ເຮັດໃຫ້ການພົວພັນຫວຽດນາມ-ກໍາປູເຈຍ ເລິກເຊິ່ງກວ່າອີກ, ຊຸກຍູ້ການຮ່ວມມືຂອງບັນດາພັກການເມືອງອາຊີ

	ເພີ່ມພູນຄູນສ້າງ, ເຮັດໃຫ້ສາຍ​ພົວພັນ​ແບບ​ພິ​ເສດ​ລະຫວ່າງ​ສອງ​ແຂວງ ຫາຍ​ເຢືອງ - ແຂວງ ວຽງ​ຈັນ ເລິກເຊິ່ງກວ່າອີກ
	ເຮັດໃຫ້ການພົວພັນຮ່ວມມືມິດຕະພາບທີ່ເປັນມູນເຊື້ອລະຫວ່າງຫວຽດນາມ-ໂມຊຳບິກ ເລິກເຊິ່ງກວ່າອີກ

ໂດຍໄດ້ຮັບຄໍາເຊີນຂອງທ່ານ Samdech Techo Hun Sen ປະທານພັກປະຊາຊົນກໍາປູເຈຍ, ທ່ານ Samdech Khuon Sudary ປະທານສະພາແຫ່ງຊາດ ກຳປູເຈຍ ແລະທ່ານ Chung Eui-yong ປະທານຄະນະປະຈຳກອງປະຊຸມສາກົນບັນດາພັກການເມືອງອາຊີ (ICAPP), ທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ໄດ້ນຳໜ້າຄະນະຜູ້ແທນຂັ້ນສູງພັກ, ລັດຫວຽດນາມ ໄປຢ້ຽມຢາມ ລາຊະອານາຈັກ ກຳປູເຈຍ ຢ່າງເປັນທາງການ, ເຂົ້າຮ່ວມກອງປະຊຸມຄົບຄະນະ ຄັ້ງທີ 12 ຂອງພັກ ICAPP ແລະວາລະປະຊຸມຄົບຄະນະ ຄັ້ງທີ 11 ຂອງລັດຖະສະພາສາກົນ ເພື່ອຄວາມໂອບອ້ອມອາລີ ແລະສັນຕິພາບ (IPTP) ໃນລະຫວ່າງວັນທີ 21-24 ພະຈິກ.

ກ່ອນທີ່ຈະໄປປະຕິບັດງານ, ທ່ານນາງ ເລທູຮ່າ ຮອງປະທານກຳມາທິການການຕ່າງປະເທດສະພາແຫ່ງຊາດຫວຽດນາມ ໄດ້ໃຫ້ສຳພາດຕໍ່ສື່ມວນຊົນ.

ຂໍຮຽນທ່ານນາງ, ເລື່ອງທ່ານປະທານສະພາແຫ່ງຊາດ ເຈິ່ນແທັງເໝິນ ແລະຄະນະຜູ້ແທນຂັ້ນສູງຂອງພັກ, ລັດຫວຽດນາມ ຈະໄປຢ້ຽມຢາມລາຊະອານາຈັກ ກຳປູເຈຍ ຢ່າງເປັນທາງການ ມີຄວາມໝາຍແນວໃດ?

