ຕອນບ່າຍວັນທີ 27 ມິຖຸນາ, ຢູ່ຮ່າໂນ້ຍ, ທ່ານເລຂາທິການສູນກາງພັກ, ປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ໂດ໊ວັນຈ໊ຽນ ໄດ້ມີການພົບປະກັບທ່ານເອກອັກຄະລັດຖະທູດວິສາມັນຜູ້ມີອຳນາດເຕັມ ສະຫະພັນລັດເຊຍ ປະຈຳ ຫວຽດນາມ Gennady Bezdetko.
 |
| ບັນຍາກາດທີ່ການຕ້ອນຮັບ. ພາບ: TTXVN |
ທີ່ການພົບປະ, ທ່ານ ໂດ໊ວັນຈ໊ຽນ ມີຄວາມປິຕິຊົມຊື່ນຕໍ່ການພັດທະນາການພົວພັນອັນດີງາມລະຫວ່າງຫວຽດນາມ ແລະ ສະຫະພັນລັດເຊຍ ໃນຫຼາຍຂົງເຂດ; ເນັ້ນໜັກວ່າ ຫວຽດນາມ ຍາມໃດກໍ່ຖືເປັນສຳຄັນການພົວພັນມິດຕະພາບທີ່ເປັນມູນເຊື້ອ ແລະ ຄູ່ຮ່ວມມືຍຸດທະສາດຮອບດ້ານກັບສະຫະພັນລັດເຊຍ, ຍາມໃດກໍ່ຖື ລັດເຊຍ ແມ່ນຄູ່ຮ່ວມມືແຖວໜ້າໃນນະໂຍບາຍການຕ່າງປະເທດຂອງ ຫວຽດນາມ.
ທ່ານ ໂດ໊ວັນຈ໊ຽນ ຕີລາຄາສູງການປະກອບສ່ວນຂອງທ່ານເອກອັກຄະລັດຖະທູດ Gennady Bezdetko ໃນການຊຸກຍູ້ການພົວພັນລະຫວ່າງສອງປະເທດໃນໄລຍະຜ່ານມາ, ເຊື່ອໝັ້ນວ່າ ທ່ານເອກອັກຄະລັດຖະທູດຈະມີຂໍ້ລິເລີ່ມຕື່ມອີກ, ປະກອບສ່ວນຊຸກຍູ້ສາຍພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດ.
ທ່ານເອກອັກຄະລັດຖະທູດ Gennady Bezdetko ໃຫ້ຮູ້ວ່າ: ພາຍຫຼັງສອງປີທີ່ປະສົບກັບຄວາມຫຍຸ້ງຍາກຍ້ອນໂລກລະບາດ, ການພົວພັນທາງການທູດລະຫວ່າງ 2 ປະເທດສືບຕໍ່ມີການພັດທະນາຢ່າງດີງາມ.
2 ຝ່າຍສືບຕໍ່ຮັກສາການພົວພັນໃນທຸກຂັ້ນ ແລະ ຜ່ານບັນດາຊ່ອງທາງຂອງພັກ, ລັດ, ລັດຖະບານ, ສະພາແຫ່ງຊາດ, ການພົບປະແລກປ່ຽນປະຊາຊົນ, ເພີ່ມທະວີການຮ່ວມມືໃນຂົງເຂດເສດຖະກິດ, ພະລັງງານ...
ທ່ານເອກອັກຄະລັດຖະທູດ Gennady Bezdetko ປາດຖະໜາວ່າ ຈະສືບຕໍ່ໄດ້ຮັບການສະໜັບສະໜູນ ແລະ ການຮ່ວມມືຂອງແນວໂຮມປະເທດຊາດ ຫວຽດນາມ, ພ້ອມກັນພັດທະນາສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງ 2 ປະເທດ....
ບູນມີ
