ເດີນທາງການພົບປະມິດຕະພາບ ແລະ ການຮ່ວມມືປະຊາຊົນຫວຽດນາມ

ຍສໝ - ເນື່ອງໃນໂອກາດສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ກຳປູເຈຍ ແລະ ປີມິດຕະພາບ ຫວຽດນາມ - ກຳປູເຈຍ 2022, ແຕ່ວັນທີ 5 – 8 ພະຈິກ 2022, ສະມາຄົມມິດຕະພາບ ຫວຽດນາມ - ກຳປູເຈຍ, ສະຫະພັນບັນດາອົງການສະມາຄົມມິດຕະພາບ ຫວຽດນາມ - ແຂວງ ບີ່ງເຟືອກ ແລະ ແຂວງ ດັກນົງ ໄດ້ສົມທົບກັບສະມາຄົມມິດຕະພາບກຳປູເຈຍ - ຫວຽດນາມ ຈັດຕັ້ງການພົບປະມິດຕະພາບ ແລະ ການຮ່ວມມືປະຊາຊົນຫວຽດນາມ - ກຳປູເຈຍ ຄັ້ງທີ 5.

	ຊຸກຍູ້ການລົງທຶນ ແລະ ການຄ້າ ຫວຽດນາມ - ກຳປູເຈຍ
	ເພີ່ມທະວີການຮ່ວມມືຊາວໜຸ່ມ ຫວຽດນາມ - ກຳປູເຈຍ

ຄະນະຜູ້ແທນສະມາຄົມມິດຕະພາບຫວຽດນາມ - ກຳປູເຈຍ ມີ 55 ທ່ານ, ນຳພາຄະນະໂດຍທ່ານນາງ ຫງວຽນທິແທງ, ກຳມະການຄະນະບໍລິຫານງານສູນກາງພັກ, ກຳມະການຄະນະປະຈຳສະພາແຫ່ງຊາດ, ຫົວໜ້າກຳມາທິການວຽກງານສະມາຊິກສະພາແຫ່ງຊາດ, ຮອງຫົວໜ້າຄະນະຈັດຕັ້ງສູນກາງ, ປະທານສະມາຄົມມິດຕະພາບ ຫວຽດນາມ - ກຳປູເຈຍ ເປັນຫົວໜ້າຄະນະເຂົ້າຮ່ວມໃນການພົບປະ. ຄະນະຜູ້ແທນສະມາຄົມມິດຕະພາບກຳປູເຈຍ - ຫວຽດນາມ ປະກອບມີ 55 ທ່ານ ໂດຍທ່ານນາງ Men Sam An - ຮອງປະທານພັກປະຊາຊົນກຳປູເຈຍ, ຮອງນາຍົກລັດຖະມົນຕີ ກຳປູເຈຍ, ປະທານສະມາຄົມມິດຕະພາບກຳປູເຈຍ - ຫວຽດນາມ ນຳໜ້າ.

ກ່ອນໜ້ານັ້ນ, ຕອນເຊົ້າວັນທີ 5 ພະຈິກ, ຢູ່ເຂດດ່ານຊາຍແດນສາກົນ ຮ່ວາລື (ເມືອງ ລົກນິງ, ແຂວງ ບິ່ງເຟືອກ) ກໍໄດ້ດຳເນີນພິທີຕ້ອນຮັບຄະນະຜູ້ແທນປະຊາຊົນກຳປູເຈຍ ໂດຍທ່ານນາງ Men Sam An ນຳໜ້າ.

ເດີນທາງການພົບປະມິດຕະພາບ ແລະ ການຮ່ວມມືປະຊາຊົນຫວຽດນາມ - ກຳປູເຈຍ ຄັ້ງທີ 5

ທ່ານນາງ ຫງວຽນທິແທງ, ກຳມະການຄະນະບໍລິຫານງານສູນກາງພັກ ແລະ ທ່ານນາງ Men Sam An - ຮອງປະທານພັກປະຊາຊົນກຳປູເຈຍ

