ຕາມສະຖິຕິຂອງສະຫະພັນບັນດາອົງການມິດຕະພາບຫວຽດນາມ, ນັບແຕ່ວັນທີ 20 – 26 ກໍລະກົດນີ້, ໄດ້ມີໂທລະເລກ, ຈົດໝາຍ, ຂໍ້ຄວາມສະແດງຄວາມເສົ້າສະຫຼົດໃຈເຖິງ ຫວຽດນາມ ຜ່ານຊ່ອງທາງການພົວພັນປະຊາຊົນປະມານ 150 ສະບັບ. “ທະຫານກອມມູນິດທີ່ສັດຊື່”, “ສະມາຊິກພັກທີ່ສົມບູນແບບ”, “ນັກທິດສະດີທີ່ດີເດັ່ນ”, “ຜູ້ນຳທີ່ລຽບງ່າຍ, ໃກ້ຊິດກັບປະຊາຊົນ”... ແມ່ນຄຳຍ້ອງຍໍຂອງເພື່ອນມິດສາກົນສຳລັບທ່ານເລຂາທິການໃຫຍ່ ຫງວຽນຟູ໋ຈ້ອງ.
ຮູບພາບຂອງທ່ານເລຂາທິການໃຫຍ່ໄດ້ສ້າງຄືນໃໝ່ໂດຍຜ່ານຂໍ້ຄວາມເຫຼົ່ານີ້ທີ່ມີຊີວິດຊີວາ, ແທ້ຈິງ ແລະ ໃກ້ຊິດສະໜິດສະໜົມທີ່ສຸດ.
 |
| ນຳຮູບພາບຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ຂຶ້ນລົດສົ່ງສະການຫຼັງພິທີໄວ້ອາໄລ. ພາບ: nhandan.vn |
ນັກກອມມູນິດທີ່ສັດຊື່, ແທ້ຈິງ
ຈົດໝາຍ, ໂທລະເລກຂຽນວ່າ ໃນຖານະເປັນຜູ້ນຳໜ້າພັກກອມມູນິດຫວຽດນາມ, ເກືອບ 3 ອາຍຸການທີ່ຜ່ານມາ, ທ່ານເລຂາທິການໃຫຍ່ ຫງວຽນຟູ໋ຈ້ອງ ພ້ອມກັນກັບກົມການເມືອງ, ຄະນະບໍລິຫານງານສູນກາງພັກ ໄດ້ວາງແຜນກຳນົດ ແລະ ນໍາພາປະຕິບັດບັນດາເປົ້າໝາຍຍຸດທະສາດກ່ຽວກັບການກໍ່ສ້າງ, ປັບປຸງພັກຢ່າງມີໄຊ. ດ້ວຍວິໄສທັດຍຸດທະສາດ, ແນວຄິດທີ່ແຫຼມຄົມ, ຕິດພັນຢ່າງແໜ້ນແຟ້ນກັບການສະຫຼຸບຕົວຈິງ, ທ່ານເລຂາທິການໃຫຍ່ ໄດ້ມີການປະກອບສ່ວນແບບພິເສດ ເພື່ອເຮັດໃຫ້ພັກກອມມູນິດ ຫວຽດນາມ ສົມກັບເປັນພັກປະຕິວັດຢ່າງແທ້ຈິງ, “ແມ່ນຄຸນສົມບັດ, ແມ່ນຄວາມສີວິໄລ” ຢ່າງແທ້ຈິງ.
ທ່ານຫົວໜາ້ສະມາຄົມມິດຕະພາບການທູດປະຊາຊົນຈີນ ຂຽນວ່າ: “ທ່ານເລຂາທິການໃຫຍ່ ຫງວຽນຟູ໋ຈ້ອງ ແມ່ນຜູ້ທີ່ຈົງຮັກພັກດີກັບລັດທິມາກ, ເປັນຜູ້ນຳທີ່ຍິ່ງໃຫຍ່ຂອງພັກກອມມູນິດ ແລະ ປະຊາຊົນ ຫວຽດນາມ; ແມ່ນມິດສະຫາຍທີ່ສະໜິດສະໜົມ ແລະ ເປັນເພື່ອນທີ່ຈິງໃຈຂອງພັກກອມມູນິດ ແລະ ປະຊາຊົນ ຈີນ".
