ຫວ່າງແລ້ວນີ້, ຢູ່ສະຖານກົງສູນໃຫຍ່ ອິນເດຍ ປະຈຳນະຄອນ ໂຮ່ຈີມິນ ໄດ້ຈັດກອງປະຊຸມສົ່ງເສີມການທ່ອງທ່ຽວລະຫວ່າງ ອິນເດຍ ແລະ ຫວຽດນາມ.
 |
| ສົ່ງເສີມຂະແໜງການທ່ອງທ່ຽວລະຫວ່າງ ອິນເດຍ ແລະ ຫວຽດນາມ. ພາບ: baoquangnam.vn |
ກ່າວຄຳເຫັນທີ່ກອງປະຊຸມ, ທ່ານ ຟ້າມວັນຖຸຍ ຮອງຫົວໜ້າກົມໃຫຍ່ທ່ອງທ່ຽວ (ກະຊວງວັດທະນະທຳ, ກິລາ ແລະ ທ່ອງທ່ຽວຫວຽດນາມ) ໃຫ້ຮູ້ວ່າ ອິນເດຍ ຢືນອັນດັບທີ 16 ໃນບັນດາປະເທດ ແລະ ເຂດແຄ້ວນທີ່ມີນັກທ່ອງທ່ຽວສາກົນມາທ່ຽວ ຫວຽດນາມ. ກົງກັນຂ້າມ, ມີນັກທ່ອງທ່ຽວຫວຽດນາມ 50.000 ຄົນເດີນທາງໄປທ່ຽວອິນເດຍ.
ຕາມທ່ານ ເຈິ່ງຟອງບິ່ງ ຮອງຫົວໜ້າກົມທ່ອງທ່ຽວ - ກົມໃຫຍ່ທ່ອງທ່ຽວ ໃຫ້ຮູ້ວ່າ: ຫວຽດນາມ ມີບັນດາສະຖານທີ່ທ່ອງທ່ຽວທີ່ມີຊື່ສຽງຫຼາຍແຫ່ງ ແລະ ມີຄວາມສາມາດບົ່ມຊ້ອນດຶງດູດນັກທ່ອງທ່ຽວຈາກ ອິນເດຍ, ພິເສດແມ່ນບັນດາຈຸດໝາຍຄື: ຮ່າໂນ້ຍ, ຮະລອງ, ຊາປາ, ເຫວ້, ດ່າໜັງ, ຍາຈາງ, ນະຄອນໂຮ່ຈີມິນ...
ໂດຍມີທັດສະນະດຽວກັນ, ທ່ານເອກອັກຄະລັດຖະທູດ ອິນເດຍ ປະຈຳ ຫວຽດນາມ Pranay Verma ໄດ້ຮັບຮູ້ວ່າ: ມີແຂກທ່ອງທ່ຽວ ອິນເດຍ ພຽງແຕ່ບໍ່ຮອດ 200.000 ເທື່ອຄົນມາ ຫວຽດນາມ ແມ່ນຈຳນວນໜ້ອຍທີ່ສຸດໃນໄລຍະທີ່ບໍ່ທັນເກີດພະຍາດໂຄວິດ-19, ເຊິ່ງບໍ່ສະແດງໃຫ້ເຫັນຂອບຂະໜາດອັນຄົບຖ້ວນຂອງການພົວພັນລະຫວ່າງສອງປະເທດໄດ້. ຈຳນວນນັກທ່ອງທ່ຽວອິນເດຍ ມາຫວຽດນາມ ອາດຈະເພີ່ມຂຶ້ນຕື່ມອີກໃນອະນາຄົດອັນໃກ້ໆນີ້ ດ້ວຍບັນດາມາດຕະການແກ້ໄຂການເຊື່ອມຕໍ່ສະເພາະລະຫວ່າງສອງຕະຫຼາດ.
ຜູ້ຕາງໜ້າວິສາຫະກິດທ່ອງທ່ຽວຫຼາຍແຫ່ງຄື: Vietravel, TSTtourist, Fiditour – Vietluxtour… ລ້ວນແຕ່ໃຫ້ຂໍ້ສັງເກດວ່າ: ທ່າແຮງຈາກຕະຫຼາດນັກທ່ອງທ່ຽວອິນເດຍ ແມ່ນໃຫຍ່ຫຼວງທີ່ສຸດ.
ບູນມີ