ຄະນະຜູ້ແທນໄດ້ດຳເນີນການຕ້ອນຮັບ ຢື້ຢາມຖາມຂ່າວ, ມອບດອກໄມ້ ແລະ ຖ່າຍຮູບທີ່ລະນຶກຢູ່ເຂດດ່ານຊາຍແດນສາກົນຮ່ວາລື. ຫຼັງຈາກນັ້ນ, ຄະນະຜູ້ແທນໄດ້ໄປຢ້ຽມຢາມ ກຸ່ມກິດຈະການທີ່ລະນຶກເຖິງການເດີນທາງກູ້ຊາດ ຂອງທ່ານນາຍົກລັດຖະມົນຕີ ກຳປູເຈຍ Hun Sen ຢູ່ເຂດ X16 ຢູ່ໝູ່ບ້ານແທັງໄຕ່, ຕາແສງ ລົກເຕິນ, ເມືອງ ລົກນິງ.

ຄະນະຜູ້ແທນສອງປະເທດ ໄດ້ຖະຫວາຍທູບທຽນບູຊາ ຢູ່ຫໍບູຊາກຳປູເຈຍ, ໄປຢ້ຽມຢາມສະຖານທີ່ລີ້ເກັບເຊື່ອງອາວຸດ, ຈຸດພົບປະຂອງທະຫານປະຊາຊົນ ແລະ ປະຊາຊົນ ຫວຽດນາມ, ຈຸດເຮັດວຽກຂອງຕາແສງ ລົກເຕິນ (ປະຈຸບັນແມ່ນຫໍວັດທະນະທຳຂອງຕາແສງລົກແທັງ, ເມືອງລົກນິງ)...

ຕອນບ່າຍວັນທີ 6 ພະຈິກ, ກ່ອນພິທີເປີດການພົບປະມິດຕະພາບ ແລະ ການຮ່ວມມືປະຊາຊົນຫວຽດນາມ - ກຳປູເຈຍ ຄັ້ງທີ 5, ທ່ານ ຟ້າມບິ່ງມິງ ກຳມະການກົມການເມືອງ, ຮອງນາຍົກລັດຖະມົນຕີ ໄດ້ໃຫ້ການຕ້ອນຮັບ ທ່ານນາງ Men Sam An, ຮອງປະທານພັກປະຊາຊົນກຳປູເຈຍ, ຮອງນາຍົກລັດຖະມົນຕີ ກຳປູເຈຍ, ປະທານສະມາຄົມມິດຕະພາບກຳປູເຈຍ - ຫວຽດນາມ, ຫົວໜ້າຄະນະຜູ້ແທນປະຊາຊົນກຳປູເຈຍ ໃນໂອກາດທີ່ຄະນະຜູ້ແທນສະມາຄົມມິດຕະພາບ ກຳປູເຈຍ - ຫວຽດນາມ ເຂົ້າຮ່ວມການພົບປະມິດຕະພາບ ຢູ່ ຫວຽດນາມ.

ພິທີເປີດເປີດລາຍການພົບປະມິດຕະພາບ ແລະ ການຮ່ວມມືປະຊາຊົນຫວຽດນາມ - ກຳປູເຈຍ ຄັ້ງທີ 5 ໄດ້ຈັດຂຶ້ນຢູ່ແຂວງ ບິ່ງເຟືອກ - ເຊິ່ງເປັນສະຖານທີ່ຂີດໝາຍປະຫວັດສາດແຫ່ງການເດີນທາງກູ້ຊາດຂອງທ່ານນາຍົກລັດຖະມົນຕີ Hun Sen, ກ່ຽວກັບຄວາມມິດຕະພາບ, ຄວາມສາມັກຄີ, ສະໜິດຕິດແໜ້ນ ລະຫວ່າງ 2 ປະເທດ. ທ່ານ ຟ້າມບິ່ງມິງ ກຳມະການກົມການເມືອງ, ຮອງນາຍົກລັດຖະມົນຕີ ໄດ້ເຂົ້າຮ່ວມ ແລະ ກ່າວຄຳປາໄສ. ທ່ານນາງ ຫງວຽນທິແທງ ປະທານສະມາຄົມມິດຕະພາບ ຫວຽດນາມ - ກຳປູເຈຍ ເນັ້ນໜັກວ່າ: ນ້ຳໃຈສາມັກຄີແບບພິເສດຫວຽດນາມ - ກຳປູເຈຍ ໄດ້ກາຍເປັນຊັບສົມບັດອັນລ້ຳຄ່າ ແລະ ສັກສິດຂອງສອງປະເທດ, ບໍ່ພຽງແຕ່ສຳລັບຄົນລຸ້ນໃນປະຈຸບັນເທົ່ານັ້ນ ຫາກຍັງສຳລັບລຸ້ນຄົນໃນອະນາຄົດນຳອີກ.

