ທະຫານແຂວງອຸດົມໄຊ ກັບ ບໍລິສັດ 705 ສສ ຫວຽດນາມ ແລກປ່ຽນບົດຮຽນຮ່ວມກັນ

ບັນຍາກາດກອງປະຊຸມແລກປ່ຽນບົດຮຽນສອງຝ່າຍ.

ໃນການພົບປະແລກການບົດຮຽນຮ່ວມກັນໃນຄັ້ງນີ້ ສະຫາຍ ພັນເອກພິເສດ ຫງວຽນ ຮື ເຮົາ ຮອງປະທານບໍລິສັດ 705 ກໍ່ໄດ້ລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານພະລາທິການຂອງບໍລິສັດໃນໄລຍະຜ່ານມາເປັນຕົ້ນແມ່ນ: ການຈັດສັນປັບປຸງຄ້າຍຄູ, ວຽກງານອຸປະໂພກ-ບໍລິໂພກ ແລະການປູກຝັງ-ລ້ຽງສັດ, ພ້ອມດຽວກັນນີ້ທັງສອງຝ່າຍກໍ່ໄດ້ສົນທະນາແລກປ່ຽນຄຳຄິດຄຳເຫັນຮ່ວມກັນ ເພື່ອຊອກຫາວິທີປັບປຸງແກ້ໄຂວຽກງານພະລາທິການທັງສອງກົມກອງໃຫ້ນັບມື້ດີຂື້ນ, ເຮັດໃຫ້ພະນັກງານ-ນັກຮົບມີຢູ່ມີກີນ ສາມາດເພິງຕົນເອງ, ກຸ້ມຕົນເອງ ແລະສ້າງຄວາມເຂັ້ມແຂງດ້ວຍຕົນເອງ.

ໃນໂອກາດດຽວກັນນີ້ ສະຫາຍ ພັນເອກ ຄຳຍີນ ແສງສຸລີ ຮອງເລຂາພັກ ຫົວໜ້າການເມືອງກອງບັນຊາການທະຫານແຂວງອຸດົມໄຊ ກໍໄດ້ກ່າວສະແດງຄວາມຂອບໃຈນຳບໍລິສັດ 705 ສສ ຫວຽດນາມປະຈຳແຂວງອຸດົມໄຊ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະໃຫ້ການຮ່ວມມືຊ່ວຍເຫຼືອໂດຍຕະຫຼອດມາ, ພ້ອມທັງອວຍພອນໄຊໃຫ້ສາຍພົວພັນນ້ຳໃຈມິດຕະພາບ ຄວາມສາມັກຄີແບບພິເສດລະຫວ່າງລາວ-ຫວຽດນາມ ເວົ້າລວມ ເວົ້າສະເພາະແມ່ນກອງບັນຊາການທະຫານແຂວງອຸດົມໄຊ ກັບບໍລິສັດ 705 ສສ ຫວຽດນາມປະຈຳແຂວງອຸດົມໄຊໃຫ້ໝັ້ນຄົງທະນົງແກ່ນຕະຫຼອດກາລະນານ.

（ແຫຼ່ງ​ຂໍ້​ມູນ​： ທະນູວັນ/ວສລ）