 | Children of Vietnam ໜູນຊ່ວຍເຂົ້າປຽກເຂົ້າທີ່ມີປະໂຫຍດທາງໂພຊະນາການໃຫ້ນັກຮຽນອະນຸບານແຂວງກວາງນາມ |
| Viettel ສຳເລັດຍຸດທະສາດ ເຄືອຂ່າຍໂທລະຄົມມະນາຄົມ 'Make in Vietnam' |
ເຮືອນໃໝ່, ຊີວິດໃໝ່
ສອງປີກ່ອນ, ຄອບຄົວ ອ້າຍ ຫງວຽນວັນທວ້າຍ (ບ້ານ ອານເກື່ອງ, ຕາແສງ ເກ໋ວເຖະ, ເມືອງ ຫຽບດຶກ, ແຂວງ ກວ໋າງນາມ) ໄດ້ອາໄສຢູ່ເຮືອນທີ່ຊຸດໂຊມຢູ່ແຄມແມ່ນ້ຳ. ເຮືອນຫຼັງໃໝ່ຂອງ ອ້າຍ ທວ້າຍ ໄດ້ຮັບການກໍ່ສ້າງໃນປີ 2022 ພາຍຫຼັງການສຳຫຼວດຂອງ Habitat ຫວຽດນາມ ແລະ ຄະນະຄຸ້ມຄອງໂຄງການເມືອງ ຫຽບດຶກ. ດ້ວຍງົບປະມານ 65 ລ້ານດົ່ງ, ບວກກັບການປະກອບສ່ວນຈາກຄອບຄົວ, ເຮືອນຊັ້ນເຄິ່ງ ກ້ວາງ 60 ຕາແມັດລວມມີຫ້ອງຮັບແຂກ, ສອງຫ້ອງນອນ ໄດ້ກໍ່ສ້າງສຳເລັດແລ້ວ.
 |
| ເຮືອນຫຼັງໃໝ່ຂອງອ້າຍ ຫງວຽນວັນທວ້າຍ. (ພາບ: Habitat ຫວຽດນາມ) |
ອ້າຍ ທວ້າຍ ກ່າວວ່າ "ກ່ອນໜ້ານີ້, ຄອບຄົວຂ້າພະເຈົ້າມີ 5 ຄົນອາໄສຢູ່ເຮືອນນ້ອຍຫຼັງໜຶ່ງ ຂະໜາດ 25 ຕາແມັດ ກໍ່ສ້າງເມື່ອ 20 ກວ່າປີກ່ອນ, ເຮືອນບໍ່ມີເສົາຫຼັກ, ຝາມີຮອຍແຕກ ແລະ ຫລັງຄາເຫຼັກຖືກເສຍຫາຍຢ່າງໜັກໜ່ວງ. ທຸກໆຄັ້ງທີ່ມີຝົນຕົກໜັກ ຫຼື ແຜ່ນດິນໄຫວ, ພວກຂ້າພະເຈົ້າກັງວົນວ່າມັນຈະພັງລົງ. ດ້ວຍການໜູນຊ່ວຍຂອງ Habitat ຫວຽດນາມ ແລະ ອຳນາດການປົກຄອງ, ປະຈຸບັນພວກຂ້າພະເຈົ້າມີບ້ານຢູ່ທີ່ປອດໄພ. ເດັກນ້ອຍມີບ່ອນຮຽນທີ່ດີກວ່າ, ຊີວິດຄອບຄົວໝັ້ນຄົງກວ່າ”.
ໃນຂະນະດຽວກັນ, ເອື້ອຍ ຫງວຽນຮົ່ງເວີນ ແລະ ລູກ 5 ຄົນ (ບ້ານ 1, ຕາແສງ ຕຽນລານ, ເມືອງ ຕຽນເຟືອກ) ກໍ່ໄດ້ປະສະພາບການດຳລົງຊີວິດຊົ່ວຄາວເພື່ອຍ້າຍໄປຢູ່ເຮືອນໃໝ່ໃນເດືອນກໍລະກົດ 2024. ເຮືອນກ້ວາງ 36 ຕາແມັດ ປະກອບມີຫ້ອງຮັບແຂກ, 2 ຫ້ອງນອນ ແລະ 1 ຫ້ອງນ້ຳ, ຊ່ວຍໃຫ້ຄອບຄົວມີຊີວິດທີ່ປອດໄພ ແລະ ໝັ້ນຄົງ.
