ຕອນເຊົ້າວັນທີ 24 ມັງກອນ, ຄະນະຜູ້ແທນກອງບັນຊາການທະຫານແຂວງຫົວພັນ, ສປປ ລາວ ໄດ້ມາຢ້ຽມຢາມ, ອວຍພອນບຸນເຕັດ ແລະມອບຂອງຂວັນໃຫ້ກອງບັນຊາການທະຫານຊາຍແດນ, ກອງບັນຊາການທະຫານແຂວງເຊີນລາ ເນື່ອງໃນໂອກາດບຸນປີໃໝ່ປະຈໍາຊາດຂອງຫວຽດນາມ.
 |
| ບັນຍາກາດທີ່ການອວຍພອນບຸນເຕັດ. ພາບ: baosonla.org.vn |
ຕາງໜ້າການນໍາກອງບັນຊາການທະຫານແຂວງຫົວພັນ, ທ່ານພົນຈັດຕະວາ ຄຳເມືອງ ໂຄດວົງຄູນ, ຫົວໜ້າກອງບັນຊາການທະຫານແຂວງຫົວພັນ ໄດ້ສົ່ງຄໍາອວຍພອນປີໃໝ່ເຖິງພະນັກງານ, ນັກຮົບທະຫານຊາຍແດນ ແລະກອງບັນຊາການທະຫານແຂວງເຊີນລາ; ພ້ອມດຽວກັນນັ້ນ ທ່ານກໍສະແດງຄວາມປາດຖະໜາຢາກໃຫ້ການພົວພັນຮ່ວມມືລະຫວ່າງສອງຝ່າຍນັບມື້ນັບສະໜິດແໜ້ນ ແລະໝັ້ນຄົງເຂັ້ມແຂງ.
ການນຳກອງບັນຊາການທະຫານຊາຍແດນ ແລະກອງບັນຊາການທະຫານແຂວງເຊີນລາ ໄດ້ສະແດງຄວາມຂອບໃຈຕໍ່ຄວາມຮັກແພງທີ່ດີງາມ, ການເອົາໃຈໃສ່ ແລະການຊ່ວຍເຫຼືອຂອງແຂວງຫົວພັນ ທີ່ມີຕໍ່ທະຫານຊາຍແດນ ແລະກອງບັນຊາການທະຫານແຂວງເຊີນລາ ໃນໄລຍະທີ່ຜ່ານມາ.
ໃນໄລຍະຈະມາເຖິງ, ສອງຝ່າຍຫວັງວ່າຈະສືບຕໍ່ເພີ່ມທະວີການພົວພັນຮ່ວມມື, ແລກປ່ຽນຂໍ້ມູນຂ່າວສານ, ບົດຮຽນໃນການກໍ່ສ້າງບໍລິເວນ, ຮັກສາຄວາມເປັນລະບຽບຮຽບຮ້ອຍ, ຄວາມປອດໄພໃນສັງຄົມຢູ່ເຂດຊາຍແດນ, ປະກອບສ່ວນກໍ່ສ້າງເສັ້ນຊາຍແດນຫວຽດນາມ-ລາວ ແຫ່ງສັນຕິພາບ, ມິດຕະພາບ, ການຮ່ວມມື ແລະການພັດທະນາ.
ກ່ອນໜ້ານັ້ນ, ຕອນບ່າຍວັນທີ 23 ມັງກອນ, ຄະນະຜູ້ແທນກອງບັນຊາການປ້ອງກັນຄວາມສະຫງົບແຂວງຫົວພັນ ກໍ່ໄດ້ໄປຢ້ຽມຢາມ, ອວຍພອນ ແລະມອບຂອງຂວັນໃຫ້ກອງບັນຊາການທະຫານແຂວງເຊີນລາ.
ບູນມີ
