ຕອນບ່າຍວັນທີ 28 ຕຸລາ, ຢູ່ກອງບັນຊາການທະຫານແຂວງອັດຕະປື, ຄະນະປະຕິບັດງານກອງບັນຊາການທະຫານແຂວງບິ່ງດິ້ງ ນຳໂດຍສະຫາຍ ພັນເອກພິເສດ ຫງວຽນມິງຮ໊ຽນ, ຫົວໜ້າການເມືອງກອງບັນຊາການທະຫານແຂວງບິ່ງດິ້ງ ໄດ້ມີການຢ້ຽມຢາມ, ເຮັດວຽກ ແລະມອບທຶນຊ່ວຍເຫຼືອການກໍ່ສ້າງໂຄງການມິດຕະພາບ 2023 ໃຫ້ແກ່ກອງບັນຊາການທະຫານ ແຂວງອັດຕະປື.
ທີ່ການພົບປະ, ການນຳກອງບັນຊາການທະຫານແຂວງບິ່ງດິ້ງ ແລະແຂວງອັດຕະປື ຢືນຢັນວ່າ ສາຍພົວພັນສາມັກຄີມິດຕະພາບແບບພິເສດລະຫວ່າງແຂວງບິ່ງດິ້ງ ແລະແຂວງອັດຕະປື ນັບມື້ນັບພັດທະນາຢ່າງໝັ້ນຄົງ ແລະເຂົ້າສູ່ລວງເລິກ. ກອງບັນຊາການທະຫານແຂວງ ບິ່ງດິ້ງ ແລະແຂວງອັດຕະປື ໄດ້ປະຕິບັດບັນດາເນື້ອໃນຕາມໂຄງການຮ່ວມມືທີ່ໄດ້ລົງນາມເປັນຢ່າງດີ, ສອງຝ່າຍໄດ້ມີການພົບປະ, ຢ້ຽມຢາມຖາມຂ່າວ, ແລກປ່ຽນ ແລະໜູນຊ່ວຍເຊິ່ງກັນ ແລະກັນໃນໜ້າທີ່ວຽກງານທຸກດ້ານເປັນປະຈໍາ, ປະກອບສ່ວນເພີ່ມທະວີຄວາມເຂົ້າໃຈ ແລະຄວາມໄວ້ເນື້ອເຊື່ອໃຈ ເຊິ່ງກັນ ແລະກັນລະຫວ່າງກຳລັງປະກອບອາວຸດສອງແຂວງ.
 |
| ສະຫາຍພົນຈັດຕະວາ ໂຊກໄຊ ພິມມະລາ, ຫົວໜ້າການເມືອງກອງບັນຊາການທະຫານແຂວງ ອັດຕະປື ມອບຊໍ່ດອກໄມ້ຊົມເຊີຍກອງບັນຊາການທະຫານແຂວງບິ່ງດິ້ງ ເນື່ອງໃນໂອກາດສະເຫຼີມສະຫຼອງ 73 ປີ ແຫ່ງວັນສ້າງຕັ້ງກອງທັບປະຊາຊົນຫວຽດນາມ. ພາບ: binhdinh.gov.vn |
ທີ່ການເຮັດວຽກ, ສະຫາຍພັນເອກພິເສດ ຫງວຽນມິງຮ໊ຽນ ໄດ້ມອບເງິນ 1.250 ຕື້ດົ່ງ, ຄອມພິວເຕີ 8 ຊຸດ ແລະເຄື່ອງພິມ ໃຫ້ແກ່ກອງບັນຊາການທະຫານແຂວງອັດຕະປື ເພື່ອສືບຕໍ່ປັບປຸງ ແລະກໍ່ສ້າງຫ້ອງການເຮັດວຽກໃຫ້ຄູອາຈານຂອງໂຮງຮຽນການທະຫານແຂວງອັດຕະປື. ຜ່ານນັ້ນ, ປະກອບສ່ວນປັບປຸງນໍ້າໃຈສາມັກຄີ, ຄວາມສະໜິດຕິດພັນ, ເພີ່ມທະວີການຮ່ວມມື ເພື່ອກໍ່ສ້າງກຳລັງປະກອບອາວຸດຂອງສອງແຂວງ ໃຫ້ນັບມື້ນັບໝັ້ນຄົງເຂັ້ມແຂງ, ປະຕິບັດສໍາເລັດທຸກໜ້າທີ່ວຽກງານ ທີ່ໄດ້ຮັບການມອບໝາຍໃຫ້ສຳເລັດ.
ຕາງໜ້າກອງບັນຊາການທະຫານແຂວງອັດຕະປື, ສະຫາຍພົນຈັດຕະວາ ໂຊກໄຊ ພິມມະລາ, ຫົວໜ້າການເມືອງກອງບັນຊາການທະຫານແຂວງ ອັດຕະປື ໄດ້ສະແດງຄວາມຂອບໃຈຢ່າງຈິງໃຈມາຍັງ ກອງບັນຊາການທະຫານແຂວງບິ່ງດິ້ງ ທີ່ໃຫ້ການຊ່ວຍເຫຼືອດ້ານຄ່າໃຊ້ຈ່າຍ, ວັດຖຸອຸປະກອນໃຫ້ແກ່ກອງບັນຊາການທະຫານແຂວງອັດຕະປື ເພື່ອປັບປຸງ, ກໍ່ສ້າງພື້ນຖານໂຄງລ່າງ, ປະກອບວັດຖຸອຸປະກອນທີ່ຈຳເປັນ ໃນການດຳລົງຊີວິດປະຈຳວັນ ເພື່ອແນໃສ່ຮັບປະກັນໃຫ້ພະນັກງານ, ນັກຮົບກໍາລັງປະກອບອາວຸດແຂວງອັດຕະປື ມີສະພາບແວດລ້ອມຮໍ່າຮຽນ, ດຳເນີນຊີວິດ ແລະເຮັດວຽກຢ່າງສະດວກ.
ບູນມີ