ເອື້ອຍ ເວີນ ໃຫ້ຮູ້ວ່າ "ເຮືອນເກົ່າຂອງພວກຂ້າພະເຈົ້າມີເນື້ອທີ່ພຽງແຕ່ 12 ຕາແມັດ, ອາກາດໜາວໃນລະດູຝົນ ແລະ ຮ້ອນໃນລະດູຮ້ອນ. ທຸກໆຄັ້ງທີ່ມີຝົນຕົກໜັກ ແລະ ລົມແຮງ, ຂ້າພະເຈົ້າຕ້ອງພາລູກກັບບ້ານແມ່ ເພື່ອຫຼີກຄວາມສ່ຽງເປັນອັນຕະລາຍ. Habitat ຫວຽດນາມ ໜູນຊ່ວຍ 40 ລ້ານດົ່ງ, ພ້ອມກັບການຊ່ວຍເຫຼືອຂອງອຳນາດການປົກຄອງ ແລະ ເງິນກູ້ເພີ່ມເຕີມ, ຂ້າພະເຈົ້າໄດ້ມີເຮືອນຫຼັງໃໝ່”.
ມາດຕະການທີ່ສ້າງສັນ
ຕາມ Habitat ຫວຽດນາມ ແລ້ວ, ເຮືອນຫຼັງໃໝ່ຂອງເອື້ອຍ ເວີນ ແລະ ອ້າຍ ທວ້າຍ ໄດ້ກໍ່ສ້າງໃນຂອບເຂດຂອງ 2 ໂຄງການຄື: “ຫຼຸດຜ່ອນຜົນກະທົບຈາກການປ່ຽນແປງຂອງດິນຟ້າອາກາດໄປເຖິງສະພາບເສຍຫາຍຊຸດໂຊມຂອງທີ່ຢູ່ອາໄສໃນຊຸມຊົນ” (ປະຕິບັດແຕ່ເດືອນພະຈິກ 2021 ຫາເດືອນມິຖຸນາ 2024) ແລະ “ກໍ່ສ້າງກຳລັງແຮງຕ້ານທານໄພທຳມະຊາດ ຜ່ານການແກ້ໄຂທີ່ຢູ່ອາໄສ ແລະ ການສ້າງກຳລັງຄວາມສາມາດໃນຊຸມຊົນ” (ແຕ່ເດືອນມີນາ 2023 ຫາ ເດືອນພະຈິກ 2024) ຢູ່ເມືອງ ຕຽນເຟືອກ ແລະ ຫຽບດຶກ, ແຂວງ ກວ໋າງນາມ.
 |
| ເຮືອນຫຼັງນີ້ມີຊັ້ນເຄິ່ງທີ່ແຂງແຮງ, ຊ່ວຍໃຫ້ຄອບຄົວຂອງ ອ້າຍ ທວ້າຍ ມີຄວາມປອດໄພເມື່ອເຂົ້າມາຢູ່ອາໄສໃນລະດູພະຍຸ. (ພາບ: Habitat ຫວຽດນາມ) |
ໃນເວລາທີ່ຜັນຂະຫຍາຍ, ທັງ 2 ໂຄງການໄດ້ສະໜັບສະໜູນການກໍ່ສ້າງເຮືອນໃໝ່ 49 ຫຼັງ, ສ້ອມແປງ 85 ຫຼັງ, ສຳເລັດການອະນາໄໃຫ້ມ 65 ຄອບຄົວ ແລະ ສະຖານທີ່ຊຸມຊົນ 3 ແຫ່ງໃນ 2 ເມືອງຂ້າງເທິງ. ນອກຈາກນັ້ນ, Habitat ຫວຽດນາມ ຍັງຈັດຕັ້ງບັນດາໂຄງການຝຶກອົບຮົມ ແລະ ໂຄສະນາສື່ສານ ເພື່ອຊ່ວຍຍົກສູງຄວາມສາມາດຮັບມືກັບໄພພິບັດທໍາມະຊາດຂອງປະຊາຊົນ.
