| ນາຍົກລັດຖະມົນຕີຫວຽດນາມ ເຂົ້າຮ່ວມ COP28, ຢ້ຽມຢາມຕວກກີິ: ພ້ອມກັນມຸ່ງໄປເຖິງເປົ້າໝາຍພັດທະນາແບບຍືນຍົງ | |
| ໃບຍ້ອງຍໍໃນວຽກງານການເປີດກວ້າງ, ພັດທະນາຕະຫຼາດຊາຍແດນ ຫວຽດນາມ - ລາວ |
ເນື່ອງໃນໂອກາດທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ນຳໜ້າຄະນະຜູ້ແທນຂັ້ນສູງຫວຽດນາມ ເຂົ້າຮ່ວມກອງປະຊຸມການນໍາກຸ່ມບັນດາພື້ນຖານເສດຖະກິດຫາກໍ່ພົ້ນເດັ່ນຂຶ້ນແຖວໜ້າໂລກ (BRICS) ເປີດກວ້າງ ຢູ່ Kazan, ສະຫະພັນລັດເຊຍ ແຕ່ວັນທີ 23-24 ຕຸລາ, ທ່ານນາງ ຫງວຽນມີງຮັ່ງ ຮອງລັດຖະມົນຕີກະຊວງການຕ່າງປະເທດຫວຽດນາມ ໃຫ້ສໍາພາດຕໍ່ນັກຂ່າວກ່ຽວກັບການໄປປະຕິບັດງານຂອງທ່ານນາຍົກລັດຖະມົນຕີ.
ກອງປະຊຸມ BRICS ເປີດກວ້າງປີນີ້ດ້ວຍຫົວຂໍ້ “BRICS ແລະຊີກໂລກໃຕ້: ພ້ອມກັນສ້າງໂລກທີ່ດີງາມກວ່າອີກ”, ເພື່ອແນໃສ່ເພີ່ມທະວີການຮ່ວມມືລະຫວ່າງ BRICS ແລະບັນດາປະເທດພວມພັດທະນາ. ຂໍທ່ານນາງຮອງລັດຖະມົນຕີ ແບ່ງປັນຕື່ມອີກກ່ຽວກັບເນື້ອໃນສຳຄັນທີ່ບັນດາປະເທດຈະໄດ້ປຶກສາຫາລືໃນກອງປະຊຸມ?
ແຕ່ວັນທີ 23-24 ຕຸລາ 2024, ກອງປະຊຸມການນຳ BRICS ເປີດກວ້າງໄດ້ດຳເນີນຢູ່ນະຄອນ Kazan, ສະຫະພັນລັດເຊຍ. ນີ້ແມ່ນກອງປະຊຸມສຳຄັນໃນຂອບການຮ່ວມມືລະຫວ່າງ BRICS ກັບບັນດາປະເທດພວມພັດທະນາ. ກອງປະຊຸມໄດ້ມີການເຂົ້າຮ່ວມຂອງບັນດາປະເທດສະມາຊິກ BRICS ແລະການນຳຂອງປະເທດຖືກເຊີນ 30 ກວ່າປະເທດ, ໃນນັ້ນມີບັນດາປະເທດພວມພັດທະນາຢູ່ທຸກທະວີບ ແລະອົງການຈັດຕັ້ງສາກົນຈຳນວນໜຶ່ງ.
ຕາມຄຳເຊີນຂອງທ່ານ Vladimir Putin ປະທານາທິບໍດີສະຫະພັນລັດເຊຍ, ປະເທດປະທານ BRICS ປີ 2024, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ເຂົ້າຮ່ວມກອງປະຊຸມດ້ວຍຖານະເປັນແຂກຖືກເຊີນ.
 |
| ທ່ານນາງ ຫງວຽນມີງຮັ່ງ ຮອງລັດຖະມົນຕີການຕ່າງປະເທດຫວຽດນາມ. ພາບ: vov.vn |
ກອງປະຊຸມການນຳ BRICS ເປີດກວ້າງປີນີ້ໄດ້ດຳເນີນໄປໃນສະພາບທີ່ເສດຖະກິດ ແລະການເມືອງໂລກສືບຕໍ່ຜັນແປໄປຢ່າງສັບສົນ. ເສດຖະກິດທົ່ວໂລກມີທ່າອ່ຽງດີຂຶ້ນແຕ່ກໍຍັງປະເຊີນໜ້າກັບຄວາມຫຍຸ້ງຍາກ ແລະສິ່ງທ້າທາຍຫຼາຍຢ່າງ, ໂດຍສະເພາະແມ່ນຄວາມສ່ຽງຕໍ່ການເຕີບໂຕຫຼຸດລົງ, ອັດຕາເງິນເຟີ້ສູງທີ່ແກ່ຍາວ...
