| ການຮ່ວມມືເພື່ອອະນາຄົດແບບຍືນຍົງໃນປະຊາຄົມລວມ APEC | |
| APEC 2023: ຫວຽດນາມ ຈະພ້ອມກັບບັນດາສະມາຊິກອື່ນ ເພື່ອພັດທະນາແບບຍືນຍົງ ແລະ ຄວາມວັດທະນາຖາວອນຂອງພາກພື້ນ |
ໂດຍຕອບຮັບຄຳເຊີນຂອງທ່ານປະທານາທິບໍດີ ອາເມລິກາ Joe Biden, ຕອນເຊົ້າວັນທີ 14 ພະຈິກ, ທ່ານປະທານປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ຫວໍວັນເຖືອງ ແລະ ພັນລະຍາ ພ້ອມກັບຄະນະຜູ້ແທນຂັ້ນສູງຫວຽດນາມ ໄດ້ເດີນທາງອອກຈາກສະໜາມບິນສາກົນ ໂນ້ຍບາຍ, ນະຄອນຫຼວງ ຮ່າໂນ້ຍ ເພື່ອໄປເຂົ້າຮ່ວມ ສັບປະດາຂັ້ນສູງເວທີການຮ່ວມມືເສດຖະກິດ ອາຊີ - ປາຊີຟິກ (APEC) 2023 ແລະ ສົມທົບກັບການເຄື່ອນໄຫວສອງຝ່າຍຢູ່ ອາເມລິກາ ແຕ່ວັນທີ 14 - 17 ພະຈິກ.
 |
| ທ່ານປະທານປະເທດ ຫວໍວັນເຖືອງ ແລະ ພັນລະຍາ ອອກເດີນທາງໄປເຂົ້າຮ່ວມສັບປະດາຂັ້ນສູງ APEC 2023 ຢູ່ ອາເມລິກາ. |
ໂດຍຕິດຕາມຄະນະ ທ່ານປະທານປະເທດ ຫວໍວັນເຖືອງ ແລະ ພັນລະຍາ ມີທ່ານຫົວໜ້າຫ້ອງວ່າການປະທານປະເທດ ເລເເຄງຫາຍ; ທ່ານລັດຖະມົນຕີກະຊວງການຕ່າງປະເທດ ບູຍເເທງເຊີນ; ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ຫງວຽນຮົ່ງຢ່ຽນ; ທ່ານລັດຖະມົນຕີກະຊວງການເງິນ ໂຮ່ດຶກເຟີກ; ທ່ານຫົວໜ້າກຳມາທິການວັດທະນະທຳ ແລະ ການສຶກສາ ສະພາແຫ່ງຊາດ ຫງວຽນດັກວິງ; ສະຫາຍ ເລຂາຄະນະພັກນະຄອນ ດ່າໜັງ ຫງວຽນວັນກວາງ; ສະຫາຍ ເລຂາຄະນະພັກນະຄອນ ຫາຍຟ່ອງ ເລຕ໋ຽນເຈົາ; ສະຫາຍ ເລຂາຄະນະພັກແຂວງ ບັກຢາງ ເຢື່ອງວັນຖ໋າຍ; ສະຫາຍ ເລຂາຄະນະພັກແຂວງ ຮືງອຽນ ຫງວຽນຮີວເງຍ; ທ່ານປະທານຄະນະກຳມະການປະຊາຊົນນະຄອນ ໂຮ່ຈີມິນ ຟານວັນມາຍ; ທ່ານຜູ້ອຳນວຍການມະຫາວິທະຍາໄລແຫ່ງຊາດ ນະຄອນ ໂຮ່ຈີມິນ ຫວູຫາຍກວນ; ທ່ານປະທານສະຫະພັນການຄ້າ ແລະ ອຸດສາຫະກຳຫວຽດນາມ ຟ້າມເຕີນກົງ.