ທ່ານຮອງນາຍົກລັດຖະມົນຕີ ໄດ້ຕ້ອນຮັບທ່ານນາງ Men Sam An, ຮອງປະທານພັກປະຊາຊົນ ກຳປູເຈຍ, ປະທານສະມາຄົມມິດຕະພາບ ກຳປູເຈຍ - ຫວຽດນາມ, ຫົວໜ້າຄະນະຜູ້ແທນປະຊາຊົນ ກຳປູເຈຍ.

ທ່ານນາງຢືນຢັນວ່າ, ການພົບປະຄັ້ງນີ້ແມ່ນໂອກາດເພື່ອໃຫ້ຜູ້ແທນປະຊາຊົນສອງປະເທດ ໄດ້ຫວນຄືນ ແລະ ສະແດງຄວາມຂອບອົກຂອບໃຈຢ່າງເລິກເຊິ່ງຕໍ່ບັນດາຄຸນງາມຄວາມດີຂອງການນຳຂັ້ນສູງຂອງພັກ ແລະ 2 ປະເທດ ແລະ ການເສຍສະຫຼະຊີວິດເພື່ອຊາດຂອງປະຊາຊົນຫວຽດນາມ - ກຳປູເຈຍ. ດ້ວຍເຫດນັ້ນ, ຈຶ່ງມີຄວາມຮັບຮູ້ ແລະ ມີຄວາມຮັບຜິດຊອບສູງກວ່າໃນການປົກປັກຮັກສາ, ແລະ ເສີມຂະຫຍາຍບັນດາຄຸນຄ່າອັນດີງາມຂອງຄວາມສາມັກຄີ ແລະ ມິດຕະພາບລະຫວ່າງປະຊາຊົນສອງປະເທດ.

ກ່າວຄຳເຫັນທີ່ພິທີເປີດ, ທ່ານນາງປະທານສະມາຄົມມິດຕະພາບ ກຳປູເຈຍ - ຫວຽດນາມ Men Sam An ປາດຖະໜາວ່າ ສະມາຄົມມິດຕະພາບ 2 ປະເທດເວົ້າລວມ ແລະ ສະມາຄົມມິດຕະພາບບັນດາທ້ອງຖິ່ນເວົ້າສະເພາະ, ພິເສດແມ່ນບັນດາແຂວງຊາຍແດນ ຈົ່ງສືບຕໍ່ຮ່ວມມືຮັກສາຄວາມມິດຕະພາບ ລະຫວ່າງປະຊາຊົນສອງປະເທດ ແລະ ສະກັດກັ້ນການເຄື່ອນໄຫວໂຄສະນາຍຸແຍ່ຊວນເຊື່ອຂອງບັນດາກຳລັງສັດຕູ ເພື່ອແນໃສ່ທຳລາຍສາຍພົວພັນມິດຕະພາບຫວຽດນາມ - ກຳປູເຈຍ.

ລາຍການພົບປະໄດ້ດຳເນີນໄປດ້ວຍຫຼາຍການເຄື່ອນໄຫວ ຄື: ສະຫຼຸບ 10 ປີແຫ່ງການເຄື່ອນໄຫວ ປູກລ້ຽງຄວາມມິດຕະພາບ, ແບ່ງປັນບັນດາການເຄື່ອນໄຫວມິດຕະພາບຂອງ 2 ສະມາຄົມຢູ່ ບິ່ງເຟືອກ (ວັນທີ 6 ພະຈິກ), ພົບປະແລກປ່ຽນກັບບັນດານັກຮົບອາສາສະໝັກ, ອະດີດນັກຊ່ຽວຊານ, ທະຫານປ້ອງກັນຊາຍແດນ, ຄະນະຊາວໜຸ່ມແຂວງ ດັກນົງ (7 ພະຈິກ).