ໄປຄຽງຄູ່ກັນນັ້ນ, ທ່າອ່ຽງພັດທະນາໃໝ່ຂອງຍຸກສະໄໝ, ໂດຍສະເພາະແມ່ນການຫັນເປັນດີຈີຕອນ, ການຫັນເປັນສີຂຽວ ແລະການພັດທະນາທີ່ກະໂດດຂັ້ນຂອງເຕັກໂນໂລຢີ ແລະປັນຍາປະດິດກໍ່ພວມເປີດແງ່ຫວັງພັດທະນາ ແລະການຮ່ວມມືໃຫ້ແກ່ບັນດາພື້ນຖານເສດຖະກິດທີ່ຫາກໍ່ພົ້ນເດັ່ນຂຶ້ນ, ໃນນັ້ນມີຫວຽດນາມ.
ກອງປະຊຸມ BRICS ເປີດກວ້າງປີນີ້ມີວາລະປະຊຸມຄົບຄະນະດ້ວຍຫົວຂໍ້ “BRICS ແລະຊີກໂລກໃຕ້: ພ້ອມກັນສ້າງໂລກທີ່ດີງາມກວ່າອີກ”. ຫົວຂໍ້ທີ່ກ່າວມານີ້ໄດ້ຢືນຢັນວ່າ ຈຸດສຸມ ແລະບຸລິມະສິດຂອງກອງປະຊຸມແມ່ນເພີ່ມທະວີການຮ່ວມມື ແລະສົມທົບກັນລະຫວ່າງ BRICS ກັບບັນດາປະເທດພວມພັດທະນາ ເພື່ອແນ່ໃສ່ຮ່ວມແຮງຮ່ວມໃຈສ້າງໂລກທີ່ດີງາມກວ່າອີກໃຫ້ແກ່ປະຊາຊົນໝົດທຸກຄົນ.
ຕາມນັ້ນແລ້ວ, ບັນດາການນຳຈະໄດ້ສຸມໃສ່ປຶກສາຫາລືກ່ຽວກັບມາດຕະການຊຸກຍູ້ການເຕີບໂຕດ້ານເສດຖະກິດ, ເພີ່ມທະວີການເຊື່ອມຕໍ່ເສດຖະກິດລະຫວ່າງ BRICS ກັບບັນດາປະເທດຊີກໂລກໃຕ້, ເພີ່ມທະວີການຮ່ວມມືໃນການຮັບມືກັບສິ່ງທ້າທາຍທົ່ວໂລກ, ຍູ້ແຮງບັນດາກຳລັງໜູນການເຕີບໂຕໃໝ່, ຄື: ເສດຖະກິດດີຈີຕອນ, ເສດຖະກິດຂຽວ, ເສດຖະກິດໝູນວຽນ, ວິທະຍາສາດ-ເຕັກໂນໂລຊີ... ສາມາດເວົ້າໄດ້ວ່າ ເປົ້າໝາຍລວມ ແລະຈຸດສຸມທະລຸລວງຂອງກອງປະຊຸມແມ່ນເພີ່ມທະວີການຮ່ວມມືເພື່ອອະນາຄົດທີ່ດີງາມກວ່າອີກ.
ຂໍທ່ານນາງໃຫ້ຮູ້ກ່ຽວກັບຈຸດປະສົງ ແລະຄວາມໝາຍການໄປປະຕິບັດງານຂອງທ່ານນາຍົກລັດຖະມົນຕີ ຟ້າມມິງຈິ໊ງ?