ນີ້ແມ່ນການຢ້ຽມຢາມ ກຳປູເຈຍ ຢ່າງເປັນທາງການຄັ້ງທຳອິດຂອງທ່ານ ເຈິ່ນແທັງເໝິນ ໃນຖານະເປັນປະທານສະພາແຫ່ງຊາດຫວຽດນາມ. ການຢ້ຽມຢາມມີຄວາມໝາຍສຳຄັນຫຼາຍດ້ານ, ຢັ້ງຢືນນະໂຍບາຍການພົວພັນຕ່າງປະເທດຂອງກອງປະຊຸມໃຫຍ່ ຄັ້ງທີ XIII ຂອງພັກ, ໃນນັ້ນໄດ້ໃຫ້ບຸລິມະສິດສູງຕໍ່ການພົວພັນ “ບ້ານໃກ້ເຮືອນຄຽງອັນດີງາມ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ຍືນຍົງຍາວນານ” ກັບກຳປູເຈຍ, ສະແດງໃຫ້ເຫັນຄວາມໄວ້ເນື້ອເຊື່ອໃຈ, ຄວາມສະໜິດຕິດພັນລະຫວ່າງການນຳຂັ້ນສູງສອງປະເທດ ກໍ່ຄືລະຫວ່າງທ່ານປະທານສະພາແຫ່ງຊາດຫວຽດນາມ ກັບການນຳຂັ້ນສູງຂອງກຳປູເຈຍ; ປະກອບສ່ວນຜັນຂະຫຍາຍປະຕິບັດບັນດາຂໍ້ຕົກລົງຂັ້ນສູງ, ເປັນຕົ້ນແມ່ນໝາກຜົນຂອງການພົບປະປະຈຳປີລະຫວ່າງກົມການເມືອງພັກກອມມູນິດຫວຽດນາມ ກັບຄະນະປະຈໍາພັກປະຊາຊົນກໍາປູເຈຍ, ກໍ່ຄືບັນດາການພົບປະຂັ້ນສູງຂອງສາມພັກ ຫວຽດນາມ-ກໍາປູເຈຍ-ລາວ, ຊຸກຍູ້ໝາກຜົນການຢ້ຽມຢາມ ກໍາປູເຈຍ ຂອງທ່ານ ໂຕເລິມ ໃນເດືອນ ກໍລະກົດ 2024 ໃນຖານະເປັນເລຂາທິການໃຫຍ່, ປະທານປະເທດຫວຽດນາມ.

ການຢ້ຽມຢາມກໍ່ແນໃສ່ສືບຕໍ່ນຳການພົວພັນ ຫວຽດນາມ-ກຳປູເຈຍ ກ້າວເຂົ້າສູ່ໄລຍະພັດທະນາໃໝ່ບົນພື້ນຖານຄວາມສະເໝີພາບ, ຕ່າງຝ່າຍຕ່າງມີຜົນປະໂຫຍດ, ຮ່ວມມືຢ່າງມີປະສິດທິຜົນ, ເຄົາລົບຜົນປະໂຫຍດຂອງກັນ; ສະເໜີທິດທາງ ແລະມາດຕະການໃຫຍ່ແນໃສ່ຍົກສູງປະສິດທິຜົນ, ສ້າງກຳລັງໜູນໃໝ່ໃຫ້ແກ່ການພົວພັນຮ່ວມມືດ້ານເສດຖະກິດ, ເພີ່ມທະວີການເຊື່ອມຕໍ່ລະຫວ່າງສອງປະເທດໃນໄລຍະຈະມາເຖິງ; ເພີ່ມທະວີການພົບປະແລກປ່ຽນ, ການພົບປະລະຫວ່າງບັນດາກຳມາທິການ ແລະກຸ່ມສະມາຊິກລັດຖະສະພາມິດຕະພາບສອງປະເທດ ກໍ່ຄືສົມທົບກັນມີກະທໍາຢູ່ເວທີປາໄສລະຫວ່າງລັດຖະສະພາສາກົນ ແລະພາກພື້ນ.

ທ່ານນາງ ເລທູຮ່າ ຮອງປະທານກຳມາທິການການຕ່າງປະເທດສະພາແຫ່ງຊາດຫວຽດນາມ. ພາບ: ຟ້າມຖັ໊ງ

ທ່ານນາງ ສາມາດແບ່ງປັນຢ່າງຈະແຈ້ງຕື່ມກ່ຽວກັບເນື້ອໃນທີ່ພົ້ນເດັ່ນ, ເປັນໜ້າເອົາໃຈໃສ່ຂອງກອງປະຊຸມ ICAPP 12 ແລະວາລະປະຊຸມ IPTP 11?