ຈົດໝາຍສະແດງຄວາມເສົ້າສະຫຼົດໃຈຂອງສະພາສັນຕິພາບໂລກ (WPC) ມີຕອນຂຽນວ່າ “ສະຫາຍ ຫງວຽນຟູ໋ຈ້ອງ ໄດ້ຢືນຢູ່ແຖວໜ້າໃນພາລະກິດປະຕິວັດດ້ວຍຄວາມຮັບຜິດຊອບຂັ້ນສູງຫຼາຍຢ່າງ, ຍາມໃດກໍ່ສຸດຈິດສຸດໃຈຕໍ່ຄວາມຕັດສິນໃຈຂອງພັກ, ຍາມໃດກໍ່ຕໍ່ສູ້ເພື່ອຜົນປະໂຫຍດຂອງປະຊາຊົນ ຫວຽດນາມ ທັງພາຍໃນ ແລະ ຕ່າງປະເທດ. ໃນໄລຍະ 60 ກວ່າປີທີ່ໄດ້ອຸທິດຕົນໃຫ້ແກ່ພັກຈົນເຖິງວັນສຸດທ້າຍຂອງຊີວິດ, ສະຫາຍໄດ້ກາຍເປັນແບບຢ່າງທີ່ຖ່ອມຕົວຂອງທະຫານທີ່ອຸທິດຕົນເພື່ອບັນດາຫຼັກການ”.
ທ່ານ ປອ Carolus Wimmer, ປະທານສະພາມິດຕະພາບ ເວເນຊູເອລາ- ຫວຽດນາມ ເລົ່າວ່າ ຄວາມເຂົ້າໃຈຂອງທ່ານກ່ຽວກັບຂະບວນການການເມືອງ ແລະ ສັງຄົມນິຍົມ ຫວຽດນາມ ແມ່ນຍ້ອນບົດບັນລະຍາຍໃນຜົນງານຂອງທ່ານເລຂາທິການໃຫຍ່ ຫງວຽນຟູ໋ຈ້ອງ “ບາງບັນຫາທິດສະດີ ແລະ ພຶດຕິກຳຕົວຈິງກ່ຽວກັບສັງຄົມນິຍົມ ແລະ ເສັ້ນທາງກ້າວຂຶ້ນສູ່ສັງຄົມນິຍົມຢູ່ ຫວຽດນາມ”.
ຜູ້ທີ່ຍົກສູງລະດັບການພົວພັນຕ່າງປະເທດຂອງ ຫວຽດນາມ
ບັນດາຈົດໝາຍ, ໂທລະເລກ ເນັ້ນໜັກວ່າ ໃນຕະຫຼອດຊີວິດຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ແມ່ນນັກການທູດທີ່ດີເດັ່ນ. ແມ່ນຜູ້ທີ່ໄດ້ສ້າງຊື່ ແລະ ຍົກນະໂຍບາຍ “ການທູດໄມ້ໄຜ່” ເຊິ່ງມີຢູ່ໃນປະຫວັດສາດການທູດຫວຽດນາມ ແຕ່ອະດີດຮອດປະຈຸບັນຂຶ້ນສູ່ລະດັບທິດສະດີ. ການກໍ່ສ້າງພື້ນຖານການທູດທີ່ເຕັມໄປດ້ວຍສີສັນ “ໄມ້ໄຜ່ຫວຽດນາມ”, ພາຍໃຕ້ການນຳພາ, ຊີ້ນຳຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ແມ່ນສືບຕໍ່ແນວຄິດຍຸກສະໄໝ ໂຮ່ຈີມິນ, ນຳມາເຊິ່ງພື້ນຖານອັນໜັກແໜ້ນໃຫ້ແກ່ການທູດ ຫວຽດນາມ.
ຄະນະກຳມະການສັນຕິພາບ ແລະ ຄວາມສາມັກຄີລາວ ໄດ້ຕີລາຄາສູງການປະກອບສ່ວນຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ໃນການສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ-ຫວຽດນາມ. “ສະຫາຍ ຫງວຽນຟູ໋ຈ້ອງ ເຖິງແກ່ມໍລະນະກຳແລ້ວ, ບໍ່ພຽງແຕ່ພັກ, ລັດ ແລະ ປະຊາຊົນ ຫວຽດນາມ ທີ່ສູນເສຍການນຳທີ່ໜ້ານັບຖືຢ່າງສູງຜູ້ໜຶ່ງ ເທົ່ານັ້ນ, ຫາກຍັງ ພັກ, ລັດ ແລະ ປະຊາຊົນ ລາວ ພວກຂາ້ພະເຈົ້າ ກໍ່ສູນເສຍເພື່ອນມິດທີ່ສະໜິດສະໜົມ, ໃກ້ຊິດຜູ້ໜຶ່ງ".