ການໄປຢ້ຽມຢາມ, ເຂົ້າຮ່ວມກອງປະຊຸມ BRICS ເປີດກວ້າງຂອງທ່ານນາຍົກລັດຖະມົນຕີແມ່ນບາດກ້າວສຳຄັນໃນການຜັນຂະຫຍາຍແນວທາງການຕ່າງປະເທດທີ່ສະເໝີຕົ້ນສະເໝີປາຍຂອງຫວຽດນາມ, ນັ້ນແມ່ນ: ເອກະລາດ, ເປັນເຈົ້າຕົນເອງ, ຫັນການພົວພັນຕ່າງປະເທດເປັນຫຼາຍຝ່າຍ, ຫຼາຍຮູບຫຼາຍແບບ, ເປັນເພື່ອນມິດ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈ, ເປັນສະມາຊິກທີ່ຕັ້ງໜ້າ ແລະມີຄວາມຮັບຜິດຊອບຂອງປະຊາຄົມໂລກ ກໍ່ຄືແຜນນະໂຍບາຍຍູ້ແຮງ ແລະຍົກລະດັບການພົວພັນຕ່າງປະເທດຫຼາຍຝ່າຍ. ການປະຕິບັດງານຂອງທ່ານນາຍົກລັດຖະມົນຕີ ມີຄວາມໝາຍສຳຄັນຫຼາຍຢ່າງ, ສະແດງອອກໃນບາງດ້ານດັ່ງລຸ່ມນີ້:
ທີໜຶ່ງ, ການເຂົ້າຮ່ວມຂອງທ່ານຜູ້ນໍາລັດຖະບານຫວຽດນາມ ຢູ່ກອງປະຊຸມ BRICS ເປີດກວ້າງແມ່ນການຢືນຢັນຢ່າງແຂງແຮງກ່ຽວກັບຈິດໃຈເປັນເຈົ້າການ, ຕັ້ງໜ້າ ແລະມີຄວາມຮັບຜິດຊອບຂອງ ຫວຽດນາມ ໃນການແກ້ໄຂບັນດາບັນຫາລວມຂອງມວນມະນຸດ.
ທີສອງ, ເລື່ອງຫວຽດນາມ ເຂົ້າຮ່ວມ ແລະພ້ອມກັນປຶກສາຫາລືກັບບັນດາພື້ນຖານເສດຖະກິດໃຫຍ່, ພື້ນຖານເສດຖະກິດໃໝ່ກ່ຽວກັບບັນຫາທີ່ພວມເກີດຂຶ້ນ ເພື່ອປະກອບສ່ວນກໍ່ສ້າງໂລກທີ່ດີງາມກວ່າອີກສືບຕໍ່ຢືນຢັນທີ່ຕັ້ງ, ບົດບາດ, ຂະໜາດຂອງຫວຽດນາມ ໃນບັນຫາການພັດທະນາຂອງມວນມະນຸດ, ຖ່າຍທອດໃຫ້ເຫັນຮູບພາບຫວຽດນາມ ແຫ່ງສັນຕິພາບ, ການຮ່ວມມື, ພັດທະນາ, ຂະຫຍັນຂັນເຄື່ອນ, ປ່ຽນແປງໃໝ່, ສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງ ຕິດພັນກັບການເຊື່ອມໂຍງເຂົ້າກັບສາກົນຢ່າງເລິກເຊິ່ງກວ້າງຂວາງ ແລະມີປະສິດທິຜົນ, ຍາດແຍ່ງເອົາແຫຼ່ງກຳລັງຈາກພາຍນອກເພື່ອຮັບໃຊ້ການພັດທະນາປະເທດຊາດ.
ທີສາມ, ຜ່ານການເຂົ້າຮ່ວມກອງປະຊຸມ, ຫວຽດນາມ ຈະສືບຕໍ່ຊຸກຍູ້ ແລະເຮັດໃຫ້ການພົວພັນຮ່ວມມືກັບສະຫະພັນລັດເຊຍ ແລະບັນດາປະເທດອື່ນໆເລິກເຊິ່ງຂຶ້ນກວ່າອີກ. ກັບລັດເຊຍ, ນີ້ແມ່ນການປະຕິບັດງານຄັ້ງທຳອິດຂອງທ່ານນາຍົກລັດຖະມົນຕີ. ການຢ້ຽມຢາມໄດ້ດຳເນີນໄປໃນຈຸດເວລາທີ່ສອງປະເທດພວມມຸ່ງໄປເຖິງການສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດໃນປີ 2025.