ຕາມທ່ານນາງ Bells Borja, ຜູ້ອຳນວຍການແຫ່ງຊາດອົງການ Habitat ຫວຽດນາມ ແລ້ວ, ໂຄງການກໍ່ສ້າງທີ່ຢູ່ອາໄສໄດ້ຮັບການອອກແບບພິເສດເພື່ອຮັບມືກັບໄພພິບັດ, ພ້ອມທັງເໝາະສົມກັບວັດທະນະທຳ, ຮີດຄອງປະເພນີ, ການເງິນຂອງແຕ່ລະຄອບຄົວ. ຈຸດເດັ່ນຂອງໂຄງການແມ່ນ:
ກ່ອນອື່ນໝົດ, ປະຊາຊົນໄດ້ຮັບການຊຸກຍູ້ໃຫ້ມີສ່ວນຮ່ວມໃນທຸກຂັ້ນຕອນ, ຈາກການອອກແບບຈົນເຖິງການກວດກາການກໍ່ສ້າງ. ອັນນີ້ຊ່ວຍຮັບປະກັນວ່າເຮືອນເໝາະສົມກັບຄວາມຕ້ອງການຕົວຈິງຂອງເຈົ້າ ແລະ ເພີ່ມການມີສ່ວນຮ່ວມ.
ທີສອງ, ເຮືອນຖືກອອກແບບໃຫ້ເຫມາະສົມກັບວັດທະນະທໍາທ້ອງຖິ່ນ. ຢູ່ເຂດພູດອຍ ກວ໋າງນາມ, Habitat ຫວຽດນາມ ໄດ້ອອກແບບເຮືອນທີ່ເໝາະສົມກັບວັດທະນະທຳຂອງຊາວເຜົ່າສ່ວນໜ້ອຍ ແລະ ທັງແຂງແຮງ ທັງສາມາດຕ້ານໄພທຳມະຊາດໄດ້.
ທີສາມ, ອົງການໝູນໃຊ້ວັດສະດຸທ້ອງຖິ່ນ, ນໍາໃຊ້ວິທີແກ້ໄຂປ່ຽນແທນເຊັ່ນ: ມຸງສັງກະສີແທນທີ່ຈະເປັນມຸງດິນຂໍເພື່ອຫຼຸດຜ່ອນຄ່າໃຊ້ຈ່າຍໃນຂະນະທີ່ຍັງຮັບປະກັນຄວາມທົນທານ.
ທີສີ່, Habitat ຫວຽດນາມ ໄດ້ຈັດຕັ້ງບັນດາໂຄງການຝຶກອົບຮົມເຕັກນິກກໍ່ສ້າງເຮືອນຢູ່ທີ່ປອດໄພຈາກໄພພິບັດ ແລະ ນຳໃຊ້ວິທີການເຂົ້າຮ່ວມເພື່ອໃຫ້ມີເຮືອນຢູ່ທີ່ປອດໄພ (PASSA - Participatory Approach for Safe Shelter Awareness). ໂຄງການເຫຼົ່ານີ້ບໍ່ພຽງແຕ່ຊ່ວຍໃຫ້ປະຊາຊົນປັບປຸງຄວາມສາມາດໃນການກໍ່ສ້າງທີ່ຢູ່ອາໄສເທົ່ານັ້ນ, ແຕ່ຍັງເຜີຍແຜ່ທັກສະ ແລະ ຄວາມຮູ້ໃນຊຸມຊົນນຳອີກ.
ໃນສະພາບການປ່ຽນແປງຂອງດິນຟ້າອາກາດທີ່ນັບມື້ນັບຮ້າຍແຮງ, Habitat ຫວຽດນາມ ໃຫ້ຮູ້ວ່າ ຈະເປີດກ້ວາງບັນດາໂຄງການກໍ່ສ້າງເຮືອນຢູ່ທີ່ປອດໄພໃນທົ່ວປະເທດ.