ນີ້ກໍ່ແມ່ນໂອກາດເພື່ອໃຫ້ 2 ສະມາຄົມ ແລກປ່ຽນຂໍ້ມູນຂ່າວສານ, ແບ່ງປັນປະສົບການ, ສະເໜີຂໍ້ລິເລີ່ມ ແລະ ມາດຕະການເພີ່ມທະວີການຮ່ວມມື, ສົມທົບກັນຈັດຕັ້ງບັນດາການເຄື່ອນໄຫວໂຄສະນາເຜີຍແຜ່, ສຶກສາໃຫ້ປະຊາຊົນທຸກຊັ້ນວັນນະຢູ່ແຕ່ລະປະເທດ ກ່ຽວກັບໃູນເຊື້ອຄວາມສາມັກຄີ. ມິດຕະພາບ ແລະ ການຮ່ວມມືຮອບດ້ານ ຫວຽດນາມ - ກຳປູເຈຍ; ເປັນເຈົ້າການຕໍ່ສູ້ຕ້ານການຖະແຫຼງການໂຄສະນາເຜີຍແຜ່ທີ່ບິດເບືອນ ເພື່ອແນໃສ່ແບ່ງແຍກສາຍພົວພັນມິດຕະພາບທີ່ເປັນມູນເຊື້ອລະຫວ່າງປະຊາຊົນສອງປະເທດ.

ການພົບປະມິດຕະພາບ ແລະ ການຮ່ວມມືປະຊາຊົນຫວຽດນາມ - ກຳປູເຈຍ ຄັ້ງທີ 5

ຕາມບົດລາຍງານສັງລວມ 10 ປີແຫ່ງການເຄື່ອນໄຫວປູກລ້ຽງຄວາມມິດຕະພາບຂອງສະມາຄົມມິດຕະພາບ ຫວຽດນາມ - ກຳປູເຈຍ, ການປູກລ້ຽງຄວາມມິດຕະພາບ ແມ່ນໂຄງການທີ່ເຕັມໄປດ້ວຍຄວາມມະນຸດສະທຳ, ເຂັ້ມຂຸ້ນໄປດ້ວຍວັດທະນະທຳຂອງ 2 ຊາດ ແລະ ມີກຳລັງແຜ່ຂະຫຍາຍຢ່າງກວ້າງຂວາງ. ໂດຍເລີ່ມຈາກ 12 ຄອບຄົວອາສາສະໝັກ ເພື່ອໜູນຊ່ວຍນັກຮຽນ 34 ຄົນທີ່ພວມຮ່ຳຮຽນຢູ່ຮ່າໂນ້ຍ ແລະ ໄທບິ່ງ, ນັບແຕ່ນັ້ນມາ, ໂຄງການດັ່ງກ່າວໄດ້ຂະຫຍາຍໄປເຖິງບັນດາແຂວງ, ນະຄອນທີ່ນັກຮຽນ ກຳປູເຈຍ ພວມຮ່ຳຮຽນ, ດ້ວຍກວ່າ 100 ຄອບຄົວ, ອົງການຈັດຕັ້ງ, ສ່ວນບຸກຄົນໄດ້ອຸປະຖຳໜູນຊ່ວຍນັກຮຽນເກືອບ 500 ຄົນ.

ຄຽງຄູ່ກັບການເຄື່ອນໄຫວອຸປະຖຳໂດຍກົງ, ການເຄື່ອນໄຫວໜູນຊ່ວຍ ແລະ ສະໜັບສະໜູນນັກສຶກສາ ກໍ່ໄດ້ດຳເນີນໄປຢ່າງຕັ້ງໜ້າຢູ່ທຸກຂັ້ນຂອງສະມາຄົມ. ໃນ 10 ປີຜ່ານມາ, ດ້ວຍການໜູນຊ່ວຍຂອງຫຼາຍອົງການ, ຂະແໜງການ, ອົງການຈັດຕັ້ງມະຫາຊົນ, ທ້ອງຖິ່ນ, ວິສາຫະກິດ, ອົງການກຸສົນສັງຄົມ ແລະ ຄົນໃຈສັດທາ, ສະມາຄົມທຸກຂັ້ນໄດ້ສົມທົບກັນຢ່າງຕັ້ງໜ້າກັບສະຫະພັນບັນດາອົງການມິດຕະພາບ ຫວຽດນາມ ໃນທຸກຂັ້ນ ໄດ້ຈັດຕັ້ງນັບຮ້ອຍລາຍການໜູນຊ່ວຍ ນັກສຶກສາຫລາຍພັນຄົນ ໃນຮູບແບບ ຄື: ມອບລາງວັນ, ຂອງຂວັນ ແລະ ມອບທຶນການສຶກສາ; ຈັດຕັ້ງການພົບປະ, ແລກປ່ຽນມິດຕະພາບ, ການຢ້ຽມຢາມທັດສະນະ, ຮຽນຮູ້ຕົວຈິງ; ສະໜອງອຸປະກອນ, ເຄື່ອງໃຊ້ທີ່ຈຳເປັນ... ປະກອບສ່ວນຢ່າງແທດຈິງຊ່ວຍໃຫ້ນັກສຶກສາມີຄວາມອຸ່ນອຽນໃຈໃນການຮ່ຳຮຽນ ແລະ ປັບປຸງຊີວິດດ້ານວັດທະນະທຳຈິດໃຈ.