ຄຽງຄູ່ກັບການຢ້ຽມຢາມຂັ້ນສູງລະຫວ່າງສອງປະເທດໃນໄລຍະຜ່ານມາ, ການໄປປະຕິບັດງານຂອງທ່ານນາຍົກລັດຖະມົນຕີ ສືບຕໍ່ຢືນຢັນນ້ຳໃຈແຫ່ງຄວາມເປັນເພື່ອນມິດທີ່ສັດຊື່ບໍລິສຸດລະຫວ່າງຫວຽດນາມ-ລັດເຊຍ, ປະກອບສ່ວນສ້າງກຳລັງແຮງໃຫ້ແກ່ການຮ່ວມມືສອງຝ່າຍ, ຊຸກຍູ້ ແລະເປີດກາລະໂອກາດຮ່ວມມືທີ່ແທດຈິງ ແລະມີປະສິດທິຜົນລະຫວ່າງສອງປະເທດໃຫ້ສົມກັບການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ ແລະລັດເຊຍ. ສຳລັບບັນດາປະເທດທີ່ເຂົ້າຮ່ວມກອງປະຊຸມ, ນີ້ກໍ່ແມ່ນກາລະໂອກາດສຳຄັນ ເພື່ອໃຫ້ພວກເຮົາສືບຕໍ່ຊຸກຍູ້ການພົວພັນສອງຝ່າຍໃນຫຼາຍຂົງເຂດ ກໍ່ຄືເພີ່ມທະວີການສົມທົບກັນຢູ່ເວທີປາໄສຫຼາຍຝ່າຍ.
ດ້ວຍຈິດວິນຍານຂອງການທູດແຫ່ງຍຸກສະໄໝໃໝ່ແມ່ນເພີ່ມທະວີການປະກອບສ່ວນ ແລະມານະພະຍາຍາມຈົນສຸດຄວາມສາມາດຂອງຕົນ ເພື່ອການຮ່ວມມື, ພັດທະນາ ແລະວັດທະນາຖາວອນ, ທ່ານນາຍົກລັດຖະມົນຕີ ແລະຄະນະຜູ້ແທນຂັ້ນສູງຫວຽດນາມ ຈະເຂົ້າຮ່ວມຢ່າງຕັ້ງໜ້າ ແລະປະກອບສ່ວນຢ່າງມີຄວາມຮັບຜິດຊອບຕໍ່ກອງປະຊຸມ BRICS ເປີດກວ້າງ.
ສິ່ງດັ່ງກ່າວສືບຕໍ່ພິສູດໃຫ້ເຫັນຄວາມຄາດຫວັງຢາກບືນຕົວຂຶ້ນຂອງຊາດຫວຽດນາມ, ຈາກປະເທດທີ່ເຄີຍຜ່ານຜ່າຄວາມເຈັບປວດ, ສູນເສຍ, ຄວາມຫຍຸ້ງຍາກມາບໍ່ຈັກວ່າເທົ່າໃດ, ມາຮອດປະຈຸບັນໄດ້ມີຄວາມໝັ້ນໃຈກ້າວເຂົ້າສູ່ສັງກາດບືນຕົວຂຶ້ນຂອງປະເທດຊາດ, ຢືນຢັນຖານະບົດບາດ, ທີ່ຕັ້ງເປັນຄູ່ຮ່ວມມືທີ່ໄວ້ເນື້ອເຊື່ອໃຈ ແລະມີຄວາມຮັບຜິດຊອບໃນປະຊາຄົມສາກົນ, ສ້າງແຮງບັນດານໃຈ ແລະປຸກລຸກຄວາມຄາດຫວັງຢາກພັດທະນາໃຫ້ຈະເລີນຮຸ່ງເຮືອງໃນໂລກ.
ຂໍຂອບໃຈທ່ານນາງຮອງລັດຖະມົນຕີ!
ແສງເດືອນ
