| ເພີ່ມທະວີການພົວພັນຮ່ວມມືລະຫວ່າງ ສ.ເກົາຫຼີ ແລະ ແຂວງເທື່ອທຽນເຫ້ວ | |
| ຫວຽດນາມ - ສ.ເກົາຫຼີ :ເພີ່ມທະວີການຮ່ວມມືສອງຝ່າຍ, ໂດຍສະເພາະແມ່ນໃນການຮ່ວມມືດ້ານເສດຖະກິດ |
ຕາມທ່ານ Park Hang-seo ແລ້ວ, ນີ້ແມ່ນເຫດການທີ່ມີຄວາມໝາຍເລິກເຊິ່ງ ເພື່ອແນໃສ່ຮັດແໜ້ນສາຍພົວພັນມິດຕະພາບທີ່ເປັນມູນເຊື້ອລະຫວ່າງ ຫວຽດນາມ ແລະ ສ.ເກົາຫຼີ.
ເມື່ອຮັບເອົາບົດບາດເປັນຫົວໜ້າຄູຝຶກກິລາບານເຕະແຫ່ງຊາດ ຫວຽດນາມ, ທ່ານ Park Hang-seo ຄິດພຽງແຕ່ວ່າ ວຽກງານທັງໝົດແມ່ນມາຈາກຄວາມມັກຮັກໃນກິລາບານເຕະ ແລະ ແມ່ນໜ້າທີ່ທີ່ຕ້ອງປະຕິບັດ. ການທີ່ໄດ້ຮັບຫຼຽນກາ “ເພື່ອສັນຕິພາບ ແລະ ມິດຕະພາບລະຫວ່າງບັນດາປະເທດ”, ທ່ານ ຮູ້ສຶກເປັນກຽດ ແລະ ພາກພູມໃຈທີ່ສຸດ.
 |
ທ່ານ Park Hang-seo ແລະ ທ່ານເອກອັກຄະລັດຖະທູດ ຫງວຽນເຟືອງງາ, ປະທານ VUFO |
ກ່າວຄຳເຫັນທີ່ພິທີມອບລາງວັນ, ທ່ານເອກອັກຄະລັດຖະທູດ ຫງວຽນເຟືອງງາ, ປະທານ VUFO ໃຫ້ຮູ້ວ່າ: ການພົວພັນມິດຕະພາບ ແລະ ການຮ່ວມມືລະຫວ່າງ ຫວຽດນາມ - ສ.ເກົາຫຼີ ມີການພັດທະນາທີ່ເຂັ້ມແຂງໃນຊຸມປີທີ່ຜ່ານມາ. 2 ປະເທດ ຫາກໍ່ສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ ແລະ ໃນການຢ້ຽມຢາມ ສ.ເກົາຫຼີ ຂອງທ່ານປະທານປະເທດຫວຽດນາມ ໃນເດືອນທັນວາ 2022, ການພົວພັນລະຫວ່າງ 2 ປະເທດໄດ້ຮັບການຍົກລະດັບຂຶ້ນເປັນຄູ່ຮ່ວມມືຍຸດທະສາດຮອບດ້ານ.
ການພົວພັນຫວຽດນາມ - ສ.ເກົາຫຼີ ໄດ້ກາຍເປັນແບບຢ່າງທີ່ປະສົບຜົນສຳເລັດບົນພື້ນຖານຄວາມຈິງໃຈ ແລະ ຄວາມໄວ້ເນື້ອເຊື່ອໃຈດ້ານການເມືອງ; ຕັ້ງໜ້າໃນການຮ່ວມມືດ້ານເສດຖະກິດ ແລະ ການຮ່ວມມືຢ່າງເລິກເຊິ່ງໃນການແລກປ່ຽນປະຊາຊົນ. ໜຶ່ງໃນບັນດາປັດໄຈສຳຄັນທີ່ເຮັດໃຫ້ມີບັນດາຜົນສຳເລັດດັ່ງກ່າວ ແມ່ນການປະກອບສ່ວນອັນສຳຄັນຂອງບັນດາອົງການຈັດຕັ້ງ ແລະ ສ່ວນບຸກຄົນຂອງສອງປະເທດ, ໃນນັ້ນມີທ່ານ Park Hang-seo.