ຜ່ານການເຄື່ອນໄຫວຂອງໂຄງການ, ການພົວພັນລະຫວ່າງບັນດາໝູ່ຄະນະ, ຄອບຄົວ, ຜູ້ອຸປະຖຳ ແລະ ບຸກຄົນ ແລະ ນັກຮຽນນັບມື້ນັບແໜ້ນແຟ້ນກ່ວາອີກ. ຜົນສຳເລັດເບື້ອງຕົ້ນຂອງໂຄງການ ແມ່ນນັກຮຽນສ່ວນຫຼາຍມີຄວາມໝັ້ນໃຈ ແລະ ມີຜົນການຮຽນດີ, ບັນລຸໄດ້ຄະແນນດີ ໃນການສອບເສັງຈົບຊັ້ນ; ບັນດານັກຮຽນ ທີ່ກັບເມືອບ້ານລ້ວນແຕ່ມີວຽກເຮັດງານທຳທີ່ໝັ້ນຄົງ, ເໝາະສົມກັບວິຊາສະເພາະ ແລະ ມີໂອກາດພັດທະນາ, ນັກຮຽນບາງຄົນ ໄດ້ຮຽນຕໍ່ລະດັບປະລິນຍາໂທ ຫຼື ປະລິນຍາເອກ ແລະ ຍັງຄົງຮັກສາຄວາມຊົງຈຳອັນດີງາມຂອງຊີວິດນັກສຶກສາຢູ່ ຫວຽດນາມ. ໝາກຜົນຂອງໂຄງການໄດ້ຮັບການຮັບຮູ້ ແລະ ຕີລາຄາສູງຈາກການນຳຂັ້ນສູງ ແລະ ປະຊາຊົນສອງປະເທດ.

ທ່ານ Vann Pha - ທີ່ປຶກສາທ່ານນາຍົກລັດຖະມົນຕີ Hun Sen, ຮອງປະທານສະມາຄົມມິດຕະພາບກຳປູເຈຍ-ຫວຽດນາມ ໄດ້ທວນຄືນປະຫວັດສາດ ແລະ ຮີດຄອງປະເພນີແຫ່ງຄວາມສາມັກຄີ, ສະໜັບສະໜູນເຊິ່ງກັນ ແລະ ກັນລະຫວ່າງ ກຳປູເຈຍ ແລະ ຫວຽດນາມ.

ກ່າວຄຳເຫັນທີ່ການປິດລາຍການ, ທ່ານ ເລຮົ່ງລຽມ, ຮອງປະທານສະມາຄົມມິດຕະພາບຫວຽດນາມ - ກຳປູເຈຍ ໃຫ້ຮູ້ວ່າ: 2 ສະມາຄົມຈະສືບຕໍ່ເສີມຂະຫຍາຍບົດບາດເປັນຂົວຕໍ່ມິດຕະພາບ, ເຊື່ອມຕໍ່ປະຊາຊົນ, ນັກທຸລະກິດ, ຊາວໜຸ່ມຂອງສອງປະເທດ. ເພື່ອໃຫ້ປະຊາຊົນທັງສອງປະເທດຮ່ວມແຮງຮ່ວມໃຈກັນປະກອບສ່ວນປົກປັກຮັກສາ, ບຳລຸງສ້າງ ແລະ ພັດທະນາສາຍພົວພັນມິດຕະພາບ ແລະ ການຮ່ວມມືຮອບດ້ານ ຫວຽດນາມ - ກຳປູເຈຍ.