ທ່ານນາງ Bells Borja ກ່າວວ່າ “ການປ່ຽນແປງຂອງດິນຟ້າອາກາດບໍ່ພຽງແຕ່ແມ່ນສິ່ງທ້າທາຍດ້ານສິ່ງແວດລ້ອມເທົ່ານັ້ນ ຫາກຍັງສົ່ງຜົນສະທ້ອນຢ່າງເລິກເຊິ່ງເຖິງການຮັບປະກັນຊີວິດສັງຄົມ, ພິເສດແມ່ນບັນດາຄອບຄົວທີ່ມີລາຍຮັບຕ່ຳ ແລະ ຊຸມຊົນທີ່ຖືກຄວາມສ່ຽງງ່າຍຢູ່ ຫວຽດນາມ. Habitat ຫວຽດນາມ ໃຫ້ຄຳໝັ້ນສັນຍາຍຸດທະສາດໄລຍະຍາວເພື່ອຍົກສູງທີ່ຢູ່ອາໄສ, ຍົກສູງຄຸນນະພາບຊີວິດ ແລະ ສ້າງປະຊາຄົມແບບຍືນຍົງກວ່າ”.
ທ່ານນາງໃຫ້ຮູ້ວ່າ ອົງການໄດ້ສຸມໃສ່ການກໍ່ສ້າງ, ສ້ອມແປງ ແລະ ຍົກລະດັບທີ່ຢູ່ອາໄສທີ່ປອດໄພດ້ວຍການມີສ່ວນຮ່ວມໂດຍກົງຂອງຄອບຄົວໂດຍຜ່ານຮູບແບບ "ປະກອບສ່ວນກໍ່ສ້າງ" (sweat equity) ແລະ ໜູນຊ່ວຍທາງດ້ານການເງິນໂດຍເງິນກູ້ຢືມຈຸນລະພາກ. ພ້ອມກັນນັ້ນ, Habitat ຫວຽດນາມ ກໍ່ສົມທົບກັບລັດຖະບານ ແລະ ຊຸມຊົນປະຕິບັດບັນດາແຜນການຫຼຸດຜ່ອນຄວາມສ່ຽງຈາກໄພພິບັດ, ນຳໃຊ້ບັນດາມາດຕະການ “ສ້າງຄວາມປອດໄພ”, ປັບປຸງການເຂົ້າເຖິງຂອງນ້ຳສະອາດ ແລະ ສຸຂະອະນາໄມຜ່ານບັນດາຂໍ້ລິເລີ່ມຄື: ການເກັບກັກນ້ຳຝົນ, ອ່າງເກັບນ້ຳ ແລະ ລະບົບສຸຂາພິບານ.
ຫນຶ່ງໃນບັນດາການເຄື່ອນໄຫວຈຸດສຸມຂອງອົງການແມ່ນເພື່ອຜັນຂະຫຍາຍແບບວິທີການ PASSA ເພື່ອຍົກສູງຄວາມຮັບຮູ້ຂອງປະຊາຊົນກ່ຽວກັບການປົກປັກຮັກສາເຮືອນທີ່ຢູ່ອາໄສ, ເພີ່ມທະວີການຕ້ານໄພພິບັດ ແລະ ການຄຸ້ມຄອງຄວາມສ່ຽງ. ຕາມທ່ານນາງ Bells Borja ແລ້ວ, ຜ່ານບັນດາຊຸດອົບຮົມ, Habitat ຫວຽດນາມ ໄດ້ແນະນຳໃຫ້ຊຸມຊົນກ່ຽວກັບການກວດກາ, ສ້ອມແປງ ແລະ ບຳລຸງສ້າງເຮືອນຢູ່ເພື່ອຫຼຸດຜ່ອນຄວາມເສຍຫາຍຈາກໄພທຳມະຊາດ, ພ້ອມທັງຊ່ວຍສ້າງແຜນການຕອບສະໜອງສະເພາະໃຫ້ບັນດາຄອບຄົວ ແລະ ທົ່ວຊຸມຊົນ.