ICAPP ແມ່ນເວທີປາໄສສາກົນໃຫຍ່ທີ່ສຸດຂອງບັນດາພັກການເມືອງຢູ່ພາກພື້ນອາຊີ ແລະກໍ່ແມ່ນເວທີປາໄສຫຼາຍຝ່າຍພັກການເມືອງໃຫຍ່ທີ່ສຸດໃນໂລກ, ໄດ້ສ້າງຕັ້ງໃນເດືອນກັນຍາ 2000 ຢູ່ ຟີລິບປິນ. ເປົ້າໝາຍຂອງ ICAPP ແມ່ນຊຸກຍູ້ການແລກປ່ຽນ ແລະຮ່ວມມືລະຫວ່າງບັນດາພັກການເມືອງຢູ່ທະວີບອາຊີ ແລະທະວີບໂອເຊອານີ, ເພີ່ມທະວີຄວາມເຂົ້າໃຈ, ຄວາມໄວ້ເນື້ອເຊື່ອໃຈລະຫວ່າງຊົນຊາດ ແລະປະເທດຕ່າໆ; ຊຸກຍູ້ສັນຕິພາບ ແລະວັດທະນາຖາວອນຜ່ານບົດບາດພິເສດຂອງການພົວພັນຊ່ອງທາງພັກ. ປະຈຸບັນ, ICAPP ມີກວ່າ 350 ພັກການເມືອງ ຂຶ້ນກັບ 52 ປະເທດ ແລະ 1 ຜືນແຜ່ນດິນທີ່ມີສິດເຂົ້າຮ່ວມກິດຈະກຳຕ່າງໆຂອງ ICAPP.

ໃນຊຸມປີມໍ່ໆມານີ້, ICAPP ໄດ້ຍົກສູງທີ່ຕັ້ງ ແລະອິດທິພົນຊື່ສຽງຢູ່ພາກພື້ນຢ່າງບໍ່ຢຸດຢັ້ງ, ພ້ອມທັງຢືນຢັນບົດບາດເປັນຂົວຕໍ່, ຊຸກຍູ້ການຮ່ວມມືລະຫວ່າງບັນດາພັກການເມືອງອາຊີ ກັບຄູ່ຮ່ວມມືຢູ່ພາກພື້ນອື່ນໃນໂລກ. ພັກກອມມູນິດຫວຽດນາມ ເຂົ້າຮ່ວມຢ່າງເປັນເຈົ້າການ, ຕັ້ງໜ້າ ແລະເປັນສະມາຊິກທີ່ສຳຄັນຂອງ ICAPP; ໄດ້ຮັບຄວາມໄວ້ວາງໃຈເລືອກຕັ້ງເປັນກໍາມະການຄະນະປະຈໍາຂອງ ICAPP ຢ່າງລຽນຕິດ; ມີທັດສະນະ ແລະອິດທິພົນຊື່ສຽງໃນການຕັດສິນໃຈຂອງອົງການ.

ກອງປະຊຸມ ICAPP 12 ໄດ້ຈັດຕັ້ງໃນລະຫວ່າງວັນທີ 21-24 ພະຈິກ ດ້ວຍຫົວຂໍ້ “ຊອກຫາສັນຕິພາບ ແລະໄກ່ເກ່ຍ”. ກອງປະຊຸມຄາດວ່າຈະຮັບຮອງເອົາຖະແຫຼງການສັນຕິພາບພະນົມເປັນກ່ຽວກັບການຊອກຫາສັນຕິພາບ, ໄກ່ເກ່ຍຜ່ານກຳລັງແຮງສັງລວມ ແລະການຮ່ວມມືຂອງພັກການເມືອງທັງພາຍໃນ ແລະນອກທະວີບອາຊີ.

IPTP ແມ່ນກົນໄກ ຂຶ້ນກັບສະພາຄວາມໂອບອ້ອມອາລີ ແລະສັນຕິພາບທົ່ວໂລກ (GCTP). ປະຈຸບັນ ກໍາປູເຈຍ ຮັກສາບົດບາດເປັນປະທານ IPTP ອາຍຸການ 2023-2024 ແລະເປັນບ່ອນຕັ້ງສຳນັກງານໃຫຍ່ຂອງ GCTP ຢູ່ພາກພື້ນອາຊີ-ປາຊີຟິກ. ວາລະປະຊຸມ IPTP 11 ຄາດວ່າຈະຮັບຮອງເອົາຖະແຫຼງການພະນົມເປັນກ່ຽວກັບການສະໜັບສະໜູນກົດບັດສັນຕິພາບເພື່ອມະນຸດ ແລະໂລກໃນການຊອກຫາສັນຕິພາບ, ຄວາມໂອບອ້ອມອາລີ ແລະໄກ່ເກ່ຍ” ແລະລະນຶກເຖິງກົດບັດສັນຕິພາບໂລກ.

