 |
ທ່ານ ຊັນສຸເກະ ບັນໂດ (Shunsuke Bando) ຜູ້ຊ່ຽວຊານອາວຸໂສຂອງຫ້ອງການ ທະນາຄານພັດທະນາອາຊີ (ADB) ປະຈໍາ ສປປ ລາວ.
ການພັດທະນາຕະຫລາດພັນທະບັດພາຍໃນ ໃຫ້ມີຄວາມເຂັ້ມແຂງ ແມ່ນມີຄວາມສຳຄັນຫລາຍ ເພາະສາມາດຫລຸດຜ່ອນການເໜັງຕີງ ຂອງເສດຖະກິດ ຈາກພາຍນອກ ແລະ ຊ່ວຍໃຫ້ເສດຖະກິດພາຍໃນ ມີຄວາມໝັ້ນທ່ຽງ, ພ້ອມທັງຮັບປະກັນການດຸ່ນດ່ຽງງົບປະມານ, ພັດທະນາພື້ນຖານໂຄງລ່າງ ແລະ ຂະຫຍາຍການຜະລິດທຸລະກິດ.
ຕາມການເປີດເຜີຍຂອງ ທ່ານ ຊັນສຸເກະ ບັນໂດ (Shunsuke Bando) ຜູ້ຊ່ຽວຊານອາວຸໂສຂອງຫ້ອງການ ທະນາຄານພັດທະນາອາຊີ (ADB) ປະຈໍາ ສປປ ລາວ ໃນກອງປະຊຸມສໍາມະນາ ກ່ຽວກັບຕະຫລາດພັນທະບັດ ໃນພາກພື້ນອາຊີຕາເວັນອອກ (Workshop on Bond Markets in Emerging East Asia) ທີ່ຈັດຂຶ້ນໃນທ້າຍອາທິດຜ່ານມາ ຢູ່ນະຄອນຫລວງວຽງຈັນ ໃຫ້ຮູ້ວ່າ: ສໍາລັບ ສປປ ລາວ ການພັດທະນາຕະຫລາດພັນທະບັດ ລັດຖະບານໄດ້ເລີ່ມແຕ່ຊຸມປີ 1990, ໂດຍການ ອອກພັນທະບັດຄັງເງິນ ແລະ ມາຮອດປັດຈຸບັນ ກໍໄດ້ເພີ່ມ ແລະ ຂະຫຍາຍການອອກພັນທະບັດປະເພດອື່ນໆ ທີ່ມີໄລຍະເວລາແຕກຕ່າງກັນ ຄື: 1 ປີ, 2 ປີ, 3 ປີ, 4 ປີ ແລະ 5 ປີ.
ສໍາລັບ ການພັດທະນາພັນທະບັດວິສະຫະກິດ ແມ່ນຢູ່ໃນຂັ້ນຕອນການກະກຽມ. ການພັດທະນາຕະຫລາດ ພັນທະບັດພາຍໃນ ແມ່ນມີຄວາມສໍາຄັນຫລາຍ, ເນື່ອງຈາກວ່າ ການລະດົມທຶນໃນຮູບແບບດັ່ງກ່າວ ແມ່ນການພັດທະນາກົນໄກລະດົມທຶນທັງໄລຍະສັ້ນ ແລະ ໄລຍະຍາວ, ສໍາລັບພາກລັດ ແລະ ເອກະຊົນ ເພື່ອເຂົ້າຫາແຫລ່ງທຶນທີ່ສົມເຫດສົມຜົນ ແລະ ສາມາດຫລຸດຜ່ອນປັດໄຈສ່ຽງ ຈາກສະພາບການເໜັງຕີງຂອງເສດຖະກິດຈາກພາຍນອກ ແລະ ການພັດທະນາຕະຫລາດພັນທະບັດພາຍໃນ ທີ່ເຂັ້ມແຂງ ແລະ ມີປະສິດທິພາບ ຈະຊ່ວຍເຮັດໃຫ້ເສດຖະກິດມີຄວາມໝັ້ນທ່ຽງ, ພ້ອມທັງຮັບປະກັນແຫລ່ງທຶນ ທີ່ຈໍາເປັນໃນການດຸນດ່ຽງງົບປະມານ, ພັດທະນາພື້ນ ຖານໂຄງລ່າງ ແລະ ຂະຫຍາຍການຜະລິດທຸລະກິດ ຊຸກຍູ້ເຮັດໃຫ້ເສດຖະກິດເຕີບໂຕຕໍ່ເນື່ອງ ແລະ ປະກອບສ່ວນ ເຂົ້າໃນການພັດທະນາເສດຖະກິດ -ສັງຄົມແຫ່ງຊາດ.
ທ່ານ ຊັນສຸເກະ ບັນໂດ ໃຫ້ຮູ້ຕື່ມວ່າ: ກອງປະຊຸມສໍາມະນາດັ່ງກ່າວ, ພາຍໃຕ້ຂໍ້ລິເລີ່ມຕະຫລາດພັນທະບັດອາຊີ ແນ່ໃສ່ຊຸກຍູ້ສົ່ງເສີມການພັດທະນາຕະຫລາດພັນ ທະບັດ ທີ່ເປັນສະກຸນເງິນທ້ອງ ຖິ່ນ ໃນພາກພື້ນອາຊຽນ+3 ເພື່ອສົ່ງເສີມຄວາມຮູ້ຄວາມເຂົ້າໃຈ ກ່ຽວກັບການພັດທະນາຕະຫລາດພັນທະບັດ, ແລກປ່ຽນບົດຮຽນ ແລະ ປະສົບການ ກ່ຽວກັບການພັດທະນາຕະຫລາດ ພັນທະບັດໃນພາກພື້ນອາຊຽນ+3, ພ້ອມສ້າງຂີດຄວາມສາມາດ ໃຫ້ແກ່ຜູ້ເຂົ້າຮ່ວມ ຈາກບັນດາກະຊວງ, ຂະແໜງການ ແລະ ອົງການກ່ຽວຂ້ອງຂອງ ສປປ ລາວ, ໂດຍສະເພາະ ແມ່ນເນັ້ນໃສ່ການພັດທະນາຕະຫລາດພັນທະບັດ ພາຍໃນ ໃຫ້ມີຄວາມເຂັ້ມແຂງ ສາມາດຫລຸດຜ່ອນການເໜັງ ຕີງຂອງເສດ ຖະກິດ ຈາກພາຍນອກ ແລະ ຊ່ວຍໃຫ້ເສດຖະກິດ ພາຍໃນມີຄວາມໝັ້ນທ່ຽງ, ພ້ອມຮັບປະກັນການດຸ່ນດ່ຽງງົບປະມານ, ພັດທະນາພື້ນຖານໂຄງລ່າງ ແລະ ຂະຫຍາຍການຜະລິດທຸລະກິດ.
（ແຫຼ່ງຂໍ້ມູນ： ຂປລ）