ທ່ານນາງກ່າວຕື່ມວ່າ “ໂດຍຜ່ານກິດຈະກໍາການແລກປ່ຽນການຮຽນຮູ້ທາງສັງຄົມ (Social Learning Exchange Activity - SLEA), ພວກຂ້າພະເຈົ້າໄດ້ສ້າງໂອກາດສໍາລັບຊຸມຊົນ ແລະ ຄູ່ຮ່ວມງານທີ່ຈະຮຽນຮູ້, ແລກປ່ຽນປະສົບການໃນການກໍ່ສ້າງທີ່ຢູ່ອາໄສທີ່ປອດໄພ ແລະ ການຄຸ້ມຄອງຄວາມສ່ຽງຈາກໄພທຳມະຊາດ. ຄວາມພະຍາຍາມເຫຼົ່ານີ້ບໍ່ພຽງແຕ່ຊ່ວຍໃຫ້ປະຊາຊົນເຂົ້າໃຈເຖິງຄວາມສໍາຄັນຂອງທີ່ຢູ່ອາໄສແບບຖາວອນເທົ່ານັ້ນ, ແຕ່ຍັງສົ່ງເສີມການຮ່ວມມື ແລະ ເຜີຍແຜ່ວິທີການປະຕິບັດຕົວຈິງນຳອີກ”.
ທ່ານນາງຍັງແບ່ງປັນວ່າ ວິໄສທັດໄລຍະຍາວຂອງ Habitat ຫວຽດນາມ ແມ່ນສ້າງໂລກທີ່ທຸກຄອບຄົວມີໂອກາດດຳລົງຊີວິດຢູ່ບ້ານແບບປອດໄພ. ບໍ່ພຽງແຕ່ແມ່ນບ່ອນພັກອາໄສເທົ່ານັ້ນ, ຫາກຍັງແມ່ນພື້ນຖານເພື່ອພັດທະນາເສດຖະກິດ, ປັບປຸງສຸຂະພາບ ແລະ ຜ່ານຜ່າສິ່ງທ້າທາຍຈາກການປ່ຽນແປງຂອງດິນຟ້າອາກາດ.
| ນັບແຕ່ປີ 2001 ເປັນຕົ້ນມາ, Habitat ຫວຽດນາມ ໄດ້ໜູນຊ່ວຍກ່ວາ 19.000 ກ່ວາຄອບຄົວຢູ່ຫຼາຍແຂວງ, ນະຄອນ, ຊ່ວຍໃຫ້ເຂົາເຈົ້າມີຊີວິດການເປັນຢູ່ທີ່ເປັນປົກກະຕິ ແລະ ສ້າງຊຸມຊົນແບບຍືນຍົງກວ່າ. |
 | Samsung Display Vietnam ຊອກຫາແຫຼ່ງຊັບພະຍາກອນມະນຸດຄຸນນະພາບສູງທີ່ໄດ້ບຳລຸງສ້າງຢູ່ ສ.ເກົາຫຼີ ຍສໝ - VSAK ແລະ SDV ໃຫ້ຄໍາໝັ້ນສັນຍາຈະສົມທົບກັນຈັດກອງປະຊຸມ ສໍາມະນາການຮັບສະຫມັກນັກສຶກສາ, ນົກຄົ້ນຄວ້າ ເພື່ອຊອກຫາ ຊັບພະຍາກອນມະນຸດຄຸນນະພາບສູງສຳລັບບໍລິສັດ SDV, ພ້ອມກັນນັ້ນ ກໍນໍາມາເຊິ່ງຂໍ້ມູນຂ່າວສານ, ທັກສະທີ່ມີຜົນປະໂຫຍດໃນຂະບວນການຊອກຫາ ວຽກເຮັດງານທໍາ. |
 | ການຫັນເປັນດີຈີຕອນແມ່ນເຮັດໃຫ້ວິສາຫະກິດຂະໜາດນ້ອຍແລະກາງ ມີພື້ນຖານດີຈີຕອນ Make in Vietnam ຕື່ມອີກ ໄລ່ຮອດທ້າຍປີ 2021, ມີກວ່າ 220.000 ເທື່ອຄົນເຂົ້າເວັບໄຊ Smedx.vn ແລະ ມີວິສາຫະກິດປະມານ 37.000 ແຫ່ງໄດ້ສຳຜັດກັບຂໍ້ມູນທີ່ມີປະໂຫຍດກ່ຽວກັບການຫັນເປັນດີຈີຕອນ. |
ມີງດຶກ