ພາກພື້ນ ອາຊີ - ປາຊີຟິກ ແລະ ເວທີ APEC ແມ່ນບູຣິມະສິດສຳຄັນໃນແນວທາງການຕ່າງປະເທດຂອງ ຫວຽດນາມ ດ້ວຍແຜນນະໂຍບາຍຊຸກຍູ້ ແລະ ຍົກສູງບົດບາດການທູດຫຼາຍຝ່າຍ, ປະກອບສ່ວນປົກປັກຮັກສາ ແລະ ຊຸກຍູ້ບັນດາຜົນປະໂຫຍດດ້ານຄວາມໝັ້ນຄົງ, ການພັດທະນາ ແລະ ຍົກສູງຖານະບົດບາດຂອງປະເທດຊາດ.
ໃນໄລຍະ 25 ປີແຫ່ງການເຂົ້າຮ່ວມ APEC, ຫວຽດນາມ ໄດ້ປະກອບສ່ວນຢ່າງຕັ້ງໜ້າ, ເປັນເຈົ້າການສຳລັບເວທີ APEC, ສະເໜີຫຼາຍຂໍ້ລິເລີ່ມ ແລະ ໂຄງການຮ່ວມມືທີ່ໄດ້ຮັບການຕີລາຄາສູງຈາກບັນດາສະມາຊິກ; ປະກອບສ່ວນຊຸກຍູ້ສັນຕິພາບ, ຄວາມໝັ້ນຄົງ, ການຮ່ວມມື ແລະ ການເຊື່ອມຕໍ່ເສດຖະກິດພາກພື້ນ, ຮັກສາບົດບາດຂອງ APEC ເປັນກົນໄກເຊື່ອມຕໍ່ເສດຖະກິດແຖວໜ້າຢູ່ ອາຊີ - ປາຊີຟິກ.
ການພົວພັນ ຫວຽດນາມ - ອາເມລິກາ ໄດ້ພັດທະນາຢ່າງເຂັ້ມແຂງໃນໄລຍະມໍ່ໆມານີ້, ດ້ວຍຂີດໝາຍທີ່ 2 ປະເທດສ້າງຕັ້ງການພົວພັນຄູ່ຮ່ວມມືຍຸດທະສາດຮອບດ້ານ ເນື່ອງໃນໂອກາດທ່ານປະທານາທິບໍດີ ອາເມລິກາ Joe Biden ມາຢ້ຽມຢາມ ຫວຽດນາມ ຕາມຄຳເຊີນຂອງທ່ານເລຂາທິການໃຫຍ່ ຫງວຽນຟຸຈ້ອງ (ເດືອນ ກັນຍາ 2023).
2 ຝ່າຍໄດ້ລົງນາມໃນຂໍ້ຕົກລົງຮ່ວມມືຫຼາຍສະບັບກ່ຽວກັບເສດຖະກິດ, ວິທະຍາສາດ - ເຕັກໂນໂລຢີ, ການສຶກສາ - ບຳລຸງສ້າງ, ມະນຸດສະທຳ, ໃນນັ້ນ ມີບັນດາສັນຍາການຄ້າດ້ວຍຍອດມູນຄ່າກວ່າ 10 ຕື້ USD.
ດ້ວຍຄວາມໝາຍພິເສດຂອງກອງປະຊຸມການບັນດານຳເສດຖະກິດ APEC ປີນີ້ ແລະ ໃນສະພາບການພົວພັນລະຫວ່າງ ຫວຽດນາມ - ອາເມລິກາ ສືບຕໍ່ພັດທະນາຢ່າງເຂັ້ມແຂງໃນໄລຍະຜ່ານມາ, ການງານເຂົ້າຮ່ວມກອງປະຊຸມຂັ້ນສູງ APEC ແລະ ບັນດາການເຄື່ອນໄຫວອື່ນໆຂອງປະທານປະເທດ ຫວໍວັນເຖືອງ ຢູ່ ອາເມລິກາ ແມ່ນມີຄວາມໝາຍສຳຄັນທີ່ສຸດ, ທັງໃນການເຄື່ອນໄຫວຫຼາຍຝ່າຍ ແລະ ສອງຝ່າຍ, ປະກອບສ່ວນສືບຕໍ່ຮັກສາ ແລະ ເພີ່ມທະວີການພົວພັນຕ່າງປະເທດທີ່ມີສັນຕິພາບ, ຄວາມໝັ້ນຄົງ, ຄວາມສະດວກໃຫ້ແກ່ການພັດທະນາຂອງປະເທດຊາດ.
ດີງເລື້ອງ