ໃນຂອບເຂດການພົບປະ, ຄະນະຜູ້ແທນປະຊາຊົນສອງປະເທດ ຫວຽດນາມ - ກຳປູເຈຍ ໄດ້ໄປຢ້ຽມຢາມໂຮງງານ Alumin Nhan Co ຂອງບໍລິສັດ Alumin ດັກນົງ - TKV (ດັກລັກ, ດັກນົງ), ແລະ ໄດ້ຮັບຟັງກ່ຽວກັບການແນະນຳ ແລະ ເຄື່ອນໄຫວຂອງໂຮງງານ.

ຕອນເຊົ້າວັນທີ 8 ພະຈິກ, ການນຳສະຫະພັນບັນດາອົງການມິດຕະພາບ ຫວຽດນາມ ແລະ ສະມາຄົມມິດຕະພາບ ຫວຽດນາມ - ກຳປູເຈຍ ໄດ້ສົ່ງຄະນະຜູ້ແທນປະຊາຊົນກຳປູເຈຍ ກັບເມືອປະເທດ, ສິ້ນສຸດການຢ້ຽມຢາມ ແລະ ເຮັດວຽກຢູ່ ຫວຽດນາມ ຢ່າງສຳເລັດຜົນ.

ການນຳສະຫະພັນບັນດາອົງການມິດຕະພາບ ຫວຽດນາມ ແລະ ສະມາຄົມມິດຕະພາບ ຫວຽດນາມ - ກຳປູເຈຍ ໄດ້ສົ່ງຄະນະຜູ້ແທນປະຊາຊົນກຳປູເຈຍ ກັບເມືອປະເທດ

ຜົນສຳເລັດຂອງກອງປະຊຸມ ໄດ້ສ້າງກຳລັງແຮງໃໝ່ອັນສຳຄັນ ເພື່ອຊ່ວຍໃຫ້ສອງສະມາຄົມປະສົບຜົນສຳເລັດຕາມບົດບັນທຶກຊ່ວຍຈຳທີ່ໄດ້ລົງນາມດ້ວຍບັນດາການເຄື່ອນໄຫວທີ່ແທດຈິງ ຄື: ຕັ້ງໜ້າແລກປ່ຽນຄະນະຜູ້ແທນ, ຈັດຕັ້ງການພົບປະມິດຕະພາບ, ແລກປ່ຽນວັດທະນະທຳ ແລະ ການເຄື່ອນໄຫວຊຸມຊົນລະຫວ່າງສະມາຄົມທຸກຂັ້ນຂອງສອງປະເທດ; ສືບຕໍ່ຊຸກຍູ້ໂຄງການປູກລ້ຽງຄວາມມິດຕະພາບ ແລະ ເບິ່ງແຍງດູແລນັກສຶກສາ ກຳປູເຈຍ ທີ່ພວມຮໍ່າຮຽນຢູ່ຫວຽດນາມ; ຈັດຕັ້ງໂຄງການຝຶກອົບຮົມການນໍາຮຸ່ນໜຸ່ມ ແລະ ເຊື່ອມຕໍ່ກັນສ້າງຊຸດຝຶກອົບຮົມວິຊາຊີບ ໃຫ້ແກ່ໄວໜຸ່ມຢູ່ບັນດາແຂວງທີ່ມີຊາຍແດນຕິດຈອດກັນ ເພື່ອແນໃສ່ຮັດແໜ້ນຄວາມສາມັກຄີມິດຕະພາບລະຫວ່າງຊາວໜຸ່ມສອງປະເທດ; ສົມທົບກັນຊຸກຍູ້ການເຄື່ອນໄຫວ, ການຮ່ວມມືດ້ານເສດຖະກິດ, ການຄ້າ ແລະ ການລົງທຶນລະຫວ່າງສອງປະເທດ, ສ້າງເງື່ອນໄຂສະດວກໃຫ້ບັນດາວິສາຫະກິດຂອງສອງປະເທດ ເປີດກວ້າງການຮ່ວມມືລົງທຶນ, ດຳເນີນທຸລະກິດໃຫ້ນັບມື້ນັບແທດຈິງ ແລະ ມີປະສິດທິຜົນ.