ຂໍຮຽນທ່ານນາງ, ຄະນະຜູ້ແທນຫວຽດນາມ ໄດ້ກະກຽມຫຍັງແດ່ ແລະຄາດວ່າຈະມີການປະກອບສ່ວນລະອຽດໃດແດ່ຕໍ່ເນື້ອໃນຂອງເຫດການດັ່ງກ່າວ?

ເລື່ອງທ່ານປະທານສະພາແຫ່ງຊາດ ເຈິ່ນແທັງເໝິນ ຕາງໜ້າໃຫ້ພັກກອມມູນິດຫວຽດນາມ ເຂົ້າຮ່ວມກອງປະຊຸມ ICAPP 12 ແມ່ນແນໃສ່ຍູ້ແຮງການເຂົ້າຮ່ວມປະກອບສ່ວນຢ່າງຕັ້ງໜ້າຂອງພັກກອມມູນິດຫວຽດນາມ ທີ່ ICAPP, ຊຸກຍູ້ການພົວພັນກັບບັນດາພັກການເມືອງອາຊີ, ປະກອບສ່ວນເຂົ້າໃນບັນຫາລວມຂອງພາກພື້ນ; ເພີ່ມທະວີການພົວພັນລະຫວ່າງພັກກອມມູນິດຫວຽດນາມ ແລະພັກປະຊາຊົນກໍາປູເຈຍ, ສະແດງໃຫ້ເຫັນຄວາມເຄົາລົບນັບຖືຕໍ່ການນຳພັກ, ລັດ ກໍາປູເຈຍ.

ຕາມນັ້ນແລ້ວ, ຄາດວ່າ, ທ່ານປະທານສະພາແຫ່ງຊາດ ເຈິ່ນແທັງເໝິນ ຈະມີບົດກ່າວປາໄສສໍາຄັນທີ່ວາລະໄຂກອງປະຊຸມ ICAPP 12, ຕີລາຄາສູງທີ່ຕັ້ງ, ບົດບາດຂອງ ICAPP ໃນການຍົກສູງຄວາມສາມັກຄີສາກົນ, ຊຸກຍູ້ການແກ້ໄຂການຂັດແຍ້ງ, ການປະທະກັນຜ່ານການເຈລະຈາ ແລະການຮ່ວມມືຫຼາຍຝ່າຍບົນພື້ນຖານກົດໝາຍສາກົນ ແລະກົດບັດສະຫະປະຊາຊາດ; ຢືນຢັນແນວທາງການພົວພັນຕ່າງປະເທດເອກະລາດ, ເປັນເຈົ້າຕົນເອງ, ມີຄວາມຫຼາກຫຼາຍ, ຫຼາຍຮູບຫຼາຍແບບ, ພ້ອມແລ້ວທີ່ຈະເປັນເພື່ອນມິດ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈ, ເປັນສະມາຊິກທີ່ຕັ້ງໜ້າ ແລະມີຄວາມຮັບຜິດຊອບຂອງປະຊາຄົມໂລກ; ຢືນຢັນການສະໜັບສະໜູນສໍາລັບເປົ້າໝາຍຂອງ ICAPP , ໃຫ້ຄຳໝັ້ນສັນຍາປະກອບສ່ວນຢ່າງຕັ້ງໜ້າເຂົ້າໃນການປະຕິບັດເປົ້າໝາຍລວມຂອງ ICAPP ແລະສະເໜີແຜນນະໂຍບາຍ, ການກຳນົດທິດແນໃສ່ຊຸກຍູ້ສັນຕິພາບ, ການໄກ່ເກ່ຍທີ່ເໝາະສົມດ້ວຍຫົວຂໍ້ຂອງກອງປະຊຸມ…

ພ້ອມດຽວກັນນັ້ນ, ທ່ານປະທານສະພາແຫ່ງຊາດ ເຈິ່ນແທັງເໝິນ ກໍ່ຈະເຂົ້າຮ່ວມວາລະປະຊຸມ IPTP 11 ໃນຖານະເປັນແຂກຮັບເຊີນຂອງປະເທດເຈົ້າພາບ ແນໃສ່ສະແດງໃຫ້ເຫັນການສະໜັບສະໜູນ ແລະເຈດຈຳນົງຂອງປະເທດເຈົ້າພາບກໍາປູເຈຍ, ເປັນຕົ້ນແມ່ນໃນອາຍຸການ ກໍາປູເຈຍ ເປັນປະທານ IPTP; ຜ່ານນັ້ນ, ປະກອບສ່ວນເພີ່ມທະວີ, ປັບປຸງ ແລະພັດທະນາສາຍພົວພັນມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານລະຫວ່າງສອງສະພາແຫ່ງຊາດ ເວົ້າສະເພາະ ແລະສອງປະເທດເວົ້າລວມ.

