 |
| ສະຫາຍ ໄທແທງກຸ໋ຍ ເລຂາພັກແຂວງ, ປະທານສະພາປະຊາຊົນແຂວງ ເງ້ອານ ໄດ້ໃຫ້ການຕ້ອນຮັບສະຫາຍ ສຸວັນນີ ໄຊຊະນະ ຮອງເລຂາພັກແຂວງ, ປະທານສະພາປະຊາຊົນແຂວງ, ຫົວໜ້າຄະນະຜູ້ແທນສະພາແຫ່ງຊາດເຂດ 11 ແຂວງ ບໍລິຄຳໄຊ, ສປປ ລາວ. |
ສະຫາຍ ໄທແທງກຸ໋ຍ ມີຄວາມດີໃຈທີ່ໄດ້ໃຫ້ການຕ້ອນຮັບຄະນະປະຕິບັດງານຂອງສະພາປະຊາຊົນແຂວງ ບໍລິຄຳໄຊ ມາຢ້ຽມຢາມ ແລະ ແລກປ່ຽນປະສົບການໃນການເຄື່ອນໄຫວກັບສະພາປະຊາຊົນແຂວງ ເງ້ອານ. ນີ້ແມ່ນຫຼັກຖານພະຍານສະແດງໃຫ້ເຫັນເຖິງການສືບຕໍ່ຮັດແໜ້ນສາຍພົວພັນອັນດີງາມລະຫວ່າງສອງທ້ອງຖິ່ນ.
ສະຫາຍເລຂາພັກແຂວງ ເງ້ອານ ຢືນຢັນວ່າ: ໃນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ຫວຽດນາມ - ລາວ, ແຂວງ ເງ້ອານ ແລະ ແຂວງ ບໍລິຄຳໄຊ ມີການພົວພັນທີ່ເປັນມູນເຊື້ອ, ສະໜິດສະໜົມກັນຜ່ານຫຼາຍທົດສະວັດ ແລະ ນັບມື້ນັບແໜ້ນແຟ້ນ.
ແຕ່ລະປີ, ອົງຄະນະພັກ, ອຳນາດການປົກຄອງ ແລະ ປະຊາຊົນສອງແຂວງໄດ້ມີບັນດາການເຄື່ອນໄຫວໄປຢ້ຽມຢາມ, ພົບປະແລກປ່ຽນ, ແລກປ່ຽນປະສົບການໃນການເຮັດວຽກຢ່າງເປັນປະຈຳ; ປະສານສົມທົບ ແລະ ຊ່ວຍເຫຼືອເຊິ່ງກັນ ແລະ ກັນໃນການພັດທະນາເສດຖະກິດ - ສັງຄົມ, ຮັກສາການປ້ອງກັນຊາດ - ປ້ອງກັນຄວາມສະຫງົບ, ພິເສດແມ່ນຮັກສາເສັ້ນຊາຍແດນລະຫວ່າງສອງແຂວງ.
ໂດຍເນັ້ນໜັກເຖິງການພົວພັນມິດຕະພາບທີ່ເປັນມູນເຊື້ອອັນສະໜິດສະໜົມ, ແໜ້ນແຟ້ນ, ດູດດື່ມລະຫວ່າງແຂວງ ເງ້ອານ ແລະ ແຂວງ ບໍລິຄຳໄຊ, ສະຫາຍ ໄທແທງກຸ໋ຍ ໄດ້ຕີລາຄາສູງບັນດາການເຄື່ອນໄຫວແລກປ່ຽນປະສົບການໃນການເຮັດວຽກ; ປະສານສົມທົບ ແລະ ຊ່ວຍເຫຼືອເຊິ່ງກັນ ແລະ ກັນໃນການພັດທະນາເສດຖະກິດ - ສັງຄົມ, ຮັກສາການປ້ອງກັນຊາດ, ປ້ອງກັນຄວາມສະຫງົບ, ພິເສດແມ່ນເຂດຊາຍແດນຮ່ວມຂອງສອງແຂວງ.
ພິເສດ, ຕາມແຜນການໃນວັນທີ 29 ສິງຫາ ປີ 2024 ຈະດຳເນີນການໂອ້ລົມເຈລະຈາຂັ້ນສູງລະຫວ່າງຄະນະຜູ້ແທນຂັ້ນສູງແຂວງ ເງ້ອານ ກັບຄະນະຜູ້ແທນຂັ້ນສູງແຂວງ ບໍລິຄຳໄຊ.
 |
| ບັນຍາກາດທີ່ການຕ້ອນຮັບ. |
ຕາງໜ້າການນຳແຂວງ, ສະຫາຍ ໄທແທງກຸ໋ຍ ໄດ້ອວຍພອນດ້ວຍຄວາມນັບຖືຢ່າງສູງໃຫ້ ສະຫາຍ ສຸວັນນີ ໄຊຊະນະ ພ້ອມດ້ວຍຄະນະປະຕິບັດງານແຂວງ ບໍລິຄຳໄຊ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ, ມີໄຊ ແລະ ປະສົບຜົນສຳເລັດຢ່າງຈົບງາມໃນການເດີນທາງປະຕິບັດງານຢູ່ ເງ້ອານ.