ສະມາຄົມມິດຕະພາບ ລັດເຊຍ - ຫວຽດນາມ ໄດ້ຂຽນວ່າ: “ຢູ່ສະຫະພັນລັດເຊຍ, ທຸກຄົນກໍ່ຮູ້ວ່າ ສະຫາຍ ຫງວຽນຟູ໋ຈ້ອງ ແມ່ນນັກເຄື່ອນໄຫວທີ່ດີເລີດຂອງຂະບວນການກອມມູນິດສາກົນ, ແມ່ນຜູ້ນຳພັກກອມມູນິດ ຫວຽດນາມ ເປັນເວລາຫຼາຍປີ, ເປັນຜູ້ທີ່ສືບຕໍ່ພາລະກິດປະຕິວັດຂອງປະທານໂຮ່ຈິມິນ, ເພື່ອນທີ່ໄດ້ທົດສອບຂອງ ລັດເຊຍ, ເປັນຜູ້ໄດ້ຮ່ຳຮຽນ, ຄົ້ນຄ້ວາຢູ່ ລັດເຊຍ. ພວກຂ້າພະເຈົ້າຮູ້ບຸນຄຸນຕໍ່ສະຫາຍ ຫງວຽນຟູ໋ຈ້ອງ ເພາະວ່າ ສະຫາຍ ໄດ້ເຄື່ອນໄຫວຢ່າງບໍ່ຮູ້ອິດຮູ້ເມື່ອຍ ເພື່ອປັບປຸງການພົວພັນຄູ່ຮ່ວມມືຍຸດທະສາດຮອບດ້ານລັດເຊຍ - ຫວຽດນາມ. ສະມາຊິກຂອງສະມາຄົມມິດຕະພາບລັດເຊຍ - ຫວຽດນາມ ໄດ້ລະນຶກເຖິງການພົບປະກັບທ່ານເລຂາທິການໃຫຍ່ ຫງວຽນຟູ໋ຈ້ອງ ໃນໄລຍະຢ້ຽມຢາມ Moskva... ບັນດາຕົ້ນໄມ້ຂຽວ ທີ່ສະຫາຍເລຂາທິການໃຫຍ່ ຫງວຽນຟູ໋ຈ້ອງ ໄດ້ປູກຢູ່ຂອບເຂດສະໜາມຫຼວງ ໂຮ່ຈີມິນ ຢູ່ Moskva ຈະຮັກສາບັນດາຄວາມຊົງຈຳ ກ່ຽວກັບບັນດາການຢ້ຽມຢາມຂອງທ່ານ ມາຍັງປະເທດຂອງພວກຂ້າພະເຈົ້າໄວ້”.
ສະພາສັນຕິພາບ ຍີ່ປຸ່ນ - ຫວຽດນາມ (JVPF) ໄດ້ຍົກສູງບົດບາດຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ໃນການນຳພາ ຫວຽດນາມ ໃນໂລກທີ່ນັບມື້ນັບຫັນເປັນໂລກາພິວັດ ແລະ ສັບສົນ ດ້ວຍບັນດານະໂຍບາຍການຕ່າງປະເທດທີ່ມີໄຫວພິບ, ໝັ້ນຄົງເຂັ້ມແຂງຄືໄມ້ໄຜ່.
ນຳພາປະເທດຊາດພັດທະນາ, ຈະເລີນຮຸ່ງເຮືອງ
ຫຼາຍອົງການສາກົນ ໄດ້ຕີລາຄາສູງບົດບາດ ແລະ ການປະກອບສ່ວນຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ໃນການຮ່ວມມືສາກົນ ແລະ ການພັດທະນາຂອງຫວຽດນາມ. ຈົດໝາຍ, ໂທລະເລກຫຼາຍສະບັບ ກ່າວວ່າ ໃນກວ່າສິບປີທີ່ມໍ່ໆມານີ້, ພາຍໃຕ້ການນຳພາຂອງທ່ານເລຂາທິການໃຫຍ່ ຫງວຽນຟູ໋ຈ້ອງ, ດ້ວຍວິໄສທັດຍຸດທະສາດ, ຄະນະບໍລິຫານງານສູນກາງ ໄດ້ອອກມະຕິຫຼາຍສະບັບກ່ຽວກັບການພັດທະນາເສດຖະກິດ - ສັງຄົມ ດ້ວຍບັນດາມາດຕະການແກ້ໄຂທີ່ບຸກທະລຸ, ສ້າງກຳລັງຜັກດັນການພັດທະນາເສດຖະກິດທີ່ວອງໄວ, ເຂັ້ມແຂງ, ໄດ້ຮັບການຮັບຮູ້ຈາກປະຊາຄົມໂລກ.
