ຕອນບ່າຍວັນທີ 6 ທັນວາ, ພະແນກແຮງງານ-ທະຫານເສຍອົງຄະ ແລະສັງຄົມແຂວງ ຮ່າຕິ້ງ ສສ ຫວຽດນາມ ໄດ້ສົມທົບກັບພະແນກແຮງງານ ແລະສະຫວັດດີການສັງຄົມ ແຂວງບໍລິຄຳໄຊ ສປປ ລາວ ຈັດຕັ້ງກອງປະຊຸມຮ່ວມມືພັດທະນາແຮງງານ, ວຽກເຮັດງານທໍາ ແລະຮັບປະກັນຊີວິດສັງຄົມ.
 |
| ບັນດາຜູ້ແທນ ເຂົ້າຮ່ວມກອງປະຊຸມ. ພາບ: news.baodansinh.vn |
ທີ່ກອງປະຊຸມ, ພະແນກແຮງງານ-ທະຫານເສຍອົງຄະ ແລະສັງຄົມແຂວງ ຮ່າຕິ້ງ ກັບພະແນກແຮງງານ ແລະສະຫວັດດີການສັງຄົມ ແຂວງບໍລິຄຳໄຊ ໄດ້ເຫັນດີເປັນເອກະພາບລົງນາມໃນຂໍ້ຕົກລົງຮ່ວມມືໃນຂົງເຂດພັດທະນາແຫຼ່ງຊັບພະຍາກອນມະນຸດ ຜ່ານການພັດທະນາທັກສະດ້ານວິຊາຊີບ, ຊຸກຍູ້ການຮ່ວມສໍາພັນບໍາລຸງສ້າງອາຊີບ, ບໍາລຸງສ້າງເພີ່ມທະວີຄວາມສາມາດໃຫ້ຖັນແຖວຄູອາຈານ ທີ່ສິດສອນກ່ຽວກັບວິຊາຊີບ ແລະວຽກງານຄຸ້ມຄອງການຮັບປະກັນຊີວິດສັງຄົມ, ການສຶກສາວິຊາຊີບ.
 |
| ພະແນກແຮງງານ-ທະຫານເສຍອົງຄະ ແລະສັງຄົມແຂວງຮ່າຕິ້ງ ສົມທົບກັບພະແນກແຮງງານ ແລະສະຫວັດດີການສັງຄົມແຂວງບໍລິຄຳໄຊ ລົງນາມໃນຂໍ້ຕົກລົງວ່າດ້ວຍການຮ່ວມມື. ພາບ: news.baodansinh.vn |
ບັນດາຂົງເຂດຮ່ວມມືລວມມີ: ແບ່ງປັນບົດຮຽນປະສົບການ, ເພີ່ມທະວີການສົມທົບກັນກ່ຽວກັບວຽກງານກໍ່ສ້າງ, ປັບປຸງກົດໝາຍ ແລະ ນະໂຍບາຍວ່າດ້ວຍການພັດທະນາແຫຼ່ງຊັບພະຍາກອນມະນຸດ, ການຮັບປະກັນຊີວິດສັງຄົມ ໃຫ້ສົມບູນແບບ; ຮ່ວມມືໃນການບໍາລຸງສ້າງ, ຍົກສູງຄວາມສາມາດຂອງຄູອາຈານຢູ່ຕາມຮາກຖານການສຶກສາວິຊາຊີບ ແລະຍົກສູງດ້ານເຕັກນິກໃຫ້ແກ່ພະນັກງານທີ່ເຮັດວຽກໃນຂົງເຂດແຮງງານ, ວຽກເຮັດງານທໍາ ແລະຮັບປະກັນຊີວິດສັງຄົມ.
 |
| ບັນດາຜູ້ແທນຖ່າຍຮູບລວມ. ພາບ: news.baodansinh.vn |
ສ້າງເງື່ອນໄຂສະດວກໃຫ້ບັນດາຫົວໜ່ວຍ, ໂຮງຮຽນຂອງສອງຝ່າຍຊອກຮູ້ຕະຫຼາດ, ຮ່ວມມື, ແລກປ່ຽນບົດຮຽນ ແລະຮ່ວມສໍາພັນດ້ານການບໍາລຸງກໍ່ສ້າງໃນຂົງເຂດສາທາລະນະສຸກ ແລະການສຶກສາວິຊາຊີບ. ສະເໜີປະກາດໃຊ້ນະໂຍບາຍບຸລິມະສິດ ແນໃສ່ສົ່ງເສີມການບໍາລຸງສ້າງວິຊາຊີບ ແລະ ຍົກສູງຄຸນນະພາບ ເພື່ອຕອບສະໜອງຄວາມຕ້ອງການຂອງສອງແຂວງ. ສືບຕໍ່ເພີ່ມທະວີການສົມທົບກັນລະຫວ່າງພະແນກ ແລະ ຂະແໜງການທີ່ກ່ຽວຂ້ອງຂອງສອງແຂວງ ໃນວຽກງານຊອກຫາ ແລະທ້ອນໂຮມອັດຖິນັກຮົບທີ່ເສຍສະຫຼະຊີວິດເພື່ອຊາດ ດ້ວຍຈິດໃຈຄວາມຮັບຜິດຊອບສູງ, ນັບມື້ນັບເຂົ້າສູ່ລວງເລິກ ແລະ ບັນລຸໄດ້ໝາກຜົນຢ່າງຈົບງາມ.
ບູນມີ
