ທັນວາ, ດ້ວຍການເຂົ້າຮ່ວມຂອງຮ້ານວາງສະແດງ140 ກວ່າຮ້ານຂອງທ້ອງຖິ່ນ ແລະ ສາກົນ, ພ້ອມກັບແຂກທ່ອງທ່ຽວນັບລ້ານເທື່ອຄົນ. ງານບຸນ ໄດ້ແບ່ງອອກເປັນຫຼາຍເຂດເຊັ່ນ ຖະໜົນຮ້ານອາຫານ ຈີນ, ຖະໜົນອາຫານ ອາຊີ, ຖະໜົນອາຫານເຄື່ອງດື່ມ... ເຂົ້າຮ່ວມງານບຸນ, ແຂກທ່ອງທ່ຽວ ຈະໄດ້ຊິມບັນດາເຍື່ອງອາຫານທີ່ດຶງດູດໃຈຂອງຫຼາຍປະເທດໃນທົ່ວໂລກ, ເຊື່ອມຕົວເຂົ້າກັບພື້ນທີ່ມ່ວນຊື່ນ ດ້ວຍດົນຕີ, ການສະແດງສິລະປະ ແລະ ບັນດາການລະຫຼິ້ນຕາມຖະຫນົນພື້ນເມືອງ.
ທ່ານ ເຢືອງຈຸງດຶກ, ປະທານສະມາຄົມຊາວ ຫວຽດນາມ ອາໄສຢູ່ ມາກາວ ໃຫ້ຮູ້ວ່າ ບັນດາເຍື່ອງອາຫານດັ້ງເດີມຂອງ ຫວຽດນາມ ໄດ້ຮັບການຕອບຮັບຈາກນັກທ່ອງທ່ຽວຢ່າງຄຶກຄັກຄື ເຝີງົວ, ເຝີໄກ່, ຢໍ່ຈືນ, ເຂົ້າປຸ້ນຊີ້ນປີ້ງ...
 |
| ຮ້ານແນະນຳວາງສະແດງອາຫານດັ້ງເດີມ ຫວຽດນາມ ໃນງານບຸນວັດທະນະທຳອາຫານການກິນປະຈຳປີ ຄັ້ງທີ 24 ທີ່ດຳເນີນຢູ່ເຂດອົກຄອງພິເສດ ມາກາວ (ຈີນ). (ພາບ: TTXVN) |
ທ້າວ ເຕີນ, ນັກທ່ອງທ່ຽວ ຈີນ ແບ່ງປັນວ່າ ລາວມັກອາຫານ ຫວຽດນາມ ຫຼາຍ. ລາວໃຫ້ຮູ້ວ່າ ເຝີທີ່ລາວຊີມໃນງານບຸນປີນີ້ ມີລົດຊາດພິເສດ. ນອກຈາກນີ້, ລາວກໍ່ປະທັບໃຈກັບຢໍ່ຈືນ ເພາະມີຜັກຫຼາຍ, ລົດຊາດເຢັນໆ, ຈ້ຳກັບນ້ຳແຈ່ວສົ້ມຫວານ.
ນອກຈາກແນະນຳອາຫານການກິນແລ້ວ, ບັນດານັກສິລະປິນ “ສະໝັກຫຼິ້ນ” ຂອງສະມາຄົມຊາວ ຫວຽດນາມ ອາໄສຢູ່ ມາກາວ ຍັງໄດ້ສະແດງບັນດາລາຍການສີລະປະ ແລະ ໄດ້ຮັບຄວາມຊົມເຊີຍດ້ວຍຄວາມຍິນດີຈາກແຂກທີ່ມາຮ່ວມງານບຸນ.
ແທັງຮັ່ງ