ໃນຈົດໝາຍສະແດງຄວາມເສົ້າສະຫຼົດໃຈຂອງສະພາຄຸ້ມຄອງບໍລິຫານສາກົນ, ຄະນະການນຳທົ່ວໂລກ ແລະ ພະນັກງານຂອງ ActionAid International ໃຫ້ຂໍ້ສັງເກດວ່າ: ການນຳຂອງທ່ານເລຂາທິການໃຫຍ່ ໄດ້ຊ່ວຍໃຫ້ ຫວຽດນາມ ບັນລຸໄດ້ບັນດາຜົນງານຫຼາຍຢ່າງ ແລະ ຍົກສູງຄຸນນະທາດ, ກຳລັງແຮງພາຍໃນ. ຈົດໝາຍຂຽນວ່າ: “ຫວຽດນາມ ກາຍເປັນໜຶ່ງໃນ 35 ພື້ນຖານເສດຖະກິດໃຫຍ່ທີ່ສຸດໃນໂລກ, ຄຽງຄູ່ການຮັບປະກັນດັດຊະນີການພັດທະນາມະນຸດຂອງ ຫວຽດນາມ ໄດ້ເພີ່ມຂຶ້ນຢ່າງບໍ່ຢຸດຢັ້ງໃນຊຸມປີມໍ່ໆມານີ້, ໄດ້ສະແດງໃຫ້ເຫັນທິດທາງທີ່ຖືກຕ້ອງຂອງພັກກອມມູນິດ ຫວຽດນາມ ໃນການປະສົມກົມກຽວກັນລະຫວ່າງການພັດທະນາເສດຖະກິດຕາມທິດຍືນຍົງ ເຊິ່ງບໍ່ປະໃຜໄວ້ທາງຫລັງ”.
ທ່ານນາງ Men Sam An, ປະທານສະມາຄົມມິດຕະພາບ ກຳປູເຈຍ - ຫວຽດນາມ, ໃນຈົດໝາຍສົ່ງສະມາຄົມມິດຕະພາບ ຫວຽດນາມ - ກຳປູເຈຍ ມີຕອນຂຽນວ່າ: “ພວກຂ້າພະເຈົ້າ ຕີລາຄາສູງບັນດາວຽກງານ, ຜົນງານອັນໃຫຍ່ຫຼວງທີ່ທ່ານເລຂາທິການໃຫຍ່ ໄດ້ນຳມາໃຫ້ ຫວຽດນາມ, ການອຸທິດຕົນຢ່າງບໍ່ຮູ້ອິດຮູ້ເມື່ອຍຂອງທ່ານເລຂາທິການໃຫຍ່ ໃນການຍົກ ຫວຽດນາມ ກາຍເປັນປະເທດຊາດໜຶ່ງທີ່ພັດທະນາເສດຖະກິດ ແລະ ມີອິດທິພົນນັບມື້ນັບເພີ່ມຂຶ້ນໃນເວທີສາກົນ, ພິເສດແມ່ນໃນການຊຸກຍູ້ການຄຸ້ມຄອງບໍລິຫານທີ່ດີ ແລະ ຕ້ານການສໍ້ລາດບັງຫຼວງ".
ມູນນິທິ Rosa-Luxemburg-Stiftung ເນັ້ນໜັກວ່າ: “ການນຳພາຂອງທ່ານເລຂາທິການໃຫຍ່ ໄດ້ມີບົດບາດສຳຄັນໃນການກຳນົດຄວາມກ້າວໜ້າ ແລະ ຄວາມວັດທະນາຖາວອນຂອງປະເທດຊາດ. ການຈາກໄປຂອງທ່ານເລຂາທິການໃຫຍ່ ບໍ່ພຽງແຕ່ແມ່ນຄວາມສູນເສຍອັນໃຫຍ່ຫຼວງຂອງພັກກອມມູນິດຫວຽດນາມ, ປະຊາຊົນ ຫວຽດນາມ ເທົ່ານັ້ນ ຫາກຍັງແມ່ນຂະບວນການຝ່າຍຊ້າຍໃນທົ່ວໂລກ ຍ້ອນຄຳໝັ້ນສັນຍາທີ່ຢຶດໝັ້ນຂອງທ່ານ ກັບບັນດາຫຼັກການຂອງສັງຄົມນິຍົມ ແລະ ຄວາມມານະພະຍາຍາມຢ່າງບໍ່ຮູ້ອິດຮູ້ເມື່ອຍ ເພື່ອການພັດທະນາຂອງ ຫວຽດນາມ ນັບມື້ນັບທີ່ດີງາມກວ່າ ໄດ້ສ້າງຂີດໝາຍທີ່ບໍ່ອາດລົບເລືອນໄດ້".