ດ້ວຍຄວາມສັນທັດ ແລະ ຄວາມສາມາດ, ປະສົບການ ແລະ ຄວາມກະຕືລືລົ້ນ, ທ່ານ Park Hang-seo ແລະ ທິມບານເຕະຫວຽດນາມ ໄດ້ເຮັດໃຫ້ຊື່ສຽງກິລາບານເຕະຫວຽດນາມ ດັງກ້ອງໃນບັນດາພາກພື້ນ ແລະ ສາກົນ, ຄື: ຊະນະເລີດ AFF Cup 2018, ຍາດໄດ້ຫຼຽນຄຳ 2 ຄັ້ງຕິດຕໍ່ກັນ ໃນການແຂ່ງຂັນກິລາບານເຕະຊາຍ ໃນງານມະຫາກຳກິລາ SEA Games (ຊີເກມ 30 ປີ 2019 ແລະ ຊີເກມ 31 ປີ 2021), ຮອງແຊ້ມ U23 ອາຊີ 2018, ອັນດັບ 4 ASIAD 2018, ເຂົ້າຮອບຮອງຊະນະເລີດ ອາຊຽນ 2019 ແລະ ຮອບຄັດເລືອກທີ 3 ບານໂລກ 2022.
 |
“ທ່ານ Park Hang-seo ມີຄວາມຕິດພັນກັນ, ກາຍເປັນເພື່ອນມິດທີ່ສະໜິດສະໜົມຂອງຊາວ ຫວຽດນາມ ບໍ່ພຽງແຕ່ຜ່ານກິລາບານເຕະເທົ່ານັ້ນ, ຊາວຫວຽດນາມ ຍາມໃດກໍ່ຈົດຈຳບັນດາຮູບພາບຂອງທ່ານ ເມື່ອທ່ານມີຄວາມເປັນຫ່ວງ, ເບິ່ງແຍງດູແລສຸຂະພາບຂອງບັນດານັກກິລາ, ຕັ້ງໜ້າເຂົ້າຮ່ວມບັນດາການເຄື່ອນໄຫວການກຸສົນ ແລະ ມະນຸດສະທຳສັງຄົມ; ໜູນຊ່ວຍປ້ອງກັນການແຜ່ລະບາດຂອງພະຍາດໂຄວິດ-19, ໜູນຊ່ວຍປະຊາຊົນເຂດພາກກາງທີ່ປະສົບໄພນ້ຳຖ້ວມ, ໜູນຊ່ວຍເດັກນ້ອຍທີ່ດ້ອຍໂອກາດ... ບັນດາການປະກອບສ່ວນຢ່າງຕັ້ງໜ້າ ແລະ ຄວາມໝາຍອັນເລິກເຊິ່ງ ໄດ້ປະກອບສ່ວນຍົກສູງທີ່ຕັ້ງ ແລະ ຮູບການກິລາຂອງຫວຽດນາມ ເວົ້າສະເພາະ ແລະ ຂອງຫວຽດນາມ ເວົ້າລວມ, ກໍ່ຄືເພີ່ມທະວີການພົວພັນມິດຕະພາບທີ່ເປັນມູນເຊື້ອອັນດີງາມລະຫວ່າງປະຊາຊົນຫວຽດນາມ - ສ.ເກົາຫຼີ”, ທ່ານເອກອັກຄະລັດຖະທູດ ຫງວຽນເຟືອງງາ ຢືນຢັນ.
ທ່ານປະທານ VUFO ປາດຖະໜາວ່າ ທ່ານ Park Hang-seo ຈະສືບຕໍ່ປະກອບສ່ວນເຂົ້າໃນການຮັດແໜ້ນ ແລະ ພັດທະນາສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງ ຫວຽດນາມ - ສ.ເກົາຫຼີ ຕື່ມອີກ.
ຄຳຮຸ່ງ