ເພື່ອກະກຽມໃຫ້ແກ່ການເຂົ້າຮ່ວມຢ່າງຕັ້ງໜ້າຂອງຄະນະຜູ້ແທນຫວຽດນາມ ຢູ່ສອງເຫດການສຳຄັນດັ່ງກ່າວ, ກໍາມາທິການການຕ່າງປະເທດສະພາແຫ່ງຊາດ ໄດ້ສົມທົບກັບຄະນະພົວພັນຕ່າງປະເທດສູນກາງ, ກະຊວງການຕ່າງປະເທດ ແລະອົງການທີ່ກ່ຽວຂ້ອງຂອງຫວຽດນາມ, ພ້ອມທັງປຶກສາຫາລືກັບອົງການທີ່ກ່ຽວຂ້ອງຂອງກໍາປູເຈຍ ໃນການກະກຽມເນື້ອໃນ, ເອກະສານກອງປະຊຸມຕ່າງໆ.

ຂໍຂອບໃຈທ່ານນາງ !

ການ​ຮ່ວມ​ມື​ລະຫວ່າງ​ຫວຽດນາມ ​ແລະສະຫະພັນ​ລັດ​ເຊຍ ຈະ​ນັບ​ມື້​ນັບ​ເຂົ້າ​ເລິກເຊິ່ງກວ່າອີກ ຍສໝ - ນັກ​ຂ່າວ ຫງວຽນ​ດັງ​ຟາດ, ຫົວໜ້າບັນນາທິການ​​ວາລະສານ ແບັກເຢືອງ, ​ເລຂາທິການ​​ສະມາຄົມ​ມິດຕະພາບ ຫວຽດນາມ - ສະຫະພັນ​ລັດ​ເຊຍ ​ໃຫ້​ຮູ້​ຄືແນວນັ້ນ​ເມື່ອ​ໂອ້​ລົມ​ກັບ​ນັກ​ຂ່າວ​ໃນ​ໂອກາດ​ທີ່​ທ່ານ​ປະທານາທິບໍດີ​ລັດ​ເຊຍ Putin ມາ​ຢ້ຽມຢາມ ຫວຽດນາມ ​ແຕ່​ວັນ​ທີ 19 – 20 ມິຖຸນາ. ທ່ານ ຫງວຽນ​ດັງ​ຟາດ ​ແມ່ນ​ອະດີດ​ຫົວໜ້າ​ພະແນກ​ຂ່າວ​ໂລກ, ສໍານັກຂ່າວສານ ຫວຽດນາມ ​ແລະອະດີດ​ຫົວ​ໜ້າ​ອົງການຜູ້ຕາງໜ້າສໍານັກຂ່າວສານ ...

ເຮັດໃຫ້ການພົວພັນມິດຕະພາບ ແລະການຮ່ວມມືຫຼາຍດ້ານລະຫວ່າງ ຫວຽດນາມ - ກູບາ ເລິກເຊິ່ງກວ່າອີກ ຫວ່າງແລ້ວນີ້, ທ່ານ ຟ້າມມິງຈີ໊ງ ນາຍົກລັດຖະມົນຕີ ແຫ່ງ ສສ ຫວຽດນາມ ໄດ້ສົນທະນາທາງໄກກັບທ່ານ Manuel Marrero Cruz ນາຍົກລັດຖະມົນຕີ ແຫ່ງ ສ. ກູບາ ເພື່ອແລກປ່ຽນກ່ຽວກັບທິດທາງ, ມາດຕະການສືບຕໍ່ເພີ່ມທະວີການພົວພັນມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ ແລະຄວາມໄວ້ເນື້ອເຊື່ອໃຈລະຫວ່າງສອງພັກ, ສອງລັດຖະບານ ແລະປະຊາຊົນສອງປະເທດ.