ວັນທີ 11 ທັນວາ, ຢູ່ສຳນັກງານປະທານປະເທດ, ທ່ານປະທານປະເທດ ຫວຽດນາມ ຫວໍວັນເຖືອງ ໄດ້ໃຫ້ການຕ້ອນຮັບທ່ານນາງ Pilar Méndez Jiménez ເອກອັກຄະລັດຖະທູດ ແອັດສະປາຍ ປະຈຳ ຫວຽດນາມ ເພື່ອເຂົ້າຢ້ຽມອຳລາເນື່ອງໃນສິ້ນສຸດວາລະການເຮັດວຽກຢູ່ ຫວຽດນາມ.
ໂດຍສະແດງຄວາມຊົມເຊີຍທ່ານເອກອັກຄະລັດຖະທູດ ແອັດສະປາຍ ທີ່ມີວາລະເຮັດວຽກທີ່ປະສົບຜົນສຳເລັດຢູ່ ຫວຽດນາມ, ທ່ານປະທານປະເທດ ຫວໍວັນເຖືອງ ຕີລາຄາສູງບັນດາຄວາມມານະພະຍາຍາມຂອງທ່ານເອກອັກຄະລັດຖະທູດ ທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນການພົວພັນຄູ່ຮ່ວມມືຍຸດທະສາດ ຫວຽດນາມ - ແອັດສະປາຍ; ຊົມເຊີຍ ແອັດສະປາຍ ທີ່ປະສົບຜົນສຳເລັດໃນການດຳເນີນການເປັນປະທານສະຫະພາບ ເອີລົບ (EU) ໜູນວຽນໃນ 6 ເດືອນທ້າຍປີ 2023.
 |
ທ່ານປະທານປະເທດ ຫວຽດນາມ ຫວໍວັນເຖືອງ ໄດ້ຕ້ອນຮັບທ່ານນາງ Pilar Méndez Jiménez ເອກອັກຄະລັດຖະທູດ ແອັດສະປາຍ |
ທ່ານປະທານປະເທດ ສະແດງຄວາມຍິນດີທີ່ເຫັນວ່າ ການພົວພັນລະຫວ່າງສອງປະເທດພວມພັດທະນາເປັນຢ່າງດີໃນທຸກຂົງເຂດ. ແອັດສະປາຍ ກາຍເປັນຄູ່ຮ່ວມມືການຄ້າໃຫຍ່ອັນດັບທີ 8 ຂອງຫວຽດນາມ ໃນ EU ແລະ ຫວຽດນາມ ກາຍເປັນຄູ່ຄ້າໃຫຍ່ທີ່ສຸດຂອງ ແອັດສະປາຍ ອາຊຽນ. 2 ປະເທດພວມມຸ່ງໄປເຖິງການສະເຫຼີມສະຫຼອງ 15 ປີແຫ່ງວັນສ້າງຕັ້ງການພົວພັນຄູ່ຮ່ວມມືຍຸດທະສາດ ຫວຽດນາມ - ແອັດສະປາຍ ແລະ ເຊື່ອໝັ້ນວ່າ ການຮ່ວມມືລະຫວ່າງ 2 ປະເທດຈະພັດທະນາຢ່າງແຮງໃນໄລຍະຈະມາເຖິງ.
ໂດຍສະແດງຄວາມຂອບໃຈຢ່າງຈິງໃຈຕໍ່ທ່ານປະທານປະເທດ ຫວໍວັນເຖືອງ ທີ່ໄດ້ສະຫຼະເວລາມາຕ້ອນຮັບ, ທ່ານເອກອັກຄະລັດຖະທູດ ແອັດສະປາຍ ໄດ້ສະແດງຄວາມຊົມເຊີຍຕໍ່ປະຊາຊົນ ແລະ ປະເທດ ຫວຽດນາມ; ຊົມເຊີຍ ແລະ ຕີລາຄາສູງບັນດາການເຄື່ອນໄຫວຂອງຫວຽດນາມ ທີ່ໄດ້ປະກອບສ່ວນຊຸກຍູ້ສະພາບແວດລ້ອມແຫ່ງສັນຕິພາບ, ສະຖຽນລະພາບ ແລະ ການພັດທະນາຢູ່ພາກພື້ນ ແລະ ໃນໂລກ.