ພ້ອມກັນນັ້ນ, ກໍ່ໄດ້ສົ່ງຄຳອວຍພອນໃຫ້ອົງຄະນະພັກ, ອຳນາດການປົກຄອງ ແລະ ປະຊາຊົນແຂວງ ບໍລິຄຳໄຊ ສືບຕໍ່ຍາດໄດ້ບັນດາໄຊຊະນະອັນໃຫຍ່ຫຼວງໃນວຽກງານກໍ່ສ້າງ ແລະ ພັດທະນາບ້ານເກີດເມືອງນອນ ແລະ ປະເທດຊາດ. ອວຍພອນໃຫ້ສາຍພົວພັນມິດຕະພາບລະຫວ່າງ ຫວຽດນາມ - ລາວ ເວົ້າລວມ, ແຂວງ ເງ້ອານ ແລະ ແຂວງ ບໍລິຄຳໄຊ ເວົ້າສະເພາະ ໃຫ້ນັບມື້ນັບສະໜິດແໜ້ນກວ່າອີກ.
 |
| ບັນດາການນຳສອງແຂວງ ເງ້ອານ ແລະ ບໍລິຄຳໄຊ ມອບຂອງທີ່ລະນຶກໃຫ້ກັນ. |
ໂດຍຕາງໜ້າໃຫ້ຄະນະປະຕິບັດງານ, ສະຫາຍ ສຸວັນນີ ໄຊຊະນະ - ຮອງເລຂາພັກແຂວງ, ປະທານສະພາປະຊາຊົນແຂວງ, ຫົວໜ້າຄະນະຜູ້ແທນສະພາແຫ່ງຊາດເຂດ 11 ແຂວງ ບໍລິຄຳໄຊ ໄດ້ສະແດງຄວາມປິຕິຍິນດີ ແລະ ຮູ້ສຶກອົບອຸ່ນເມື່ອໄດ້ຮັບການຕ້ອນຮັບຢ່າງສົມກຽດ ແລະ ເຕັມໄປດ້ວຍມິດຈິດມິດໃຈຈາກການນຳແຂວງ ເງ້ອານ.
ທ່ານໃຫ້ຮູ້ວ່າ ການເດີນທາງປະຕິບັດງານຄັ້ງນີ້ຂອງຄະນະ ແມ່ນມີຄວາມປາຖະໜາຢາກຮ່ຳຮຽນສຶກສາຂະບວນການຕິດຕາມກວດກາ ແລະ ແຜນການປະຕິບັດບັນດານະໂຍບາຍ, ມະຕິຂອງສະພາປະຊາຊົນ; ວຽກງານແກ້ໄຂຄຳຮ້ອງທຸກ, ຄຳຮ້ອງຟ້ອງ ແລະ ຄຳສະເໜີຂອງປະຊາຊົນ.
ນອກຈາກນັ້ນ, ຍັງມີຫຼາຍເນື້ອໃນທີ່ຄະນະປາດຖະໜາຢາກຮ່ຳຮຽນໃນການປະຕິບັດວຽກງານຕິດຕາມກວດກາໃນຂົງເຂດຕ່າງໆ. ພ້ອມກັນນັ້ນ ສະຫາຍ ສຸວັນນີ ໄຊຊະນະ ໃຫ້ຮູ້ວ່າ: ໃນຄະນະປະຕິບັດງານ, ມີສະມາຊິກໃໝ່ຫຼາຍຄົນທີ່ເຂົ້າຮ່ວມການເຄື່ອນໄຫວຂອງສະພາປະຊາຊົນ, ສະນັ້ນ ຕ້ອງໄດ້ຮ່ຳຮຽນເພື່ອປະຕິບັດໜ້າທີ່ ແລະ ຄວາມຮັບຜິດຊອບຂອງຕົນໃຫ້ເປັນຢ່າງດີ.