ລຽບງ່າຍ, ຊື່ກົງບໍລິສຸດ, ຮໍ່າຮຽນຢ່າງບໍ່ຢຸດຢັ້ງ
ໃນສາຍຕາຂອງເພື່ອນມິດສາກົນ, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ສ້າງແບບຢ່າງທີ່ສະຫງ່າລາສີ ກ່ຽວກັບຄວາມໃສແຈ້ງ, ຊື່ກົງບໍລິສຸດ, ຍອດຍິ່ງສູງສົ່ງ, ລຽບງ່າຍ, ອຸທິດຕົນຢ່າງສຸດຈິດສຸດໃຈຕໍ່ພາລະກິດຂອງພັກ, ການປະຕິວັດຂອງປະເທດຊາດ. ຈົດຫມາຍ, ໂທລະເລກຈໍານວນຫຼາຍໄດ້ກ່າວຄືນ ແລະ ຢືນຢັນສິ່ງນີ້.
ອົງການບໍ່ຂຶ້ນກັບລັດຖະບານ ActionAid International (AAI)/ໂຮນລັງ ໄດ້ຂຽນໃນຈົດໝາຍສົ່ງໄປຍັງສະຫະພັນບັນດາອົງການມິດຕະພາບຫວຽດນາມ ດັ່ງນີ້: ທ່ານເລຂາທິການໃຫຍ່ ຫງວຽນຟູ໋ຈ້ອງ “ເປັນແບບຢ່າງໃຫ້ບັນດາການນຳບັນດາອົງການປະຊາຊົນໃນທົ່ວໂລກ ດ້ວຍຄວາມລຽບງ່າຍ, ໃກ້ຊິດສະໜິດສະໜົມ ແລະ ເປັນແບບຢ່າງ”.
ປະທານສະພາມິດຕະພາບ ເວເນຊູເອລາ- ຫວຽດນາມ ໄດ້ຫວນຄືນຄວາມຊົງຈຳຂອງການພົບປະໂດຍກົງຄັ້ງທຳອິດກັບທ່ານເລຂາທິການໃຫຍ່ ຢູ່ໃນກອງປະຊຸມຂອງຄະນະບໍລິຫານງານສະພາສັນຕິພາບໂລກ ທີ່ຈັດຂຶ້ນຢູ່ຮ່າໂນ້ຍ ແຕ່ວັນທີ 23 – 25 ພະຈິກ 2017. "ທ່ານເກັບຄວາມຮູ້ສຶກໄດ້ດີ, ມີສະຕິປັນຍາ, ສາຍຕາວິເຄາະ ແລະ ຄວາມເປັນມິດທີ່ດີໃນເວລາຕ້ອນຮັບແຂກຕ່າງປະເທດ", ທ່ານ ປອ. Carolus Wimmer ກ່າວ.
ຜູ້ອຳນວຍການສະຖາບັນ ໂຮ່ຈີມິນ ຂຶ້ນກັບມະຫາວິທະຍາໄລສັງລວມແຫ່ງຊາດ Saint Petersburg - ສຈ. ຫວຽດນາມ ທ່ານ Kolotov ເລົ່າວ່າ ໃນການພົບປະກັບບັນດານັກຊ່ຽວຊານ, ນັກຮຽນຮູ້ຕ່າງປະເທດກ່ຽວກັບຫວຽດນາມ, ສະຫາຍ ຫງວຽນຟູ໋ຈ້ອງ ໄດ້ສະແດງຄວາມຈິງໃຈ ແລະ ເປີດອົກເປີດໃຈ, ຍາມໃດກໍ່ພ້ອມແລ້ວທີ່ຈະປຶກສາຫາລືບັນດາຫົວເລື່ອງທີ່ຮ້ອນເຮັ່ງ, ສັບສົນທີ່ສຸດ ໂດຍບໍ່ມີການກະກຽມລ່ວງໜ້າ.
ມິງດຶກ (ແປຕາມ ໜັງສືພິມປະຊາຊົນ)