ທ່ານເອກອັກຄະລັດຖະທູດ ຢືນຢັນວ່າ ແອັດສະປາຍ ຖືການຮ່ວມມືກັບ ຫວຽດນາມ ເປັນສຳຄັນ ແລະ ແມ່ນບຸລິມະສິດໃນການພັດທະນາການພົວພັນຮ່ວມມື. ມີຫຼາຍວິສາຫະກິດຂະໜາດໃຫຍ່ຂອງ ແອັດສະປາຍ ທີ່ມາລົງທຶນຢູ່ ຫວຽດນາມ ບັນລຸໄດ້ຜົນສຳເລັດ, ໃນນັ້ນມີບັນດາຂົງເຂດພະລັງງານທົດແທນ, ພະລັງງານລົມ, ພະລັງງານແສງຕາເວັນ ແລະ ດິຈິຕອລ, ລ້ວນແຕ່ແມ່ນຂົງເຂດສຳຄັນໃນຍຸດທະສາດໃນການພັດທະນາຂອງທັງສອງຝ່າຍ.
ທ່ານເອກອັກຄະລັດຖະທູດ ເຊື່ອໝັ້ນວ່າ ດ້ວຍສັນຍາການຄ້າເສລີ ຫວຽດນາມ - EU, ສັນຍາອາລັກຂາການລົງທຶນ ຫວຽດນາມ - EU ແລະ ຫວ່າງມໍ່ໆມານີ້ ການສ້າງຕັ້ງຫ້ອງການການຄ້າ ແອັດສະປາຍ ປະຈຳຫວຽດນາມ ຈະສ້າງພື້ນຖານ, ຊຸກຍູ້ການພົວພັນຮ່ວມມືລະຫວ່າງ 2 ປະເທດຢ່າງແຮງ.
ຂອບອົກຂອບໃຈທ່ານເອກອັກຄະລັດຖະທູດທີ່ມີຄວາມຮູ້ສຶກດີຕໍ່ປະເທດ ແລະ ປະຊາຊົນຫວຽດນາມ, ທ່ານປະທານປະເທດ ຫວູວັນເຖືອງ ປາດຖະໜາວ່າ ໃນໄລຍະຈະມາເຖິງ, 2 ປະເທດຈະສືບຕໍ່ຊຸກຍູ້ການເຄື່ອນໄຫວຕິດຕໍ່ພົວພັນລະດັບສູງທຸກຂັ້ນ, ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ເປັນພື້ນຖານໃຫ້ແກ່ການຮ່ວມມືສອງຝ່າຍ.
ທ່ານປະທານປະເທດກໍ່ຖືວ່າ 2 ຝ່າຍຕ້ອງສືບຕໍ່ຊຸກຍູ້ບັນດາຂອບເຂດການຮ່ວມມື 2 ຝ່າຍ, ພິເສດແມ່ນສັນຍາການຄ້າເສລີ ຫວຽດນາມ - EU ແລະ ສັນຍາອາລັກຂາການລົງທຶນ ຫວຽດນາມ - EU ເພື່ອປັບປຸງການພົວພັນລະຫວ່າງສອງປະເທດໃຫ້ນັບມື້ນັບໝັ້ນຄົງເຂັ້ມແຂງ. ທ່ານປະທານປະເທດ ປາດຖະໜາໃຫ້ສອງປະເທດຊຸກຍູ້ການພົບປະແລກປ່ຽນວັດທະນະທຳ, ຊຸກຍູ້ການພົວພັນລະຫວ່າງສອງປະເທດໃຫ້ເລິກເຊິ່ງກວ່າອີກ.
ໃນສະພາບການທີ່ສອງປະເທດກ້າວໄປສູ່ການສະເຫຼີມສະຫຼອງ 15 ປີແຫ່ງວັນສ້າງສາຍພົວພັນຄູ່ຮ່ວມມືຍຸດທະສາດ, ທ່ານປະທານປະເທດ ຫວໍວັນເຖືອງ ປາດຖະໜາວ່າ 2 ຝ່າຍຈະຈັດຕັ້ງບັນດາການເຄື່ອນໄຫວທີ່ແທດຈິງເພື່ອລະນຶກ ແລະ ຮັດແໜ້ນການພົວພັນລະຫວ່າງ 2 ປະເທດກວ່າອີກ.
ມິງດຶກ