ຄຽງຂ້າງນັ້ນ, ສະຫາຍ ສຸວັນນີ ໄຊຊະນະ ໄດ້ແຈ້ງໃຫ້ ສະຫາຍເລຂາພັກແຂວງ ເງ້ອານ ໄທແທງກຸ໋ຍ ກ່ຽວກັບສະພາບການພັດທະນາເສດຖະກິດ-ສັງຄົມ, ຮັບປະກັນການປ້ອງກັນຊາດ - ປ້ອງກັນຄວາມສະຫງົບຂອງແຂວງ; ສະແດງຄວາມຂອບໃຈຢ່າງສູງຕໍ່ກັບແຂວງ ເງ້ອານ ທີ່ໄດ້ໃຫ້ການສະໜັບສະໜູນ ແລະ ໜູນຊ່ວຍອັນໃຫຍ່ຫຼວງໃຫ້ແກ່ແຂວງ ບໍລິຄຳໄຊ ໃນຫຼາຍຂົງເຂດ; ເຊື່ອໝັ້ນວ່າ: ຜ່ານການເດີນທາງປະຕິບັດງານ ຈະໄດ້ຖອດຖອນບັນດາບົດຮຽນປະສົບການ ເພື່ອຍົກສູງປະສິດທິຜົນການເຄື່ອນໄຫວຂອງສະພາປະຊາຊົນແຂວງ.
 |
| ບັນດາການນຳແຂວງ ເງ້ອານ ໄດ້ຖ່າຍຮູບທີ່ລະນຶກກັບບັນດາສະຫາຍໃນຄະນະປະຕິບັດງານຂອງແຂວງ ບໍລິຄຳໄຊ. |
ທີ່ການພົບປະຄັ້ງນີ້, ການນຳຂອງສອງແຂວງຢືນຢັນວ່າ ຍາມໃດກໍ່ຖືເປັນສຳຄັນ ແລະ ເຊື່ອໝັ້ນໃນການພົວພັນລະຫວ່າງ ແຂວງ ເງ້ອານ ແລະ ແຂວງ ບໍລິຄຳໄຊ ຈະນັບມື້ເກີດດອກອອກຜົນ, ຕິດພັນກັນຢ່າງແໜ້ນແຟ້ນ, ປະກອບສ່ວນເຂົ້າໃນການເພີ່ມພູນຄູນສ້າງນ້ຳໃຈມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ປະກອບສ່ວນເພີ່ມທະວີການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດ ຫວຽດນາມ - ລາວ ໃຫ້ຂຽວສົດງົດງາມ, ໝັ້ນຄົງຂະໜົງແກ່ນຊົ່ວກາລະນານ.
 | ເລຂາຄະນະພັກແຂວງ ແທັງຮວ໋າ ຕ້ອນຮັບຄະນະຜູ້ແທນສະພາປະຊາຊົນແຂວງ ຫົວພັນ - ລາວ ຍສໝ - ຕອນບ່າຍວັນທີ 29 ພຶດສະພາ, ຢູ່ທີ່ໂຮງແຮມ ຈຳປາ, ເມືອງ ເຊິມເຊີນ, ສະຫາຍ ໂດ໊ຈ່ອງຮຶງ, ກຳມະການສູນກາງພັກ, ເລຂາຄະນະພັກແຂວງ, ປະທານສະພາປະຊາຊົນແຂວງ ແທງຮວ໋າ ໄດ້ໃຫ້ການຕ້ອນຮັບຄະນະປະຕິບັດງານຂອງສະພາປະຊາຊົນແຂວງ ຫົວພັນ, ສາທາລະນະລັດ ປະຊາທິປະໄຕ ປະຊາຊົນ ລາວ ນຳໂດຍ ສະຫາຍ ຄອນປະພັນ ເລືອງສີຈັນທອງ, ... |
 | ຫຼາຍການເຄື່ອນໄຫວທີ່ຟົດຟື້ນໃນງານບຸນເກັບໝາກໝັ້ນປີ 2024 ຢູ່ຕາແສງເຂດຊາຍແດງ ເງ້ອານ ຍສໝ - ວັນບຸນເກັບໝາກໝັ້ນປີ 2024 ໄດ້ຈັດຂຶ້ນຢູ່ຕາແສງ ເມື່ອງຫຼົງ (ເມືອງ ກີເຊີນ, ແຂວງ ເງ້ອານ) ດ້ວຍການເຄື່ອນໄຫວວັດທະນະທຳທີ່ເປັນເອກະລັກສະເພາະຫຼາຍຢ່າງຂອງຊາວເຜົ່າ ມົ້ງ ແລະ ແມ່ນເຫດການ ເພື່ອແຜ່ກະຈາຍສີສັນຂອງເຂດຊາຍແດນ ແລະ ໂຄສະນາ, ແນະນຳເຄື່ອງໝາຍການຄ້າຂອງໝາກໝັ້ນ ຕ່າມຮວາ. |
ມິງດຶກ (ແປຕາມ baomoi.com)
