ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ພ້ອມດ້ວຍຄະນະ ໄດ້ເຂົ້າຮ່ວມພິທີວາງສີລາລຶກໂຄງການເມືອງອັດສະລິຍະປູຊານ ຊຶ່ງເປັນໜຶ່ງໃນໂຄງການທົດລອງລະດັບຊາດຕົວເມືອງອັດສະລິຍະຂອງ ເກົາຫີຼ ແນໃສ່ສ້າງຕົວເມືອງທັນສະໄໝ ແລະ ເປັນມິດກັບສິ່ງແວດລ້ອມ, ເຂົ້າຮ່ວມພິທີວາງສີລາລຶກຄັ້ງນີ້ຍັງມີປະທານາທິບໍດີ ເກົາຫີຼ ແລະ ນາຍົກລັດຖະມົນຕີແຫ່ງ ສສ ຫວຽດນາມ ແລະ ໄທ.
ຂ່າວຍັງໃຫ້ຮູ້ອີກວ່າ ໃນຕອນເຊົ້າຂອງວັນທີ 25 ພະຈິກ 2019 ນີ້, ທ່ານ ນາຍົກລັດຖະມົນຕີ, ໄດ້ນຳພາຄະນະຜູ້ແທນລາວເຂົ້າຮ່ວມພິທີເປີດກອງປະຊຸມສຸດຍອດຜູ້ບໍລິຫານພາກທຸລະກິດອາຊຽນ- ສ ເກົາຫີຼ, ພາຍໃຕ້ຫົວຂໍ້ “ການຮ່ວມມື ແລະ ໜ້າວຽກໃນການບັນລຸຄວາມສົມບູນພູນສຸກຮ່ວມກັນ”.
 |
ທ່ານ ທອງລຸນ ສີສຸລິດ ໃນໂອກາດເຂົ້າຮ່ວມກອງປະຊຸມສຸດຍອດສະເຫຼີມສະຫຼອງອາຊຽນ-ສ ເກົາຫຼີ. (ພາບ: Lao's Army News)
ຊຶ່ງໃນກອງປະຊຸມນີ້, ບັນດານັກທຸລະກິດຂອງ ອາຊຽນ-ສ ເກົາຫີຼ ໄດ້ປຶກສາຫາລື ແລະ ແລກປ່ຽນຄຳຄິດຄຳເຫັນແນໃສ່ຜັນຂະຫຍາຍສັນຍາເຂດການຄ້າເສລີອາຊຽນ- ສ ເກົາຫລີ ເພື່ອປະກອບສ່ວນເຂົ້າໃນການເພີ່ມທະວີການຄ້າ, ການລົງທຶນ ແລະ ການທ່ອງທ່ຽວອາຊຽນ-ເກົາຫີຼ ໃຫ້ນັບມື້ນັບເພີ່ມຂຶ້ນ ໃນທ່າມກາງທີ່ສະພາບເສດຖະກິດໂລກປັ່ນປ່ວນອັນເນື່ອງມາຈາກລັດທິປົກປ້ອງພາຍໃນ ແລະ ສົງຄາມການຄ້າໃນປະຈຸບັນ.
ຫຼັງຈາກນັ້ນ, ທ່ານນາຍົກລັດຖະມົນຕີ ໄດ້ສືບຕໍ່ເຂົ້າຮ່ວມກອງປະຊຸມສຸດຍອດນະວັດຕະກຳທາງດ້ານວັດທະນະທຳ ອາຊຽນ-ສ ເກົາຫລີທີ່ແນໃສ່ປຶກສາຫາລື ກ່ຽວກັບການສ້າງຄວາມສົມບູນພູນສຸກຮ່ວມກັນ ໃນຂະແໜງວັດທະນະທໍາ-ສັງຄົມ ລະຫວ່າງອາຊຽນ- ສ ເກົາຫີຼ, ເປັນຕົ້ນຂະແໜງສິລະປະ, ການບັນເທິງ, ຮູບເງົາ ແລະ ອື່ນໆ.
（ຄຳຮຸ່ງ）
